2 | Sínʼio tokoán je Biblia

JE BIBLIA ITSO: “Je kjoa kichjitʼa ngasʼa, kichjitʼa xi tʼatsʼe nga koakoyaná, jméni nga sʼe̱síniná kjoachoyakaokjoa xi totʼatsʼe kjoatsejta kao kjoanijetakon xi tjínle xo̱n Escrituras” (ROMANOS 15:4).

Jósʼin tsoyanile jebi

Je Biblia tsjoáná kjoafaʼaitsjen xi sínʼio tokoán, basenkaoná nga chókjoajinná je kjoa xi bitjatojiaan kʼoa nga nikʼajenlee tokoán. Kʼoati tso nga jeme tjóxin jmeni xi tsín nda bʼé tokoán.

Jósʼin basenkaoná

Toxá ba sʼe sakʼoani tokoán kʼoa toxá sakʼoa nikjáojinñá. Tonga je chjota xi depresión bʼetʼale kʼoa xi ansiedad tjínle tokʼoa sʼentsjai kon. Jósʼin koasenkao jmeni xi tso je Biblia.

Je Biblia basenkaoná nga nda sʼe kjoafaʼaitsjenná kʼianga kui nikjaʼaitsjeen xi tsín ndatjín (Filipenses 4:8). Koaan kui kuinyaa jkoaa jmeni xi nda kʼoe kjoafaʼaitsjenná kʼoa tsínkui nʼio kuenta sʼiaan jmeni xi nikjáojiaan (Salmo 94:18, 19).
Je Biblia koasenkaoná kʼiatsa kʼoasʼin nikjaʼaitsjeen nga tsín jme chjíná (Lucas 12:6, 7).
Ya Biblia nkjín choa̱ faʼaitʼa xi tsoyaná nga tsín toñá tiyoaa, kʼoa nga ngisa nda majinle Niná josʼe tokoán (Salmo 34:18; 1 Juan 3:19, 20).
Je Biblia kʼoatso nga jé Niná xosʼin nga tsín tikui kjoaʼaítsjenniná jmeni xi tsín nda bʼé tokoán (Isaías 65:17; Apocalipsis 21:4). Jmeni xi tso Niná koasenkaoná kʼiatsa nʼio nikjáojiaan.

Jósʼin basenkao Biblia je Jessica

Josʼin bʼetʼana nga depresión tjínna

“Kʼianga 25 nóna kui chʼin tsakʼetʼana nga nʼio kitsokjoan kʼoa kʼoatsakʼinna nga depresión tjínna. Kui ngotjo ngosa jaʼaitsjenna jmeni xi koanna ngasʼa kʼoa tsín titsaʼbeña jokisʼian. Je chjinexki kʼoakitsona nga kui kisʼejnajin kjoafaʼaitsjenna jmeni xi koanna ngasʼa kʼoa nga kuinga depresión koannina. Kui xki tsakʼaina xi tsakasenkaona kʼoa jé kikonle chjinexki xi kui xá sʼín nga kʼoakitsona ánni nga kui chʼin kiskatʼanina.

Basenkaona je Biblia

Kʼianga nʼio tsakʼetʼana depresión nʼio kitsokjoan, likui tikisʼefeña kʼoa nʼio kisikjáojian. Nkjín nitje̱n nga tokui kisikjaʼaitsjen ʼndeʼnde jmeni xi koankjáojinna. Ya Salmo 94:19 kʼoatso nga je Niná tsjoánganʼioná kʼianga nʼio nikjáojiaan. Kʼianga bajna yaa sikájnatʼale yaona je Biblia kao je xo̱n xi texto tjíotʼana xi tsjoánganʼiona, kʼoa kui bʼexkia kʼianga tsín sʼefe, kʼoasʼin tsjoaʼndenile nga je Niná tsjoánganʼiona.

Je Biblia kʼoatso nga tsínkui si̱siaan je kjoafaʼaitsjen xi tsínni kʼoatjín nga̱ ʼyañá jokjoantjínni xi tʼatsʼe Niná. Tobʼelañá, kʼoasʼin sikjaʼaitsjen tsakai nga tsín jme chjína kʼoa nga tsín ʼya xi tsjoake koa̱nna. Koanjinna nga kʼoatso je Biblia nga nʼio tsjoakená Niná kʼoa nga mandosinle xi tʼatsaan nga jngó jngoá nga Nʼainá mani. Kʼoa tobijbi nda kisʼe ijngokʼani kjoafaʼaitsjenna nga̱ kui kisikjaʼaitsjen jmeni xi tsakasenkaona kʼoa tsín tikitsjoaʼndenile kjoafaʼaitsjenna nga kui sikjaʼaitsjen xi tsín ndatjín. Kʼoasʼin ʼbe yaona ndʼai josʼin bena je Niná. Kui jebi xi tíbasenkaona nga tsín tichʼaosʼin sikjaʼaitsjenña xi titʼatsʼanña.

Nʼio koyale je nichxin kʼianga tsín tikui si̱kjaʼaitsjenñá jmeni xi síkiʼaonná. ʼBeña nga tsín tijme chʼin sʼe̱nile kjoafaʼaitsjenná nichxin xi sʼa nroa, kʼoa kui xi tíbasenkaona nga tíchókjoajinna nga depresión tjínna nga tikoyale je nichxin nga tondiaa tjóxin chʼin jebi”.