Ánni nga kʼoasikji kjoajticha tjínni

Ánni nga kjoajticha tjínni ngakjijnda. Nga jchaa machjén nga koa̱njinná jósʼin tíjna nga majtike xínkjín je chjota, jñá nroani nga majtike xínkjín kʼoa ánni nga kʼoasikji kjoajticha tjínni.

Jósʼin tíjna nga majtike xínkjín chjota

Nga jtike ma xínkjín je chjota tsín nda fikao xínkjín kʼoa bʼasjengi. Kʼoa ali tsa tochoatsejin nga majtike xínkjín.

JÑÁ NROANI NGA MAJTIKE XÍNKJÍN CHJOTA

Nkjín koya tjínni anni nga majtikeni xínkjín. Ali tsa tokuijin majtikeni tʼatsʼe josʼín, totsen tjín ʼyani xi majtike. Tsakui nichxin kʼoasʼin síkjaʼaitsjen nga tsʼen, nga chʼao kjoan kʼoa nga tsín tikoa̱nndayani. Tsakui nichxin kʼoasʼin síkjaʼaitsjenje̱ nga ngisa nangi tjío tikʼoajinni je, nga xkón síkatío je chjota kʼoa nga tse kjoa bajngi. Kʼoa kʼoati kui kʼoasʼin síkjaʼaitsjen kʼani nga totaon tsaʼya kʼoa tsa jmesa kjoa xi jaʼatojin.

JÓMANI NGA SA NKJÍN SA NKJÍN MANI XI MAJTIKE XÍNKJÍN

Je chjota sakʼoa je majtike xi saʼnda tsínni bexkon. Tobʼelañá, tjínkʼa je chjota xi tsín be yaole tsa jeni kʼoatisʼin tísíkjaʼaitsjen josʼin síkjaʼaitsjen jngo chjota xi bexkón kʼoa tsa xi tsjoake. Nga kʼoasʼín, kui majtikeni xínkjín je chjota.

Nga ngotjo majtikeni xínkjín chjota kuinga kʼoasikji kjoajticha tjínni. Jósʼiaan nga tsín xíngiaa koa̱njtichaa. Je Biblia tsoya jñá nroani nga kʼoama.

JE BIBLIA TSOYA JÑÁ NROANI JE KJOAJTICHA

Je flecha xi matsen kui tsoya jña nroani nga majtike xínkjín chjota. 1. Xi tsínni kʼoatjín yaa nroani jmeni xi tso xi kjaʼaí, redes sociales kao jotso noticia. 2. Nga tsín be tʼatsʼe josʼin ngale chjota, tʼatsʼe xi xin tsʼe kao tʼatsʼe jngo religión. 3. Nga tsokjónle tsa jmeni xi kʼoantjaiya, tsa jmeni xi sicha kʼoa nga tsín be jmeni xi koa̱n. 4. Je kjoajticha kui xosíkao chjota nga tsín nda síkjaʼaitsjen tʼatsʼe xi kjaʼaí, nga bʼasjengi xínkjín kao kjoatsʼen.

ALI TSA JEJIN CHJOTA TÍTJON KOANJTIKE XÍNKJÍN. Je kjoajticha yaa ngʼajmi kinroani kʼianga jngo ánkje xi kontra tsakʼejnale Niná, je xi Na̱i kao Satanás ʼmile. Kʼianga jekontra tsakʼejnale Niná, nʼio chʼao koankjoan. Nga ndiso kʼoa nga “nʼaile kjoandiso” ʼmile je Na̱i, kuinga kʼoasikji kjoajticha kao kjoatsʼen tjínni (Juan 8:44; 1 Juan 3:11, 12). Je Biblia kʼoatso nga nʼio chʼao kjoan, nga nʼio tsʼen kʼoa nga nʼio jtile (Job 2:7; Apocalipsis 12:9, 12, 17).

ÑÁ XI CHJOTA KʼOATI JETSAKINNÁ NGA JTICHA MAA JE XÍNGIAA. Je chjota xi títjon tsakʼejna i̱ Sonʼnde xi Adán tsakʼin, kʼoati kisʼin jokisʼin je Na̱i, kʼoa yaa kinroani nga chjotajée maa (Romanos 5:12). Kʼoa je Caín, xi tile koanni Adán, jtike koan je ndsʼe̱ xi Abel tsakʼin kʼoa kisikʼien (1 Juan 3:12). Ningalani bakoá kjoatsjoacha kao kjoamatokon, tonga nga chjotajée maa, sakʼoa to yaoná mangínñá, xintokon maa kʼoa ngʼakon maa, kʼoa yaa nroani nga jticha maa xíngiaa (2 Timoteo 3:1-5).

KʼIANGA TSÍN TSEJTA MAA YAA NROANI NGA JTICHA MAA XÍNGIAA. Nga nʼio tsʼen je chjota kʼoa nga totaon be xínkjín yaa nroani je kjoajticha. Nga kui kijnajtsa jngo tjíjtsa Sonʼnde jmeni xi mele Na̱i, kuinga tsín bakóni kjoatsejta je chjota, bʼasjengini xínkjín, fáoti, besin kʼoa totaon be xínkjín (1 Juan 5:19).

Je Biblia tsoya jña nroani nga majtike xínkjín chjota kʼoa kʼoati tsoya jósʼin sʼe̱ndajin kjoa jebi.