Je Pablo kitsjoale kjoanda Niná kʼoa koannʼiojin

Kʼianga kisʼejinle je jtín xi tíjna ya Roma nga jetjenyandiaa Pablo, tjínkʼa ndsʼee xi 64 kilómetro kjin kinroani nga kikʼáyandiaa. Je Pablo nda kisʼe kon nga kʼoasʼin kiskoeya je ndsʼee, kitsjoale kjoanda Niná kʼoa koannʼiojin (Hch 28:15). Je Pablo nʼio nkjín kʼa nga kisinʼiojin je jtín, tonga nga kʼia, jé xi kjoanʼiojin koanchjénle, nga̱ tíjnanʼio (2Co 13:10).

Nichxin xi tiyoaa ndʼaibi, je superintendente xi tsʼe circuito sínʼiojin je jtín kʼianga bichósíxatʼa. Tonga kʼoati sakʼoa bijtale, síkjáojin kʼoa nroajen kon. Jméni xi sʼiaan nga si̱nʼiojiaan ndsʼee jebi kao chjoónle kʼoa nga si̱nʼiojinngañá xíngiaa kʼianga bichósíxatʼaná (Ro 1:11, 12).

• 

  Koanngían je kjoajtín xi satío nga bitjokʼinyasoán. Je superintendente xi tsʼe circuito tsjoánganʼiole nga be jokji bʼenelee yaoná kʼianga ʼmiyasoán nga kui xomana (1Te 1:2, 3; 2:20). Koaan precursor auxiliar sʼin si̱xá je sá nga bichósíxatʼaná je ndsʼee. Kʼoasʼin kʼoéndajiaan nga ñatjen kʼuínyasoán kʼoa tsakuije̱ nga koaikaoná je ndsʼee kʼoa tsa je chjoónle nga kʼoee estudio. Alikui kʼoasʼin si̱kjaʼaitsjeen nga tsín nda bakoyasoán kʼoa tsa tosʼa choatsená, nga̱ je ndsʼee kui xi mele nga ñatjen kʼuínyasoán.

• 

  Nda chjoéyaa. Koaan ya koationi ya niʼyaná kʼoa tsa kʼoakʼuínlee nga katafikjenkaoná. Nga kʼoanʼia, kʼoasʼin bakoñá nga chjí ʼyatokoán. Xi ijngosani, je ndsʼee alikui nʼio tse xi síjéná (Lu 10:38-42)..

• 

  Kuinóʼyá je kjoafaʼaitsjen xi tsjoáná kʼoa kʼoasʼiaan jmeni xi kuitsoná. Je superintendente xi tsʼe circuito basenkaoná nga ngisasa nda si̱xálee Jeobá. Tsakui nichxin sakʼoa ñaki kʼoakuitsokixiná nga tsjoáná kjoafaʼaitsjen jmeni xi machjénsa nga sʼiaan (1Co 5:1-5). Kʼiatsa si̱tjosoán jmeni xi kuitsoná kao kjoatsjoa kʼoasʼin je xá xi kjinele (Heb 13:17).

• 

  Takui nga chjí ʼyatokuin. Kʼoatʼinlai je superintendente xi tsʼe circuito kao chjoónle josʼin tíbasenkaoli jmeni xi sʼín. Koaan nga jesoa kʼoakʼuínlai kʼoa tsa maije̱ jngo xo̱n chjílai kʼoa tsa jngo tarjeta tikasénlai (Col 3:15).