3 | Chjota xi síkʼaxki̱ Biblia

JE BIBLIA SIKʼAXKI CHJOTA: Xi kʼoati kisatio kjoafaʼaitsjenle joni ñá (SANTIAGO 5:17).

Jósʼin tsoyanile jebi

Je Biblia síkʼaxki xi xʼin kao xi yánchjín xi kjaʼaí kjaʼaí kjoa jaʼatojin. Kʼianga bʼexkiaa ʼyañá je kjoa xi jaʼatojin kʼoa tsakui nichxin kʼoati kui kjoa tibitjatojiaan tsanda ñá.

Jósʼin basenkaoná

Ngatsʼiñá nga mená nga katamajinle xi ngikʼa josatío tokoán, ngisaa kʼianga chʼin bʼetʼale kjoafaʼaitsjenná. Kʼianga kʼoéxkiaa Biblia koa̱njinná nga kʼoati kisatio kon chjota xi síkʼaxki̱ josatío tokoán ñá, koa̱njinná nga tsín tsa toñájián xi nʼio nikjáojiaan kʼoa xi tsín nda sʼe sakʼoa tokoán.

Je Biblia bʼéyanajmí jokitso kʼa chjota xi kisikinroajen kon kʼoa xi kinroajen nganʼiole. A sakʼoa i̱si: “Likui tichókjoanina, alikui titsoni tokoan nga koatejnakoan”. Kʼoati kisatio kon je Moisés, Elías kao David (Números 11:14; 1 Reyes 19:4; Salmo 55:4).
Ya Biblia kʼoatso nga nʼio ba kisʼe kon Ana nga tsín koan kisʼele xti, kʼoa je chjoón xi tsakatiojao totsabesin (1 Samuel 1:6, 10).
Tsakui nichxin kʼoati sʼe tokuin jokisʼe kon je Job, jngo chjota xi bʼaxki̱ ya Biblia. Ningalani koankjainle tʼatsʼe Niná ba kisʼe kon kʼoa i kitso: “Jekichobena josʼin tijna. Alikui timenina koatejnakoan” (Job 7:16).

Ngatsʼi chjota jebi nda kisationi kjoafaʼaitsjenle. Kʼoati nda sa̱tío kjoafaʼaitsjenná tsa kjuintjenngiaa choa̱le.

Jósʼin basenkao Biblia je KeVin

Josʼin bʼetʼana nga trastorno bipolar tjínna

“Kʼiaa tsaʼyale nga trastorno bipolar tjínna nga jeme 50 nóna. Sakʼoa kʼoasʼe tokoan nga toʼan mena kʼoasʼinyeje tsa jmeni tonga sakʼoa kʼoasʼin sikjaʼaitsjen nga toxitsjoa nga tijnakoan.

Basenkaona je Biblia

Kʼoati sʼe tokoan jokisʼe kon pastro Pedro. Sakʼoa kisikinroajen kon nga sakʼoa tsín nda kisʼin. ʼNdele nga tokui sikjaʼaitsjen ʼndeʼnde, tosaa tsakásjai nganʼio kʼoa tsakinyakao miyole. Kʼianga tsín nda sʼe tokoan ñaki tokui kuenta sʼian jñani chʼao sʼian kʼoa kʼoasʼin sikjaʼaitsjen nga tsín jme chjína. Kʼoatisʼian jokisʼin je pastro Pedro, jé miyona basje nga binyakaona. Je miyona binyakaona nga tsín sikʼajenle tokoan.

Kʼoati sikjaʼaitsjenjian jokisʼe kon je rey David. Sakʼoa kinroajen kon kʼoa toje tsakáne jée yaole jñani chʼao kisʼin. Kʼoati sʼe tokoan tsanda an, jée fane yaona tsa jmeni xi sʼian kʼoa tsa joxian. Kuinga nʼio basenkaonina jmeni xi kitso David tojosʼin faʼaitʼa ya Salmo 51. Ya versículo 3 itso: Nʼio nda ʼbe jme jée xi tsakajngia kʼoa ñaki tokui tjía kjoafaʼaitsjenna. Kʼoakjoán tisʼin sikjaʼaitsjen kʼianga ba tjín tokoan. Ñʼai mana nga nda sikjaʼaitsjen xi titʼatsʼanña, kʼoa kʼiaa sikjaʼaitsjen jokitso David, tojosʼin faʼaitʼa ya versículo 10, jñani tso: Jngo ni̱ma̱ xi tsje sʼin tíjna tʼainái, ji Niná, kʼoa jngo espíritu xi chjotse tʼainái, xi tosi tonda kixi koa̱n. Kʼoati xinle tsanda an je Niná, nga katabasenkaona nga tsjoa katasʼe tokoan. Kʼoati basenkaona jotso ya versículo 17, jñani tso: Jngo ni̱ma̱ xi aon tjínle kʼoa xi jekinroajen kon, ji Niná, alikui chʼa̱sjengi. Kʼianga ñandia ñandia bʼexkia versículo jebi majinna nga tsjoakena Jeobá.

Kʼianga kui sikjaʼaitsjen choa̱ xi faʼaitʼa Biblia kʼoa josʼin tíbasenkaona Niná, sʼejngo tokoan nga kuitjoson jmeni xi tso Biblia, basenkaona nga chókjoajinna kʼoa tsín sikinroajen tokoan nga̱ tjínjngoo tokoan nga kuitjoson jmeni xi tso Énle Niná”.