Cántico chjotse xi kuijndálee Jeobá
1 Je Kjoajtín xi xki̱ nó bʼéjna je Watch Tower Bible and Tract Society of Pennsylvania kʼiaa kisʼejna nga 4 sá octubre nó 2014, kʼoa jngo én kisʼejinkon xíngiaa xi nʼio tsjoa tsakʼé kon. Kʼoatsakʼinle nga sʼe̱ndayanda chjotse je cánticoná. Kʼoati tsakʼinle nga je cántico xi jndalee Niná kui xi nʼio nichjén nga ʼyaxkoán je Jeobá (Sal. 96:2).
2 Ánni nga kʼoasʼin sʼe̱ndayanda chjotsesíni je cánticoná. Nkjín koya tjínni. Xi títjon, tsakui nichxin kʼoantjaiyajin jotso letrale je cántico nga̱ tjíokʼa testole Biblia xi jengisa nda machoyaná ndʼaibi (Prov. 4:18). Xi majaoni, tjíokʼa én jñani jetísʼendaya chjotse je Traducción del Nuevo Mundo, kʼoa kʼoantjaiyajin choa jotso je cántico ndʼaibi nga̱ je én xi faʼaitʼa yaa kitjoénile je Biblia xi tokʼoa jekijna. Xi ijngosani, mani nga nʼio tse xi kʼoantjaiyajinle je cántico, kʼoati tosa sa̱tíondasa kʼa cántico xi ñaki sʼa chjotse.
3 A kʼiaa saʼnda si̱chjén je cántico chjotse nga jekuitjo ngayeje. Mai. Je sá xi fini choa choa kuitjo kʼoa yaa sa̱tío ya jw.org. Kʼianga jesʼe̱jna jngo cántico chjotse me tiʼakʼia kuijndáñá ya Kjoajtín xi tsoyaná josʼin si̱xálee Niná, kʼoa kui si̱kjetʼañá kjoajtín jebi. Je xomana nga kʼoakaole nga kuijndá je cántico chjotse, yaa sʼe̱tʼa joʼmi ya programa xi tsʼe kjoajtín, kʼoa itso én xi sʼe̱tʼale: “cántico chjotse”.
4 Jósʼiaan nga ndi̱to̱n koa̱nná je cántico chjotse. Sakʼoaa likui ndi̱to̱n maná jngo cántico. Tonga mená chjénngilee jokisʼin je salmista nga kitso: “Ánni nga sesíña nga kʼoasjengʼale kʼoa likui tojyó koatejna” (Sal. 30:12). Kataʼyala jmeni xi sʼiaan nga koa̱nná je cántico chjotse.
Nkjín kʼa kuinóʼyalee je músikale je cántico chjotse. Yaa jw.org sa̱tíotʼa. Tsa kʼoasʼian ndi̱toon koa̱nná.
Chótʼayá jotso letrale kʼoa kʼoéjintokoán.
Nkjín kʼa kuijndá je cántico chjotse saʼnda nga koa̱nná.
Nkjín kʼa kuijndá kao familianá kʼianga chotʼayajtían Énle Niná ya niʼyaná ánni nga koa̱nsíniná ngatsʼiaa.
5 Je sá xi fini, títjon kjoanla kui músikale je cántico chjotse kuinóʼyalee kʼiatsa kui kuijndá nga jekjoetʼa je Kjoajtín xi tsoyaná josʼin si̱xálee Niná. Xijekoa̱n, kʼiaa kuijndá josʼin jndaa ngantsjai.
6 Kʼianga jndaa ya kjoajtínná jngo kjoanda xi nʼio chjíle, nga̱ ma nijngoaa je jta̱ná kao xíngiaa nga chʼasjengʼaa je Jeobá. Kuinga tsín koa̱nsíni tsa tokjaʼaíla xá sʼiaan kʼianga jndaa ya kjoajtínná.
7 Jmésani xi koa̱n sʼiaan nga xkón jchaa je cánticoná. Kʼianga satío je kjoajtíntsená, títjon kjoanla músika fane kʼoa kʼiaa fitsʼia jme xi faʼa ya kjoajtíntse. Je ndsʼee xi sʼín grabar ngayeje músika jebi nʼio bʼéngikjoama̱ kʼoa nʼio nkjín naxinandá faʼaini. Jao kʼa bichó ya Patterson (Nueva York) nga xki̱ nó, kʼoa tijé beni gastole. Kuinga ndatjínsíni nga kjitʼanangi koanngínkiyoaa ya ʼndená kʼoa kuinóʼyá je músika xi kjoane kʼianga jekʼoakuitsoná je ndsʼee xi koandiaa je kjoajtíntse. Je músika jebi koasenkaoná nga si̱kʼéjnandaa je ni̱ma̱ná nga nda kjoaʼasʼenjinle jmeni xi sa̱kóyaná (Esd. 7:10).
8 Ndʼaibi kui si̱kjetʼañá je kjoajtínná je cántico chjotse xi ʼmi: “¡Que venga el Reino establecido por Dios!”. Cántico jebi kʼiaa kijndatítjon nga kisʼejna nó jebi je Kjoajtín xi xki̱ nó sʼejna. Kui xá kisʼendani nga jejngo siento nó nga tíbatéxoma je Chjotaxále Niná.
9 Je cántico chjotse xi kuitjo kʼoati ya maxki̱kao je “tsojminda” xi títsjoáná Jeobá (Mat. 12:35a, TNM). Kʼoasʼin kʼoénelee yaoná nga katamaná jotso, ánni nga ñaki kao ni̱ma̱ná kuijndásíñá. Tsa kʼoasʼiaan, kʼoasʼin chʼa̱sjengʼaa je Niná kʼoa kʼoasʼin jchaxkoán josʼin bakinle (Sal. 147:1).