Kʼoee je “tsojminda” xi tjínná kʼianga faʼaikonná je ndsʼee (Mat. 12:35a, TNM)

“Tʼaiʼndelao chjota xi xin faʼaini.” (Rom. 12:13.) Ngatsʼiñá nga mená si̱tjosoán én jebi nga kʼoailee “tsojminda” xi tjínná je ndsʼee xi faʼaikonná. Ya jinjtín, jé xi chjotajchínga sʼin tjío bʼéndajin nga masinle je ndsʼee xi bichótsjoá kjoanokjoaya kʼoa nga katabʼaile xi tsʼe pasajele. Tonga ñá tsakui nichxin likui tso tokoán nga nokjoalee ya niʼyaná je ndsʼee tsa tochoa tsojmi tjínná kʼoa tsa nʼio nikjaojiaan jmeni xi kʼoailee. Je xi koasenkaoná nga tsín tokui sa̱tétʼañá kuinga kuenta sʼiaan jmeni xi kitsole Jesús je Marta (Luc. 10:39-42). Kʼoakitsole nga je kjoanda xi sokóná kʼianga nda chjoéyaa xi faʼaikonná kuinga ma nimiyoaa kʼoa nga ma ninʼiojinngañá xíngiaa, ali tsakuijin tsa síxkónkjoan tsojmi kʼoailee xíngiaa kʼoa tsa síxkón si̱choaan niʼyaná. Kʼiatsa koanngíntjenngiaa kjoafaʼaitsjen jebi, ngatsʼiñá nga koa̱nná kʼoailee je “tsojminda” xi tjínná je ndsʼee tojo tso je Énle Niná (3 Juan 5-8).