Tʼejngui tokuin nga jekisichatʼali Jeobá

1, 2. Jmé xi sʼín Jeobá kʼianga kʼoamaniná je jéená kʼoa jósʼe tokoán (kʼoati chótsenlai sén xi faʼaitʼa).

KʼIANGA tsakajngijée je rey David chʼao kisʼe kon (Sal. 40:12; 51:​3, én xi tjítʼa jña fitsʼiani capítulo). Tonga nga kʼoakoannile jéele je Jeobá kisichatʼale (2 Sam. 12:13). Nga koanjinle David kʼianga jekisichatʼale Niná nda kisʼe kon kʼoa ñaki koantjale (Sal. 32:1).

² Ñá kʼoati nda sʼe tokoán nga síchatʼaná je Jeobá kʼoa ñaki matjaná. Ninga tse jée kuijnyá je Jeobá sichatʼaná tsa kʼoakoa̱nniná, tsa kʼoéjnatseen je jéená kʼoa tsa tsínti kʼoasʼianñá (Prov. 28:13; Hech. 26:20; 1 Juan 1:9). Nga ʼyaa nga síchatʼaná je Jeobá nda sʼe tokoán. Nga tondiaa síchajin jéená joxi tsínni kʼia tsakijnyijée (Ezeq. 33:16).

3, 4. Jókisʼe kon Jennifer, kʼoa jméni xi chótʼayajiaan i̱ kjoaʼmiya jebi.

³ Sakʼoa tsín sʼejngo tokoán nga jekisichatʼaná Jeobá. Kataʼyala jokoan jngo tichjaa xi Jennifer ʼmi. Kʼianga sʼa ʼndí kji je xijchále kitsoyale xi tʼatsʼe Jeobá. Tonga kʼianga jekoanjchínga alikui tinda kikaoni yaole, kui kʼoakisʼin xi tsín kixi tíjna. Nga jenkjín nó jaʼato kisindayaa yaole kʼoa xijekoan kisʼenngindá. Itso: “Nʼio koantsjoake̱ tao̱n kʼoa kisichajngiña, tojtintsjai koanna kʼoa nʼio tsakʼia̱. Nga kʼoakoannina jéena kʼoa nga jetsakʼéchjíntjaina Cristo koanjinna nga jekisichatʼana Jeobá, tonga alikui ñaki kisʼejngo tokoan”.

⁴ A kʼoati tsín tjínjngo tokuin nga jekisichatʼali Jeobá jme jée xi tsakijnyi ngasʼa. Tikjaʼaitsjenjin nga kui xi mele nga kʼoéjngoaa tokoán nga jekisichat’aná, tojo kisikao David nga tsakakóle kjoamatokon kʼoa nga kisichatʼale. I̱ kjoaʼmiya jebi kui jchaa jokji chjíle nga kʼoéjngoaa tokoán kʼianga jekisichatʼaná Jeobá, kʼoa jméni xi koa̱n sʼiaan nga sʼe̱jngo tokoán.

ÁNNI NʼIO CHJÍNILE NGA KʼOÉJNGOAA TOKOÁN NGA JEKISICHATʼANÁ JEOBÁ

5. Jósʼin mele Na̱i nga si̱kjaʼaitsjeen. Jngo choa̱ tʼejnai.

⁵ Tsa kʼoéjngoaa tokoán kʼianga jekisichatʼaná Jeobá alikui ya ska̱yaa che̱nle Na̱i. Je Na̱i básjaile josʼín nga tsín tije Jeobá si̱xánilee. Tobʼelañá, kui xi mele nga kʼoasʼin si̱kjaʼaitsjeen nga tsínti kʼia sichatʼaniná Jeobá je jée xi tsakijnyaa. Kataʼyala jokoan jngo chjotale Cristo xi Corinto tsʼe, kʼianga kisichajngi kichʼasjejin jinjtín (1 Cor. 5:​1, 5, 13). Je chjota jebi kʼoakoannile jéele nga koanskanni, tonga je Na̱i kui xi koanmele nga je chjotale Cristo tsínti katasíchatʼanile kʼoa nga tsínti tsjoáʼndenile nga kuichokʼejnajin ijngokʼani ya jinjtín. Tsa tsínlani kisichatʼale chjotale Cristo je xi tsakajngijée kʼoajinsʼin kisikjaʼaitsjen nga tsín tikʼia sichatʼanile Jeobá, bajin kisʼe kon kʼoa tsínjin tije Jeobá kisixánile. Je Na̱i tojo kʼoatísʼín ndʼaibi. Tonga ñá, ʼyañá jme che̱n xi síchjén (2 Cor. 2:​5-11).

6. Jmé xi sʼiaan nga tsínti jée kjoáneñá yaoná.

⁶ Tsa kʼoéjngoaa tokoán nga jekisichatʼaná Jeobá alikuijin tijée kjoáneñá yaoná. Kʼianga sokójéená, toxá tsín tinda sʼeni tokoán (Sal. 51:17). Tonga nga kʼoama, basenkaoná nga nindayaa yaoná (2 Cor. 7:​10, 11). Tsa tosi tonda jée kjoáne yaoná ninga jekʼoakamaniná kjuinroajenjin tokoán kʼoa tsínjin tije Jeobá si̱xánilee. Tonga tsa kʼoéjngoaa tokoán kʼianga jekisichatʼaná Jeobá alikuijin tikui si̱kjaʼaitsjenñá jme jée xi tsakijnyaa, ndajin sʼe̱ tokoán kʼoa tosi tondajin je Jeobá si̱xálee (Col. 1:​10, 11; 2 Tim. 1:3). Kataʼyala jméni xi sʼiaan nga kʼoéjngoaa tokoán nga jekisichatʼaná Jeobá.

JMÉ XI SʼIAIN NGA SʼE̱JNGO TOKUIN NGA JEKISICHATʼALI JEOBÁ

7, 8. Tojo tso Éxodo 34:​6, 7, jméni xi kitso Jeobá kʼoa jméni xi bʼéjngo tokoán.

⁷ Tikjaʼaitsjain jokjoan Jeobá. Tikjaʼaitsjain jokitsole Moisés kʼianga tsakjákaonajmí ya nindo Sinaía (tʼexkiai Éxodo 34:​6, 7).b Kʼoakitso nga tjínle kjoamatokon kʼoa nga mamakená. Tsa tsjoachaa je Jeobá kʼoa tsa kʼoakoa̱nniná je jéená, tíjnandaa nga sichatʼaná nga̱ likui tsʼen kʼoa bakóná kjoamatokon.

⁸ Je Jeobá alikui bʼéndiso, tjínjngoo tokoán nga bakó kjoamatokon (Sal. 31:5). Tsa tsín tjínjngo tokuin nga jekisichatʼali tikjaʼaitsjenjin nga bakó kjoamatokon je Jeobá kʼoa nga síchatʼale toʼyani xi kʼoamanile jéele. Tsa tjínjngo tokuin nga kʼoasʼín je Jeobá kʼoati sʼe̱jngo tokuin nga jekisichatʼali tsanda ji.

9. Tojo tso Salmo 32:​5, jósʼin tíjna nga síchatʼaná Jeobá.

⁹ Tikjaʼaitsjenjin josʼin tíjna nga síchatʼaná je Jeobá. Je David i kitsole Jeobá: “Kinichatʼaní je jéena kʼoa kinichatʼanái jñani tsín nda kisʼian” (tʼexkiai Salmo 32:5).c Kʼianga én hebreo je én xi “kinichatʼaní” sʼin faʼatoya kʼoati kui tsoyanile nga “mangínkoaa” kʼoa nga “chjomitjeen” jngo chʼá. Kʼianga kisichatʼale Jeobá je David jngoyanile nga je Jeobá kikao je chʼá xi yʼa kʼoa ñaki koantjale je David kʼoa nda kisʼe kon (Sal. 32:​2-4). Kʼiatsa kʼoakoa̱nniná je jée xi bijnyaa kʼoasʼin sichatʼaná Jeobá jokisikao je David, tsjoa sʼe̱ tokoán kʼoa koa̱ntjaná.

10, 11. Jótso xi tʼatsʼe Jeobá ya Salmo 86:5.

¹⁰ (Tʼexkiai Salmo 86:5).d Je David kʼoakitso nga tíjnanda Jeobá nga síchatʼaná. Jngo xo̱n xi tʼatsʼe Biblia nchja̱ni kʼoatso nga tsín tokjoan yaole síjtile Jeobá nga bijnyijée, tosaa kui xi mele nga sichatʼaná kʼiatsa kʼoakoa̱nniná je jéená. I kitsosa David: “Nʼio bakolai kjoatsjoacha ngatsʼi je xi nchja̱li”. Tojosʼin tsaʼyaa ya kjoaʼmiya xi jaʼato, je Jeobá tsjoake koa̱nná ngantsjai, kʼoa aliʼya xi kʼoakji tsjoakená jokji tsjoakená je, kuinga tíjnandani nga síchatʼaná kʼiatsa kʼoakoa̱nniná je jéená (Is. 55:7). Tsa tsín sʼejngo tokuin kʼianga jekisichatʼali Jeobá tikjaʼaitsjain nga tíjnanda nga síchatʼale ngatsʼi xi kʼoamanile jéele kʼoa xi síjéle kjoamatokon. Tʼejngui tokuin kʼianga jekisichatʼali.

¹¹ Ya Biblia kʼoatso nga be Jeobá nga chao koanndañá kʼoa majinle nga chjotajée maa. Nga ʼyaa jebi nda sʼe tokoán (Sal. 139:​1, 2). Kataʼyalasa jokitso David xi kʼoejngo tokoán nga síchatʼaná Jeobá.

JMÉNI XI FAʼAITSJENLE JEOBÁ XI TʼATSAAN

12, 13. Tojo tso Salmo 103:​14, jméni xi faʼaitsjenle Jeobá kʼoa jméni xi sʼín.

¹² (Tʼexkiai Salmo 103:14).e Je David kʼoatso ánni nga síchatʼaniná Jeobá kʼianga kʼoamaniná jéená. Kuinga be nga chjotajée maa, nga chao koanndañá kʼoa nga sakʼoa kui k’oan’ia xi tsín kixi tíjna. Kataʼyalasa jme xi kitso David.

¹³ Je David kʼoakitso nga be Jeobá josʼin koanndaa. Nga chao koanndani Adán kuinga machjénnile nga skénjta, nga koakjen kʼoa nga koájnafe (Gén. 2:7). Tonga nga tsakajngijée je Adán kao Eva kʼoati kisikakinná je jée kʼoa kuinga kui kʼoanʼiañá xi chʼaotjín. Kʼianga kʼoakitso David nga faʼaitsjenle Jeobá nga chao koanndañá kui xi tsonile nga be nga chjotajée maa. Tonga tsa kʼoakoa̱nniná je jéená mamakená kʼoa síchatʼaná (Sal. 78:​38, 39).

14. 1) Jméni xi bakóyaná Salmo 103:12 josʼin síchatʼa Jeobá. 2) Tojo koan je David, ánni kʼoabixónñá nga tondiaa síchatʼaná Jeobá (chótsenlai recuadro “Je Jeobá síchatʼaná kʼoa síchajin je jéená”).

¹⁴ Jósasʼin tíjna nga síchatʼaná Jeobá (tʼexkiai Salmo 103:12).f Je David kʼoakitso kʼianga jesíchatʼaná Jeobá nʼio kjin fikao je jéená. Kʼoatso nga kʼoakji kjin fikao jokji kjin tíjnale jña bitjoni je tsʼuí kao jña kantjaini. Jméni xi bakóyaná jebi. Kʼianga síchatʼaná je Jeobá kjin fikao je jéená kʼoa alikui tikui síkjaʼaitsjenni kʼoa alikui tikʼoatso ngindianiná jmeni xi kinʼia (Ezeq. 18:​21, 22; Hech. 3:19).

15. Jósʼiaan tsa tsín nda sʼe tokoán tʼatsʼe jée xi tsakijnyaa ngasʼa.

¹⁵ Tsa tsín nda sʼe tokoán nga tsakijnyijée ngasʼa koaan si̱kjaʼaitsjenjiaan jmeni xi tso ya Salmo 103 ánni nga sʼe̱jngosíni tokoán nga jekisichatʼaná Jeobá. Koaan i̱ kuixoán: “Je Jeobá be nga chjotajée ma, tíjnandaa nga sichatʼana tsa kʼoakoa̱nnina jéena. A tsí kʼoati machjén nga kʼoasʼin sikjaʼaitsjen tsanda an. Je Jeobá jekisichajin jme jée xi tsakajngia ngasʼa. A tsí kʼoati tjínnele kʼoasʼian tsanda an”. Kʼianga jesíchatʼaná Jeobá, alikui tosi tonda kui bʼéjinkon jme jée xi tsakijnyaa. Kuinga kʼoati machjénni nga si̱chajiaan tsanda ñá (Sal. 130:3). Kʼianga jesʼe̱jngo tokuin nga jekisichatʼali Jeobá nda sʼe̱ tokuin kʼoa alikui tikui kʼoéjinkonni.

16. Ánni nga tsín ndatjínni tsa tokui si̱kjaʼaitsjen ʼndeʼndee jmeni xi tsín nda kinʼia ngasʼa (kʼoati chótsenlai sén xi faʼaitʼa).

¹⁶ Tsa tosi tonda kui si̱kjaʼaitsjain tʼatsʼe jée xi tsakijnyi ngasʼa, joxi yaani mangóson tsa carro tinixákoai kʼoa toya chótsenya ʼndeʼndai cho̱tsínle. Machjén nga sakʼoa chótsenyá cho̱tsínle carro ánni nga jchañá jmeni xi kjima jto̱nni, tonga nga tsín jme xi koa̱nná machjén nga chótsen kixi kixiaa josʼin ndiaa timangián. Kʼoati machjén nga sakʼoa si̱kjaʼaitsjeen jme jée xi tsakijnyaa ngasʼa ánni nga tsín tikui kʼoasʼianñá. Tonga tsa tokui si̱kjaʼaitsjen ʼndeʼndee alikuijin tinda sʼe̱ni tokoán kʼoa alikuijin nda si̱xálee Jeobá. Kuinga machjénni nga kui si̱kjaʼaitsjenjiaan jokoa̱nchon kʼianga jekjoaʼaí sonʼnde chjotse, nga kʼia, alikui tikui si̱kjaʼaitsjenñá jmeni xi kinʼia (Is. 65:17; Prov. 4:25).

TʼEJNGUI TOKUIN NGA JEKISICHATʼALI JEOBÁ

17. Ánni nga kʼoéjngoñá tokoán nga tsjoakená Jeobá kʼoa nga síchatʼaná.

¹⁷ Kʼoéjngoaa tokoán nga tsjoakená Jeobá kʼoa nga síchatʼaná (1 Juan 3:19). Je Na̱i kui xi mele nga kʼoasʼin si̱kjaʼaitsjeen nga tsín tsjoakená Niná kʼoa nga tsínkʼia sichatʼaná. Kui xi mele nga tsín tije Jeobá si̱xánilee. Ngisaa tíbásjaingánile ndʼai jotísʼín nga̱ be nga tongichoasa nichxin tíjnale (Apoc. 12:12). Alikui kʼoaiʼndee nga je katabʼanachaná.

18. Jósʼiain nga sʼe̱jngo tokuin nga tsjoakeli Jeobá kʼoa nga jekisichatʼali.

¹⁸ Ya kjoaʼmiya xi jaʼato kui tsaʼyaa jmeni xi sʼiaan nga sʼe̱jngo tokoán nga tsjoakená Jeobá. Kʼoa i̱ kjoaʼmiya jebi kui kaʼyaa jméni xi sʼiaan nga kʼoéjngoaa tokoán kʼianga jekisichatʼaná Jeobá. Si̱kjaʼaitsjenjiaan jokjoan je Jeobá kʼoa jmeni xi tso Biblia josʼin síchatʼa. Je Jeobá be nga chjotajée maa kʼoa bakóná kjoamatokon. Kʼoa kʼianga síchatʼaná tondiaa síchajin jée xi bijnyaa. Tsa si̱kjaʼaitsjenjiaan jebi kʼoati sʼe̱ tokoán jokisʼe kon David kʼianga kitso: “Ji kinichatʼaní je jéena kʼoa kinichatʼanái jñani tsín nda kisʼian” (Sal. 32:5).