Katamaná josʼin bakóya je publicador xi jengisa tjínle kjoafaʼaitsjen

ʼYachjíñá je publicador xi jetjínle kjoafaʼaitsjen josʼin bakóyason. Tjínkʼa xi jenʼio kjoatse nga tjíosíxále je Jeobá kʼoa tjíokʼa xi tosʼa kjimale josʼin nga nda bakóyason. Je xíngiaa jebi tjíobení nga je Jesucristo tíbándiaale je jtínle nichxin fetʼa xi tiyoaa ndʼaibi kʼoa nga je xotísʼín nga sa nda sa nda tíʼmiyason kʼoa nga tjíosakóyale je chjota (Mat. 28:19, 20). Nga jenkjín nó tjíobakóyason tjíobʼaile “je nganʼio xi nʼio tse [xi] tsʼe Niná” kʼoa kui xi tjíobinyakao kʼianga kjoa tjíofaʼatojin (2 Cor. 4:7). Xíngiaa jebi kao kjoatsjoa bakóyale xi kjaʼaí publicador jmeni xi jebe, kʼoa tsa mená koaan koakoyaná je kjoafaʼaitsjen xi jetjínle josʼin bakóyason (Sal. 71:18). Koaan kjoásjailee josʼiaan kʼianga kuitsoyaná. Jósʼin.

Kʼianga ʼmiyasoán. Kʼianga nda kuitsoya je Énle Niná je xíngiaa xi tosʼa choatsele nga tsoyason, machjénní nga je publicador xi jengisa tjínle kjoafaʼaitsjen kuitsoyale. Nʼio tse xi koa̱nle kʼiatsa nda skótsenle josʼin bakóyason je publicador jebi. (Chótʼai je párrafo xi majanni faʼaitʼa ya subtítulo xi tso “Ayude a los nuevos” ya kjoaʼmiya xi ʼmi “Cómo mantener el entusiasmo en la predicación”, xi jaʼaitʼa ya rebista La Atalaya xi tsʼe 15 de febrero de 2015.) Jmé kjoanda xi sokóli kʼianga ñatjen ʼmiyasuin kao je publicador xi jengisa tjínle kjoafaʼaitsjen.

A koaan kʼoakʼuínlai jngo publicador xi jengisa tjínle kjoafaʼaitsjen tsa kʼoakoa̱nle nga ñatjen koanngínkʼinyason. Kʼiatsa chʼin tíbʼetʼale, tsakui nichxin koa̱n ya ndʼiale kʼuínkao sakʼoai je chjota xi tiʼmiyalai je Biblia. Kʼianga jekafetʼano nga kachotʼayao chjónangilai jósʼin kasasénle josʼin kaʼmiyalai je chjota kʼoa tijélai kjoafaʼaitsjen.

Tikʼayalai nichxin nga chja̱kaonajmí. Kʼianga ndasa kataʼyai je publicador xi jengisa tjínle kjoafaʼaitsjen, tikʼayalai nichxin. Kʼoatʼinlai nga katafikonno nga chotʼayajtíon Énle Niná ya niʼyano kʼoa koaan chjónangilai, jolani jebi: Jósʼin tsabeni Énle Niná, jósʼin tísíchikontʼain je Jeobá, jósʼin kjimankjínya je ndsʼee ya jtín saʼnda nga kisʼenngindá kʼoa jmé kjoanda xi tísokóle nga tísíxále Niná. Kʼiatsa chʼin tíbʼetʼale, tsakui nichxin koa̱n tosa ya ndʼiale chótʼayajtíon Énle Niná.

Kuenta tʼiain jokji kʼoakoa̱nle nga koasenkaoli. Tojo maa ngatsʼiaa nga kjaʼaí kjaʼaínile jmeni xi ngisasa maná josʼin bakoyasoán, kʼoati ma je publicador xi jengisa kjoatse tjíotsoyason (Rom. 12:6-8). Tjíokʼa xi jenʼio jchínga kʼoa tsakui nichxin likui tikʼoakoa̱nnile nga tse nichxin sikʼayaná. Tonga nʼio tse xi koakoyaná nga kʼoasʼin jekjoatse tjíosíxále Jeobá.