Mele nga nda koatio ngatsʼi chjota
Kuijin xi meli nga nda kuijnai kao familiali nichxin xi sʼa nroa, nga tsjoa sa̱tío tokon, nga tsín jme chʼin sʼe̱no kʼoa nga nda kuiyo. Ngatsʼi chjota kui xi mele nga nda koatio.
Nkjín chjota xi kʼoasʼin síkjaʼaitsjen nga tsín koa̱n nga kʼoasʼin kuiyoaa. Nga̱ be nga tsín ñá tjínjinná jmeni xi maná, tobʼelañá, xi totʼatsʼe chʼin COVID-19 nʼio nkjín chjota xi tsín tinda tjíoni, xi tsínle tao̱n kʼoa nkjín xi tjíobiya. Kuinga nʼio nkjín xi kʼoasʼin síkjaʼaitsjenni nga tsínkʼia ndasʼin kuiyoaa.
Je chjota nʼio síkjáojin josʼin koatio nichxin xi nroaján kʼoa básjai jmeni xi kuinyakao nga ndasʼin koatio. Tjínkʼa xi kʼoasʼin makjainle nga toxá jetjínndajinni jmeni xi maná kʼoa tjínkʼa xi kʼoatso nga to suerte jmeni xi maná. Nkjín xi kʼoatso nga kui skuelangʼa kao tao̱n xi ndasʼin síkatíoná. Kʼoa tjínkʼa xi kʼoatso nga tokui xi machjén nga nda chjota koaan kʼianga ndasʼin kuiyoaa.
A ndasʼin sikatío kjoaixiná xi tinikʼaxkiaa i̱bi. Tikjaʼaitsjenlai jebi:
Jmé xi kuitsoni josʼin kuiyoaa nichxin xi sʼa nroa.
A kui je skuelangʼa kao tao̱n xi nda sikatíoná.
A nda kuiyoaa nichxin xi nroa tsa nda chjota koaan.
Jmé xi koasenkaoli nga nda kuijnai nichxin xi nroa.
Kui tʼatsʼe jebi bakóyaná revista jebi.