Jósʼiaan nga ndasa kʼuínyasoán: kuinyakoaa je chjota xi bʼailee estudio nga katasíngale yaole nga nda katakotʼaya

Ánni nga nʼio chjísínile nga kʼoasʼiaan. Kʼianga koa̱ntaja je kjoamakjainle je chjota xi bʼailee estudio, ali tsa tokui xi machjén nga skoe̱ jmeni xi choa ñʼai sʼin tíjna xi faʼaitʼa je Énle Niná (Heb. 5:12–6:1). Tonga kʼianga skótʼaya machjénní nga sikjaʼaitsjen josʼin mangóson jmeni xi jebe kʼoa jmeni xi tosʼa kjimajinle, kʼoa jósʼin koaitjenngi (Prov. 2:1-6). Kʼianga skoe̱ jmeni xi sakʼoa kjonangi je chjota xi bʼailee estudio machjénní nga koa̱nle nga toje koatiotsʼinya. Kʼiatsa kʼoenele yaole nga kʼoasʼin koaitjenngi jmeni xi kjimajinle kui xi koasenkao nga ska̱le jme kjoa xi kjoaʼatojin nga sixále Niná (Luc. 6:47, 48).

Jókoa̱n sʼiaan:

Kʼoakʼuínlee nga nʼio chjíle nga títjon kjoanla je Jeobá bʼetsʼoalee kʼianga ñandia ñandia chotʼayá (Juan 14:26; 1 Cor. 2:10).
Saʼnda nga tosʼa títjon, kʼoakʼuínlee je xi tibʼailee estudio nga tongini katakotʼaya jmeni xi kʼuínyalee. Koakoyalee josʼin kʼoechoa̱ je én xi nʼio chjíle xi faʼaijin ya párrafo kʼoa koakolee josʼin bʼechoaa je libroná.
Kʼoakʼuínlee nga katatsoya josʼin majinle ʼndele nga toya xo̱n kʼoexkia jmeni xi kuitso. Kʼoa likui tokui kjoachjonangi koatiolee xi toya kʼoexkiani párrafo nga kʼoakuitso.
Kʼoakʼuínlee je chjota xi tibʼailee estudio nga nyaon nyaon katabʼéxkia Biblia. Ya jw.org tíjna jngo programa xi koasenkao nga kʼoendajin josʼin kʼoexkia je Biblia. Tonga tjínnele nga ñaki kʼoakʼoe kon nga kʼoasʼin, ánsíni nga koa̱nnganile nga nyaon nyaon kʼoexkia je Biblia. Tsa kʼoasʼin tse kjoanda so̱kole (Sal. 1:2, 3).
Koakoyalee je xi tibʼailee estudio nga katasíchjén je BIBLIOTECA Watchtower xi tíjnaná ya Internet nga katabásjaiya jmeni xi kjonangi xi tʼatsʼe Biblia. Kʼuínyalee jokjoan símbolole je xo̱n xi ngisa nichjén ya kjoajtínná. Tobʼelañá je fg kui tsoyanile je foyeto Énnda chjotse xi tʼatsʼe Niná tínroani.

I̱ tʼiain sá jebi:

Kʼianga jekjoetʼa tsa jngo kjoaʼmiya kʼoa tsa jngo subtítulo, kʼoatʼinlai nga katabʼéyanajmí je xi tibʼailai estudio jmeni xi kamajinle. Kʼiatsa tsín ʼya xi tibʼailai estudio ndʼaibi, kʼianga kʼoéxkiai tsa jngo testo kʼoa tsa jngo párrafo xi tsʼe Xo̱n xi Bájinkonná, tʼeyanajmí jmeni xi kamajinli. Tsa kʼoasʼiain ngisa nda koa̱njinli jmeni xi bʼexkiai.