Tosi tonda koakoá kjoatsjoacha

1. Jméni xi koanjinná nga tosʼa kichotʼayá je Biblia.

A FAʼAITSJENNÁ jmeni xi tsaʼyaa nga tosʼa kichotʼayá je Biblia. Tsakui nichxin tokʼoakoanná nga kisʼejinná nga tjínnile jaʼaín je Niná. Ndajin kisʼe tokoán nga tsaʼyaa nga tsín kjoañʼai síkjaʼáná Niná jñani lʼí tífaʼájnga̱. Kʼoa tsjoajin kisʼe tokoán nga kisʼejinná nga kjoaʼáyanile xíngiaa xi jekʼien kʼoa nga ya ñatjen kuiyoaa ya ʼndenaxó.

2. Kʼianga jetichotʼayai je Biblia, jmésa xi kinʼiai (Efesios 5:1, 2).

² Kʼianga jekichotʼayai je Biblia ngisajin tsjoacha koain je Jeobá kʼoa kuijin xi tsakasenkaoli nga kinitjosuin jmeni xi jekjimajinli. Kʼoa jmeni xi kichjoejin nga kinʼiai yajin kichʼangini jotso je Énle Niná. Kʼoajinti kinindayai yaoli jonʼiai kʼoa josʼin nikjaʼaitsjain nga̱ meli nga nda kuijnai ngixko̱n Niná, tojo sʼín jngo tiʼndí nga kjenngile nʼaile, kʼoajinti tinʼiai nga je Jeobá tichjenngilai (tʼexkiai Efesios 5:1, 2).b

3. Jméni xi machjén nga si̱kjaʼaitsjenjiaan.

³ Si̱kjaʼaitsjenjiaan jebi: A ngisaa tsjoake̱ ndʼaibi je Jeobá tikʼoajinni nichxin nga kisʼe̱nngindá. A kʼoasʼin sikjaʼaitsjen kʼoa a kʼoasʼian josʼín je Jeobá. Kʼoa a ngisaa bakole kjoatsjoacha je ndsʼee xi tjío ya jinjtín. Alikui si̱kinroajeen tokoán tsa tsín tikʼoakji kjoatsjoacha tibakoñá jokinʼia nga tosʼa kichotʼayá je Énle Niná. Kʼoati koan je chjotale Cristo xi tsakatio kʼianga siglo 1. Je Jesús alikui kʼoasʼin kisikjaʼaitsjen nga tsín tisikʼantjaiyani yaole chjota jebi. Kʼoati tsín kʼoasʼin sikjaʼaitsjen xi tʼatsaan (Apoc. 2:4, 7). Be nga koa̱n koako ijngokʼá kjoatsjoacha tojo kinʼia nga tosʼa kichotʼayá je Biblia.

4. Jmé xi chótʼayajiaan i̱ kjoaʼmiya jebi.

⁴ I̱ kjoaʼmiya jebi kui jchaa jméni xi sʼiaan nga ngisa tsjoacha koaan je Jeobá kao xíngiaa. Kʼoa xijekoa̱n, kʼoati jchaa jósʼin binyakaoná kʼoa jósʼin binyakao xi kjaʼaí nga kʼoanʼia.

TOSI TONDA TSJOACHA KATAMAA JEOBÁ

5, 6. 1) Jmé kjoa xi jaʼatojin je pastro Pablo kʼianga kitsoyason. 2) Jmé xi tsakasenkao nga tosi tonda kisixále Jeobá.

⁵ Tsjoa kisʼe kon je pastro Pablo nga kitsoyason, tonga kʼoati tse kjoa jaʼatojin. Tobʼelañá, xkón chon ndiaa jña tsakʼamje kʼianga kjin kikakóyason, kʼianga xo̱ngá jaʼatojin, nga ché tjín ya yandiaa, kʼoa sakʼoa totaon tsabe je chjota xi jtike (2 Cor. 11:23-27). Kʼoa je chjotale Cristo sakʼoa likui tsabechjí jmeni xi kisʼin je pastro Pablo nga tsakasenkao (2 Cor. 10:10; Filip. 4:15).

⁶ Jmé xi tsakasenkao Pablo nga tosi tonda je Jeobá kisixánile. Kʼianga kiskotʼayajin xo̱n escritura tsabe jokjoan Jeobá, koanjinle josʼin tsakasenkao kʼoa ñaki tsakʼéjngo kon nga tsjoake (Rom. 8:38, 39; Efes. 2:4, 5). Je Pablo kʼoati nʼio tsjoake koan je Niná kʼoa kʼoasʼin tsakakóni nga tsjoake kʼianga kisisinle chjotale Cristo (Heb. 6:10).

7. Jméni xi koasenkaoná nga ngisa tsjoacha koaan Niná.

⁷ Kʼianga ngisa tsjoacha koaan je Niná machjén nga kjitʼa chótʼayá je Biblia. Kʼianga ñandia ñandia kʼoéxkiaa je Biblia, si̱kjaʼaitsjenjiaan jméni xi bakóyaná tʼatsʼe Jeobá. Si̱kjaʼaitsjenjiaan jebi: “Jósʼin bakó texto jebi nga tsjoakena Jeobá. Kʼoa jméni xi sʼian nga koakoa nga tsjoake̱ je Jeobá”.

8. Jósʼin basenkaoná nga bʼetsʼoaa kʼianga ngisa tsjoacha maa je Niná.

⁸ Kʼianga kʼoaʼmilee je Jeobá jotjín tokoán kʼianga bʼetsʼoalee ngisaa tsjoacha maa (Sal. 25:4, 5). Kʼoa je nrʼoéná (1 Juan 3:21, 22). Jngo tichjaa xi Asia tsʼe, xi Khanhc ʼmi, itso: “Tsjoake̱ koan je Jeobá nga koanjinna jmeni xi tso je Biblia. Tonga ngisaa titsjoake̱ koanngáña nga kinrʼoéna nga tsakʼetsʼoale, kʼoa kui xi tsakasenkaona nga kui kʼoakisʼian jmeni xi sasénle”.

TOSI TONDA TSJOACHA KATAMAA XÍNGIAA

9. Jósʼin tsakakó Timoteo nga tsjoake koan chjotale Cristo.

⁹ Kʼianga jejngo jao nó jaʼato nga chjotale Cristo koan je Pablo kʼiaa tsabexkon Timoteo. Je Timoteo nʼio tsjoake koan Jeobá kao chjota. Nga koanskanni, je Pablo i kitsole je chjotale Cristo xi Filipos tsʼe: “Niʼyajin xi tjínna xi tikʼoasʼin ngóson tjínkon joni Timoteo, nga ñaki síkjáokeno” (Filip. 2:20). Je Pablo ali tsakuijin kisikʼaxki̱ nga nʼio nda male tsjoá kjoanokjoaya je Timoteo kʼoa nga nʼio nda male bʼéndajin je kjoa. Kui kisikʼaxki̱ jokji tsjoake je chjotale Cristo. Kʼoa je jtín ñaki kiskoyajinle nga kichosíxatʼa je Timoteo (1 Cor. 4:17).

10. Jósʼin tsakakó je Anna kao xʼinle nga tsjoake je ndsʼee.

¹⁰ Ñá kʼoati fasjailee josʼin binyakoaa je ndsʼee (Heb. 13:16). Si̱kjaʼaitsjenla ijngokʼá tʼatsʼe Anna, xi tsaʼyaná ya kjoaʼmiya xi jaʼato. Je Anna kao xʼinle kisíxatʼaa je ndsʼee nga jejaʼato je jtsíntjao̱nʼio kʼoa tsabee nga chixoya ndʼiale kʼoa nga tsínle najño xi kʼoa̱kjá nga̱ koanjndí ngayeje najñole. Je Anna kʼoatso josʼin tsakinyakao. Itso: “Kichʼaníjin najñole kʼoa tsakaneníjin. Kinixjaʼainíjin, tsakjaxkóyaníjin kʼoa kʼiaa tsangínkaonilaijin. Ningalani likui nʼio tse josʼin tsakinyakoaijin tonga ndʼaibi miyo chobaijin”. Kui kʼoakisʼinni je Anna kao xʼinle nga tsjoake je ndsʼee (1 Juan 3:17, 18).

11. 1) Jósʼin bichómani nga bakoá kjoatsjoacha. 2) Tojo tso Proverbios 19:17, jósʼin síkjaʼaitsjen Jeobá kʼianga bakolee kjoatsjoacha xíngiaa.

¹¹ Kʼianga bakolee kjoatsjoacha xíngiaa majinle nga kʼoatinʼia josʼín je Jeobá. Tonga tsakui nichxin tsínkʼia jchaa jokji chjí be xi ngikʼa jmeni xi nʼia kʼianga binyakoaa. Je tichjaa Khanh, xi kanikʼaxki̱ná ya párrafo 8, alikui chajinle jotjín chjota tsakinyakao. Itso: “Nʼio tsjoale kjoanda ngatsʼi je tichjaa xi kikaona kʼianga kixinyasoan. Tjao tsabena, jaʼaikʼána, kisikjenna kʼoa faʼaisíkatío ijngokʼanina ndʼiana. Ndʼaibi majinna nga tse kjoama̱ tsakʼéngi nga kʼoakisikaona. Kuijin kʼoakisʼinni nga tsjoakena”. Tonga alikui tongatsʼi ndsʼee nga tsjoáná kjoanda nga binyakoaa. Je Khanh i tsosa tʼatsʼe je xi tsakinyakao: “Tsa kʼoalani koa̱nna koasenkaongajaoña ngatsʼi tichjaa, tonga alikui ʼbe kʼa jñani tjío. Tonga je Jeobá be jñani tjío kʼoa kʼoaxinle nga katasíchikontʼain”. Je Jeobá kuenta sʼín ninga tochoa jokji binyakoaa je xíngiaa. Be nga tse kjoama̱ sʼenginá jmeni xi nʼia kʼoa mele nga tsjoángajaoniná (tʼexkiai Proverbios 19:17).d

12. Je ndsʼee xi jekisʼenngindá, jósʼin koakole kjoatsjoacha je jtín (kʼoati chótsenlai sén xi faʼaitʼa).

¹² Tsa jekʼinsʼenngindái jósʼin koakui nga tsjoachai je ndsʼee xi tjío ya jinjtín. Kʼiaa nga kuisenkoai. Jngo ti xi Jordan ʼmi, kui kiskonangile xi chjotajchínga sʼin tíjna jmé xi koa̱n sʼin nga tsjoánganʼiole je ndsʼee xi tjío ya jinjtín. Je xi chjotajchínga sʼin tíjna kʼoakitsole nga nda tísʼín nga tíbasenkao ndsʼee, kʼoa kitsjoale kjoafaʼaitsjen josʼin koa̱n koasenkaosa. Kʼoakitsole nga xátí katabichó ya Ndʼia jña chotʼayá ánni nga koa̱n sitiʼndasíni xi ngikʼa, nga katatsjoá comentariole, nga ya katatsoyason ya jtín jñani bʼakaole, kʼoa nga katabásjaile josasʼin koa̱n tsjoánganʼiole je ndsʼee. Kʼianga kisitjoson ti jebi jmeni xi tsakʼinle ngisaa tsjoake koan je ndsʼee. Kʼoati koanjinle nga je xi siervo ministerial ma, jé xi tokʼoa jebinyakao je ndsʼee, ali tokʼiajin kʼoasʼín nga jekui xá tjoéle (1 Tim. 3:8-10, 13).

13. Jmé xi tsakasenkao je Christian nga chjotajchínga sʼin tsakʼejna ijngokʼa.

¹³ A saje siervo ministerial koain axo chjotajchínga sʼin tsakijnai tsakai. Je Jeobá alikui chajinle josʼin tsakakolai kjoatsjoacha je ndsʼee (1 Cor. 15:58). Kuenta tísʼín nga tosi tonda tibakolai kjoatsjoacha je ndsʼee. Jngo ndsʼee xi Christian ʼmi alikui tinda kisʼeni kon nga tsín tichjotajchínga sʼin tsakʼejnani. Tonga alikui kisikʼajenle kon, itso: “Ningalani tsín tichjotajchínga sʼin tsakatejnaña kʼoatsakʼe tokoan nga tojo kʼoasʼin sixále Jeobá jokji tjen kʼoakoa̱nna”. Nga jeki nichxin, chjotajchínga sʼin tsakʼejna ijngokʼa. Kʼoasʼin kisikjaʼaitsjen nga tsín tikʼoakoa̱nnile nga chjotajchínga sʼin kʼoéjna. Itso: “Kui kisikjaʼaitsjen tsa je Jeobá xi títsjoáʼndena nga koasenkoa je jtín, sitjosonña xá jebi nga̱ tsjoake̱ña je Jeobá kao je ndsʼee”.

14. Jmé xi bakóyaná jokitso jngo tichjaa xi Georgia tsʼe.

¹⁴ Kʼoati bakolee kjoatsjoacha je chjota xi tsín kotʼaya je Énle Niná (Mat. 22:37-39). Tobʼelañá, jngo tichjaa xi Georgia tsʼe xi Elena ʼmi, itso: “Tokui bitjoxinyasonña ngasʼa nga tsjoake̱ je Jeobá. Tonga nga ngisa tsjoake̱ koan je Niná kʼoati ngisa tsjoake̱ koan je chjota. Kui kisikjaʼaitsjen jme kjoa xi tjíofaʼatojin kʼoa jméni xi koa̱nndosinle. Nga kʼoasʼin kisikjaʼaitsjen ngisaa koanmena tsakasenkoa” (Rom. 10:13-15).

KJOANDA XI TJENKAO NGA BAKOLEE KJOATSJOACHA XÍNGIAA

15, 16. Tojosʼin matsen je sén, jmé kjoanda xi sokóná nga bakolee kjoatsjoacha xíngiaa.

¹⁵ Kʼianga bakolee kjoatsjoacha je ndsʼee kʼoati be je xi kjaʼaí chjota. Kʼianga koan chʼin COVID-19, je Paolo kao chjoónle tsakinyakao je tichjaa xi jejchínga nga tsakakóyale josʼin kisichjén je celularle kʼoa tsa tabletale kʼianga kitsoyason. Jngo tichjaa jebi xi nʼio ñʼai male tsakai, tonga nga jekoanle kisichjén celularle kao tabletale, kʼoakitsole xínkjín nga katabatiojtín nga kjoaʼaítsjenya Kjoabiyale Cristo. Kʼoa 60 koanni xi videoconferencia kiskotsenle nga tsakatiojtín. Je tichjaa kao xínkjín nʼio tsakinyakao jmeni xi kisʼin Paolo kao chjoónle. Je tichjaa itso xi kiskile je ndsʼee: “Niná xi katabʼéchjíno nga binyakaonáijin xi jejchíngaijin. Alikui cha̱jinna nga mandosinlaijin Jeobá, kʼoa nga tsejta koaon nga tsakʼinyanáijin”.

¹⁶ Nga kʼoatsakʼinle Paolo nʼio tse jmeni xi koanjinle. Koanjinle nga ngisa chjíle nga bakolee kjoatsjoacha xíngiaa tikʼoajinni jokji kjoachjine tjínná kʼoa tsa jmeni xi maná nʼia. Itso: “Superintendente xi tsʼe circuito koan choatse, alikui tifaʼaitsjennile je ndsʼee jotso kjoanokjoaya xi kitsjoa, tonga faʼaitsjenle josʼin tsakasenkoa”.

17. ʼYásani xi kʼoati binyakao nga bakoá kjoatsjoacha.

¹⁷ Kʼianga bakoá kjoatsjoacha tiñá binyakaoniná. Kʼoakoan jngo ndsʼee xi Nueva Zelanda tsʼe, xi Jonathan ʼmi. Ñandia nga xoto tsabee jngo ndsʼee xi precursor sʼin tísíxá nga toje títsoyason nga nyisen. Kʼoasʼin tsakʼéndajin nga ñatjen kuitsoyason nga xoto maxon. Alikui koanjinle tsa tije koasenkaoni nga kʼoasʼin kitsjoanganʼiole je ndsʼee nga ñatjen kitsoyason. Je Jonathan itso: “Alikui tsjoake̱ nga xinyasoan, tonga nga tsaʼbe nga nʼio nda male tsoyason je ndsʼee kʼoa nga nrʼoé je chjota kui xi tsakasenkaona nga tsjoake̱ koan nga kixinyasoan. Kʼoati nʼio koanmiyosa je ndsʼee, jé tsakasenkaona nga kao kjoatsjoa kixinyasoan, nga ngisa nʼio kisʼejna kjoamakjainna kʼoa nga ngisa koanmiyosa je Jeobá”.

18. Jméni xi mele Jeobá nga sʼiaan.

¹⁸ Je Jeobá kui xi mele nga tsjoacha katamaa kʼoa nga tsjoacha katamaa je ndsʼee. Tojosʼin tiʼyaa, nga ngisa tsjoacha koaan je Jeobá machjén nga kʼoéxkiaa je Biblia, si̱kjaʼaitsjenjiaan jme xi bʼexkiaa kʼoa ntsjaintsjai kʼoétsʼoaa. Nga kuinyakoaa je ndsʼee kʼoasʼin koakonilee nga tsjoachaa. Kʼianga ngisa tsjoacha koaan Jeobá, ngisaa miyoná koa̱n kʼoa ngisaa jtín sʼin kuiyoaa kao je ndsʼee. Kʼoa miyole Niná koaan ngantsjai nichxin.