A nda kuiyoaa nichxin xi nroa tsa nda chjota koaan

Jenʼio nkjín nó tjínle nga kʼoasʼin síkjaʼaitsjen chjota nga nda biyoaa kʼianga nda chjota maa. Tobʼelañá, je chjota xi Confucio tsakʼin, xi maestro kʼoa filósofo koan, xi kʼia tsakʼejna nga nó 551 saʼnda nó 479 tongini nga nó 1, i kitso: “Alikuijin kʼoanikoai xi kjaʼaí jmeni xi tsín meli nga sikaoli”.a Nkjín chjota xi Asia tsʼe xi kʼoatisʼin síkjaʼaitsjen.

JMENI XI SʼÍN KʼA

Nkjín chjota xi kʼoasʼin síkjaʼaitsjen nga nda koatio kʼiatsa ndasʼin. Kuinga nda fikaoni xi kjaʼaí, bakóle kjoaxkóntokon kʼoa ndasʼin síkjaʼaitsjen. Jngo chjoón xi Vietnam tsʼe xi Linh ʼmi, itso: “Kʼoasʼin kisikjaʼaitsjen ngantsjai nga ndasʼin koatejna kʼiatsa nda sʼian”.

Xi tijeni chjoón jebi fikaole tsojmi xi kjenni je chjota xi ma̱ tjío kʼoa xi tsínle ndʼia.

Nkjín chjota xi nda sʼín nga̱ kʼoasʼin sakóyale ya religión jña tjíojin. Jngo chjota xi Taiwán tsʼe xi Hsu-Yun ʼmi, itso: “Kʼoasʼin tsakʼinyana nga kui xi kuitsoni jmeni xi kisʼin nga sʼa tíjnakon jngo chjota tsa tsjoa sʼe̱ kon kʼoa tsa kjoañʼai kjoaʼa kʼianga jekuiyá”.

JOSʼIN BICHÓMANI

Nga jemaxon, je chjoón jebi ba tjín kon kʼoa jekijtale, kʼoa je ʼndíle yʼangʼa.

Kʼianga nda chjota maa ndasʼin biyoaa. Ningalani nda chjota maa alikui tongantsjai nga nda biyoaa. Jngo chjoón xi Hong Kong tsʼe xi Shiu Ping ʼmi, itso: “ʼBeña nga tsín tongantsjai nga ndasʼin biyoaa ninga nda nʼia. Ninga nda kisikuinda je familiana kʼoa nda kisʼian, likuini nda tsakiyuijin, nga̱ je xʼinna kitsjionkonnajin kao je ʼndíxtina”.

Nkjín chjota xi tjíobe nga tsínni tsakui religión xi basenkaoná nga nda nʼia. Jngo chjoón xi Japón tsʼe xi Etsuko ʼmi, itso: “Ya religión jña tsakatejnajian an kixinyale xi sʼa xti jmeni xi kisʼin. Tonga tsínni nda kisʼe tokoan nga tsaʼbe nga je chjota xi ya tjíojin religión jebi alikuini ndasʼin fikao yaole, xá kjányani kʼoa tsín ndasʼin síchjén je tao̱n xi maxkó ya yo̱ngo̱”.

“Ninga nda kisikuinda je familiana kʼoa nda kisʼian, likuini nda tsakiyuijin, nga̱ je xʼinna kitsjionkonnajin kao je ʼndíxtina” (SHIU PING, HONG KONG)

Tjínkʼa chjota xi nʼio sísin tʼatsʼe religión xi kʼoatso nga tsínni ndasʼin batio ninga nda sʼín. Kʼoakisʼe kon jngo chjoón xi Vietnam tsʼe xi Van ʼmi, itso: “Nyaon nyaon tsakatiole to, naxó kao tsojmi xi ma chine je ʼndíkʼienna, ánni nga sichikontʼainnina nichxin xi sʼa nroa. Ninga nkjín nó nga kʼoakisʼian jebi, toxitsjoani, nga̱ tojo kitjochʼinnile je xʼinna. Kʼoa je tsotina xi xin naxinandá tíkotʼaya kʼiaa 20 nóle nga kʼien”.

TSÍN TOKUI XI MACHJÉN NGA NDA CHJOTA KOAAN

Ninga nʼio chjíle nga nda chjota koaan, ali tokuijin xi machjén nga ndasʼin kuiyoaa nichxin xi sʼa nroa. Kataʼyala jotso je Énle Niná.

ALI TONGATSʼI CHJOTA NGA NDA SʼÍN

“Jngo chjota xi bajngijée síkitsónjin xi ndatjín” (ECLESIASTÉS 9:18).

Tjín chjota xi bʼénele yaole nga nda sʼín, tonga nga kʼoati tjín chjota xi chʼao sʼín kuinga tsín nda biyoñá. Tobʼelañá, kʼianga táo chʼin sʼe, tsa si̱kuindai yaoli nga kʼoasʼiain jotso je chjotaxá kʼoa tsín chjota kuijnajinlai, tonga tsa tjínkʼa xi tsín sitjoson kʼoa tsín sikuinda yaole, tsakui nichxin chʼin ska̱tʼali.

NKJÍN XI TSÍN BE XI NDATJÍN KAO XI CHʼAOTJÍN

“Kijna jngo ndiaa xi kixi male je chjota, tonga kjoabiya bichókao nga jemani” (PROVERBIOS 14:12).

Jokji tífaʼato nó, nkjín chjota xi nda tjíosʼín kjimale, tonga skanni be nga tsínni nda sʼín. Ninga mená nda sʼiaan, tsa tsín nda chjoéjiaan jmeni xi sʼiaan, alikui nda kuichomani.

ALIKUI ÑÁ ʼYAA JMENI XI KOA̱NNÁ

“Alikui ʼyao jme xi koa̱n nyaonli jngili” (SANTIAGO 4:14).

Ningalani nʼio nda sʼín jngo chjota, alikui be jmeni xi koa̱nle nyaonli jngili. Tobʼelañá, xi totʼatsʼe chʼin COVID-19, nkjín chjota kisicha yaole nga tsakinyakao xi kjaʼaí. Kataʼyala jokoan jngo chjoón xi China tsʼe xi Liting ʼmi, xi kʼia kʼien je nʼaile nga carro tísíxákao. Itso: “Alikui majinna ánni nga kʼoakoanni, nga̱ nʼio nda chjota je pana, nʼio síxá, nangitokon kʼoa kixi, kʼoa je xi ya tjenkao alikui kʼien, tojekjoán xi kʼien”.

Jméni xi nda sikatíoná kʼiatsa tsínkui nga nda chjota koaan. Machjén nga ya kjoásjaiyaa jñani ñaki kʼoatjín jme xi kuitsoná nga jchaa jmeni xi nda sikatíoná nichxin xi sʼa nroa. Jñáni koa̱nsjainá je xi kuitsoyaná.

a Kʼiatsa mesali jchai jmeni xi kitsoya je Confucio, tʼexkiai ya capítulo 7 xi tsʼe libro El hombre en busca de Dios, párrafo 31-35. Libro jebi jé testigole Jeobá bʼasje. Kʼoati faʼaitʼa ya Internet ya www.jw.org.