Tsee kjoanda tjenkao kʼoa tsee xi bakóyaná nga je Jeobá nixálee

Kʼianga kisʼejna Kjoajchántse xi majaoni je xijchána kitjoo ya Estonia kʼoa yaa kikatio ya Alemania kʼoa yaa kitsian, nga koanskanni sa Canadá tsangínngáijin kʼoa yaa chrian tsakiyuijin jñani tíjna ʼnde xi Ottawa ʼmi. Yaa tsakiyuijin jña kijna jngo nyʼoáxo̱ʼnda̱, nʼio ma̱ kinijcháijin yaonajin, tonga tsínkʼia koantsínnajin chjao xi kichinaijin.

Ñandia kʼianga je testigole Jeobá kichosíxatʼa je mana tsakʼéxkiale Apocalipsis 21:3 kao 4, ñaki kichokajin ni̱ma̱le jmeni xi tsakʼinyale kʼoa kinroajen ndáxko̱n. Ndi̱toon kisikʼantjaiya yaole xijchána kʼoa kisʼenngindá.

Ningalani tochoa male én inglés je xijchána tonga nʼio tsabechjí je Énle Niná. Ningalani nga nitje̱n kisixá je nʼaina jñani manandá je ki̱cha̱ xi níquel ʼmi ya Sudbury (Ontario), me to xki̱ jin nichxin fikaonajin nga mangínkʼinyasuinjin kao je ndichja xi maʼndí xi Sylvia ʼmi. Kʼoa xki̱ xomana chotʼayajtínjin je Xo̱n xi Bájinkonná. Je pana kao mana nʼio tsakinyakaona nga tsjoake̱ koan je Jeobá, kʼiaa te nóna nga kisʼe̱nngindá nga nó 1956. Nga ʼbe jokji tsjoake Jeobá je xijchána kui xi tíbasenkaona nga kʼoatisʼian tsanda an.

Kʼianga jetʼana secundaria alikui tinʼio kisʼejnani kjoamakjainna. Kʼoasʼin kisikjaʼaitsjen tsa precursor sʼin sixá tsínjinkʼia so̱kona tao̱n nga avión kjuíkoa nga kjuíkotsen jñani xin naxinandá, je xi kisʼian kuinga ya kisixá jñani fane radio, makjoanni nga jenʼio koanxon kisixá saʼnda tsín tikiña je kjoajtín. Kʼoa jé kisimiyoa chjota xi tsín bexkon je Énle Niná, tonga chaan likui tinda kisʼeni kjoafaʼaitsjenna kʼoa kui xi tsakasenkaona nga kisikatíoa miyo jebi.

Yaa Oshawa (Ontario) kikatejna. Yaa tsaʼbexkoan Ray Norman kao ndichja xi Lesli ʼmi kao xi kjaʼaísa precursor, nʼio koanndosinle xi tʼatsʼan. Nga tsaʼbe jokji tsjoa tjíole nga tjíosíxále Niná kui xi tsakasenkaona nga ngisa nda kisixále Niná nga precursor sʼin kisixá nga sá septiembre nó 1966. Nʼio tsjoa kisʼe tokoan nga kʼoasʼin kisixá, kʼoa nʼio tse kjoanda kisokosana.

TSA JE JEOBÁ TSJOÁXÁLI KʼOATʼIAIN

Nga sʼa secundaria tsoʼba koanmena nga ya kjuísixá ya Betel xi tíjna ya Toronto (Canadá). Kʼianga precursor sʼin jetisixá kʼoatsakʼinna nga ño nó kjuísixá ya Betel. Tonga nʼio koantsjoake̱ je Lesli kʼoa kʼoasʼin kisikjaʼaitsjen nga tsínkʼia tiskoeña tsa ya Betel kjuísixá. Tsakʼetsʼoale Jeobá, kiña ya Betel kʼoa nʼio ba koanna nga kisikʼéjna je Lesli.

Ya Betel yaa kisixá jña sané najño kʼoa xijekoan secretario sʼin kisixá. Kʼoa je Lesli precursora especial sʼin kisixá ya Gatineau (Quebec). Sakʼoa kui kisikjaʼaitsjen jmeni xi tísʼín Lesli kʼoa kui kisikjaʼaitsjen tsa nda kisʼian nga i̱ Betel jeʼe̱sixá. Nga koanskanni i jaʼaisíxá je Ray, je ndsʼe̱ Lesli kʼoa yaa ñatjen tsakiyonijin. Kʼoasʼin koan kiskajin ngindiaña Lesli kʼoa kʼiaa chixainjin nga 27 sá febrero nó 1971 nga tojeme tífe xi ño nó kichosixá ya Betel.

Yaa kinikasénnajin jngo jtín xi én francés nchja̱ xi tíjna ya Quebec. Xijekoan, kʼoatsakʼinna nga superintendente xi tsʼe circuito sʼin sixá kʼoa tokʼiaa 28 nóna. Kʼoakixian nga tsín kuitjosonna xá jebi, tonga nʼio tsakasenkaona jmeni xi tso Jeremías 1:7, 8. Je Lesli nkjín kʼa kitsiʼaon kʼoa alikui nanda kisʼefe, kui xi nʼio koankjáojinna tsa tsín kuitjosonnajin xá jebi. Tonga i kitsona: “Tsa je Jeobá títsjoáná xá jebi, a tsí koa̱n si̱tjosoán”. Kʼoa 17 nó nga superintendente xi tsʼe circuito sʼin kinixáijin.

Nʼio tse xá kisʼena, saʼnda tsín tikoanʼanina nga je Lesli kisisinle. Tsee jmeni xi koanjinna. Ñandia kʼianga tjín xi kichosíkjanetʼa xo̱ntjoa ndʼianajin, kʼianga kitjoa tsínni ʼya xi tjín, tojngoo ni̱si̱nyá tíjna xi tsojmi tjíoya, jolani jngo mantel, queso, nioxtila, to xi ma chine, vino, copa kʼoa jngo xo̱n kijnajin xi i̱ tso: “Tʼinkoai chjoónli nga tangínkʼetsaojion”. Nga kʼia nda chon, tonga tsee xá tjínna nga̱ nkjín kjoanokjoaya chana nga koationda, kuinga kʼoakixinnile je Lesli nga tsín kʼoakoa̱nna kjuíkoa. Alikui jokitso tonga tsaʼbeña nga ba kisʼe kon. Skanni kʼoakoanna, kʼoa kui kisikjaʼaitsjenjian jmeni xi tso Efesios 5:25, 28. Koanchoyana nga je Jeobá xi kʼoasʼin tísíkjaʼaitsjenna nga kuenta sʼian jmeni xi machjénle je chjoónna. Tsakʼetsʼoale Jeobá kʼoa xijekoan tsangínníjin, nʼio tsjoa kisʼe kon je Lesli, carro tsangínkoaijin kʼoa yaa tsangínjin jñani kijna jngo xo̱ngá. Nʼio tsjoa kisatio tokuinjin, saʼnda koanʼana nga kisikatíonda je kjoanokjoayana.

Nkjín jtín kinixatʼaijin, tjen Columbia Británica saʼnda Terranova. Nʼio tsjoa kisatio tokuinjin. Jmeni xi koanmena nga sʼa ʼndí kjiʼe̱ nga kjin naxinandá skoe, kʼoasʼin kitjoson. Koanmena kia Skuela xi tsʼe Galaad, tonga tsínkui xi koanmena nga misionero sʼin kjuísixá jñani xin naxinandá. Kʼoasʼin kisikjaʼaitsjen nga toje xi tse kjoachjine tjínle xi kuitjosonle xá jebi. Kʼoati kui kitsokjonle tsa ya ni̱kasénna ya África jñani nʼio tjín chʼin kao kjoajchán. Nda tíjna jñani tisixá.

KʼOATSAKʼINNAJIN NGA YA KOANNGÍNJIN YA ESTONIA KAO NAXINANDÁ XI YA TJÍOCHRIAN

Kʼiaa nga nó 1992 kitjoʼnde ijngokʼale xále Niná ya naxinandá jña Unión Soviética tsakʼin. Kʼoatsakʼinnajin tsa tiyondaijin nga jo misionero sʼin koanngínsi̱xáijin ya Estonia. Tsakʼetsʼoalaijin Jeobá kʼoa i tsakixón ijngokʼaijin: “Tsa je Jeobá títsjoáná xá jebi, a tsí koa̱n si̱tjosoán”. Tsangínníjin kʼoa faʼaitsjenna nga i̱ kixian: “Jótonda nga tsín ya África tínikasénná”.

Ndi̱toon kichotʼayaijin je én estonio. Nga tosʼa tjíchoa̱ sá tiyuijin ya Estonia superintendente xi tsʼe circuito sʼin kinixá ijngokʼaijin. Kʼoa 46 jtín kao grupo kinixatʼaijin ya naxinandá Estonia, Letonia, Lituania kao Kaliningrado (Rusia). Kichotʼayaníjin én letón, lituano kao ruso. Ninga ñʼai koannajin, je ndsʼee xi ya tsʼe tsakinyakaonajin kʼoa tsabechjí jokji tsakʼenelaijin yaonajin. Kʼianga nó 1999, jngo sucursal kisʼejna ya Estonia kʼoa yaa tsakatejnajinle je comité xi tsʼe Sucursal kao Toomas Edur, Lembit Reile kʼoa kao Tommi Kauko.

Nkjín ndsʼee tsaʼyaxkuinjin xi ya Siberia kinikasén. Ningalani nʼio tse kjoa jaʼatojin nga ndoyá tsakatio kʼoa nga kjin tsakatiole familiale, alikui kisikʼajenle kon. Je xi tsjoa tsakáya kon kuinga kitsoyason. Koanjinnajin nga kʼoati tsjoa sa̱tío tokuinjin ninga kjoa kuitjátojinjin.

Nga tsín tsen kinikjáyaijin jokji jaʼato nó, je chjoónna chaan kisokochʼinle, alikui ndi̱to̱n tsaʼyaijin nga kui chʼin xi fibromialgia ʼmi kisʼele. Kuinga kʼoatsakixónnijin nga ngisa nda tsa ya Canadá koanngínjin. Nga kʼoatsakʼinnajin nga ya koanngínjin Skuela xi fi Ndsʼee xi ya tjíojin Comité xi tsʼe Sucursal ya Patterson (Nueva York), kʼoasʼin kisikjaʼaitsjen nga tsín kʼoakoa̱nnajin koanngínjin. Kʼianga jetsakʼetsʼoalaijin Jeobá kʼoatsakixuínjin nga koanngínjin kʼoa kisichikontʼainnajin. Kʼiaa koanxkile je Lesli kʼianga kisʼejna skuela jebi. Kʼoa tojo kʼoasʼin kinixálaijin je Jeobá.

XIN ʼNDE KINIKASÉN IJNGOKʼANAJIN

Kʼianga nó 2008 nga jeya tiyo ijngokʼaijin ya Estonia, yaa tjen jña sʼendiaanile xále Niná kinokjoana kʼoa kʼoatsakʼinna tsa tiyondaijin nga ya República Democrática del Congo koanngínjin. Tokʼoakoanna nga kʼoatsakʼinna nga̱ kʼoatsakʼinnajin nga tiʼa si̱kasénʼénnijin nga koa̱nnyaonni. Alikui tsakʼeyanajmíle je Lesli nga kʼia, nga̱ kui xi koanmena nga nda katabajnafe. Tonga an, tsakʼetsʼoale Jeobá tsʼajnda nitje̱n nga tsakʼeyanajmíle nga nʼio kjimakjáojinna nga ya África koanngínjin.

Nga koannyaonni nga jetsakʼeyanajmíle je Lesli, i tsakixuínjin: “Jé Jeobá xi kʼoatítsoná nga ya África kjuian. Jósʼin jchañá nga kje ya mangínjián tsa tsjoani sa̱tío tokoán”. Nga jexjaʼaonjngo nó tiyuijin ya Estonia, yaa Kinsasa tsangínjin, ʼnde xi tíjna ya Congo. Nʼio naskáchon ya sucursal, kʼoa chon nyʼán nyʼán. Je xi tsakʼéjna títjon Lesli nga jekichosʼainjin jña tsakiyonijin, jngoo xo̱n xi kijnatjaole saʼnda nga kitjonijin ya Canadá. Itso xo̱n jebi: “Tsjoa tʼai tokuin tojñani tijnai”. Nʼio tsjoa kisatio tokuinjin nga tsaʼyaxkuinjin je ndsʼee, nga tsakʼinyalaijin Biblia je chjota kʼoa nga misionero sʼin kinixáijin ya ʼnde jebi. Nga jeki nichxin kui kjoanda kisʼenajin nga tsangínnixatʼaijin je sucursal xi tjío ya África, xi 13 naxinandá nchja̱ni. Kʼoasʼin tsaʼyaxkonnijin jochon nga jngó jngó ʼnde. Alikui tikui kisikjáojinña jme xi makjáojinna tsakai ngasʼa. Tosaa tsakʼailaijin kjoanda Jeobá nga ya África kisikasénnajin.

Ya Congo-Kinsasa kjaʼaí kjaʼaí kjoan tsojmi kichinaijin, jolani je cho̱ndo xi kjine chjota xi ya tsʼe. Tsínkʼia nga kui kinikjaʼaitsjainjin tsakui chi̱naijin, tonga nga tsaʼyaijin nga nʼio tsjoake je ndsʼee xi ya tsʼe, kʼoati kichotʼaijin jochine kʼoa nʼioni nda kichinenajin.

Tsangínkʼainganʼiolaijin xi kao Énle Niná je ndsʼee xi ya tsʼe naxinandá jebi kʼoa tsangínkaolaijin tsojmi xi koanchjénle. Je chjota xi kjoasi tsjoake bʼetʼale naxinandá kʼoa síkiʼaon je yánchjín kao ʼndíxti. Me tongatsʼi je ndsʼee nga ma̱ kisijchá yaole. Tokʼoakoannajin jokji kjoamakjain tjínle je ndsʼee nga kui kiskoyale nga kjoaʼáyanile je kʼien, nga tsjoake Jeobá kʼoa nga kixi fitʼale naxinandále. Nga kʼoasʼín ndsʼee jebi kui kinikjaʼaitsjainjin jósʼin tinixálaijin Jeobá kʼoa jókji nʼio tíjna kjoamakjainnajin. Tjínkʼa ndsʼee xi kisicha ndʼiale kao tsojmintjele. Kui kisikjaʼaitsjenjinna nga ngotjo nichañá jmeni xi tjínná kʼoa nga kui xi ngisa chjíle nga nda tiyoaa ngixko̱n Niná. Alikui jotso je ndsʼee ningalani tse kjoa faʼatojin. Kui xi tsakinyakaonajin nga nʼiojin koainjin kʼoa nga kichokjoajinnajin ningalani chʼin tsaotʼa sakʼoanajin.

YAA ASIA KINIKASÉNNAJIN

Xijekoan, kʼoatsakʼinnajin nga ya sucursal xi tíjna Hong Kong koanngínjin. Alikuikʼia kʼoasʼin kinikjaʼaitsjainjin nga ya ʼnde jebi koanngínjin. Tonga nga je Jeobá tsakasenkaonajin jñani xin josʼin kinixálaijin, kʼoati tjínjngo tokuinjin nga je koasenkaonajin. Kʼiaa nga nó 2013 kitjuijin ya África, ba koannajin nga kinikatiuijin je miyonajin kʼoa nga naskáchon ya África, kʼoa tsín ʼyaijin jochon ya Hong Kong.

Nʼio kjaʼaí chon ya Hong Kong nga̱ nʼio nkjín chjota tjín kʼoa xinxin tsʼe xi ya tjío. Kʼoati ñʼai koannajin nga én chino cantonés kichotʼayaijin. Tonga nʼio nda kiskoéyanajin je ndsʼee kʼoa nʼio nda kichinenajin je tsojmi xi ya tjín. Sa tse sa tsee xá kisʼe ya sucursal kʼoa nga sa chjí sa chjí koan ndʼia, je Cuerpo Gobernante xin tsakásjaiʼnde jñani kisʼejna je sucursal kʼoa tsakaténa je ndʼia xi kjio. Nga nó 2015, yaa Corea del Sur tsangínjin kʼoa tojo yaa tiyuijin saʼnda ndʼaibi. Kʼoati ñʼai kjimanajin je én xi nokjoa i̱bi. Ningalani sʼa choa manajin je én coreano, tsjoánganʼionajin nga kʼoatsonajin je ndsʼee nga sa nda sa nda nokjoaijin én jebi.

XI KOANJINNAJIN

Alikui tongantsjai nga choa ñʼai maná nga nimiyoaa tsa ʼyani, tonga koanjinnajin nga ngisaa ngotjo ʼyaxkonñá xíngiaa tsa ñá kjoásjee je miyoná kʼoa tsa nda chjoéyaa xíngiaa. Tiʼyaníjin nga meni tongóson sʼín ngatsʼi je ndsʼee, kʼoa je Jeobá nʼio ndasʼin tsakʼéndaná nga koa̱n kuinyakaongañá xíngiaa, nga si̱miyoaa kʼoa nga tsjoacha koaan xíngiaa (2 Cor. 6:11).

Kjimajinnajin nga ndatjín nga chjoéyaa toʼya chjotani tojo sʼín je Jeobá kʼoa nga jchaa jósʼin bándiaaná. Kʼianga nroajen tokuinjin kʼoa tsa kʼia nga kʼoasʼin kinikjaʼaitsjainjin jósʼin bekonnajin xi ngikʼa, kui chotʼajin ijngokʼaijin je xo̱n xi síkasénnajin je ndsʼee nga tsjoánganʼionajin. Ñaki tiʼyaníjin nga nrʼoé je Jeobá kʼianga bʼetsʼoalaijin, tsjoánganʼionajin kʼoa sínʼio tokuinjin.

Jokji tífaʼato nó, je Lesli kao an kjimajinnajin nga nʼio chjíle nga nikʼayalaijin nichxin xíngijin ningalani sakʼoa nʼio tse xá tjínnajin. Kʼoati kjimajinnajin nga ndatjín nga tiñá bijnochañá yaoná, ngisaa tsa tosʼa tichotʼayá jngo én. Nga nyaon nyaon kʼianga jemanjio, kui nikjaʼaitsjainjin jméni xi nʼio kamatsjoachaijin kʼoa bʼailaijin kjoanda Jeobá.

Xi kjoaixi alikuikʼia kʼoasʼin kisikjaʼaitsjen tsa misionero koa̱n kʼoa tsa xin naxinandá kjuía. Tonga tiʼbeña nga koaanná kʼoasʼiaan tojmeni tsa je Jeobá koasenkaoná, kʼoa nʼio tsjoa tjín tokoan nga kʼoatisʼian. Kʼoatisʼin sikjaʼaitsjen joni je profeta Jeremías nga kitso: “Kichʼanachanái, ji Jeobá” (Jer. 20:7). Kʼoatjín kjoaixi jotso én jebi. Je Jeobá tísíchikontʼainnajin kʼoa sakʼoa tsínkui choyalaijin jmeni xi títsjoánajin. Saʼnda kui kjoanda kitsjoana nga koan avión tsakatejnaya. Ngisaa nkjín ʼnde jekia tikʼoajinni jokji kisikjaʼaitsjen nga sʼa ʼndí kjiʼe̱. Jenkjín sucursal tsangínnixatʼaijin jña xinxin naxinandá. Nʼio tsjoale kjoanda je Lesli, nga̱ tsjoánganʼiona tojñani koanngínjin kʼoa kao kjoatsjoa kʼoasʼín.

Kui nikjaʼaitsjainjin ngantsjai ʼyáni xi tinixálaijin kʼoa ánni nga kʼoanʼianijin. Je kjoanichikontʼain xi tjínnajin ndʼaibi, tojngola choa̱ josʼin sichikontʼainná Jeobá nichxin xi sʼa nroa kʼianga tsjoáná ngayeje jmeni xi nimetokoán (Sal. 145:16).