KJOAʼMIYA XI CHOTʼAYA 6
KJOAJNDA 18 Kʼoailee kjoanda Niná tʼatsʼe kjoabʼechjíntjai
Bʼailee kjoanda Jeobá nga síchatʼaná
“Niná kʼoasʼin koantsjoake sonʼnde nga kitsjoa je xi tojngo ʼndíle” (JUAN 3:16).
XI TÍNCHJA̱NI
Jméni xi kisʼin Jeobá nga koa̱n jchatʼa je jéená. Kʼianga koa̱njinná ngisaa chjí jchaa nga síchatʼaná.
1, 2. Ánni kʼoabixónsíñá nga kʼoatisʼin tiyoaa jokoan je ti xi bʼaxki̱ ya párrafo 1.
SI̱KJAʼAITSJENLA tʼatsʼe jngo ti xi nʼio nyiná je xijchále. Toxijña sʼejinle nga mʼe xijchále, tonga kʼoati sʼejinle nga nʼio tse tao̱n kitjenle. Tsee tao̱n tsjentʼain ti jebi kʼoa kʼoaʼmile nga kjitʼanangi katasíjnda. Tonga tsínjinkʼia koa̱njndale nga̱ nʼio tse tao̱n kitjentʼain.
2 Kʼoati kui kjoa tiyojiaan tsanda ñá jokoan ti jebi. Je Adán kao Eva chjotatsje nga sʼa koannda kʼoa nʼio naskánachon jñani tsakatio (Gén. 1:27; 2:7-9). Koan tsakatio tsakai ngantsjai nichxin. Tonga nga tsakajngijée tsín tikitsjoaʼndenile Jeobá nga ya ʼndenaxóle Edén tsakatio kʼoa tsín tikoan tsakationi ngantsjai. Jósʼin kichomani nga kʼoakisʼin. Je Biblia itso: “Kui je xi jée ʼmi jaʼasʼenjin sonʼnde xi totʼatsʼe jngo chjota. Kʼoasʼin tjín kjoabiya xi totʼatsʼe jéebe. Kʼoa je kjoabiyabe kʼoasʼin kitsaotʼale ngatsʼi chjota, nga̱ tsajngi jée ngatsʼi” (Rom. 5:12). Nga xtile maa je Adán kao Eva chjotajée maa kʼoa biyañá, kʼoa tsín koa̱nná kʼoéchjíntjé yaoná (Sal. 49:8).
3. Ánni nga ya mangósonni je jée xi kichʼá joni tsa tao̱n kitjenná.
3 Je Jesús kʼoakitso nga je jée xi kichʼá yaa mangóson joni tsa tao̱n kitjenná (Mat. 6:12; Luc. 11:4). Kʼianga bijnyijée yaa mangóson joni tsa tao̱n kitjenná xi kao Jeobá kʼoa tjínnele si̱jndañá. Tsa tsínlani tsakʼéchjíntjainá Jeobá alijme kjoachoya tjínná (Rom. 6:7, 23).
4. 1) Jósʼin tiyoaa tsa tsínlani tsakʼéchjíntjainá Niná (Salmo 49:7-9). 2) Jmé xi nchja̱ni Biblia kʼianga jée síkʼaxki̱ (chótsenlai je recuadro jñani “Jée” tso).
4 Kʼiatsa tsínlani tsakʼéchjíntjainá Niná alikuijin titjoéniná je kjoanda xi kisicha Adán kao Eva (tʼexkiai Salmo 49:7-9).a Alikuijin koa̱n kuiyoaa ngantsjai nichxin kʼoa tsínjin tikjoaʼáyaniná, tokʼoajin koaan joma je cho̱ (Ecl. 3:19; 2 Ped. 2:12).
5. Jmé xi kisʼin Jeobá nga tsakʼéchjíntjainá (chótsenlai sén xi faʼaitʼa).
5 Si̱kjaʼaitsjenla ijngokʼá je ti xi kabʼaxki̱ ya párrafo 1. Nʼiojin tsjoa sʼe̱ kon kʼiatsa jngo chjotanyiná kʼoakuitsole nga je sijnda tao̱n xi kitjenle. Tikʼoasʼinni, nga tsjoakená Jeobá jé tsakʼéchjíntjainá nga chjotajée maa. Je Jesús i kitso: “Niná kʼoasʼin koantsjoake sonʼnde nga kitsjoa je xi tojngo ʼndíle, jméni nga ngatsʼisíni xi makjainle tʼatsʼe, likui cha̱, tonga tjínle kjoabijnachon ngantsjai” (Juan 3:16). Nda biyoaa ngixko̱n Jeobá nga kʼoasʼin tsakʼéchjíntjainá.
Je Jesús kʼoakitso nga koa̱n jchatʼa je jéená nga jekoanchjíntjé (Juan 3:16). Kitsjoantjai yaole xi totʼatsaan (Chótsenlai párrafo 5)
6. Jmé xi chótʼayajiaan i̱ kjoaʼmiya jebi, kʼoa ánni.
6 Jmé kjoanda xi tjenkao nga tsakʼéchjíntjainá Niná kʼoa jósʼin jchatʼa je jéená. Nga koa̱njinná kataʼyala jmé xi tínchja̱ni nga chobanda ngindiañá kao Jeobá, nga chatʼa je jéená, nga koanchjíntjé, nga ndái biyolee je jée kao kjoabiya kʼoa nga chjotakixi sʼin bekonná Niná. Ngisaa kʼoailee kjoanda Jeobá kʼianga si̱kjaʼaitsjenjiaan josʼin tsoyanile nga jngó jngó koya én jebi.
NGA CHO̱BANDA NGINDIAÑÁ KAO NINÁ
7. 1) Jósʼin tsakatio je Adán kao Eva kʼianga jetsakajngijée. 2) Jméni xi machjénná nga xtile Adán maa (Romanos 5:10, 11).
7 Kʼianga tsakajngijée je Adán kao Eva alikui tikoan tsakationi ngantsjai nichxin kʼoa tsín tinda tsakationi ngixko̱n Niná. Kʼianga kjesa bajngijéejin yaa familiale Niná tjíojin (Luc. 3:38). Tonga nga jetsakajngijée alikui tiya familiale Niná tsakatiojinni kʼoa kʼiaa kʼoakisʼin kʼianga kjesa sʼejinle xti (Gén. 3:23, 24; 4:1). Nga xtile Adán maa machjén nga cho̱banda ijngokʼañá xi kao Jeobá (tʼexkiai Romanos 5:10, 11).b Machjén nga nda kuiyo ijngokʼá ngixko̱n Niná. Kʼianga én griego je én xi cho̱banda tso kui nchja̱ni “nga nimiyo ijngokʼá je xi jtikená tsakai”. Je Jeobá tsakásjaile jokisʼin nga koa̱n nda kuiyo ijngokʼañá ngixko̱n.
JÓSʼIN KOA̱N CHO̱BANDA NGINDIAÑÁ KAO NINÁ
8. Jméni xi kisʼin Jeobá nga koa̱n nda kuiyo ijngokʼá ngixko̱n.
8 Jé Jeobá tsakʼéndajin nga koa̱n cho̱banda ngindiañá kao je. Tikʼoakji chjínile xi kitsjoangajao jokji chjíle xi kisicha Adán. Ya Romanos 3:25 kʼoatso nga je ʼNdíle kisikasén “nga koanle jéentjainá”. Nga kʼoakisʼin Jeobá koaan nda kuiyo ijngokʼá ngixko̱n kʼoa koaan miyole koaan.
9. Jméni xi kitsole Jeobá nga sʼin je chjota israelita nga koan kichatʼa je jéele.
9 Je Jeobá kʼoakitso nga cho̱ katatsjoátʼale chjota israelita ánni nga koa̱n chatʼani je jéele kʼoa koa̱n nda koationi ngixko̱n. Ñandia kʼianga jngo nó, je naʼmitítjon choo kitsjoatʼale Niná nga koantsje je jéele naxinandá. Tonga je cho̱ alikui mangóson kao chjota, kuinga tsín tondiaa tsakjaʼáxinni je jéele chjota israelita. Je Jeobá kisichatʼale kʼianga kʼoakoannile jme xi kisʼin kʼoa nga kitsjoatʼale cho̱ (Heb. 10:1-4). Kʼianga cho̱ kitsjoatʼa chjota israelita nga koantsje je jéele, kui kisikjaʼaitsjenjinle nga chjotajée kʼoa nga machjén nga tjín xi kʼoechjíntjai nga tondiaa jchatʼa je jéele.
10. Jméni xi kisʼin Jeobá nga tondiaa jchatʼa je jéená.
10 Jméni xi kisʼin Jeobá nga tondiaa jchatʼa je jéená. Jé ʼNdíle kisikasén i̱ Sonʼnde nga tsakʼéchjíntjainá kʼoa “tojngo kʼa kitsʼaitʼa, nga tsakʼa je jéele [chjota]” (Heb. 9:28). Je Jesús kitsjoaa “kjoabijnachonle nga nkjín chjota kʼoechjíntjai” (Mat. 20:28, TNM). Kʼoa jósʼin tíjna nga koanchjíntjé.
NGA KOANCHJÍNTJÉ
11. 1) Ánni nga tjínnenile koanchjíntjé. 2) ʼYáni xi koan tsakʼéchjíntjainá.
11 Je Biblia kʼoatso nga je Jeobá tsakʼéchjíntjainá nga koan kichatʼa je jéená kʼoa nga koa̱n nda kuiyo ijngokʼañá ngixko̱n. Jósʼin tsakʼéchjíntjainá Niná nga kisokongajaoni jmeni xi kisicha Adán. Nga tsakajngijée je Adán kao Eva chjotajée koan kʼoa alikui tikoan tsakationi ngantsjai nichxin. Nga chjotatsje Adán nga kjesa bajngijéejin kuinga ijngo chjotatsje koanchjénni xi tjínnele kʼoechjíntjainá (1 Tim. 2:6). Tojé xi koa̱nle kʼoechjíntjainá jngo chjota xi tsín jme jée tjínle, xi koa̱n kʼoéjna ngantsjai kʼoa xi tíjnanda nga kuiyántjainá. Tokʼoasʼin nga tondiaa jchatʼa je jéená.
12. Ánni nga koan tsakʼéchjíntjaininá Jesús.
12 Janla koya kataʼyaa ánni nga tojeni Jesús xi koan tsakʼéchjíntjainá. Xi títjon, chjotatsje koan kʼoa “likui tsajngi jée”. Xi majaoni, koan tsakʼejna ngantsjai nichxin i̱ Sonʼnde. Kʼoa xi majanni, tíjnandaa nga kʼienntjainá (1 Ped. 2:22; Heb. 10:9, 10). Je Jesús chjotatsje koan joni Adán (1 Cor. 15:45). Kʼianga kʼienntjainá koan tsakʼéchjí je jée xi tsakajngi Adán kʼoa kʼoasʼin koanjndani ngayeje jmeni xi kisicha Adán (Rom. 5:19). Nga tsakʼéchjíntjainá Jesús “Adán xi jetʼani” ʼmile. Kuinga tsín timachjénni nga ijngo chjota kʼoechjíntjainá. Je Jesús toñandia kʼienntjainá (Heb. 7:27; 10:12).
13. Jméni xi kisʼin Jeobá nga koa̱n nda kuiyo ijngokʼá ngixko̱n.
13 Jméni xi kisʼin Jeobá nga koa̱n nda kuiyo ijngokʼá ngixko̱n. Tojosʼin tiʼyaa, je Jeobá kʼoasʼin tsakʼéndajin nga sichatʼa je jéená ánni nga nda kuiyo ijngokʼasíñá ngixko̱n. Tonga nga jchatʼa je jéená tjínnele koa̱nchjíntjé. Jé Jesús kisikasén i̱ Sonʼnde kʼoa kao njínle tsakʼéchjíntjaininá (Efes. 1:7; Heb. 9:14). Kataʼyala jósʼin kichomani nga kʼoakisʼin.
NDÁI BIYOLEE JE JÉE KAO KJOABIYA KʼOA CHJOTAKIXI SʼIN BEKONNÁ NINÁ
14. Jméni xi chótʼayajiaan, kʼoa ánni.
14 Nga jchaa jmé kjoanda xi sokóná nga tsakʼéchjíntjainá Jeobá, jaola koya én xi síchjén Biblia chótʼayajiaan. Kʼianga koa̱njinná ngisaa chjí jchatokoán nga síchatʼaná Jeobá.
15, 16. 1) Jmé kjoanda xi tjínná nga jekoanchjíntjé. 2) Jósʼe tokoán nga jendái tiyolee je jée kao kjoabiya.
15 Je Biblia kʼoatso nga ndái biyolee je jée kao kjoabiya kʼianga jekoanchjíntjé. Je pastro Pablo i kitso: “Jeʼyao nga koanchjíntjao josʼin nga chʼao tsakiyo, xi kʼoasʼin kisʼeno joni tsa kjoatjaole xijcháno. Li tsa koanchjíntjaijion kao tsojmi xi fitson, ni kao tao̱nsinejin, ni kao tao̱nchxoajin, tonga koanchjíntjao kao je njínle Cristo xi nʼio chjíle, xi joni tsa tsʼe ʼndíbarré xi tsín jña chʼao kjile xi ñaki tsje” (1 Ped. 1:18, 19).
16 Nga jekoanchjíntjé jendái tiyolee je jée kao kjoabiya, xi nʼio tse kjoañʼai síkjaʼáná (Rom. 5:21). Bʼailee kjoanda je Jeobá kao Jesús nga kʼoasʼin tsakʼéchjíntjainá (1 Cor. 15:22).
17, 18. 1) Jósʼin tíjna nga chjotakixi sʼin bekonná je Jeobá. 2) Jmé kjoanda xi tjínná nga chjotakixi sʼin bekonná je Jeobá.
17 Nga chjotakixi sʼin bekonná Jeobá tsínkui síjéná nga ñá kʼoéchjíntjé yaoná nga chjotajée maa. Tonga alikui xi tsonile nga faʼatone kjoatéxomale. Xi ijngosani, ali tsakuijin nga bakinná nga chjotakixi sʼin bekonniná kʼoa ali tsakuijin xi tsonile nga totsjoáʼnde kʼianga bijnyijée. Kuinga chatʼani je jéená nga makjainná nga je Jeobá kao Jesús tsakʼéchjíntjainá (Rom. 3:24; Gál. 2:16).
18 Jmé kjoanda xi tjínná nga chjotakixi sʼin bekonná Jeobá. Tjínkʼa chjotale Cristo xi toxá kitjoéjinni nga ya koatexomakao Jesús ya ngʼajmi kʼoa xtile Niná ma (Tito 3:7; 1 Juan 3:1). Koaan ya koatexomakao Jesús nga̱ jekichatʼa jéele (Rom. 8:1, 2, 30). Kʼoa je xi i̱ Sonʼnde tjínle kjoachoya, miyole Niná ma kʼoa koaan koatio ngantsjai nichxin nga̱ kʼoati jekichatʼa jéele (Sant. 2:21-23). Je chjotankjín xi kuinje̱ngi nga kjoaʼaí Armagedón kui kjoanda koyale nga tsínkʼia kuiyá (Juan 11:26). Kjoaʼáyanile je “chjota xi tjínle kjoakixi” kao xi “chjotatsʼen” tsole Biblia (Hech. 24:15; Juan 5:28, 29). Nga jekoai nichxin, je choʼndale Niná xi koatio i̱ Sonʼnde “kʼoéyondaí kao kjoajeya xi tsʼe ʼndíle Niná” (Rom. 8:21). Tojosʼin tiʼyaa, kui kjoanda choyalee nga kjoaʼaí nichxin nga chjotatsje koaan kʼoa nga nda kuiyo ijngokʼá ngixko̱n Niná.
19. Jósʼin tiyoaa kʼianga jetsakʼéchjíntjainá je Jeobá kao Jesús (kʼoati chótsenlai je recuadro “Nga síchatʼaná Jeobá”).
19 Tojonásʼin kaʼyaa tʼatsʼe je ti xi tao̱n kitsjentʼain nga kisicha ngayeje jme xi tjínle, kʼoati kui kjoa tiyojiaan tsakai nga chjotajée maa. Tonga je Jeobá tsakʼéndajin josʼin koa̱n jchatʼa je jéená kʼoa jé Jesús kisikasén nga kʼienntjainá. Nga makjainná tʼatsʼe Jesús ndái biyolee je jée kao kjoabiya. Kʼoati koa̱n tondiaa jchatʼa je jéená. Tonga xi ngisa chjíle kuinga jekoa̱n nda kuiyoaa ngixko̱n Jeobá.
20. Jmé xi chótʼayajiaan ya kjoaʼmiya xi ijngo.
20 Bʼailee kjoanda je Jeobá kao Jesús kʼianga nikjaʼaitsjenjiaan jmeni xi kisʼin xi tʼatsaan (2 Cor. 5:15). Tsa tsínlani tsakʼéchjíntjainá je Jeobá alijmejin kjoachoya tjínná. Ya kjoaʼmiya xi ijngo kui chótʼayajin kʼa je choa̱ xi faʼaitʼa Biblia xi tsoyaná jme kjoanda xi sʼená kʼianga jekoanchjíntjé.
KJOAJNDA 10 Chʼa̱sjengʼaa je Nináná Jeobá
a Salmo 49:7-9: “Nijngojinla xi koa̱nle kʼoasjentjai jngo ndsʼe̱, kʼoa ni koa̱njinla jngo kjoabʼechjíntjai tsjoále Niná xi tʼatsʼe ndsʼe̱, 8 (kʼoa jotjín tjínnele koa̱nchjíntjai je kjoabijnachonle nikʼiajinla kuichole chjíle) 9 kʼianga koa̱n kʼoéjnakon ngantsjai nichxin kʼoa tsín skoe̱ je tsjó”.
b Romanos 5:10, 11: “Tsa kʼia nga kontraná koan Niná, tijeni kisikjáondaná titʼatsʼeni xi totʼatsʼe kjoabiyale ʼndíle, tosa ndʼai, nga jekichobandanía, kuitjontjainía xi totʼatsʼe kjoabijnachonle. 11 Ali tsa toje jebi, tonga kʼoati nʼosjejeyasa Niná totʼatsʼe Nainá Jesucristo. Totʼatsʼe jekichjoé ndʼaibi je kjoachobandabi”.