KJOAʼMIYA XI CHOTʼAYA 14
KJOAJNDA 8 Jé Jeobá koase̱nchjoa nga tsín jme xi koa̱nna
Chjoéjion “ʼyáni xi si̱xálao”
“Tonga an kʼoa kao xi tjío yaniʼyana jé Jeobá si̱xálaijin” (JOS. 24:15).
XI TÍNCHJA̱NI
Si̱kjaʼaitsjenjiaan ánni nga je Jeobá tinixánilee.
1. Jmé xi sʼiaan tsa mená ndasʼin kuiyoaa kʼoa ánni (Isaías 48:17, 18).
JE Jeobá nʼio tsjoakená kʼoa kui xi mele nga ndasʼin kuiyoaa ndʼaibi kao nichxin xi nroaján (Ecl. 3:12, 13). Kʼianga kisindaná kui kjoanda kitsjoaná nga nkjín koya jmeni xi maná nʼia, tonga tsín kʼoasʼin kisindaná nga tiñá koatexomanilee yaoná kʼoa nga ñá kʼoakuixoán jmeni xi ndatjín kʼoa jmeni xi chʼaotjín (Ecl. 8:9; Jer. 10:23). Je Jeobá be nga ndasʼin kuiyoaa kʼiatsa je si̱xálee kʼoa tsa si̱tjosoán jmeni xi tsoná (tʼexkiai Isaías 48:17, 18).a
2. Jósʼin mele Na̱i nga si̱kjaʼaitsjeen, kʼoa jmé xi tísʼín je Jeobá.
2 Je Na̱i kui xi mele nga kʼoasʼin si̱kjaʼaitsjeen nga ngisa ndasʼin kuiyoaa kʼiatsa tsín je Jeobá koandiaaná (Gén. 3:4, 5). Kʼianga jchale nga to énndiso jmeni xi tso je Na̱i, je Jeobá títsjoáʼndee nga toje tjíobatéxomale xínkjín chjota kʼoa tiʼyañá nga tsín ndasʼin tíbichómani. Tonga ya Biblia síkʼaxki je chjota xi ndasʼin tsakatio nga je Jeobá kisixále, jolani je Jesús. I̱ kjoaʼmiya jebi jan koya tjínni xi chótʼayajiaan. Xi títjon, ánni nga je Jeobá kisixánile Jesús. Xi majaoni, ánni nga toje Jeobá tjínnenile jchaxkoán. Kʼoa xi majanni, ánni nga je Jeobá nixánilee.
ÁNNI NGA JE JEOBÁ KISIXÁNILE JESÚS
3. Jméni xi tsakʼaitʼale je Jesús kʼoa jókitso.
3 Kʼianga jaʼai Jesús i̱ Sonʼnde jé xi kʼoasʼin koanmele nga je Jeobá skoe̱xkón. Nga to chriankʼia kisʼenngindá, je Na̱i kʼoakitsole nga tsjoále ngayeje jmeni xi tjín sonʼnde kʼiatsa je kʼoetsʼoale. Tonga je Jesús i kitso: “Tʼin, Satanás, nga̱ tjítʼa: Tojé Naili Nináli [Jeobá] xi jchaxkuín, kʼoa toje tojngo xi si̱xálai” (Mat. 4:8-10). Kataʼyala ánni nga je Jeobá kitʼanile Jesús.
4, 5. Ánni nga je Jeobá kisixánile Jesús.
4 Je Jesús nʼio tsjoake je Nʼaile, kuinga je kisixánile (Juan 14:31). Be nga ngisa ndatjín nga je Jeobá nixálee (Juan 8:28, 29; Apoc. 4:11). Kʼoati be nga je títsjoáná kjoabijnachon, nga nʼio nda chjota kʼoa nga koa̱n si̱nʼiotʼaa (Sal. 33:4; 36:9; Sant. 1:17). Je Jesús be nga tsínkʼia bʼéndiso Jeobá kʼoa jé kitsjoale ngayeje jmeni xi tjínle (Juan 1:14). Tonga je Na̱i ndisoní, xinkonní, ngʼakon kʼoa jé xokisʼin nga kjoabiya tjín (Juan 8:44). Je Jesús nda bexkon je Jeobá kʼoa kʼoati nda bexkon je Na̱i, kuinga tsín kʼoakisʼinni josʼín je Na̱i kʼoa tsínkʼia yátsʼi̱n tsakasénle Jeobá (Filip. 2:5-8).
5 Ijngo koya anni nga je Jeobá kisixánile Jesús kuinga be nga nda kuichomani kʼiatsa kixi koaitʼale (Heb. 12:2). Be nga kʼoasʼin kʼoasjetsjeni jaʼaínle Nʼaile kʼoa yaa kjuinroani nga tjóxin je jée kao kjoabiya.
ÁNNI BAKINNILE NGA JCHAXKOÁN JE JEOBÁ
6, 7. Ánni nga tsín je Jeobá síxánile chjota, kʼoa ánni nga toje Jeobá bakinnile nga jchaxkoán.
6 Nichxin xi tiyoaa ndʼaibi nkjín chjota xi tsín bexkon Jeobá, kuinga tsín je síxánile. Alikui be jokjoan kʼoa alikui be tsa je títsjoáná jmeni xi tjínná. Kʼoati koan je chjota xi Atenas tsʼe, tsín be xi tʼatsʼe Jeobá kʼianga kicho Pablo (Hech. 17:19, 20, 30, 34).
7 Kʼianga kitsoyale Pablo je chjota xi Atenas tsʼe kʼoakitsole nga tʼatsʼe Niná nga tiyochoán, nga nikjaan kʼoa jé títsjoáná jmeni xi tjínná. Kʼoati kitsole nga tojngo chjota kisinda Niná kʼoa nga ya kinroañá ngatsʼiaa. Bakinle nga toje jchaxkoán Niná nga̱ jé kisindaná (Hech. 17:25, 26, 28).
8. A kjoanʼio bʼénená Jeobá nga je ni̱xálee.
8 Je Jeobá alikui kjoanʼio sʼínná nga je si̱xálee ningalani tiʼndele nga kʼoasʼin nga̱ jé kisindaná kʼoa jé batéxomale ngʼajmi kao Sonʼnde. Tosaa kui xi mele nga ni̱ma̱ná katanroajinni nga je si̱xálee (1 Tim. 2:3, 4). Ngayeje jmeni xi kisinda Jeobá kui bakó nga tíjna kʼoa nga tsjoakená. Kʼoatsoná nga kʼuínyalee xi kjaʼaí jmeni xi sʼin nichxin xi nroaján (Mat. 10:11-13; 28:19, 20). Nga tsoyaná je Jeobá tsen tsen tjío je jtín jñani biyojtián kʼoa tjío je ndsʼee xi bándiaaná (Hech. 20:28).
9. Jósʼin bakó Jeobá nga tsjoakená ngatsʼiaa.
9 Je Jeobá tsjoake ngatsʼi chjota ninga tsín makjainle xi tʼatsʼe. Jokji tífaʼato nó, millón chjota xi tsín kuenta sʼín je Jeobá kʼoa tokui fini josʼin síkjaʼaitsjen. Ninga kʼoalani, je Jeobá tsjoále jmeni xi machjénle (Mat. 5:44, 45; Hech. 14:16, 17). Tobʼelañá, kui kjoanda kitsjoaná ngatsʼiaa nga sʼená miyo, nga tjín xíngiaa, nga sʼená ʼndíxti kʼoa nga maná nixá (Sal. 127:3; Ecl. 2:24). Jebi kui bakó nga tsjoakená Jeobá (Éx. 34:6). Ndʼaibi kuila kataʼyaa ánni nga je Jeobá nixánilee kʼoa jósʼin síchikontʼainná.
ÁNNI NGA JE JEOBÁ TINIXÁNILEE
10. 1) Ánni nga je Jeobá nixánilee (Mateo 22:37). 2) Jósʼin basenkaoná nga tsejta je Jeobá (Salmo 103:13, 14).
10 Tojo kisʼin je Jesús, kuinga je Jeobá nixánilee nga̱ tsjoachañá (tʼexkiai Mateo 22:37).b Kʼianga nda ʼyaxkoaan je Jeobá ngisasa nda ʼyaa jokjoan, jolani nga tsejta. Tobʼelañá, kʼianga tsínti kisitjosonnile Jeobá je chjota israelita, i kitsole: “Nrʼoánrʼoenináo ali tikuijin xi chʼaotjín kʼoanʼiaño” (Jer. 18:11). Je Jeobá be nga chjotajée maa kʼoa nga chao koanndañá (tʼexkiai Salmo 103:13, 14).c Kʼianga nikjaʼaitsjenjiaan nga tsejta je Jeobá kʼoa nga ʼyaa jokjoan ngisaa mamená nga je nixálee.
11. Ánsani nga je Jeobá nixánilee.
11 Ijngosa koya ánni nga je Jeobá nixánilee kuinga ʼyaa nga kui xi ndatjín kʼoa ndasʼin bichómani nga kixi mangíntʼalee (Mat. 4:10). Nga̱ chʼasjetsjeñá je jaʼaínle, chʼasjendisoñá je Na̱i kʼoa bayatsjoañá kon je Jeobá. Tsa je Jeobá si̱xálee ndʼaibi kʼoasʼiaan tokʼia saʼndani (Juan 17:3).
12, 13. Jmé xi bakóyaná jokisʼin je tichjaa xi Jane ʼmi kao xi Pam ʼmi.
12 Tsa tsjoacha koaan je Jeobá saʼnda nga sʼa ʼndí kjoaan sa tsjoacha sa tsjoachaa koaan nga jekoa̱njchíngaa. Kʼoakisʼin je tichjaa xi Jane ʼmi kao xi Pam ʼmi.d Je Pam 10 nóle kʼoa je Jane 11 nóle nga kiskotʼaya Biblia. Ningalani tsín kiskotʼaya je xijchále, kʼoakitsole nga koa̱n skótʼaya Biblia tsa kʼoati koai yo̱ngo̱ nga tífe xomana. Je Jane itso: “Jmeni xi koanjinna nga kiskotʼaya Biblia kui xi tsakasenkaona nga tsín kʼoati kisʼian josʼín je xti xi ñatjen fia skuela, nga tsín droga kisken kʼoa nga tsín kisichajngia”.
13 Kʼianga koanskanni, publicadora koan nga jao tichjaa. Kʼianga jekoanjchínga precursora sʼin kisixá kʼoa kʼoati kisikuinda kaoni je xijchále. Kʼianga síkjaʼaitsjenjin Jane josʼin tíbasenkao Jeobá, itso: “ʼBeña josʼin síkuinda Jeobá je miyole, tojo tso ya 2 Timoteo 2:19, je Jeobá be ʼyani xi je síxále”. Nga je Jeobá tinixálee alikui jao kʼoé tokoán nga je sikuindaná.
14. Jósʼiaan nga kuinókjoantjé Jeobá (kʼoati chótsenlai sén xi faʼaitʼa).
14 Nokjoantjéñá je Jeobá kʼianga ʼya xi énndiso báne nga̱ kui xi mená nga katabe chjota jokjoantjínni xi tʼatsʼe. Kʼoasʼin nokjoantjé tojo nikoaa jngo miyoná xi nʼio nda ʼyaxkoaan. Tsa ʼya xi énndiso koane kʼoa kʼoakuitsoná nga nʼio tsʼen je miyoná alikui koa̱nkjainná nga̱ ʼyañá nga ndʼé kʼoa nga nda chjota (Sal. 34:1; Is. 43:10). Kuinga nokjoantjéñá je Jeobá nga̱ tsjoachañá kʼoa mená nga je si̱xálee.
A kʼuínyalai je chjota jokjoantjínni xi tʼatsʼe Niná (Chótsenlai párrafo 14)f
15. Jmé kjoanda xi kisʼele Pablo nga je Jeobá kisixále (Filipenses 3:7, 8).
15 Nikʼantjaiyañá jmeni xi nʼia kʼianga ngisasa nda nixálee je Jeobá. Je Pablo nʼio nda choa̱ tsakʼéjnaná nga kʼoakisʼin. Ningalani nʼio ndasʼin tsakʼejna kʼoa nʼio nda xá kisʼele kisikʼéjnaa ngayeje jebi kʼianga jechjotale Cristo koan (Gál. 1:14). Nga je Jeobá kisixále nʼio tsjoa kisʼe kon kʼoa kui kjoanda tjínle nga ya koatexomakao Cristo ya ngʼajmi. Tsín kʼoakoannile Pablo jmeni xi kisʼin kʼianga je Jeobá kisixále kʼoa ñá kʼoati tsínkʼia kʼoamaniná jmeni xi tinʼia nga je Niná tinixálee (tʼexkiai Filipenses 3:7, 8).e
16. Jmé xi bakóyaná jokisʼin je Julia (kʼoati chótsenlai sén xi faʼaitʼa).
16 Jé Jeobá sichikontʼainná ndʼaibi kao nichxin xi sʼa nroa tsakui ngisa kʼoailee kjoandosin nga je si̱xálee. Kataʼyala jokoan jngo tichjaa xi Julia ʼmi. Kʼianga sʼa ʼndí yaa yo̱ngo̱ kise. Nga nda se tsakʼinyale nga koa̱nle ngisasa nda sé. Xijekoan, nʼio tsaʼyale kʼoa yaa kise jñani se je chjota xi nʼio ʼyale. Je ti xi ñatjen kiskotʼaya ya skuela xi tsʼe música, tsakjákaonajmíni xi tʼatsʼe Niná kʼoa kʼoakitsole nga Jeobá ʼmi jaʼaínle. Xijekoan, je Julia jao kʼa kiskotʼaya Biblia nga jngo xomana. Nga jeki nichxin, jé Jeobá kisixále kʼoa alikui tikui xá kisʼinni nga kise. Ningalani tsín choa ñʼai koanle nga kʼoakisʼin, je Julia itso: “Nʼio nkjín chjota xi i̱ kitsona: Ánni nga tsínti jndani nga̱ nʼio ndasi nga jndai. Tonga an kui xi mena nga je Jeobá sixále”. Itsosa: “Je xi jetsʼato 30 nó nga je Jeobá tisixále nʼio tsjoa tjín tokoan kʼoa alikui jao tjínna nga tsjoána je Jeobá ngayeje jmeni xi mena nichxin xi sʼa nroa” (Sal. 145:16).
Kui xi ngisa tsjoa bʼé tokoán nga je Jeobá nixálee (Chótsenlai párrafo 16)g
TOSI TONDA JE JEOBÁ SI̱XÁLEE
17. Jméni xi majinná nga to jenichxin fetʼa tiyoaa.
17 Jenʼio machrianle nga kjoetʼa jmeni xi chon sonʼnde kʼoa kui jebi kinchja̱ni Pablo kʼianga i̱ kitso: “Je xi kjoaʼaí, kjoaʼaíní, kʼoa likui koa̱ntseyale” (Heb. 10:37). Kui xi tsonile nga tongichoasa nichxin tíjna nga kʼuínyalee chjota xi tʼatsʼe Jeobá kʼoa jé xi kuitsoni tsa je sixále kʼoa tsa mai (1 Cor. 7:29). Tonga kʼoati kui xi tsonile nga tochoatsesa nga kjoañʼai kjoaʼa je choʼndale Niná kʼiatsa kjoalani kjoaʼatojin.
18. Jméni xi tsoná Jeobá kao Jesús.
18 Je Jesús kʼoakitsole chjota nga chjotatjenngile katama kʼoa nga tosi tonda kʼoakatasʼín (Mat. 16:24, TNM). Kuinga tsín koa̱n si̱kinroajenñá tokoán ninga jekjoatse nga tinixálee Jeobá kʼoa ninga sakʼoa ñʼai koa̱nná nga kʼoasʼiaan. Tsjoa tjío tokoán kʼoa tsee kjoanda tjínná nga je Jeobá tinixálee (Sal. 35:27).
19. Jmé xi bakóyaná jokoan je Gene.
19 Tjínkʼa chjota xi kʼoasʼin síkjaʼaitsjen nga tsín bʼetsaojiaan xi testigole Jeobá maa. Kʼiatsa sʼa xti tsakui nichxin kʼoatisʼin nikjaʼaitsjain. Kʼoakoan jngo ndsʼee xi Gene ʼmi. Itso: “Kʼoasʼin kisikjaʼaitsjen nga nkjín koya jmeni xi sʼechjoaná xi testigole Jeobá maa. Nga̱ je xti xi ñatjen koanjchínga tsakʼétsaojin, ki sʼuí, bitjokao xtiyánchjín kʼoa kui videojuego xi kjoatsʼen tjenkao sískákao. ʼNdele nga kʼoakisʼian an to kjoajtínla fia kʼoa to fixinyasonña”. Jósʼin kichomani nga kʼoasʼin kisikjaʼaitsjen je Gene. Itso: “Kʼoati kisʼian josʼín je xti xi ñatjen koanjchínga, tsakʼetsaojinña tonga alikuini ñaki tsjoa kisʼe tokoan, kʼiaa jaʼaitsjenna jmeni xi tso je Biblia kʼoa koanjinna nga ndatjín nga nitjosoán. Xijekoan, ñaki kʼoatsakʼe tokoan nga je Jeobá sixá ijngokʼanile kʼoa saʼnda nga kʼia tiʼbeña josʼin tíbasenkaona Jeobá”.
20. Jméni xi mená sʼiaan.
20 Jngo xi kiski salmo i kitso kʼianga kisele Jeobá: “Tsjoa tjínle je chjota xi ji chjoejin kʼoa xi ji faʼai̱koai nga ya katabʼejna ya nditsinli” (Sal. 65:4). Kʼoati kuixoán jokitso je Josué nga kitso: “Tonga an kʼoa kao xi tjío yaniʼyana jé Jeobá si̱xálaijin” (Jos. 24:15).
KJOAJNDA 28 Jósʼiaan nga miyole koaan je Jeobá
a Isaías 48:17, 18: “Kui jebi xi títso Jeobá, je xi tsakatseyali, je xi tsje sʼin tíjna ya Israel: An Jeobá, anña Nináli, je xi kʼoasʼin bakóyali ánni nga nda kuijnasíni, je xi kʼoasʼin síkasényali ndiaa xi tjínnele kuitómjeyai. 18 Kʼiatsa koasenñolani je kjoatéxomana, ñaki nyʼánjin sʼin kuijnai joni tsa jngo xo̱ngá, kʼoa je kjoakixili ñaki jo xóle ndáchikonjin koa̱n”.
b Mateo 22:37: “Jesús kʼoakitsole: Katamatsjoachai Naili Nináli. Katamatsjoachani ngayije ni̱ma̱li, kao ngayije kjoatsjoali, kʼoa kao ngayije kjoafaʼaitsjenli”.
c Salmo 103:13, 14: “Josʼín jngo nʼai nga bakóle kjoamatokon je xtile, je Jeobá kʼoasʼin bakóle kjoamatokon je xi tsokjónke. 14 Nga̱ nʼio nda be josʼin koanndaa, faʼaitsjenle nga to chaoñá”.
d Alikui tsa ñaki kʼoaʼmi kʼa chjota xi bʼaxki̱ i̱bi.
e Filipenses 3:7, 8: “Tojmenibe xi tsʼan xi jekisikinje, kisichajian ngayije, jméni nga kuinjesínina Cristo. 8 Kjoakixiní, kʼoasʼin ʼbekoan ngayije kjoa nga lijme chjíle. Kjaínga tongisa chjíle nga nda ʼbe Cristo Jesús, Naina. Tʼatsʼe Cristo kisichania ngayije, tojoni tsa tjé ʼbekoan, jméni nga kʼoasʼin kuinjesínina Cristo”.
f XI TÍNCHJA̱NI SÉN XI FAʼAITʼA: Kʼianga tísʼejna kjoajtíntse jngojtín chjota xi ya nya nditsin xi chʼaosʼin tjíosíkʼaxki̱ je testigole Jeobá kʼoa jngo chjoón xi ya faʼa, chjoón jebi yaa bichó jñani tjíotsoyason je ndsʼee kʼoa nrʼoé je Énle Niná.
g XI TÍNCHJA̱NI SÉN XI FAʼAITʼA: Sén jebi kui bakó jmeni xi kisʼin Julia nga je Jeobá kisixále.