A ʼyaní

Jókji carreta xi tíjnaya je chjota etíope nga kichokonle je Felipe

KʼIANGA én griego je xi “carro” sʼin faʼatoya ya Traducción del Nuevo Mundo kjaʼaí kjaʼaí kjoan carreta xi nchja̱ni (Hech. 8:​28, 29, 38). Je xi tíjnaya chjota etíope xi tsakjákaonajmí je Felipe ali tsakuijin carreta xi síchjén chjota nga fi kjoajchán kʼoa ali tsakuijin xi sítokanacha. Je xi tíjnaya chjota jebi ngisaa jekji. Kataʼyala ánni nga kʼoabixónñá.

Je chjota etíope xángʼa kisʼele kʼoa kjin jaʼaini. Chjota jebi “xángʼa tjínle xi ya síxákao je Candace, xi reina sʼin tíjnale je chjota etíope, jé kjinentsja ngayeje kjoanyinále” (Hech. 8:​27, TNM). Jñani Etiopía tsakʼin nga kui nichxin yaa jñani Sudán ʼmi saʼnda jña Egipto ʼmi ndʼaibi. Ningalani tsín tongóson kjoan carreta xi tsakʼejnaya chjota etíope jebi, nkjínjin tsojmi tsakʼa nga kjin ki. Kʼianga kui nichxin kjaʼaí kjaʼaí kjoan xi tsakatioya chjota nga kjin ki. Jolani je carreta xi ño mani ruedale. Jngo xo̱n xi tʼatsʼe libro xi tsʼe Hechos nchja̱ni itso: “Je carreta jebi ngisaa nkjín tsojmi chóya, ngisaa nda tsakatioya chjota kʼoa tsakui nichxin ngisa kjin ki”.

Je chjota etíope tíbʼéxkia nga kichokonle Felipe. Je Biblia kʼoatso nga je “Felipe kitokakonle chjotabe. Kinrʼoéle nga tíbʼéxkia xo̱nle Isaías” (Hech. 8:30). Je carreta xi chjota tsakatioya nga kui nichxin, alikui nʼio ki, to xa̱nxa̱n ki. Kuinga koan tsakʼéxkiani je chjota etíope kʼoa koan kichotjennginile Felipe.

Je chjota etíope kʼoakitsole “Felipe nga katafikinya karrole, nga ya katabʼejnatʼale nga je” (Hech. 8:31). Je carreta xi kisitoka chjota tsakinyandoni nga kisixákao. Tonga je carreta xi chjota tsakatioya ngisaa koantiʼnde, kuinga koan tsakatioyani je chjota etíope kao Felipe.

Tojo tso ya capítulo 8 xi tsʼe Hechos kʼoa jmesani xi ʼyaa jokoan nichxin kjoatse, alikui tikʼoasʼin faʼaitʼani je chjota etíope je xo̱n xi nichjén nga jngo carreta xi sítoka chjota tíjnaya kʼoa tsakuije̱ xi machjén nga fi kjoajchán. Tosaa kʼoasʼin matsen nga jngo carreta xi jekji tíjnaya.