KJOAʼMIYA XI CHOTʼAYA 19
Ñaki kʼoakʼoé tokoán nga kjoaʼaíkao Jeobá je sonʼnde chjotse
“Kʼianga jme xi tso [Jeobá] kʼoasʼín” (NÚM. 23:19).
KJOAJNDA 142 Likui kuinjioán kjoachoya xi tjínná
XI TÍNCHJA̱NIa
1, 2. Kʼianga kjesa faʼaijin sonʼnde chjotse, jméni xi machjén nga sʼiaan.
BʼAILEE kjoanda Jeobá nga kʼoatso nga kjoaʼaxin jmeni xi chon sonʼnde kʼoa nga naskánasichon ijngokʼa (2 Ped. 3:13). Ninga tsínlani ʼyaa kʼiákjoánni kjoaʼaíkao sonʼnde chjotse, jmeni xi kjimachon ndʼaibi kui bakóná nga jechrian tíjna (Mat. 24:32-34, 36; Hech. 1:7).
2 Machjén nga ñaki kʼoéjngoaa tokoán ngatsʼiaa nga kʼoakoa̱n jmeni xi tso je Niná. Ni chriansʼa kʼoa ni jekjoatse nga Niná tinixálee kjuinroajeen kjoamakjainná tsa tsín si̱kuindaa yaoná. Je pastro Pablo kʼoakitso nga kui “je jée xi síñʼainá” kʼianga tsín makjainná (Heb. 12:1). Kʼianga tsín kjuinroajen kjoamakjainná machjén nga kuenta sʼiaan jmeni xi kjima xi bakóná nga jemachrianle nga kjoaʼaí sonʼnde chjotse (Heb. 11:1).
3. Jmé xi chótʼayajiaan i̱ kjoaʼmiya jebi.
3 I̱ kjoaʼmiya jebi jan koya tjínni xi chótʼayajiaan xi koasenkaoná nga ñaki kʼoéjngoaa tokoán nga kjoaʼaíkao Jeobá je sonʼnde chjotse. Xi títjon, si̱kjaʼaitsjenjiaan nga tsakʼéchjíntjainá Jesús. Xi majaoni, si̱kjaʼaitsjenjiaan jokji nganʼio tjínle Jeobá. Kʼoa xi majanni, tosi tonda kui xále Niná kʼoasʼiaan. Xijekoa̱n, kui chótʼayajiaan nga kʼoati basenkaoná ñá ndʼaibi jmeni xi kitsole Jeobá je Habacuc. Tonga kuila títjon chótʼayajiaan ánni machjénni nga kʼoéjngoaa tokoán nga kjoaʼaíkao Niná je sonʼnde chjotse.
ÁNNI MACHJÉNNI NGA NʼIO SʼE̱JNA KJOAMAKJAINNÁ
4. Ánni machjénni nga nʼio sʼe̱jna kjoamakjainná.
4 Nga nyaon nyaon machjén nga nʼio sʼe̱jna kjoamakjainná. Tobʼelañá, kui chjoejiaan ʼyáni xi si̱miyoaa, jósʼin bʼetsaojiaan, jméni xi chótʼayá, jme xá xi sʼiaan, tsa kuixaan kʼoa tsa xti sʼe̱ná. Koaan kui si̱kjaʼaitsjenjiaan jebi: “Jméni xi bakó josʼian. Jmeni xi sʼian, a bakoña nga tokjoaʼato jmeni xi chon sonʼnde kʼoa nga jeme kjoaʼaíkao Niná je sonʼnde chjotse. Axo kʼoasʼian josʼín je chjota xi tsín makjainle nga jngo sonʼnde chjotse kjoaʼaíkao Niná” (Mat. 6:19, 20; Luc. 12:16-21). Nda chjoéjiaan jmeni xi sʼiaan tsa ñaki tjínjngo tokoán nga jetíjnachrian je sonʼnde chjotse.
5, 6. Ánni machjénni nga nʼio sʼe̱jna kjoamakjainná kʼianga kjoa bitjatojiaan. Jngo choa̱ tʼejnai.
5 Kʼianga tse kjoa bitjatojiaan machjén nga nʼio sʼe̱jna kjoamakjainná. Jolani nga chjota fitjenngikená, nga chʼintáo katʼaná kʼoa tsa jmesa kjoa kuitjátojiaan xi sikinroajen tokoán. Tsakui nichxin chókjoajinná kjoa nga tosʼa, tonga tsa tse nga kjoa kuitjátojiaan machjén nga nʼio sʼe̱jna kjoamakjainná ánni nga chókjoajinniná kʼoa nga tosi tonda kao kjoatsjoa si̱xálee Jeobá (Rom. 12:12; 1 Ped. 1:6, 7).
6 Kʼianga kjoa tibitjatojiaan, tsakui nichxin kui si̱kjaʼaitsjeen nga tsínkʼia kjoaʼaíkao Jeobá je sonʼnde chjotse. Alikui kui xi tsonile tsa tsín nʼio tíjna kjoamakjainná tsa kʼoasʼin si̱kjaʼaitsjeen. Jngola choa̱ si̱kʼéjnaa. Tsa nʼio nyʼán kjima nga cha̱nnyʼán, tsakui nichxin kʼoasʼin si̱kjaʼaitsjeen nga tsínkʼia kjoaʼaí cha̱nndoá, tonga tsínkʼia nga tsín faʼai cha̱nndoá. Tikʼoasʼinni, kʼianga nikʼajenlee tokoán tsakui nichxin kʼoasʼin si̱kjaʼaitsjeen nga tsínkʼia kjoaʼaí je sonʼnde chjotse. Tonga tsa nʼio tíjna kjoamakjainná sʼe̱jngo tokoán nga kuitjoson jmeni xi tso Jeobá (Sal. 94:3, 14, 15; Heb. 6:17-19). Tsa tjínjngo tokoán nga sitjoson jme xi tso Jeobá kui xále títjon si̱kʼéjnaa.
7. Jméni xi tsín koa̱n kʼoasʼiaan.
7 Kʼoati machjén nga nʼio sʼe̱jna kjoamakjainná kʼianga kʼuínyasoán. Nʼio nkjín chjota xi tsín makjainle kʼianga kui chjakaonajmíñá nga jngo sonʼnde chjotse kjoaʼaíkao Niná (Mat. 24:14; Ezeq. 33:32). Tonga alikui koa̱n kʼoatisʼin si̱kjaʼaitsjeen tsanda ñá josʼin síkjaʼaitsjen chjota xi tsín makjainle. Nga tsín kʼoakoaan, machjén nga nʼio sʼe̱jna kjoamakjainná. Janla koya kataʼyaa jmeni xi koa̱n sʼiaan.
SI̱KJAʼAITSJENJIAAN NGA TSAKʼÉCHJÍNTJAINÁ JESÚS
8, 9. Jósʼin basenkaoná nga nʼio sʼejna kjoamakjainná nga kui nikjaʼaitsjenjiaan nga tsakʼéchjíntjainá Jesús.
8 Jngo koya xi koasenkaoná nga nʼio sʼe̱jna kjoamakjainná kʼiaa nga si̱kjaʼaitsjenjiaan nga tsakʼéchjíntjainá Jesús, nga̱ kui xi bʼéjngo tokoán nga kuitjoson jme xi tso Niná. Machjén nga si̱kjaʼaitsjenjiaan jósʼin tíjna nga tsakʼéchjíntjainá je Jesús, kʼoa ánni nga kitsjoaʼndeni Jeobá nga kʼienntjainá je ʼNdíle. Nga koa̱njinná jebi, sʼe̱jngo tokoán nga kjoaʼaíkao Jeobá jngo sonʼnde chjotse jñani koa̱n kuiyoaa ngantsjai nichxin. Ánni kʼoabixónñá.
9 Si̱kjaʼaitsjenjinla jósʼin tíjna nga tsakʼéchjíntjainá Jesús. Je Jeobá kisikasén je ʼNdíjngole i̱ Sonʼnde, xi nʼio miyole mani, nga jo chjotatsje sʼin kitsin. Kʼianga tsakʼejna Jesús i̱ Sonʼnde kjoañʼai tsakjaʼá kʼoa tsee kjoañʼai kinikjaʼá nga kinikʼien. Alikuijin choa ñʼai koanle Jeobá nga kisikasén ʼNdíle. Je Jeobá nʼio tsjoakená, alikui kui xá kisikasénni ʼNdíle nga kʼoasikji tse kjoañʼai kinikjaʼá tsa tochoatseni nga nda kuiyoaa (Juan 3:16; 1 Ped. 1:18, 19). Tsee kjoama̱ tsakʼéngi Jeobá nga tsakʼéchjíntjainá, kuinga kʼoatsoni nga koa̱n kuiyoaa ngantsjai nichxin.
SI̱KJAʼAITSJENJIAAN JOKJI NGANʼIO TJÍNLE JEOBÁ
10. Tojo tso Efesios 3:20, jméni xi koa̱nle sʼin Jeobá.
10 Ijngo koya josʼin nga nʼio sʼe̱jna kjoamakjainná kʼiaa nga si̱kjaʼaitsjenjiaan jokji nganʼio tjínle Jeobá. Tjínle nganʼio nga sitjoson ngayeje jmeni xi tso. Tsakui nichxin ñá xi chjota kʼoasʼin si̱kjaʼaitsjeen nga tsínkʼia kjoaʼaí jngo sonʼnde chjotse kʼoa nga tsínkʼia kuiyoaa ngantsjai nichxin. Tonga je Jeobá me tongantsjai nga kui kʼoatso nga kui kʼoasʼin jmeni xi tokʼoamaná. Jé Jeobá xi ngisasa tse nganʼio tjínle (Job 42:2; Mar. 10:27). Toxá kui kʼoatsoni jmeni xi tokʼoamaná ñá xi chjota (tʼexkiai Efesios 3:20).b
11. Tikʼaxki̱ jngui jmeni xi tomaxkónná xi kitso Jeobá (chótsenlai je recuadro “Jósʼin kitjoson jmeni xi kitso Jeobá”).
11 Si̱kjaʼaitsjenla jokitsole Jeobá je choʼndale nichxin kjoatse, xi kʼoasʼin nikjaʼaitsjeen ñá xi chjota nga tsínkʼia kʼoakoa̱n. Ningalani jenʼio jchínga je Abrahán kao Sara, kʼoakitsole Niná nga jngo ʼndí sʼe̱le (Gén. 17:15-17). Kʼoati kitsole Abrahán nga je ntje̱le tsjoále ya ʼnde Canaán. Tonga je ntje̱le Abrahán, xi tsonile je chjota israelita, nkjín nó nga choʼnda koan ya Egipto kʼoa kʼoajinsʼin kisikjaʼaitsjen nga tsínkʼia kuitjoson jmeni xi tsakʼinle Abrahán, tonga kitjoson. Kʼoa nga koanskanni, kʼoakitsole Jeobá je Elisabet nga jngo ʼndí sʼe̱le ninga jenʼio jchínga. Kʼoati kitsole María, jngo tsotixo̱ngó nga je kʼoa̱ je ʼNdíle nga jtsín i̱ Sonʼnde. Kʼoasʼin kitjosonni jmeni xi kitso Jeobá ya ʼndenaxóle Edén (Gén. 3:15).
12. Jókji nganʼio tjínle Jeobá, tojo tso Josué 23:14 kao Isaías 55:10, 11.
12 Kʼianga nikjaʼaitsjeen jmeni xi kitso Jeobá kʼoa josʼin kisitjoson ʼyañá nga nʼio tse nganʼio tjínle, kʼoa kui xi bʼéjngo tokoán nga sitjoson kʼianga kʼoatso nga jngo sonʼnde chjotse kjoaʼaíkao (tʼexkiai Josué 23:14;c Isaías 55:10, 11d). Kʼoa ngisaa koa̱nná kuinyakoaa xi kjaʼaí nga katamajinle nga kʼoakoa̱n kjoaixi jmeni xi tso Niná. I kitso Jeobá nga kui kinchja̱ni je sonʼnde chjotse kao ngʼajmi chjotse: “Je énbi ndaní, kʼoa kjoakixiní” (Apoc. 21:1, 5).
KUI NGISA KUENTA SʼIAAN JE XÁLE NINÁ
NGA BIYOJTIÁN
Jósʼin basenkaoná jebi nga nʼio sʼejna kjoamakjainná (Chótsenlai párrafo 13)
13. Jósʼin basenkaoná nga nʼio sʼejna kjoamakjainná kʼianga mangián kjoajtín.
13 Xi majanni koya xi koasenkaoná nga nʼio sʼe̱jna kjoamakjainná kʼiaa nga kui kuenta sʼiaan je xále Niná. Si̱kjaʼaitsjenla jósʼin basenkaoná je kjoajtín xi satíoná. Jngo tichjaa xi Anna ʼmi,e xi ñaki to xále Niná tísʼín, itso: “Je kjoajtín xi satíoná basenkaona nga nʼio sʼejna kjoamakjainna. Ningalani tsín nʼio nda male bakóya xi tínchja̱ya kʼoa tsa tojeʼbe jmeni xi kuitso. Tonga jmeni xi nrʼoe basenkaona nga ngisa nda majinna jmeni xi tso Biblia, kʼoa ngisaa nʼio sʼejna kjoamakjainna”. Kʼianga satíoná kjoajtín kʼoati nʼio basenkaoná je comentariole ndsʼee (Rom. 1:11, 12; 10:17).
NGA ʼMIYASOÁN
Jósʼin basenkaoná jebi nga nʼio sʼejna kjoamakjainná (Chótsenlai párrafo 14)
14. Jósʼin basenkaoná nga nʼio sʼejna kjoamakjainná kʼianga ʼmiyasoán.
14 Kʼoati nʼio sʼejna kjoamakjainná kʼianga ʼmiyasoán (Heb. 10:23). Jngo tichjaa xi Barbara ʼmi xi jetsʼato 70 nó nga testigole Jeobá ma, itso: “Nʼio sʼejna kjoamakjainna kʼianga xinyasoan. Sa nʼio sa nʼio sʼejna kjoamakjainna kʼianga kui nchjaña tʼatsʼe Jeobá kao jmeni xi tso”.
NGA TOÑÁ CHOTʼAYÁ
Jósʼin basenkaoná jebi nga nʼio sʼejna kjoamakjainná (Chótsenlai párrafo 15)
15. Jósʼin basenkaoná nga nʼio sʼejna kjoamakjainná kʼianga toñá chotʼayá (kʼoati chótsenlai sén xi faʼaitʼa).
15 Kʼianga chotʼayá nga toñá kʼoati basenkaoná nga nʼio sʼejna kjoamakjainná. Jngo tichjaa xi Susan ʼmi kʼoatso josʼin basenkao kʼianga nda bʼéndajin josʼin kotʼaya. Itso: “Kʼiaa nga taingo kotʼayajian je Xo̱n xi Bájinkonná xi bʼakaole xomana xi fini. Nga lune kao nga majte kʼiaa kotʼayajian jmeni xi faʼa je kjoajtín xi satíoná nga jinle xomana, kʼoa nga kjaʼaí nichxin kui kotʼaya xi kjaʼaísanile nga toʼan”. Sa nʼio sa nʼio tísʼejna kjoamakjainle Susan nga ñaki kʼoasʼin fitjenngi josʼin tjínndajinle nga kotʼaya. Jngo tichjaa xi Irene ʼmi, xi ya tíjna jña tjen sʼendiaanile xále Niná kʼoatso nga nʼio sʼejna kjoamakjainle kʼianga kotʼaya je én xi tongini kinokjoa. Itso: “Ñaki tokʼoamana nga ʼbe nga ñaki kʼoakjoansʼin bitjoson jmeni xi tongini tso Jeobá”.f
ALIKUI JAO TJÍNNÁ NGA KUITJOSON
16. Jósʼin ʼyañá nga kʼoati basenkaoná ñá jmeni xi kitsole Jeobá je Habacuc (Hebreos 10:36, 37).
16 Nkjín ndsʼee xi jekjoatsele nga kui tjíokoyale nga kjoetʼa jme xi chon sonʼnde. Kʼoa tsakui nichxin kʼoasʼin si̱kjaʼaitsjeen ñá xi chjota nga kjibʼachxinle. Tonga je Jeobá majinle jotjío kon je choʼndale. Kuinga i̱ kitsonile je profeta Habacuc: “Je sén jebi kʼiaa kuitjoson josʼin tíjnachoa̱ nichxinle, kʼoa tísíxátíyaa saʼnda nga kuichokjetʼa, kʼoa likui tokʼoanacha. Kʼoa ninga kʼoachxinle tosi tonda tjenyatokon tijnalai, nga̱ kjoanʼio kuitjoson. Likui sikʼachxin” (Hab. 2:3). Ali tojejin Habacuc xi kʼoatsakʼinle, kʼoati nʼio basenkaoná ñá nichxin xi tiyoaa ndʼaibi. Jé Jeobá xi kʼoasʼin koanmele nga kui kinchja̱ni je pastro Pablo tʼatsʼe chjotale Cristo xi kui tjíokoyale je sonʼnde chjotse kʼianga kui kisikʼaxki̱ jmeni xi tsakʼinle Habacuc (tʼexkiai Hebreos 10:36, 37).g Ninga sakʼoa kʼoasʼin si̱kjaʼaitsjeen nga tísíkʼachxin je Jeobá, kuenta sʼiaan nga sitjoson jmeni xi tso. Kʼiakjoán nga choa̱le sitjoson.
17. Jósʼin kitjenngi jngo tichjaa je kjoafaʼaitsjen xi kitsjoale Jeobá je Habacuc.
17 Nkjín ndsʼee xi kʼoatjíosʼín jotso je Jeobá nga tjenyatokon tjíobatio ninga nʼio nkjín nó tífaʼato. Kataʼyala xi tʼatsʼe jngo tichjaa xi Louise ʼmi, xi kʼia nga nó 1939 tsakʼétsʼiakaoni nga kisixále Jeobá. Itso: “Kʼoasʼin kisikjaʼaitsjen tsakai nga tongini kjoaʼaí Armagedón nga kjesa 18 nóna, tonga tsínni kʼoakoan. Je xi nʼio tsakasenkaona jokji tífaʼato nó kʼiaa nga tsakʼexkia tʼatsʼe xi nʼio tsejta koan. Jolani Noé, Abrahán, José kao xi kjaʼaísa choʼndale Niná xi tse kiskoya nga kitjoson jmeni xi kitso Jeobá. Kʼianga tjenyatokon biyoaa basenkaoná nga majinná nga jechrian tíjna sonʼnde chjotse”. Kʼoajin tisʼin síkjaʼaitsjen xi jenkjín nó nga je Jeobá tjíosíxále.
18. Jósʼin basenkaoná jmeni xi tjín nga sʼejngo tokoán nga kjoaʼaíkao Jeobá je sonʼnde chjotse.
18 Ningalani kje faʼaijin je sonʼnde chjotse kuenta sʼiaan jmeni xi tjín. Jolani je niño, je yá, cho̱ kao chjota. Ningalani tsín tsakai ngasʼa, tonga ʼyañá nga tjín ndʼaibi nga̱ jé Jeobá kisinda (Gén. 1:1, 26, 27). Je Jeobá kʼoatso nga jngo sonʼnde chjotse kjoaʼaíkao kʼoa sitjoson. Kuiyoñá ngantsjai nichxin kʼoa tsín tijme chʼin sʼe̱ni. Kʼianga kuicho nichxin nga kjoaʼaíkao Jeobá je sonʼnde chjotse, ñaki jchañá nga kʼoakoa̱n tojosʼin ʼyaa ndʼaibi je tsojmi xi tjín (Is. 65:17; Apoc. 21:3, 4).
19. Jmé xi koasenkaoná nga nʼio sʼe̱jna kjoamakjainná.
19 Nga kjesa faʼaijin sonʼnde chjotse tosi tonda nʼio katasʼejna kjoamakjainná. Si̱kjaʼaitsjenjiaan nga tsakʼéchjíntjainá Jesús, si̱kjaʼaitsjenjiaan jokji nganʼio tjínle je Jeobá kʼoa kui ngisa kuenta sʼiaan je xále. Tsa kʼoasʼiaan jebi, kʼoati kui kjoanda sʼe̱ná je kjoanda xi sʼe̱le chjota xi makjainle kʼoa xi tsejta (Heb. 6:11, 12; Rom. 5:5).
KJOAJNDA 139 A fiya jkui nga tijnai ya sonʼnde chjotse
a Nichxin xi tiyoaa ndʼaibi, nkjín chjota xi tsín makjainle nga jngo sonʼnde chjotse kjoaʼaíkao Niná. Kʼoatso nga to kuento kʼoa nga tsínkʼia kʼoakoa̱n. Tjínjngoo tokoán ñá nga kuitjoson ngayeje jmeni xi tso Jeobá. Tonga machjén nga tosi tonda nʼio katasʼejna kjoamakjainná. I̱ kjoaʼmiya jebi kui chótʼayajiaan jméni xi koa̱n sʼiaan nga nʼio sʼe̱jna kjoamakjainná.
b Efesios 3:20: “Niná ngisa totse male sʼín ngayije kjoa jo kji xi nijé, josʼin faʼaitsjenná, totʼatsʼe je nganʼio xi síxájinná”.
c Josué 23:14: “Kʼoa ndʼaibi tojeme kuiyáa. Jon nanda ʼyao kao ngayeje ni̱ma̱no kʼoa kao ngayeje kjoabijnachonno nga nijngojin énnda xi kinchja̱ je Jeobá Nináno xi tsín kitjoson. Ñaki kitjoson ngayeje xi totʼatsaon. Nijngojin én jebi xi tsín kitjoson”.
d Isaías 55:10, 11: “Nga̱ tojo ma nga ya tjen ngʼajmi bʼani jtsí kʼoa tjon nyʼán, tsín ya bichó ijngokʼani tsa tsín kjoanla basénndále nangi, nga mantje kʼoa bitjo tsojmintje, kʼoa je chjota xi bʼéntje sʼeele na̱xi̱n kao nioxtila xi kjen, 11 kʼoakoa̱n je én xi bitjoni ndsoʼba. Alikui tokjitia nga kjoaʼaínrʼoenina; ñaki kʼoakoa̱n jmeni xi mena, kʼoa ñaki kʼoasʼin kuichotsjoá jme xá tisikasénña”.
e Alikui tsa ñaki kʼoaʼmi kʼa chjota xi bʼaxki̱ i̱bi.
f Ya jñani “profecía” tso xi faʼaitʼa je Índice de las publicaciones Watch Tower, nkjín artículo faʼaitʼa xi kui nchja̱ni tʼatsʼe én xi tongini kinokjoa. Tobʼelañá, koaan chótʼai je artículo xi ʼmi “Lo que Jehová predice se cumple sin falta”, xi faʼaitʼa revista La Atalaya xi tsʼe 1 de enero de 2008.
g Hebreos 10:36, 37: “Nga̱ jon machjénno nga jchókjoajinno, jméni nga kuinje̱sínino je kjoanisʼengi, kʼia nga jekinitjoson josʼin nga mele Niná. 37 Ngijngotjolani, je xi kjoaʼaí, kjoaʼaíní, kʼoa likui koa̱ntseyale”.