Jméni xi sʼiaan nga tosi tonda tsjoacha koaan xíngiaa

1, 2. 1) Ánni kʼoakitsoni je pastro Pablo nga je kjoatsjoacha xi ngisa títjon tíjna. 2) Jmé xi chótʼayajiaan i̱ kjoaʼmiya jebi.

KʼIANGA kui kinchja̱ni je pastro Pablo xi tʼatsʼe kjoamakjain, kjoachoya kao kjoatsjoacha, kʼoakitso nga kui kjoatsjoacha xi ngisa títjon tíjna (1 Cor. 13:13). Kuinga kʼoakitsoni nga̱ je kjoachoya xi tjínná kʼoa kao jmeni xi makjainná ndʼai, kʼiaa kuitjoson nga jeʼndenaxó koa̱n Sonʼnde. Tonga je kjoatsjoacha alikuikʼia kjoetʼa, nga̱ tosi tonda tsjoacha koaan je Jeobá kao je xíngiaa tokʼia saʼndani.

² Tjínnená koakoá kjoatsjoacha ngantsjai, kuinga jan koya tjínni xi chótʼayajiaan i̱ kjoaʼmiya jebi. Xi títjon, ánni nga tjínnenile tsjoacha koaan xíngiaa. Xi majaoni, jósʼin koakoá nga tsjoacha xíngiaa. Kʼoa xi majanni, jósʼiaan nga tosi tonda tsjoacha koaan xíngiaa.

ÁNNI NGA TJÍNNENILE TSJOACHA KOAAN XÍNGIAA

3. Ánni tjínnenile nga tsjoacha koaan je xíngiaa.

³ Ánni nga nʼio chjínile nga tsjoacha koaan xíngiaa. Kuinga kʼoasʼin bakoñá nga chjotatjenngile Cristo maa. Je Jesús i kitsole chjotatjenngile: “Kʼuisʼin skoe̱ ngatsʼi nga jon nío chjotana, tsa kʼoasʼin matsjoachao xíngio” (Juan 13:35). Xi ijngosani, je kjoatsjoacha jtín síkatíoná. Kuinga i̱ kitsoni je Pablo: “Je kjoatjaocha xi nda bʼékjaoná, kʼoa síjngoná” (Col. 3:14). Ijngosa koya anni nga nʼio chjínile nga tsjoacha koaan xíngiaa, kuinga kʼoakitso je pastro Juan nga tjínnele tsjoacha koaan je ndsʼee (1 Juan 4:21). Kʼianga tsjoachaa je ndsʼee kʼoasʼin bakoñá nga tsjoachaa je Jeobá.

4, 5. Jngo choa̱ tʼejnai jósʼin mangóson nga tsjoachaa je Niná kʼoa nga tsjoachaa je ndsʼee.

⁴ Jósʼin mangóson nga tsjoachaa je Niná kʼoa nga tsjoachaa je ndsʼee. Kʼianga koa̱njinná jebi, kataʼyala josʼin síxá je ni̱ma̱ná kao je yaoná. Jngo chjinexki kʼoasʼin beni jósʼin tísíxá ni̱ma̱le jngo chjota kʼianga kotʼa je naxánjínle ntsja. Jmé xi bakóyaná choa̱ jebi.

⁵ Tojo sʼín chjinexki jebi nga kʼoasʼin kotʼani je ni̱ma̱le chjota tsa nda tísíxá kʼoa tsa mai, kʼoatisʼinni xi kao ñá, kʼoasʼin jchañá tsa tsjoacha kjoaixiaa je Jeobá nga kuenta sʼiaan jokji tsjoachaa je ndsʼee. Tsa tsín tikʼoakji tsjoachañá je ndsʼee jokji tsjoachaa ngasʼa kʼoajinniti kjimaa xi kao Jeobá. Tonga tsa tibakolee je ndsʼee nga tsjoachaa, kui xi tsonile nga tojo nʼio tsjoachaa je Jeobá.

6. Ánni nga tjínneniná si̱kjaʼaitsjenjiaan tsa tsín tikʼoakji tsjoachañá je ndsʼee jokji tsjoachaa ngasʼa (1 Juan 4:​7-9, 11).

⁶ Machjén nga si̱kjaʼaitsjenjiaan tsa tojo kʼoakji tsjoachaa je ndsʼee jokji tsjoachaa ngasʼa, nga̱ kʼoati ya jchanile tsa tojo kʼoakji tsjoachaa je Jeobá. Kui bakó jebi jmeni xi kitso je pastro Juan, nga i̱ kitso: “Je xi ndsʼe̱ tsabeni xko̱n, kʼoa tsín tjaoke ndsʼe̱, jósʼin koa̱nni nga tjaoke koa̱nni Niná, xi tsín tsa tsabeni xko̱n” (1 Juan 4:20). Kui bakóyaná jebi nga tokʼiaa ndasʼin kuiyoaa ngixko̱n Jeobá tsa tsjoacha koaan je xíngiaa (tʼexkiai 1 Juan 4:​7-9, 11).b

JÓSʼIN KOAKOÁ NGA TSJOACHAA XÍNGIAA

7, 8. Jósʼin koakoá nga tsjoachaa je xíngiaa.

⁷ Ya Biblia nkjín kʼa faʼaitʼa je kjoatéxoma xi i̱ tso: “Katamatsjoachao xíngio” (Juan 15:​12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Je kjoatsjoacha yaa ni̱ma̱ná nroajinni. Nga tsjoacha xíngiaa yaa bakoñá jmeni xi bixoán kʼoa jmeni xi nʼia.

⁸ Nkjín koya josʼin bakolee xíngiaa nga tsjoachaa. Ya Biblia faʼaitʼa kʼa choa̱ jmeni xi koa̱n sʼiaan. Itso: “Cho̱bakao xíngio xi kjoakixi” (Efes. 4:25). “Nyʼán tiyokao xíngio” (Mar. 9:50). “Ngisa títjon jchaxkón xikʼa joni tsa tijonnio” (Rom. 12:10). “Chjoétjao xíngio” (Rom. 15:7). “Tichatʼa ngaʼi̱ngajánlao xíngio” (Col. 3:13). “Tinyakaongañáo kjoa xi jo chʼá sʼin kjinele xíngio” (Gál. 6:2). “Tijetakon xíngio” (1 Tes. 4:18). “Tʼaisalao nganʼio xíngio” (1 Tes. 5:11). “Tʼetsʼoantjao xíngio” (Sant. 5:16).

9. Ánni kʼoabixónsíñá nga tsjoachaa xíngiaa kʼianga nijetakoán (kʼoati chótsenlai sén xi faʼaitʼa).

⁹ Kataʼyala jmé xi tsoyanile nga “tijetakon xíngio” kitso Pablo. Ánni kʼoabixónsíñá nga kʼoasʼin bakonilee kjoatsjoacha xíngiaa kʼianga nijetakoán. Jngo xo̱n xi tʼatsʼe Biblia nchja̱ni kʼoatso nga je én griego xi kisichjén Pablo nga “tijetakon xíngio” tso, kui xi tsonile nga ya tjen tijnakoaa jngo chjota kʼianga kjoa faʼatojin. Kʼianga nijetakoán jngo ndsʼee xi kjoa tífaʼatojin bisenkaoñá nga tosi tonda kixi katafitʼale Niná kʼoa kʼoasʼin bakonilee nga tsjoachaa (2 Cor. 7:​6, 7, 13).

10. Ánni kʼoabixónsíñá nga kʼoasʼin bakoñá kjoamatokon kʼianga ninʼioá kon xíngiaa.

¹⁰ Nga ninʼiojiaan xíngiaa kʼoasʼin bakoñá nga tjínná kjoamatokon. Kʼianga mamachaa jngo chjota xi kjoañʼai tífaʼá bisenkaoñá kʼoa fasjailee josʼin bʼainganʼiolee. Tojosʼin tiʼyaa, nga mamachaa jngo chjota ninʼioñá kon. Kʼoati sʼín je Jeobá. Je pastro Pablo kʼoakitso nga sínʼio kon je chjota nga̱ mamake. Kʼoakitso nga je Jeobá jé “Nʼai xi tsʼe kjoamatakon, kʼoa Niná xi tsʼe ngayije kjoanijetakon” (2 Cor. 1:3). Kʼianga “Nʼai xi tsʼe kjoamatakon” kitso Pablo kui xi kitsonile nga mamakená je Jeobá kʼoa nga tʼatsʼe nroani je kjoamatokon. Je Jeobá basenkaoná kʼoa sínʼio tokoán kʼianga tse kjoa bitjatojiaan (2 Cor. 1:4). Tobʼelañá, kʼianga fatiná nda sʼená kʼianga nandá ʼyoá. Kʼoatisʼinni xi kao Jeobá, nda sʼe tokoán nga sínʼiojinná kʼianga kjoa bitjatojiaan. Jméni xi koasenkaoná nga koakoá kjoamatokon kʼoa nga si̱nʼioá kon je xíngiaa tojo sʼín je Jeobá. Kuinga koa̱nná josʼin si̱nʼioá kon xíngiaa.

11. Tojo tso Colosenses 3:12 kao 1 Pedro 3:​8, jmé xi koasenkaoná nga tsjoacha koaan je ndsʼee kʼoa nga si̱nʼioá kon.

¹¹ Jméni xi koasenkaoná nga tosi tonda tsjoacha koaan xíngiaa kʼoa nga si̱nʼioá kon. Kʼiaa nga si̱jinlee yaoná jotjío kon xíngiaa, nga tsjoacha koaan kʼoa nga koakolee kjoanda (tʼexkiai Colosenses 3:12;c 1 Pedro 3:8d). Kʼianga bakolee kjoamatokon je ndsʼee binyakaoñá kʼianga kjoa faʼatojin. Je Jesús i kitso: “Xi nʼio tjínle ni̱ma̱ná, kui xi nchja̱ni ndsoʼbaa. Je xi nda chjota, kjoanda xi sʼín, nga̱ kjoanda tjínle ni̱ma̱le” (Mat. 12:​34, 35). Kʼianga ninʼioá kon je ndsʼee kʼoasʼin bakoñá nga tsjoachaa.

JÓSʼIAAN NGA TOSI TONDA TSJOACHA KOAAN XÍNGIAA

12. 1) Ánni nga tsín ya chjénnginilee josʼín chjota nga tsín bakó kjoatsjoacha. 2) Jméni xi chótʼayajiaan xi fisani.

¹² Ngatsʼiñá nga mená si̱tjosoán je kjoatéxoma xi tso: “Tjaocha katamaa xíngiaa” (1 Juan 4:7). Je Jesús kʼoakitso nga nʼio nkjín chjota xi tsín titsjoake koa̱nni xínkjín (Mat. 24:12). Tonga alikui xi kitsonile nga nkjín chjotatjenngile xi tsínti koakoni kjoatsjoacha. Ninga kʼoalani, alikui ya chjénngilee josʼín chjota nga tsín bakó kjoatsjoacha. Jósʼin jchañá tsa tsjoachaa kjoaixiaa je ndsʼee. Kataʼyala.

13. Jósʼin bakoñá nga tsjoacha kjoaixiaa je ndsʼee.

¹³ Jonʼia kʼianga jme kjoa sʼená yaa bakoñá tsa tsjoacha kjoaixiaa je ndsʼee (2 Cor. 8:8). Kʼianga kui kinchja̱ni xi tʼatsʼe jebi, je pastro Pedro i kitso: “Nʼio katamatsjoachao xíngio, nga̱ nkjín kjoatsʼen bʼéʼmatʼain kjoatjaochabe” (1 Ped. 4:8). Yaa bakoñá jonʼia tsa tsjoacha kjoaixiaa je ndsʼee kʼianga kui kʼoasʼín jmeni xi tsín sasénná kʼoa tsa josikaoná.

14. Tojo tso 1 Pedro 4:​8, jósʼin tjínnele koakoá nga tsjoachaa xíngiaa. Jngo choa̱ tʼejnai.

¹⁴ Chótʼayajinla jmeni xi kitso je pastro Pedro. Kʼianga fitsʼiani ya versículo 8, itso: “Nʼio katamatsjoachao xíngio”. Kʼianga én griego, je én xi “nʼio” sʼin jaʼatoya, kui nchja̱ni nga nkjínsa koya josʼin koakolee nga tsjoachaa xíngiaa. Kʼoa jña fetʼani versículo jebi kʼoatso nga “nkjín kjoatsʼen bʼéʼmatʼain kjoatjaochabe”. Je kjoatsjoacha yaa mangóson jngo najño xi te kji xi bʼéʼma ngayeje jée. Kʼianga “bʼéʼmatʼain” tso versículo jebi kui xi tsonile nga nichatʼalee xíngiaa. Tojo ma jngo najño nga bʼéʼma jñani jndí kji, tikʼoasʼinni, kʼianga tsjoachaa xíngiaa alikui kui kuenta nʼia jñani tsín nda sʼín.

15. Jósʼin bichómani nga tsjoacha ma kjoaixiaa xíngiaa (Efesios 4:32).

¹⁵ Kʼianga tsjoachaa xíngiaa nichatʼalee kʼianga kui kʼoasʼín jmeni xi tsín sasénná, ninga sakʼoa ñʼai maná (tʼexkiai Efesios 4:32).e Nga nichatʼalee xíngiaa kʼoasʼin bakoñá nga tsjoachaa, kʼoa je Jeobá sasénle nga kʼoanʼia. Jmésa xi koasenkaoná nga tosi tonda si̱chatʼalee xíngiaa kʼoa nga tsínkui kuenta sʼiaan jñani tsín nda sʼín.

16, 17. Jmésani xi koasenkaoná nga si̱chajiaan tsa tsín sasénná josʼín je ndsʼee. Jngo choa̱ tʼejnai (kʼoati chótsenlai sén xi faʼaitʼa).

¹⁶ Kui kuenta sʼiaan jñani nda sʼín xíngiaa kʼoa tsínkui kuenta sʼiaan jñani chʼao sʼín. Tobʼelañá, tsa mená foto chʼa̱sjee nga tiyojtián kao ndsʼee nga tibʼetsaojiaan, nga mená nda katabitjo nkjín kʼa chʼasjee foto. Tonga nga tjínkʼa jñani tsín nda matsen je foto, tonichajonñá kʼoa tokui nikatioá xi nda bitjo.

¹⁷ Je foto xi chʼasjee kui xá nikatíotjaoñá nga nikjaʼaitsjenjiaan jokji tsjoa kisʼe tokoán nga tsakʼetsaojiaan nga kui nichxin. Tonga tsa kuilani kʼoakisʼin jngo ndsʼee xi tsín kisasenná, machjén nga si̱chajiaan tojo nikoaa je foto xi tsín nda bitjo nga nichajoaan (Prov. 19:11). Nga jeʼyaxkoaan ndsʼee jebi kʼoa nga nda mangínkoaa kui xi koasenkaoná nga tsínkui kuenta sʼiaan jñani tsín nda sʼín.

ÁNNI NGA NʼIO CHJÍNILE NGA TSJOACHA KOAAN XÍNGIAA NDʼAIBI

18. Jmé xi ngisa tínchja̱ni kjoaʼmiya jebi.

¹⁸ Ánni nga tosi tonda tsjoacha koa̱nñá xíngiaa. Tojosʼin kaʼyaa, nga tsjoachaa xíngiaa kʼoasʼin bakoñá nga tsjoachaa je Jeobá. Jósʼin koakoá nga tsjoachaa je ndsʼee. Kʼiaa nga si̱nʼioá kon, tonga kʼoati machjén nga koakoá kjoamatokon. Kʼoa nga tosi tonda tsjoacha koaan xíngiaa machjén nga si̱chatʼalee tsa jñani tsín nda sʼín.

19. Ánni nga nʼio chjínile nga tsjoacha koaan xíngiaa ndʼaibi.

¹⁹ Ánni nga nʼio chjínile nga tsjoacha koaan xíngiaa ndʼaibi. Kataʼyala nga̱ i̱ kitso Pedro: “Machrianle nga kjoetʼa ngayije kjoa. […] Nʼio katamatsjoachao xíngio” (1 Ped. 4:​7, 8). Kʼianga tsakjákao Jesús je chjotatjenngile kʼoakitsole jokoa̱n nga to jetífikjetʼa nichxin. I kitsole: “Chʼao skoe̱konno ngatsʼi naxinandá xi tʼatsʼan” (Mat. 24:9). Ningalani koaitjenngikená je chjota, tjínnele nga jtín sʼin kuiyoaa ngatsʼiaa nga si̱xálee Jeobá. Je Na̱i kui xi mele nga xkoa̱ya kuiyoaa, tonga nga tsjoachaa xíngiaa alikui je kuinje̱le nga̱ je kjoatsjoacha jtín síkatíoná (Col. 3:14; Filip. 2:​1, 2).