A koaan nda sa̱tío tokoán ningalani kjoajchán kao kjoasi tjín
Je Gary sondado koan ngasʼa kʼoa itso: “Nga kjesa kotʼayajian Biblia kui kisikjaʼaitsjen ánni nga kʼoasikji kjoa tjínni, nga tsín kixi jmeni xi matʼain chjota kʼoa nga kjoatsʼen tjín. Tonga ndʼai alikui tikui sikjaʼaitsjenña nga̱ ʼbeña nga je Jeobá sindachon sonʼnde”.
Nkjín chjota xi kʼoatjío kon jotjín kon je Gary. Kataʼyala josʼin tjíobinyakao jme xi tso Biblia.
JE BIBLIA ITSO: “Nga̱ ji, Jeobá, nda chjotai kʼoa tijnandaní nga nichatʼai” (Salmo 86:5).
JÓSʼIN BASENKAONÁ: “Jmeni xi tso texto jebi nda bʼé tokoan, nga̱ kui tsoya nga tjínle kjoamatokon je Jeobá. ʼBeña nga sichatʼana jmeni xi kisʼian nga kia kjoajchán” (Wilmar, Colombia).
JE BIBLIA ITSO: “Ngʼajmi chjotse kʼoenda kao jngo sonʼnde chjotse; kʼoa je kjoa xi jaʼato jetondiaa jchajin, alikui tikui kjoaʼaítsjennile ni̱ma̱ná” (Isaías 65:17).
JÓSʼIN BASENKAONÁ: “Kui tjínna estrés kao depresión kʼoa kui kʼoakoanni nga̱ tsaʼbeña jmeni xi koan nga kia kjoajchán. Tonga jmeni xi tso texto jebi kui síkjaʼaitsjenjinna nga kuicho nichxin nga je Jeobá kjoaʼaxin jmeni xi chʼao bʼé tokoan. Alikui tikui kjoaʼaítsjennina. Nda sʼe̱ni tokoan” (Zafirah, Estados Unidos).
JE BIBLIA ITSO: “Nga kui nichxin, je xi kixi nda kʼoéjna, kʼoa nʼio tse kjoanyʼán sʼe̱ saʼnda nga koa̱ntsín je sá” (Salmo 72:7).
JÓSʼIN BASENKAONÁ: “Kjitʼa sikjaʼaitsjenjian jmeni xi tso texto jebi. Tongichoasa cha nga tsín tikui kjoaʼaítsjennina joma kʼianga satío kjoajchán kʼoa nga tsín tikui sikjáojinña nga xkón tjío je xíngia” (Olexandra, Ucrania).
JE BIBLIA ITSO: “Je kʼienli koatiokonni [ . . . ]. Tikjaʼálao yaono kʼoa ñaki kao kjoatsjoa tinókjoao, jon xi to chaojion” (Isaías 26:19).
JÓSʼIN BASENKAONÁ: “Me kʼien ngatsʼi je xíngia kʼianga kinikjeson chjota tutsi. Tonga jmeni xi tso texto jebi nda bʼé tokoan nga̱ skoe ijngokʼaña ninga kʼien. Nʼiojin tsjoa koa̱nna nga skoe nga jekjoaʼáyanile” (Marie, Ruanda).
JE BIBLIA ITSO: “Tongi choasa nichxin cha kʼoa je xi tsʼen alikui tikoationi [ . . . ]. Tonga je xi ndʼé tsʼee koa̱n je sonʼnde, kʼoa ñaki nyʼán sʼin koatio” (Salmo 37:10, 11).
JÓSʼIN BASENKAONÁ: “Ningalani tsín tikjoajchán kjimani jñani tsʼan, tonga tojo chʼao chon kʼoa chʼao kjoan je chjota. Tonga jmeni xi tso texto jebi nʼio tíbasenkaona. Je Jeobá be jmeni xi kjima kʼoa kʼoati majinle jotjín tokoan. Tojeme kjoaʼaxin ngayeje xi kjoañʼai síkjaʼáná kʼoa alikui tikui kjoaʼaítsjenniná” (Daler, Tayikistán).
Je chjota xi bʼaxki̱ i̱ revista jebi nda tjío kon nga̱ kui tjíobinyakao jmeni xi tso Biblia. Ningalani jtike koan chjota xi kjaʼaí én male, xi kjaʼaí sʼin tsen yaole kʼoa xi xin naxinandále, tonga ndʼai alikui tikʼoakjoanni (Efesios 4:31, 32). Xi testigole Jeobá maijin alikui kjoa política nojinjin yaonajin kʼoa alikui kjoasi nojinjin yaonajin (Juan 18:36).
Jinjin xi testigole Jeobá maijin bʼainganʼiongañálaijin xíngijin jotjín manijin ngakjijnda Sonʼnde (Juan 13:35). Tojo koan je Olexandra, xi jenása kabʼaxki̱, nga kjoajchán kisʼe ʼndele xin ki. Itso: “Nga jekichuijin jñani xin naxinandá, tokjoan tsaʼyaníjin je testigole Jeobá xi ya tsʼe, xi ya tjíokoyanajin. Nga tsakinyakaonajin ngisaa ngotjo koannganinajin”.
Tʼin nga satíonajin kjoajtín, ánni nga jchani jókoa̱n sʼiaan nga nda sa̱tío tokoán. Kʼoati jchai nga kʼoatso ya Biblia nga nda kuiyoaa nichxin xi nroaján. Titjásʼain ya jw.org kʼoa tjasjai jñani satíonajin kjoajtín kʼoa tsa maije̱ tijái nga kataʼmiyali Biblia. Jngo testigole Jeobá kuitsoyali kʼoa kui sichjén je xo̱n Koaan nda kuiyoaa ngantsjai nichxin.