Jósʼiaan nga ndasa kʼuínyasoán: kuiyondakoaa jotso én xi kʼoétsʼiakaoñá

Ánni nga nʼio chjísínile nga kʼoasʼiaan. Kʼiatsa tsín koa̱nndosinle je chjota jotso én xi kʼoétsʼiakaoñá nga chja̱kaonajmiá, tsakui nichxin toya tje̱n sikjetʼa je énle kʼoa tsínni koa̱n kʼuínyalee je Énle Niná. Nʼio nkjín xi jetsoyason xi kʼoatso nga je xi ngisa chjíle kui jotso én xi bʼetsʼiakaoñá nga chjakoaa chjota. Ningalani ya faʼaitʼa kʼa josʼin kʼuínyalee chjota ya xo̱n Xá xi nʼia tʼatsʼe Niná kʼoa kao libro Razonamiento, tonga alikui ya faʼaitʼayeje jokoa̱n kuixoán. Ánni. Kuinga koa̱n ñá chósonnilee jokuixoán. Kʼoa ningalani ya tjítʼayeje jokoa̱n kuixoán, koaan si̱kʼantjaiyalee kʼoa kʼoati koa̱n tsaan én si̱chjén. Ngisa nda koakoyasoán kʼiatsa tongini kuiyondakoaa jokʼuínlee chjota ʼndele nga kui kʼoakuixoán jmeni xi tokʼia kjoaʼaítsjenná (Prov. 15:28).

Jókoa̱n sʼiaan:

Jngo tema chjoejiaan xi ya faʼaitʼa je xo̱n xi si̱xákoaa xi koa̱nndosinle je chjota jñani ʼmiyasoán.
Nda si̱kjaʼaitsjeen jotso én xi kuinókjoaa kʼianga jesi̱tiʼndaa chjota. Koaan i̱ kuixoán: “Kui xá kjoaʼaikonnile nga...”, “Nʼio nkjín chjota xi kui makjaojinle xi tʼatsʼe...”, “Jósʼin nikjaʼaitsjain xi tʼatsʼe...”. Tongisa nda kʼiatsa tochoa én kuinókjoaa kʼoa je xi choa ñʼai. Tjínkʼa xíngiaa xi bʼéjinkon jotso én xi bʼétsʼiakao nga fákaonajmí je chjota.
Kʼianga kʼoati katanchja̱ je chjota, si̱kʼéjna jngolee kjoachjonangi ánni nga kʼoakatatsosíni josʼin síkjaʼaitsjen (Mat. 17:25). Kuenta sʼiaan nga kjaʼaíjin kjoa tísíkjaʼaitsjen kʼianga kuichonrʼoé. Kuinga tsínkui chjónangisínilee jmeni xi ñʼai koa̱nle, kʼoa ni kʼoénejinlee nga kjoanʼio kʼoakatatso jmeni xi kachjonangilee.

I̱ tʼiain sá jebi:

Kʼianga chótʼayajtíon Énle Niná ya niʼyano, kʼoati chʼa̱sjeʼa choao nichxin nga kuiyondakao jotso én xi kʼoétsʼiakaoño nga chja̱kao je chjota kʼoa kʼoatʼianchoyao.
Kʼoatʼinlai je xi ñatje̱n kʼoakaoli nga kʼuínyasuin jotso je én xi kʼoétsʼiakaoni nga chja̱koai je chjota (Prov. 27:17). Koaan tikʼantjaiyai jotso én xi kʼoétsʼiakaoni kʼiatsa tsín koa̱nndosinle je chjota.