Si̱chjén je foyeto Jméni xi bakóyaná je Énle Niná nga chja̱kaonajmiá je chjota

1. Jñánile foyeto xi sʼa kitjo chjotse xi koa̱nchjénná nga kʼuínyasoán.

¹ Chriansʼaa kitjo je foyeto chjotse Jméni xi bakóyaná je Énle Niná. Me mangóson josʼin faʼaitʼa libro Razonamiento, nkjín koya faʼaitʼa jmeni xi nchja̱ni Biblia kʼoa nkjín testo yʼangini. Nʼiojin ndasʼin koa̱nchjénná nga chja̱kaonajmiá je chjota tʼatsʼe Énle Niná. Jósʼin si̱chjén nga tongini kuiyondaa jokʼuínlee je chjota nga kuitjokʼinyasoán.

2. Jósʼin si̱chjén je foyeto Jméni xi bakóyaná je Énle Niná nga kʼuínyasoán.

² Tobʼelañá, koaan si̱chjén je kjoachjonangi 8 kʼoa i̱ kuixoán: “Kʼianga chjakaonajmíjin je xíngiaa, nʼio nkjín xi kʼoatso tsa je Niná tjínle jée nga kjoañʼai tichjaʼá. [Tjínkʼa ʼnde jñani ngisa ndasʼin bichómani nga ñaki yakjoan foyeto bakolee je chjota.] Jósʼin nikjaʼaitsjenngái ji xi tʼatsʼe jebi. [Tʼaiʼndelai chjota nga katanchja̱.] Je Biblia bakóya xi tʼatsʼe jebi”. Xijekoa̱n, kʼoéxkialee kʼoa cho̱bayañá tsa jngo kʼoa tsa nkjín testo xi faʼaitʼa. Tsa koa̱nndosinle je chjota, koakolee xi kan kjoachjonangi faʼaitʼa jña sʼa fitsʼiani je foyeto, kʼoa kʼoakʼuínlee tsa koa̱n nga kjaʼaí nichxin chótʼayajiaan je kjoachjonangi xi faʼaitʼa. Kʼoati koa̱n si̱kájna jngolee je xo̱n xi nichjén nga bʼailee estudio je chjota kʼoa kʼoakʼuínlee nga ya bakóyasa tʼatsʼe jmeni xi kachobayañá.

3. Jósʼin si̱chjén je foyeto chjotse kʼianga koakoyasoán ya ʼnde jñani tsín makjainle chjota tʼatsʼe Biblia ninga makjainle tʼatsʼe Niná.

³ Je kjoachjonangi 4 kao 13 saʼnda 17 nʼio nda koasenkaoná kʼianga ya koakoyasoán ya ʼnde jñani tsín makjainle chjota tʼatsʼe Biblia ninga makjainle tʼatsʼe Niná. Tobʼelañá, kʼianga si̱chjén je kjoachjonangi 17 koaan i̱ kuixoán: “I tinixatʼa ngotjuijin je chjota kʼoa kui tichjakaonajmínijin tʼatsʼe familia. A tsí kjoaixi nga sa tse sa tse kjoa tjíosʼele je familia, jósi ngái ji. [Tʼaiʼndelai chjota nga katanchja̱.] Nkjín xi jechixán xi kui tjíofitjenngi kjoafaʼaitsjen jebi: Je xi chjoón xkón katabe xʼinle. [Likuikjoan machjén nga kʼoakʼuínlee nga ya Efesios 5:33 jñani kʼoatso. Tsa kʼia nga chjoón xi tichjakaonajmiá, tosa kui koakolee jotso Efesios 5:28.] Jósi ngái ji, a koasenkao xi jechixán tsa koaitjenngi je kjoafaʼaitsjen jebi”.

4. Jméni xi sʼiaan kʼianga jecho̱banajmiá kao chjota xi tsín makjainle tʼatsʼe Biblia ninga makjainle tʼatsʼe Niná.

⁴ Kʼianga jecho̱banajmiá kao chjota, kʼoakʼuínlee jme nichxin kuichochon ijngokʼalee nga tojo kui kjoachjonangi cho̱bayañá. Kʼianga kuicho ijngokʼá, koaan kjaʼaí testo kʼuínyalee xi tiya faʼaitʼani jñani tíjna je kjoachjonangi xi saje kichotʼayá. Kʼianga skoe̱le tokoán kʼoakʼuínlee nga je kjoafaʼaitsjen xi kichobayañá nga ya Biblia faʼaitʼa. Si̱kájna jngolee xo̱n xi koa̱nndosinle tonga kuenta sʼiaan jmeni xi kichobayañá kʼoa kao josʼin síkjaʼaitsjen xi tʼatsʼe Biblia. (Chótʼai je xo̱n Xá xi nʼia tʼatsʼe Niná xi tsʼe sá diciembre nó 2013, pájina 3-6.)