Jósʼiaan nga ndasa kʼuínyasoán: Tʼinyasonlai je chjota xi tsín matsenle

ÁNNI NGA NʼIO CHJÍSÍNILE: Tsakui nichxin tsín nda satío kon je chjota xi tsín matsenle kʼianga je fákaonajmí je chjota xi tsín bexkon. Kuinga machjénsíni nga kjoásjee kʼoa nga kʼuínyalee je Énle Niná. Je Jeobá tsjoake je chjota xi tsín matsenle kʼoa mandosinle xi tʼatsʼe (Le 19:14). Chjénngiaa je choa̱le Jeobá kʼoa kuisenkao je chjota jebi nga katabe xi tʼatsʼe Niná.

JÓKOA̱N SʼIAAN:

• Tijnyísjai (Mt 10:11). A ʼya kʼai je chjota tsa xi xka̱ je xínkjín. Jñani bakoyasuin a tjín skuela jñani sakóyale je chjota xi xka̱, ʼnde jñani makuinda kʼoa tsa xi kjaʼaísanile je xi mele kʼoexkia je xo̱n xi toxá bitjoni xi tsʼe je chjota xi xka̱.

• Katamandosinli xi tʼatsʼe. Tsa ndʼé si̱koai je chjota nda sʼe̱ kon. Kui chja̱kaonajmíni jmeni xi mandosinle je chjota.

• Tisenkoai nga katabe xi tʼatsʼe Jeobá. Je naxinandále Niná nkjín koya xo̱n tíbʼasje kʼoa kao xi kjaʼaísanile xi koa̱n kuinyakao je chjota xi tsín matsenle. Chjónangilee je chjota jósʼin mele nga sakóyale. Je superintendente xi tsʼe servicio machjén nga kʼoakatatsole je siervo de publicaciones nga kui katasíjé je xo̱n xi mele je chjota.