Nda si̱chjén je libro Jmé kjoanni xi bakóya je Biblia

Kʼianga sa nda sa nda machoyale jmeni xi bakóya Biblia je chjota xi bʼailee estudio kʼoa nga sítjoson, kui bakó nga jetífaʼasʼenjin ni̱ma̱le je Énle Niná (Sal. 1:1-3). Kʼiatsa nda si̱chjén jmeni xi faʼaitʼa je libro Jmé kjoanni xi bakóya je Biblia kʼoasʼin kuinyakoaa nga koa̱ntajasa je kjoamakjainle.

Kjoachjonangi xi tjío jña fitsʼiani kjoaʼmiya. Jña fitsʼiani nga jngó jngó kjoaʼmiya kjoachjonangi faʼaitʼa kʼoa tiyaa bakóyani je kjoaʼmiya xi tʼatsʼe kjoachjonangi jebi. Koaan si̱katíolee kjoachjonangi jebi je chjota xi ʼmiyalee, tonga ali tsakuijin nga kʼiakjoan kʼoakuitso, kuiní nga ngisa koa̱nndosinle jmeni xi kʼuínyalee. Tsa maije̱, kʼoati koa̱n kʼoakʼuínlee nga kʼoakatatso choa josʼin majinle. Tsakui nichxin likui kixi tjín jmeni xi kuitso, tonga alikui koa̱n nga kʼiakjoan si̱kixiyandaa. Jmeni xi kuitso kʼoasʼin jchañá jmeni xi ngisa nda kʼuínyalee (Prov. 16:23; 18:13).

Kjoaʼmiya xi majngokao. Kʼiatsa jekamajinle je chjota xi bʼailee estudio je kjoaʼmiya xi kachotʼayá, koaan kʼoakʼuínlee nga skan katabʼéxkia je kjoaʼmiya xi majngokao xi kui tínchja̱ni. Kʼoa xi ngindia nga chótʼayá kao je, koaan si̱katío kʼalee kjoachjonangi kʼianga jchaa tsa jmeni xi tsín koanjinle. Kʼiatsa bele tokoán, koaan kui kʼuínya ngotjolee je kjoaʼmiya xi majngokao, koaan ninga tojngo jao párrafo kʼoa tsa ngayeje kʼuínyalee. Koaan sʼe̱xkia je párrafo kʼoa si̱katío kʼalee je kjoachjonangi xi tongini jekinikatíondaa.

Rekuadro xi tjío jña fetʼani je kjoaʼmiya. Nga jefetʼa nga jngó jngó kjoaʼmiya jngo rekuadro faʼaitʼa kʼoa kui tsoya je kjoachjonangi xi tjío jña fitsʼiani. Kʼiatsa chótʼayajin ijngokʼá rekuadro jebi kao je chjota xi ʼmiyalee, jchañá tsa kamajinle jme xi ngisa tínchja̱ni je kjoaʼmiya kʼoa tsa jekoa̱nle nga toje kʼoakuitso. Kʼoéxkiaa jotso je rekuadro kao testo xi faʼaitʼa, kʼoa xijekoa̱n, kʼoakʼuínlee je chjota xi ʼmiyalee nga kui katasíchjén testo jebi nga kʼoakatatso ánni nga kʼoatjínsíni jmeni xi tso je rekuadro (Hech. 17:2, 3).