KJOAJMIYA XI CHOTʼAYA 7
KJOAJNDA 15 Chʼa̱sjengʼaa je ʼNdítjonle Jeobá
Jmé kjoanda sʼená nga síchatʼaná Jeobá
“Tojiní xi mali nichatʼai” (SAL. 130:4).
XI TÍNCHJA̱NI
YA Biblia nkjín choa̱ faʼaitʼa xi tsoya josʼin síchatʼaná Jeobá. Nga kui chótʼayajiaan ngisaa chjí jchatokoán nga síchatʼaná.
1. Ánni nga tsín tongóson sʼin majinniná josʼin tíjna nga nichatʼalee xíngiaa.
NDA sʼe tokoán kʼianga kʼoatsoná nga síchatʼaná tsa ʼya xi jokanikoaa kʼoa tsa jokaʼmilee, tonga kʼoati ʼyaa nga tsín tongóson sʼin majinná josʼin tíjna nga nichatʼalee xíngiaa. Tsakui nichxin to jekisichajin jmeni xi koan kʼoa kui xi mele nga tojo kʼoasʼin miyo cho̱bá joni ngantsjai. Axo tsín tinʼio simiyoniná ningalani jekisichajin jmeni xi koan.
2. Tojo tso Biblia, jósʼin tíjna nga síchatʼaná Jeobá (kʼoati chótsenlai sén xi faʼaitʼa).
2 Kʼianga síchatʼaná je Jeobá alikui kʼoasʼín jonʼia xi chjota. Jngo xi kiski salmo i kitso: “Tojiní xi mali nichatʼai kʼoa kuinga ʼyaxkónnili” (Sal. 130:4).a Aliʼya xi mangósonkao josʼín je Jeobá nga̱ tondiaa síchatʼaná. Kʼiatsa mená nga kʼoatisʼin si̱chatʼalee xíngiaa tsanda ñá, tjínnele je Jeobá chjénngilee. Ya Escrituras Hebreas jngo én faʼaijin xi toje Jeobá nchja̱ni josʼin síchatʼaná kʼoa alikui ñá xotsoná xi chjota.
3. Ánni tsín mangósonni josʼin síchatʼaná Jeobá kʼoa jonʼia xi chjota (Isaías 55:6, 7).
3 Kʼianga síchatʼaná je Jeobá tondiaa síchajin je jée xi bijnyaa kʼoa nda biyo ijngokʼá ngixko̱n. Nga kʼoasʼín je Jeobá nda sʼe tokoán (tʼexkiai Isaías 55:6, 7).b
4. Jósʼin bakóyaná Jeobá nga katamajinná josʼin tíjna nga síchatʼaná.
4 Nga tsín mangósoán josʼín Jeobá nga síchatʼa, sakʼoa ñʼai maná nga majinná. Kuinga nkjín choa̱ síchjénni Jeobá nga tsoyaná ánni nga ngisasa nda koa̱njinniná josʼin tíjna nga síchatʼaná kʼoa kui chótʼayajin kʼa i̱ kjoaʼmiya jebi. Kʼoati kuitsoyaná jósʼín je Jeobá nga tondiaa síchajin je jéená kʼoa nga nda biyo ijngokʼañá ngixko̱n. Nga kui chótʼayajiaan ngisaa nda koa̱njinná josʼin tíjna nga síchatʼaná Jeobá kʼoa ngisaa chjí jchatokoán nga kʼoasʼín.
JE JEOBÁ FAʼÁXIN JE JÉENÁ
5. Jósʼín je Jeobá nga síchatʼa je jéená.
5 Ya Biblia je jée sakʼoa kui síngósonkao jngo chʼá xi nʼio ai. Tobʼelañá, je rey David i kitso: “Jekichobekaona je jéena, nʼio ai kjimana kʼoa tsín chókjoakaona” (Sal. 38:4). Kʼoa ya Salmo 25:18 kao 32:5 kʼoatso nga “síchatʼale” Jeobá ʼyani xi kʼoamanile je jéele. Kʼianga én hebreo kui tsoyanile nga “mangínkoaa” kʼoa tsa “chjomitjeen” jngo chʼá. Tojo sʼín jngo chjota xi taja nga bʼa chʼá xi nʼio ai, kʼoasʼín je Jeobá nga síchatʼaná, faʼáxin je jée xi kichʼá.
Síchatʼaná [kui tsoyanile “nga fikao” kʼoa tsa “kjomitje̱n”] (Sal. 25:18)
6. Jókji kjin fikao Jeobá je jéená.
6 Ya Biblia ijngo choa̱ síchjén jñani kʼoatso nga je Jeobá kjin fikao je jéená. Ya Salmo 103:12 itso: “Jokji kjin tíjnale jña bitjoni tsʼuí kao jña kantjaini, kʼoakji kjin síkʼéjna je jée xi bijnyaa”. Jña bitjoni Tsʼuí kʼoa jña kantjaini nʼio kjin tjíole xínkjín. Kʼianga kʼoatso texto jebi kui bakóyaná nga nʼio kjin fikao Jeobá je jéená kʼianga síchatʼaná.
“Jokji kjin tíjnale jña bitjoni tsʼuí kao jña kantjaini” (Sal. 103:12)
7. Jósíkao Jeobá je jéená (Miqueas 7:18, 19).
7 Kʼianga kʼoatso Biblia nga kjin fikao Jeobá je jéená, jñáni fikao. Je rey Ezequías i kitso xi tʼatsʼe Jeobá: “Yándsʼin kinikʼatsaojtuin ngayeje je jéena”. Kʼoa je notale texto itso: “Alikui tikui kuenta kinʼiani” (Is. 38:9, 17; nota). Kʼianga kʼoamaniná je jéená yaa síkʼatsao Jeobá jñani tsínti beni. Kʼoati i̱sʼin faʼatoya texto jebi: “Tichjaʼaxinní je jéena joni tsa tsínkʼia tsakajngijée”. Kʼoati tso ya Miqueas 7:18, 19c (tʼexkiai). Kʼoatso nga ya síkʼatsaongindá Jeobá je jéená ya jinndáchikon. Nichxin kjoatse tsa jmeni xi ya kiskangindá ya jinndáchikon aliʼya xi tikoansjainile.
“Yándsʼin kinikʼatsaojtuin ngayeje je jéena” (Is. 38:17)
“Yaa kʼoétsaongindái je jéele ya jinndáchikon” (Miq. 7:19)
8. Jmé xi bakóyaná choa̱ xi kachotʼayajiaan.
8 Je choa̱ xi kachotʼayajiaan kui bakóyaná josʼín Jeobá nga síchatʼaná. Faʼáxin je jéená kʼoa ñaki matjaaná. Je rey David i kitso: “Jó tondale jebe xi kjoatsʼantjaikjoale kichatʼa, kʼoa xi jéele kisʼeʼma. Jó tondale je chjota xi Nainá likui síkʼaxki̱kao jéele” (Rom. 4:6-8). Tojé Jeobá xi kʼoasʼin síchatʼaná.
JE JEOBÁ SÍTSJEE JE JÉENÁ
9. Jmé choa̱ xi síchjén Jeobá nga ngisa nda majinná josʼin síchatʼaná.
9 Ijngolasa choa̱ jchaa xi faʼaitʼa ya Biblia xi síngósonkao josʼín Jeobá nga sítsje je jéená xi totʼatsʼe nga jekoanchjíntjé kʼiatsa kʼoakoa̱nniná je jéená. Ya Biblia kʼoatso nga sítsje jéená je Jeobá, xi tsonile, matsje je chjota xi kabajngijée (Sal. 51:7; Is. 4:4; Jer. 33:8). Tije Jeobá tsoyaniná josʼin bichómani kʼianga sítsje jéená. Itso: “Ningalani ñaki ní kjoan je jéeno, ñaki koa̱nkjoanxóxó joni tsa nyʼán; kʼoa ninga ní kjoan joni tsa najño ní, ñaki chxoa koa̱nkjoan joni tsa ntsja̱le barré” (Is. 1:18). Tsa jmeni xi ní sʼin tsen skuínga jngo najño nʼio ñʼai bitjongini. Choa̱ jebi kui bakóyaná nga ñaki sítsje Jeobá je jéená kʼianga síchatʼaná.
“Ningalani ñaki ní kjoan je jéeno, ñaki koa̱nkjoanxóxó joni tsa nyʼán” (Is. 1:18)
10. Jmésa choa̱ xi síchjén Jeobá nga majinná josʼin tíjna nga síchatʼaná.
10 Tojosʼin tsaʼyaa ya kjoaʼmiya xi jejaʼato, je jéená yaa mangóson joni tsa tao̱n kitjenná (Mat. 6:12; Luc. 11:4). Kʼianga bijnyijée jngoyale sa tse sa tse tao̱n tsjentʼeen. Tonga nga síchatʼaná Jeobá jngoyale síchajin je tao̱n xi kitjenná, xi tsonile, alikui tikui bʼéjinkonni je jée xi tsakijnyaa. Nʼio nda sʼe tokoán nga kʼoasʼin síchatʼaná.
“Tichatʼanajin jme xi tjennajin” (Mat. 6:12)
11. Jósʼin tíjna nga jngokʼa síchajin je jéená Jeobá (Hechos 3:19).
11 Je Jeobá ali tobʼéʼmajin je jéená, jngokʼa síchajin (tʼexkiai Hechos 3:19).d Nga ngisasa nda koa̱njinná, si̱kjaʼaitsjenla je ndájín xi kisichjén chjota nichxin kjoatse, ngotjo kichajonni kʼianga tjín xi tsakʼétʼaxo̱n. Kʼianga jetsakʼéchjí jotjín tao̱n kitsjenle je chjota, jngokʼa kichajon jñani kisʼetʼaxo̱n. Nda sʼe tokoán nga kʼoati sʼín je Jeobá kʼianga síchatʼaná, jngokʼa síchajin je jéená (Sal. 51:9).
“Jméni nga cha̱tʼasíni jéeno” (Hech. 3:19)
12. Jmé xi tsoyanile nga yojbijma síkʼaxki̱ Jeobá.
12 Ya Isaías 44:22, ijngo choa̱ síkʼaxki̱ josʼín Jeobá nga síchatʼa je jéená. Itso: “Yojbi koajtsane jñani tsín nda nʼiai, kʼoa je jéeli yojbijma koajtsane”. Joxi yojbijma bájtsane Jeobá je jéená kʼianga síchatʼaná ánni nga tsín ʼya xi tiskoe̱ni.
“Yojbi koajtsane jñani tsín nda nʼiai” (Is. 44:22)
13. Jósʼe tokuin nga síchatʼaná Jeobá.
13 Ngayeje choa̱ xi kaʼyaa kui bakóyaná josʼín Jeobá nga síchatʼaná. Kuinga tsín koa̱n kʼoasʼin si̱kjaʼaitsjenñá nga tsínkʼia sichatʼaná tsa kasokójéená, nga̱ jetsakʼéchjíntjainá je Jesús. Kʼianga síchatʼaná Jeobá jngokʼa síchajin je jéená. Kuinga kʼoéjngosíñá tokoán nga sichatʼaná kʼiatsa kʼoakoa̱nniná je jéená.
SÍMIYO IJNGOKʼANÁ JEOBÁ
Kʼianga síchatʼaná Jeobá nda biyo ijngokʼá ngixko̱n (Chótsenlai párrafo 14)
14. Ánni kʼoéjngoñá tokoán nga síchatʼaná je Jeobá (kʼoati chótsenlai sén xi faʼaitʼa).
14 Kʼianga síchatʼaná Jeobá mamiyo ijngokʼá. Nga ʼyaa jebi nda sʼe tokoán kʼoa sʼejngoo tokoán nga tsín kjoañʼai sikjaʼáná. Nga̱ je Jeobá i kitsole je profeta Jeremías: “Sichatʼale jñani tsín nda kisʼin kʼoa alikui tikui kjoaʼaítsjennina je jéele” (Jer. 31:34). Kʼoati kui texto jebi kisichjén je Pablo nga i̱ kitso: “Likui tikjoaʼaítsjennina jéele” (Heb. 8:12). Ánni nga kui én jebi kisichjénni.
“Alikui tikui kjoaʼaítsjennina je jéele” (Jer. 31:34)
15. Jósʼin tíjna nga kʼoatso Jeobá nga tsínti kjoaʼaítsjennile je jéená.
15 Kʼianga kui síkʼaxki̱ Biblia je én xi faʼaitsjenná tso alikui tongantsjai nga kui nchja̱ni jmeni xi kinʼia ngasʼa. Sakʼoa kui nchja̱ni jmeni xi sʼa kʼoasʼiaan. Tobʼelañá, je chjota xi ñatjen kinikʼientʼa yá je Jesús, i kitso: “Tikjaʼaitsjennái kʼianga jekoatexomai” (Luc. 23:42, 43, TNM). Nga kʼoakitso chjota jebi, ali tsakuijin xi kitso nga kʼiakjoan katafaʼaitsjenle Jesús xi tʼatsʼe. Kʼoa je Jesús kʼoakitsole nga kjoaʼaítsjenle xi tʼatsʼe kʼianga sikjaʼáyanile. Kʼianga kʼoatso Jeobá nga tsínti kjoaʼaítsjennile je jéená kui xi tsonile nga jekisichatʼaná kʼoa tsín jme kjoañʼai sikjaʼáná.
16. Tojo tso Biblia, jósʼe tokoán nga síchatʼaná Jeobá.
16 Ijngola choa̱ kataʼyaa xi faʼaitʼa ya Biblia xi basenkaoná nga majinná josʼe tokoán nga síchatʼaná je Jeobá. Nga chjotajée maa joxi choʼnda sʼin tiyolee je jée, tonga kʼianga síchatʼaná Jeobá jendái biyolee je jée (Rom. 6:17, 18; Apoc. 1:5). Nʼio tsjoa sʼe tokoán nga síchatʼaná Jeobá.
“Jejitjondaílao je jée” (Rom. 6:18)
17. Ánni kʼoabixónñá nga ya mangóson nga síchatʼaná Jeobá joma nga mandayaa tsa táo chʼin tjínná (Isaías 53:5).
17 (Tʼexkiai Isaías 53:5).e Ya Biblia kʼoati kui síngósonkao je jée joma kʼianga táo chʼin katʼaná. Tonga jekisindayaná Jeobá kʼianga kʼienntjainá Jesús kʼoa kui xi basenkaoná nga nda biyo ijngokʼá ngixko̱n Niná (1 Ped. 2:24). Kʼianga mandaya jngo chjota xi táo chʼin tjínle nʼio tsjoa sʼe kon. Kʼoati nʼio tsjoa sʼe tokoán tsanda ñá kʼianga síchatʼaná Jeobá kʼoa nga mamiyo ijngokʼá.
“Xi tʼatsʼe nga kinikiʼaon kʼoasʼin koanndayañá” (Is. 53:5)
JÓSʼIN BIYOAA NGA SÍCHATʼANÁ JEOBÁ
18. Jmé xi bakóyaná ngayeje choa̱ xi kachotʼayajiaan (kʼoati chótsenlai je recuadro “Jósʼín Jeobá nga síchatʼaná”).
18 Ngayeje choa̱ xi kachotʼayajiaan kui bakóyaná nga tondiaa síchajin Jeobá je jéená kʼianga síchatʼaná kʼoa nda biyoaa ngixko̱n. Kuinga kʼoasʼínni nga nʼio nda chjota kʼoa nga tsjoakená, ali tsakuijin nga bakinná nga kʼoakoa̱ntʼeen (Rom. 3:24).
19. 1) Ánni nga bʼainilee kjoanda je Jeobá (Romanos 4:8). 2) Jmé xi chótʼayajiaan ya kjoaʼmiya xi ijngo.
19 (Tʼexkiai Romanos 4:8).f Bʼailee kjoanda je Jeobá nga̱ tojé xi male síchatʼa kjoaixiná tojo tso ya Salmo 130:4. Tonga tsa mená nga sichatʼaná machjén nga si̱tjosoán jme xi kitso Jesús, kʼianga i̱ kitso: “Tonga tsa tsín si̱chatʼalao chjota jéele, kʼoati je Nʼaino likui sichatʼano jéeno” (Mat. 6:14, 15). Machjén nga kʼoatisʼin si̱chatʼalee xíngiaa josʼin síchatʼaná je Jeobá. Yaa kjoaʼmiya xi ijngo kuitsoyaná jmeni xi koa̱n sʼiaan.
KJOAJNDA 46 Bʼailaijin kjoanda Jeobá
a Nʼio nkjín Biblia xi tsín síkʼaxki̱ ya Salmo 130:4 josʼin síchatʼaná Jeobá.
b Isaías 55:6, 7: “Tjasjao je Jeobá kʼianga choa̱lesa. Tinókjoalao kʼianga sʼasa chrian tíjna. 7 Katasíkʼéjna je ndiaale chjotatsʼen kao je chjota xi chʼao tjío kjoafaʼaitsjenle, kʼoa katanroanrʼoeni Jeobá, nga̱ koakóle kjoamatokon, kʼoa katanroanrʼoeni Nináná nga̱ nʼio male síchatʼa”.
c Miqueas 7:18, 19: “Aliʼya xi mangósonkoai jonʼiai ji, nga nichatʼalai kʼoa nga tsínkui kuenta nʼiai je jée xi bajngi chjota. Alikui tondiaa majtile, nga̱ je xi ngisa sasénle kui kjoatsjoacha. 19 Sko̱ema ijngokʼaná kʼoa sichatʼaná. Yaa kʼoétsaongindái je jéele ya jinndáchikon”.
d Hechos 3:19: “Tikʼantjaiyao tsokʼoa kjoafaʼaitsjenno, katabʼantjaiyanio, jméni nga cha̱tʼasíni jéeno, jméni nga kjoaʼaísíni nichxin nga kuinjenyʼán josʼin Niná koatexoma”.
e Isaías 53:5: “Kʼoa jé kinikiʼaon xi tʼatsʼe jéená; totaon tsaʼya xi tʼatsʼe jéená. Jé tsakʼaile kjoañʼai xi tʼatsʼe nga ndasʼin kuiyoaa, kʼoa xi tʼatsʼe nga kinikiʼaon kʼoasʼin koanndayañá”.
f Romanos 4:8: “Jó tondale je chjota xi Nainá likui síkʼaxki̱kao jéele”.