Kuinyakoaa je chjota xi tsín matsenle nga katamale xi tʼatsʼe Jeobá
1. Jósʼin tsakakó je Jesús nga koanmake je chjota xi tsín matsenle.
1 Jngo jao nichxin nga kjesa nikʼienjin je Jesús jao chjota xi tsín matsenle kinchja̱le nga jetíbitjo ya naxinandá Jericó, kʼoa i kitsole: “Señor, [...] jchamatakonnajin”. Tsakui nichxin kui nʼio tísíkjáojin Jesús nga jemachrianle nga ni̱kʼien, tonga tsakasenjnaa, kinchjale nga jao chjota jebi kʼoa kisindaya (Mat. 20:29-34). Jósʼin chjénngilee je Jesús nga koanmake je chjota.
2. Tsa jngo chjota xi tsín matsenle sa̱téjiaan ya yandiaa, jósʼin chja̱kaoñá Énle Niná.
2 Jósʼin kuinyakoaa. Tsa jngo chjota xi tsín matsenle sa̱téjiaan ya yandiaa, kʼoakʼuínlee joʼminá kʼoa kʼoakʼuínlee nga koa̱n kuisenkoaa. Tsakui nichxin tso̱kjonná nga tosʼa títjon chja̱koaa, nga̱ tjínkʼa chjota xi totaon be je ʼndíchjota xi tsín matsenle. Tsa ndʼé si̱koaa kʼoa koakolee nga mandosin kjoaixiná, tsakui nichxin likui tso̱kjonná. Nga jchaa josʼin kuinyakoaa, kuenta sʼiaan nga tjínkʼa xi matsen choale kʼoa tjínkʼa xi ñaki mai. Tsa jekabisenkoaa, koaan kʼia kʼoakʼuínlee nga Biblia bakoyalee chjota. Kʼoéxkia jngolee testo, tsa Salmo 146:8 kʼoa tsa Isaías 35:5, 6. Kʼoati koa̱n kʼuínyalee josʼin kʼoaje̱n je grabación xi tjío ya Internet ya jw.org. Tsa male bʼéxkia je xo̱n xi tsʼe chjota xi tsín matsenle, xi braille ʼmi, chjónangilee tsa mele nga koanngínkaolee jngo xo̱n xi Énle Niná faʼaitʼa xi kʼoasʼin kisʼenda. Tsa tíjna jngole computadora kʼoa tjínle je programa xi bʼéxkia je letra xi faʼaitʼa ya pantalla, tochale koa̱n kjuinrʼoéle jme xi faʼaitʼa ya jw.org kʼoa kao xo̱n xi ma chʼajeen je formato xi RTF ʼmi. Je xo̱n xi braille tjítʼa kʼoa kao xi RTF ʼmi tokao nga én kastía nga bitjo kʼoa kao én xi ngisasa nokjoa jngo tjíjtsa Sonʼnde. (Chótsenlai je rekuadro xi “Kʼianga kuisenkoai je chjota xi tsín matsenle...” ʼmi.)
3. Jósʼin koa̱nsjainá je chjota xi tsín matsenle ya jñani bʼakaoná ʼmiyasoán.
3 Jósʼin koa̱nsjainá je chjota xi tsín matsenle. Mani nga me tsín je bitjo je chjota xi tsín matsenle kʼianga nikjanetʼaa xo̱ntjoa, me tsín je tsaojiaan kʼianga ʼmiyasoán. Machjénní nga kjoásjee kʼoa nga chja̱kaoñá Énle Niná (Mat. 10:11). Tsa jngo chjota xi ñatjen nixá kʼoa tsa xi ñatjen mangián skuela likui matsenle, koaan chja̱kaoñá Énle Niná. Tsa tíjna jngo skuela jñani fi je xi tsín matsenle ya jña bʼakaoná ʼmiyasoán, koaan chjónangilee je xi director tíjna tsa koa̱n koanngínkao kʼaa xo̱n xi braille tjítʼa, ánni nga ya sikatíosíni ya jña nya libro. A ʼyaxkon jngoaa chjota tsa xi tsín matsenle xínkjín. A tíjna jngo ʼnde ya jñani bʼakaoná ʼmiyasoán jñani bʼainganʼiole kʼoa tsa jña bationi je chjota xi tsín matsenle. Kʼoéyanajmílee xi xínkjín mani je chjota xi tsín matsenle, je chjota xi bʼejnaʼnda jñani bationi kʼoa tsa je xi director tíjna ya skuela jñani fi nga ñá xi testigole Jeobá maa mená kuinyakoaa ʼndíchjota jebi. Kʼoakʼuínlee nga kjioná xo̱n xi braille tjítʼa kao grabación xi koa̱n kjuinrʼoéle. Koakolee jñani kʼoatso Biblia nga je Niná kʼoatso nga sindaya je chjota xi tsín matsenle. Kʼoati koa̱n koakolee je video xi “No sé qué haría sin ella” ʼmi xi faʼaitʼa ya jw.org, xi kui tínchja̱ni tʼatsʼe jngo ndsʼee nga nʼio tíbasenkao nga kijnale Biblia xi braille faʼaitʼa. Tsa kʼoéjnatseen jme xá kabichoñá, tochale likui ñʼai koa̱nná nga koa̱nsjainá je chjota xi tsín matsenle.
4. Jméni xi bakóyaná je kjoanda xi kisʼele jngo tichjaa xi tsín matsenle.
4 Jngo tichjaa xi tsín matsenle, xi Janet ʼmi, yaa ki jñani batio je chjota xi tsín matsenle kʼoa jngo tsoti tsakjákaonajmí. Je tichjaa i kitsole: “Kʼianga tsakʼejna Jesús i̱ Sonʼnde kisindaya kʼa chjota xi tsín matsenle kʼoa kui tsakakó jmeni xi sʼin nichxin xi nroaján tʼatsʼe je chjota xi tsín matsenle”. Tsakakóyale jotso Apocalipsis 21:3, 4 kʼoa kitsoyale josʼin sitjoson je Chjotaxále Niná xi tʼatsʼe jebi. Je tsoti jebi tsakʼejnajñá ngotjo kʼoa kʼiaa i kitso: “Kjelangá sa kʼoatsojin jngona jngo chjota xi tsín matsenle. Me ngatsʼi chjota xi matsenle nga kʼoatso nga kuinga maxka̱ñá tsa tjín xi kinʼia kʼoa tsa je chjotajchínganá tjín xi kisʼin”. Nga koanskanni, je tichjaa jngo correo kisikasénle tsoti jebi jñani tsakʼétʼale josʼin koa̱nsjaile ya Internet je libro Jmé kjoanni xi bakóya je Biblia, kʼoa ndʼaibi jao kʼa tsoyale Biblia nga xki̱ xomana.
5. Ninga tsín maná nindayá je chjota xi tsín matsenle, jmé kjoanda xi so̱kole kʼiatsa koa̱nndosinná xi tʼatsʼe.
5 Kjoaixi nga tsín koa̱nná si̱ndayaa je chjota xi tsín matsenle jokisʼin je Jesús. Tonga koaan kuinyakoaa ngatsʼi chjota nga katamajinle jokjoantjínni je Énle Niná, ni xi matsenle kʼoa ni xi tsín matsenle, xi “je niná xi tsʼe sonʼnde ndʼaibi tsakʼéchjoangi kjoafaʼaitsjenle” (2 Cor. 4:4). Je Jesús kuinga koanmake nga kisindayani nga jao chjota xi tsín matsenle xi kiskajin ya chrian Jericó (Mat. 20:34). Tsa kʼoati koa̱nndosinná tsanda ñá je chjota xi tsín matsenle, kuinyakaojián nga katamale xi tʼatsʼe Jeobá. Tojé Jeobá xi koa̱nle sindaya kʼoa tsjoále kjoabijnachon xi tsínkʼia fetʼa.