KJOAʼMIYA XI CHOTʼAYA 31
KJOAJNDA 111 Xi tsjoa fáya tokoán
A tsjoa tjín tokoán josʼin tiyoaa
“Jekoanngana nga tonda sʼekoan jo tjín xi tjínna” (FILIP. 4:11).
XI TÍNCHJA̱NI
Tsjoa sʼe̱ tokoán tsa kʼoee kjoanda, tsa nangitokon koaan kʼoa tsa si̱kjaʼaitsjenjiaan je kjoachoya xi tjínná.
1. Jósʼin tíjna nga tsjoa bʼé tokoán.
JE XI chjí be jokji jetjínle tsjoa satío kon kʼoa tsín yaole síjtile. Ningalani tsjoa tjínná josʼin tiyoaa, alikui koa̱n nga tokʼoéjngoaa tokoán. Koaan si̱kjaʼaitsjeen jmésani xi sʼiaan nga ngisa nda si̱xálee Jeobá (Rom. 12:1; 1 Tim. 3:1). Ninga kʼoalani, tojo tsjoa sʼe̱ tokoán ninga tsínkui xá kʼoainá jmeni xi mená.
2. Ánni tsín nda bichómani nga tsín tomajngoni tokoán jokji jetjínná.
2 Tsa tsín tomajngoni tokoán jokji jetjínná tochale kui kʼoasʼiaan xi tsín kixi tíjna. Tobʼelañá, tjínjinkʼa xi ngisasa tse sixá tojoni nga tsesa tao̱n kuinjele ánni nga nkjín tsojmi sʼe̱nile, ninga tsínni ñaki machjénle. Xi tokʼoamaná, kuinga tjínkʼa ndsʼee xi chan síché kʼianga tao̱n nʼio símekon kʼoa tsa jmesani xi kjaʼaínile. Tsakui nichxin i̱ tso xi síkjaʼaitsjen: “Tjínna ʼnde nga kʼoasʼian”, “jekichobena nga tikoya”, “koaan toskoela tao̱n jebi kʼoa skan sikʼéjnangajaoña”. Ninga kʼoalani, tojo tísíchéni. Kʼoa nga kʼoasʼín, alikui sasénle Jeobá nga̱ tsín nda nikʼéjnaa jaʼaínle nga kʼoanʼia (Prov. 30:9). Tjínkʼa xi tsín nda satío kon kʼianga tsín jme xá bʼaile jinnaxinandále Niná kʼoa yaa nroani nga tsín tije Jeobá síxánile (Gál. 6:9). Sakʼoajin i̱ kuixoán: “Jókoa̱nnile nga kʼoasʼin xi je Jeobá tísíxále”. Kʼianga kui xi tsín kixi tíjna kʼoasʼín jngo ndsʼee, tsakui nichxin kui xosikao nga tsín titsjoa sʼe̱ni kon jokji jetjínle.
3. Jósʼin basenkaoná jmeni xi tso Filipenses 4:11, 12.
3 Koaan tsjoa kʼoé tokoán tojosʼin tiyoaa. Je Pablo i kitso: “Jekoanngana nga tonda sʼekoan jo tjín xi tjínna” (tʼexkiai Filipenses 4:11, 12).a Kʼianga kʼoakitso Pablo ndoyá tíjnaʼya, tonga tojo tsjoa kisʼe kon. Kui bakóyaná nga kʼoati koa̱n tsjoa sʼe̱ tokoán tsanda ñá ninga kjoa kuitjátojiaan. Kʼoa i̱ kjoaʼmiya jebi jan koya tjínni xi chótʼayajiaan xi koakoyaná jméni xi sʼiaan nga tsjoa sʼe̱ tokoán.
KʼOEE KJOANDA
4. Ánni tsjoa sʼeni tokoán kʼianga bʼé kjoanda (1 Tesalonicenses 5:18).
4 Tsa kʼoee kjoanda ngisaa tsjoa sa̱tío tokoán (tʼexkiai 1 Tesalonicenses 5:18).b Tsa tsjoa tjín tokoán jokji jetjínná, alikuijin kui nʼio si̱kjaʼaitsjeen jmeni xi tsínná. Tsa chjí ʼyaa josʼin tinixálee Jeobá ndʼai, sa nda sa ndajin si̱tjosoán jme xá xi tjínná kʼoa tsínjin tokui si̱kjaʼaitsjen ʼndeʼndee jme xá xi mená nga kʼoainá. Kuinga kʼoatsoni Biblia nga kʼoailee kjoanda Jeobá tʼatsʼe jmeni xi tjínná, nga̱ nda sʼe tokoán kʼianga kʼoanʼia. Tsa kʼoailee kjoanda Niná, je Biblia kʼoatso nga tsjoáná kjoanyʼántokonle “xi ñaki faʼatole ngayije kjoafaʼaitsjenle chjota” (Filip. 4:6, 7).
5. Ánni tsjoa tsakatíoni kon tsakai chjota israelita (kʼoati chótsenlai sén xi faʼaitʼa).
5 Je chjota israelita nkjín kʼa tsakjayojéetʼale Jeobá nga̱ kui nʼio kisikjaʼaitsjen josʼin tsakjen nga tsakatio ya Egipto (Núm. 11:4-6). Ninga nkjín koya xi tsín kisʼele ya ʼndekixí, tsjoajin kisatio kon tsa chjí tsabe jmeni xi kitsjoale Jeobá kʼoa josʼin tsakasenkao. Koanjin kui kisikjaʼaitsjen josʼin kisikatíondái Jeobá kʼianga te kjoañʼai kisikasénne chjota egipcio, nga̱ choʼnda koan kʼoa totaon tsaʼya. Kʼoa nga jekitjoni ya Egipto tsakʼaa tao̱nchxoa, tao̱nsine kao najño xi kitsjoale chjota egipcio (Éx. 12:35, 36). Xi ijngosani, je Jeobá kisijaoya ndáchikon Ní ánni nga kitjontjainile yaole chjota israelita. Kʼoa nga jetjío ya ʼndekixí, nyaon nyaon kitsjoale maná xi kiskine. Kuinga tsín tsjoa kisationi kon chjota israelita nga̱ tsín chjí tsabe jmeni xi kitsjoale Jeobá.
Ánni nga tsín tsjoa kisationi kon chjota israelita (Chótsenlai párrafo 5)
6. Jméni xi sʼiaan nga kʼoee kjoanda.
6 Jméni xi sʼiaan nga kʼoee kjoanda. Xi títjon, nyaon nyaon si̱kjaʼaitsjeen jmeni xi tjínná kʼoa koaan jao kʼoa tsa jan koya kʼoétʼaxoaan ánni nga bʼainilee kjoanda Niná (Lam. 3:22, 23). Xi majaoni, nyaon nyaon kʼoailee kjoanda Jeobá kao xíngiaa tʼatsʼe josʼin binyakaoná (Sal. 75:1). Kʼoa xi majanni, je si̱miyoaa chjota xi male tsjoá kjoanda. Tsa je si̱miyoaa xi tsjoá kjoanda kʼoajinti kʼoee kjoanda tsanda ñá, tonga tsa je si̱miyoaa xi tsín jme kjoanda tsjoá, kʼoajin tisʼiaan tsanda ñá, nga̱ bakinná jmeni xi sʼín xi kjaʼaí (Deut. 1:26-28; 2 Tim. 3:1, 2, 5). Tsa kʼoee kjoanda ngisajin nda sʼe̱ tokoán kʼoa tsínjin kui nʼio si̱kjaʼaitsjeen jmeni xi tsínná.
7. Jmé xi kisʼin Aci nga ngisa tsjoa kisʼe kon.
7 Kataʼyala jokoan jngo tichjaa xi Aci ʼmi, xi Indonesia tsʼe. Itso: “Kʼianga koan chʼin COVID-19, kui kisikjaʼaitsjen josʼin tijna kʼoa nga tjínkʼa ndsʼee xi ndasʼin tjío. Nga kʼoakisʼian alikui titsjoa kisʼeni tokoan” (Gál. 6:4). Jméni xi kisʼin je tichjaa nga tsjoa kisʼe ijngokʼani kon. Itsosa: “Kui kisikjaʼaitsjen josʼin tísíchikontʼainna Jeobá nga nyaon nyaon kʼoa nga naxinandále tijnajian. Nga kitsjoale kjoanda Jeobá ngisaa tsjoa kisʼe tokoan”. Tsa chjénngilee jokisʼin tichjaa, kʼoati tsjoa sa̱tío tokoán tsanda ñá ninga sakʼoa kjoa bitjatojiaan.
NANGITOKON KATAMAA
8. Jókoan Baruc.
8 Kʼoati sakʼoa tsín nda kisʼe kon Baruc, xi secretariole koan Jeremías. Yaa tsakasenkao Jeremías nga kʼoakitsole chjota israelita jme kjoañʼai xi tsjoále Jeobá nga tsín tjíosítjosonle. Je Baruc alikui tikuenta kisʼinni jmeni xi mele Jeobá, to yaole kini kʼoa tokui kini jmeni xi je koanmele. Jé Jeremías kisikasén Jeobá nga i̱ kitsole. “Kui tifasjai nga nkjín tsojmi sʼe̱li. Ali tosi tondajin kui fasjai” (Jer. 45:3-5). Kʼoakitsole Jeobá nga tsjoa katabʼé kon jokji jetjínle. Nga kʼoatsakʼinle Baruc, kisitjoson kʼoa tosi tonda nda tsakʼejna ngixko̱n Niná.
9. Jmé xi bakóyaná jotso 1 Corintios 4:6, 7 (kʼoati chótsenlai sén xi faʼaitʼa).
9 Tsakui nichxin kʼoasʼin síkjaʼaitsjen jngo ndsʼee nga bakinle kʼianga jngo xá kʼoaile ya jinjtín. Tsakui kʼoasʼin síkjaʼaitsjenni nga nʼio nda tísíxá kʼoa nga koa̱nle sitjoson tsa jme xá sʼe̱nele, kʼoa tsakuije̱ nga jenkjín nó nga je Jeobá tísíxále. Jméni xi koasenkao nga tsín chʼao sʼe̱ kon tsa kjaʼaí xi kʼoaile je xá xi mele. Koaan kui sikjaʼaitsjen jmeni xi kitso Pablo ya 1 Corintios 4:6, 7c (tʼexkiai). Alikui toxá jekichʼañá jmeni xi maná nʼia kʼoa ali tsa ñájin nikinjee je xá xi bʼainá jinnaxinandále Niná. Jngoo kjoatjao xi je Jeobá tsjoáná kʼoa kuinga kʼoasʼínni nga tsjoakená kʼoa nga nʼio nda chjota (Rom. 12:3, 6; Efes. 2:8, 9).
Tʼatsʼe Jeobá nroani tojmeni xi maná nʼia (Chótsenlai párrafo 9)f
10. Jmé xi koasenkaoná nga nangitokon koaan.
10 Nangitokon koaan tsa si̱kjaʼaitsjejiaan jokisʼin Jesús. Ninga ʼNdíle Niná kʼoa ninga tse nganʼio tjínle tsakanéjon ndso̱ko̱ chjotatjenngile. Je Juan i kitso: “Be Jesús nga je Nʼainá kʼoasʼin kitsjoale ngayije kjoa jaya ntsja, nga kʼoasʼin jaʼaini tʼatsʼe Niná, kʼoati ya koaikonle Niná [ . . . ], tsakanéjon ndso̱ko̱ chjotale” (Juan 13:3-5). Koanjin kʼoasʼin kisikjaʼaitsjen Jesús nga je xi tjínnele sa̱néjon ndso̱ko̱, tonga alikʼia kʼoasʼin kisikjaʼaitsjen nga tjínnele nʼio nda kʼoéjna kʼoa nga nkjín tsojmi sʼe̱le (Luc. 9:58). Nangitokon koan kʼoa tokoanjngoni kon jmeni xi kisʼele. Nga kʼoakisʼin, nʼio nda choa̱ tsakʼéjnaná (Juan 13:15).
11. Jmé xi tsakasenkao Dennis nga ngisa tsjoa kisʼe kon.
11 Jngo ndsʼee xi Dennis ʼmi, xi ya tsʼe jña Países Bajos ʼmi, kʼoatso nga sakʼoa ñʼai male nga nangitokon ma joni Jesús. Itso: “Kʼianga ʼya xi xá bʼaile ya jinjtín, sakʼoa tsín nda sʼe tokoan nga̱ kʼoasʼin sikjaʼaitsjen nga an bakinna nga kʼoaina. Nga kʼoasʼe tokoan, kui kotʼayajian tʼatsʼe kjoanangitokon. Ya JW Library® nkjín texto tjíchoa̱na xi kui nchja̱ni tʼatsʼe kjoanangitokon kʼoa nga kʼoasʼin bʼechoa̱ ngisaa ngotjo masjainina kʼoa bʼexkiaa ijngokʼa. Kʼoati nkjín kjoanokjoaya nrʼoele xi tjíoyana ya teléfonona xi kui nchja̱ni tʼatsʼe nga tjínnele nangitokon koaan.d Kjimajinna nga je Jeobá tjínnele kuitjongʼa tojmeni xi nʼia, ali tsakuijin nga ñá kuitjongʼa. Jme xá xi nʼia tsʼee Jeobá kʼoa tsjoáʼndená nga bʼainganʼioá”. Tsa sakʼoa kʼoasʼe tokoán josʼe kon ndsʼee jebi, machjén nga nangitokon koaan. Tsa kʼoasʼiaan, tsjoa sʼe̱ tokoán kʼoa tosi tonda miyole Jeobá koaan (Sant. 4:6, 8).
SI̱KJAʼAITSJENJIAAN KJOACHOYA XI TJÍNNÁ
12. Jósʼin basenkaoná je kjoachoya xi tjínná nga tsjoa sʼe tokoán (Isaías 65:21-25).
12 Tsjoa sa̱tío tokoán tsa si̱kjaʼaitsjenjiaan kjoanichikontʼain xi tsjoáná Jeobá nichxin xi nroaján. Ya libro xi tsʼe Isaías kʼoatso nga majinle Jeobá josatío tokoán ndʼaibi kʼoa kʼoatso nga kjoaʼaxin nichxin xi nroaján ngayeje kjoa xi tjínná (tʼexkiai Isaías 65:21-25).e Kʼianga jekjoaʼaí sonʼnde chjotse naskánakjoan ndʼia kuiyoʼyá kʼoa nda kuiyoaa, tsjoachaa koaan je xá xi sʼiaan kʼoa nkjín koya tsojmi xi ma chine sʼe̱. Ñá kʼoa kao ʼndíxtiná alikui tikui kuinókjonnilee tsa jme xi koa̱nná nga̱ tsín tisʼeni xi chʼaotjín (Is. 32:17, 18; Ezeq. 34:25). Nʼio naskánakoa̱nchon nga kʼia kʼoa alikui jao tjín tokoán nga kʼoakoa̱n.
13. Kʼiáni ngisa machjén nga si̱kjaʼaitsjenjiaan je kjoachoya xi tjínná.
13 Ngisaa timachjénngáni ndʼai nga si̱kjaʼaitsjenjiaan je kjoachoya xi tjínná, nga̱ nichxin fetʼa tiyoaa kʼoa ñʼai kjimachon (2 Tim. 3:1). Jé Jeobá basenkaoná nga nyaon nyaon kʼianga bándiaaná kʼoa nga tsjoánganʼioná (Sal. 145:14). Kʼoati tsoná jokoa̱nchon nichxin xi nroaján xi nda bʼé tokoán kʼianga kjoa bitjatojiaan. Ndʼaibi, tsee kjoama̱ bʼengiaa nga bijnyiʼá familianá, tonga ʼyañá nga tsín tongantsjai nga kʼoakoa̱nchon nga̱ je Jeobá kʼoatso nga tsjoáná jmeni xi machjénná kʼianga jekjoaʼaí sonʼnde chjotse (Sal. 9:18; 72:12-14). Tsa táo chʼin bʼetʼaná, tsa aonjon aontʼa yaoná, tsa sakʼoa nʼio ba sʼená kʼoa tsa nʼio nikjáojiaan, si̱kjaʼaitsjeen nga tsín tongantsjai nga kʼoasʼin kuiyoaa nga̱ je Niná kʼoatsoná nga tsín tisʼe̱ni chʼin kao kjoabiya kʼianga jekjoaʼaí sonʼnde chjotse (Apoc. 21:3, 4). Nga kʼoatsoná Niná tsjoa bʼé tokoán ninga kjoa bitjatojiaan ndʼaibi. Ninga totaon jchaná, ninga chʼin tíbʼetʼaná, tsa xíngiaa kuiyá kʼoa tojme kjoa xi kuitjátojiaan, koaan tsjoa kʼoé tokoán nga̱ ʼyañá nga tokjoaʼato ngayeje jebi nga̱ tsín tikui kjoa kuiyojinñá kʼianga jekjoaʼaí sonʼnde chjotse (2 Cor. 4:17, 18).
14. Jósʼiaan nga sʼe̱jngo tokoán nga kuitjoson nichxin xi nroaján jmeni xi tsoná Jeobá.
14 Jósʼin basenkaoná kjoachoya xi tjínná nga tomajngoni tokoán josʼin tiyoaa ndʼaibi. Je kjoachoya xi tjínná yaa mangóson cho̱tsín. Kʼianga cho̱tsín bʼeyaa ngisaa nda matsenná jochon jñani titomjee, kʼoakjoán tima je kjoachoya xi tjínná, kʼianga kui nikjaʼaitsjenjiaan machoyaná jokoa̱nchon kʼoa josʼin kuiyoaa kʼianga jekjoaʼaí sonʼnde chjotse. Tobʼelañá, tsakui nʼio nikjáojiaan nga ñʼai maná tao̱n, koaan kui si̱kjaʼaitsjenjiaan jókoa̱nchon kʼianga tsínti tao̱n koa̱nchjénni, nga tsínti tao̱n tsjéntʼenñá kʼoa nga tsín tima̱ kuiyoñá. Kʼoa tsa tsín nda sʼe tokoán nga tsín bʼainá je xá xi mená ya jinjtín, koaan kui si̱kjaʼaitsjenjiaan nga tsín tikui nʼio kʼoainilee kjoandosin kʼianga jechjotatsje koaan kʼoa nga jejmi nó tinixálee Jeobá (1 Tim. 6:19). Nga tse kjoa tjínná ndʼaibi, sakʼoajin ñʼai maná nga majinná jokoa̱nchon kʼianga jekjoaʼaí sonʼnde chjotse, tonga tsakui kuenta sʼiaan jokoa̱nchon nga kʼia, alikuijin tikui nʼio si̱kjaʼaitsjenjinñá jme kjoa xi tjínná ndʼaibi.
15. Jmé xi bakóyali jotso je Christa.
15 Kataʼyala jotso tichjaa xi Christa ʼmi, xi chjoónle ma Dennis, xi jenása kanikʼaxkiaa. Itso: “Sa táo sa táo kjima chʼin xi tjínle nindana kʼoa to silla de ruedas tijnaya, me to nachansa kijnasoan kʼoa aonjon aontʼa yaona. Chriansʼaa kʼoakitsona chjinexki nga sa táo sa táo koa̱nña. Kʼianga kʼoakitsona tokjoan itso xi kisikjaʼaitsjen: Alikuijin kʼoasʼin síkjaʼaitsjen tʼatsʼe nichxin xi nroaján josʼin sikjaʼaitsjen an. Nda sʼe tokoan kʼianga kui sikjaʼaitsjen kjoachoya xi tjínna. Totíchókjoajinlana ndʼaibi jme kjoa xi tijnajian, tonga kʼianga jekjoaʼaí sonʼnde chjotse nʼio ndasʼin koatejna”.
“TSÍN JME XI CHALE JE XI TSOKJÓNKE” JEOBÁ
16. Ánni kʼoakitsoni David nga “tsín jme xi chale je xi tsokjónke” Jeobá.
16 Ningalani ndatjío tokoán josʼin tiyoaa ndʼaibi, tojo kjoa bitjatojiaan. Si̱kjaʼaitsjenjinla jme kjoa xi jaʼatojin je rey David. Alikui kixi tíjna jmeni xi koantʼain, kichʼanachale, jan xtile kʼien kʼoa nkjín nó nga chjota kitjenngike nga koanmele kisikʼien. Ninga kui kjoa jaʼatojin tsjoa kisʼe kon. I kitso xi tʼatsʼe Jeobá: “Tsín jme xi chale je xi tsokjónke” (Sal. 34:9, 10). Kuinga kʼoakitsoni nga̱ be nga je Jeobá basenkaoná kʼoa tsjoáná jmeni xi machjénná ningalani sakʼoa kjoa bitjatojiaan (Sal. 145:16). Joni David, tsjoa tjío tokoán nga̱ ʼyañá nga je Jeobá koasenkaoná tojme kjoa xi kuitjátojiaan.
17. Ánni menili nga tsjoa kʼoái tokuin.
17 Je Jeobá kui xi mele nga tsjoa kʼoé tokoán (Sal. 131:1, 2). Tojosʼin jekachotʼayajiaan, tsjoa sʼe̱ tokoán tsa kʼoee kjoanda, tsa nangitokon koaan kʼoa tsa si̱kjaʼaitsjenjiaan je kjoachoya xi tjínná. Tsa kʼoasʼiaan, koaan i̱ kuixoán: “Tsjoa tjínna” (Sal. 16:5, 6).
KJOAJNDA 118 Tʼaisanáijin kjoamakjain
a Filipenses 4:11, 12: “Ali jo tixian tsa jme xi chana. Jekoanngana nga tonda sʼekoan jo tjín xi tjínna. 12 ʼBenía kjoayo̱ma̱. ʼBenía kjoatseya. Tojmenibe xi matʼen anbi, tsa nʼio maskia, tsa nʼio baona, kʼoa tsa tse sʼena, kʼoa tsa tse sichaje̱, jekoanngana”.
b 1 Tesalonicenses 5:18: “Tʼao kjoanda ngayije, nga jebi xi mele Niná tʼatsaon nga tiyokao Cristo Jesús”.
c 1 Corintios 4:6, 7: “Tonga jebi, ndsʼe, kixian tʼatsʼan, kʼoa tʼatsʼe Apolos, nga kʼoasʼin tsakjandiaalaijin nga jon, jméni nga kao jinjin chótʼayasínio nga tsín ngisa tse sʼiansao jo tjín xi tjítʼa, jméni nga tsín ngʼakon koangíntʼasínilao jngo chjota, kʼoa kontra koangínlao xi kjaʼaí. 7 ʼYáni xi faʼájinli, kʼoa jmé xi tjínli xi tsín kitsʼaili. Tsa kitsʼaili, ánni nga ngʼa manili joni tsa xi tsín kitsʼaili”.
d Koaan chótsenlai ya jw.org je video xi ʼmi: Jehová cuida a los humildes kao El orgullo conduce al desastre.
e Isaías 65:21-25: “Kʼoenda niʼya kʼoa yaa koatioʼya; kʼoentje xka̱totsee kʼoa jé ski̱ne tole. 22 Alikui xá kʼoendani nga kjaʼaí xi koatioʼya kʼoa alikui xá kʼoentjeni nga kjaʼaí xi ski̱ne. Nga̱ jokji tse male jngo yá kʼoakji tse koa̱nle naxinandána, kʼoa je xá xi sʼin je xi an kiskoejian ñaki tsjoa koaya kon. 23 Ali tokjoatjaojin nga sixá, kʼoa likui tokui xá sʼe̱nile xti nga kjoañʼai kjoaʼa, nga̱ ntje̱lee ma je xi kisichikontʼain Jeobá, je kʼoa kao ntje̱le. 24 Saʼnda nga kje nchja̱jinna, kjuinrʼoele jotjíotso; kʼoa tisʼaa tjíonchja̱ni nga kjuinrʼoele. 25 Je tseen kao barré ñatjen koakjeen, je xa li̱ji̱ koakje̱n josʼín je nra̱ja̱ kʼoa je ye̱ to chao ski̱ne. Aliʼya xi tijosʼinni kʼoa alijme xi sikitsón ya nindo tsjena, kui xi tso je Jeobá”.
f XI TÍNCHJA̱NI SÉN XI FAʼAITʼA: Jngo ndsʼee xi ya tísíxá ya ndʼia xi machjén nga ʼyaxkón Niná, jngo tichjaa xi én seña kiskotʼaya yaa tífaʼa nga tíchjonangile kʼianga tísʼejna kjoajtíntse, kʼoa jngo ndsʼee xi kjoanokjoaya títsjoá.