Jósʼin basenkaoná Jeobá nga kaná je kjoa xi bitjatojiaan

1. Ánni machjénni nga ska̱ná je kjoa xi bitjatojiaan kʼoa ʼyáni xi koasenkaoná (1 Pedro 5:10).

NGA sa ñʼai sa ñʼai kjimachon nichxin xi tiyoaa ndʼaibi ngatsʼiñá nga kjoa bitjatojiaan. Tjínkʼa xi táo chʼin tjíokao, xi xínkjín kisicha kʼoa xi tijeni familiale fitjenngike kʼoa tsa je chjotaxá (Mat. 10:​18, 36, 37). Kuinga machjénni nga ska̱ná kʼoa nga ñaki kʼoakʼoé tokoán nga je Jeobá koasenkaoná (tʼexkiai 1 Pedro 5:10).a

2. Jméni xi basenkaoná nga kaná je kjoa xi bitjatojiaan.

² Kʼianga kaná kixi mangíntʼalee je Jeobá kʼoa tojo kao kjoatsjoa nixálee ninga kjoa bitjatojiaan, ninga tjín xi fitjenngikená kʼoa ninga jée sʼejnabasenná. Je xi basenkaoná nga kaná kuinga ʼyaa nga kuicho nichxin nga ndasʼin kuiyoaa. Kuinga kaniná nga je Jeobá tsjoáná “je nganʼio xi nʼio tse” (2 Cor. 4:7). I̱ kjoaʼmiya jebi ño koya tjínni xi jchaa josʼin basenkaoná Jeobá nga kaná.

KʼOÉTSʼOALEE JEOBÁ

3. Ánni nga tse kjoanda tjínniná nga ma bʼetsʼoalee Jeobá.

³ Ninga chjotajée maa kui kjoanda tjínná nga ma bʼetsʼoalee Jeobá, kʼoa kui xi basenkaoná nga kaná (Heb. 4:16). Koaan kʼoétsʼoalee tojme horani, koaan kʼoéyanajmílee tojmeni xi mená, tojme én xi nokjoaa, tojñani tiyoaa, tsa toñá tiyoaa kʼoa ninga ndoyá tiyoʼyá (Jon. 2:​1, 2; Hech. 16:​25, 26). Majinle Jeobá josʼe tokoán kʼianga ba tjínná, ninga tsín ʼyaa jmeni xi kʼuínlee kʼianga kʼoétsʼoalee (Rom. 8:​26, 27). Tsee kjoanda tjínná nga ma bʼetsʼoalee Jeobá.

4. Ánni nga koa̱n kʼoakʼuínnilee Jeobá nga katabasenkaoná.

⁴ Ya Biblia itso xi tʼatsʼe Jeobá: “Tsa nijé tojmeni kjoa josʼin mele nga je, je nrʼoéná” (1 Juan 5:14). Kui xi mele Jeobá nga ska̱ná je kjoa xi bitjatojiaan, kuinga tíjnandani nga koasenkaoná kʼianga kʼoétsʼoalee. Kʼianga kaná je kjoa xi bitjatojiaan, kʼoasʼin bʼékjaoʼakao Jeobá je Na̱i (Prov. 27:11). Kʼoati tso Biblia nga je Jeobá mele tsjoánganʼiole je xi tjíojngo ni̱ma̱le nga je tjíosíxále (2 Crón. 16:9). Koaan kʼoéjngoaa tokoán nga mele koasenkaoná je Jeobá nga ska̱ná jme kjoa xi bitjatojiaan (Is. 30:18; 41:10; Luc. 11:13).

5. Jósʼin basenkaoná kʼianga bʼetsʼoaa (Isaías 26:3).

⁵ Ya Biblia kʼoatsoná nga kʼoéyanajmílee Jeobá jmeni xi makjáojinná. Kʼoa je Niná tsjoáná je kjoanyʼántokonle “xi ñaki faʼatole ngayije kjoafaʼaitsjenle chjota” kʼoa jé sikuinda ni̱ma̱ná kao kjoafaʼaitsjenná (Filip. 4:7). Bʼailee kjoanda Jeobá nga nrʼoéná. Je chjota xi tsín be tʼatsʼe Jeobá, básjaile josʼín nga síchajin jme kjoa xi tjínle. Ninga kʼoalani sʼín alikui nda satío kon, nga̱ tokʼiaa nda satío tokoán nga bʼetsʼoalee Jeobá kʼoa nga je ninʼiotʼaa. Nga kʼoanʼia nda sʼe tokoán ngantsjai (tʼexkiai Isaías 26:3).b Jngo koya josʼin basenkaoná Jeobá nga nda sʼe tokoán kuinga faʼaitsjenná texto jñani kʼoatso nga tsjoakená kʼoa nga mele koasenkaoná (Sal. 62:​1, 2).

6. Jméni xi koa̱n kʼuínlee Jeobá kʼianga kʼoétsʼoalee (kʼoati chótsenlai sén xi faʼaitʼa).

⁶ Jméni xi koa̱n sʼiaan. Kʼianga tse kjoa bitjatojiaan, kʼoétsʼoalee Jeobá kʼoa kʼoakʼuínlee nga katabasenkaoná nga nda katasʼe tokoán, kʼoa si̱jélee kjoachjine ánni nga jchañá josʼiaan (Sal. 55:22; Prov. 2:​10, 11). Kʼoati koa̱n kʼoailee kjoanda nga tíbasenkaoná kʼianga tíkaná kjoa xi tibitjatojiaan (Filip. 4:6). Si̱kjaʼaitsjenjiaan josʼin tíbasenkaoná nga nyaon nyaon kʼoa kʼoailee kjoanda nga kʼoatísʼín. Ninga kjoa tjínná, kuenta sʼiaan josʼin tísíchikontʼainná Jeobá (Sal. 16:​5, 6).

JE BIBLIA

7. Jósʼin basenkaoná nga chotʼayá Biblia.

⁷ Kui Biblia síchjén Jeobá nga basenkaoná nga chókjoajinná je kjoa xi bitjatojiaan. Nkjín kʼa faʼaitʼa jñani kʼoatso nga tsín totsjionkonná je Jeobá, jolani ya Mateo 6:8 nga i̱ tso: “Je Nʼaino be ngayije xi machjénno, tongini nga nijáo”. Jé Jesús xi kʼoakitso kʼoa je nda bexkon Jeobá. Kʼianga kjoañʼai chjaʼá kʼoéjngoaa tokoán nga je Jeobá koasenkaoná nga̱ be jme nganʼio xi machjénná. Jmeni xi tso Biblia basenkaoná nga chókjoajinná je kjoa xi bitjatojiaan (Sal. 94:19).

8. 1) Jngo texto tikʼaxki̱ xi basenkaoná nga kaná je kjoa xi bitjatojiaan. 2) Jméni xi sʼiaan nga kjoaʼaítsjenná je texto xi koasenkaoná.

⁸ Ya Biblia faʼaitʼa kjoafaʼaitsjen xi basenkaoná nga chókjoajinná jme kjoa xi bitjatojiaan. Kʼianga kuenta nʼia kjoafaʼaitsjen jebi basenkaoná nga kui kʼoanʼia xi ndatjín (Prov. 2:​6, 7). Tobʼelañá, kʼoatsoná nga tsínkui nʼio si̱kjáojiaan jmeni xi koa̱n nichxin xi sʼa nroaján, nga tosa tokui kuenta sʼiaan jme kjoa xi sʼe nga nyaon nyaon (Mat. 6:34). Kʼiatsa ntsjaintsjai kʼoéxkiaa je Biblia kʼoa tsa si̱kjaʼaitsjenjiaan jmeni xi tso, kjoaʼaítsjenná je texto xi koasenkaoná kʼianga kjoa tibitjatojiaan.

9. Jósʼe tokoán nga ʼyaa josʼin tsakasenkao Jeobá je choʼndale nichxin kjoatse.

⁹ Je Biblia kʼoatso josʼin tsakasenkao Jeobá je chjota xi je kisinʼiotʼa (Heb. 11:​32-34; Sant. 5:17). Kʼianga nikjaʼaitsjenjiaan josʼin tsakasenkao chjota jebi, kʼoati sʼejngo tokoán nga “basenkaoná kʼoa tsjoáná nganʼio, kʼoa tíjnandantsjai nga basenkaoná kʼianga kjoaba tiyojiaan” (Sal. 46:1). Kʼianga si̱kjaʼaitsjenjiaan josʼin tsakakó kjoamakjain je choʼndale Niná nichxin kjoatse kʼoa nga tosi tonda je Jeobá kisixále ninga tse kjoa jaʼatojin, koasenkaoná nga kʼoati sʼiaan tsanda ñá (Sant. 5:​10, 11).

10. Jméni xi sʼiaan nga koasenkaoná jmeni xi tso je Biblia.

¹⁰ Jmé xi koa̱n sʼiaan. Nyaon nyaon kʼoéxkiaa Biblia kʼoa kʼoétʼaxoaan je texto xi koasenkaoná. Nkjín ndsʼee xi kʼia nga tanjio bʼéxkia je folleto Nyaon nyaon chótʼayajiaan je Biblia kʼoa kui xi tsjoánganʼiole bʼajnda nichxin. Kʼoakoan je tichjaa xi Marie ʼmi,c kʼoatsakʼinle nga jao xijchále nga cáncer tjínle kʼoa jé Marie kisikuinda jotjínsa sá tsakatiokon. Jmé xi tsakasenkao je Marie nga kiskale kjoa jebi. Itso: “Nga tanjio bʼexkiaña kʼoa sikjaʼaitsjenjinña je texto xi faʼaitʼa je folleto Nyaon nyaon chótʼayajiaan je Biblia. Kui xi tsakasenkaona nga kisikjaʼaitsjen tʼatsʼe Jeobá kao jmeni xi bakóyaná ʼndele nga tokui sikjaʼaitsjen je kjoa xi tifaʼatojian” (Sal. 61:2).

BINYAKAONÁ JE NDSʼEE

11. Jósʼin basenkaoná nga ʼyaa nga tjíokale je ndsʼee jme kjoa xi tjíofaʼatojin.

¹¹ Binyakaoná je ndsʼee xi tjío jngo tjíjtsa Sonʼnde nga̱ kʼoati kui kjoa faʼatojin je kjoa xi bitjatojiaan (1 Ped. 5:9). Nga tjíokale je kjoa xi tjíofaʼatojin, kʼoati sʼejngo tokoán tsanda ñá nga ska̱ná tojme kjoa xi kuitjátojiaan (Hech. 14:22).

12. Jósʼin kuinyakaongañá xíngiaa (2 Corintios 1:​3, 4).

¹² Nkjín koya josʼin binyakaoná je ndsʼee. Tobʼelañá, tsjoáná jmeni xi machjénná kʼoa kui én fákaoná xi nda bʼé tokoán. Kʼoakoan je Pablo kʼianga kinikʼéjnanʼio ya ndʼiale, nkjín ndsʼee kichotsjoánganʼiole. Je xo̱n xi kiski yaa síkʼaxki̱ jaʼaínle ndsʼee xi tsakinyakao kʼoa kitsjoale kjoanda nga kʼoakisʼin (Filip. 2:​25, 29, 30; Col. 4:​10, 11). Nichxin xi tiyoaa ndʼai, je ndsʼee kʼoati tsjoánganʼioná nga kaná je kjoa xi bitjatojiaan, kʼoa kʼoati machjén nga kʼoainganʼiolee tsanda ñá kʼianga kjoa faʼatojin (tʼexkiai 2 Corintios 1:​3, 4).d

13. Jmé xi tsakasenkao je tichjaa xi Maya ʼmi kʼianga kiskale je kjoa xi jaʼatojin.

¹³ Kataʼyala jokoan jngo tichjaa xi Maya ʼmi, xi Rusia tsʼe. Kʼianga nó 2020, policía jaʼasʼen ndʼiale kʼoa kiskotʼa jmeni xi tjíole. Xijekoan, kikao je tichjaa nga kinijtsoʼa ngixko̱n kjoatéxoma xi totʼatsʼe nga Énle Niná títsoyason. Je tichjaa kʼoatso josʼin tsakinyakao je ndsʼee. Itso: “Kʼianga kʼoasʼin kisikjaʼaitsjen nga tsín tichókjoanina, je ndsʼee kinchjana teléfono, kisikasénna carta kao mensaje kʼoa kʼoakitsona nga chjí bekonna. ʼBeña nga tojngo familia mañá kao ngatsʼi ndsʼee, kʼoa kʼianga nó 2020 tsaʼbeña nga ñaki kʼoatjín kjoaixi”.

14. Jmé xi sʼiaan nga kuinyakaoná je ndsʼee (kʼoati chótsenlai sén xi faʼaitʼa).

¹⁴ Jmé xi koa̱n sʼiaan. Tsín si̱kjinlee je ndsʼee kʼianga kjoa bitjatojiaan. Koaan kʼoakʼuínlee je xi chjotajchínga sʼin tjío nga katabinyakaoná nga̱ yaa mangóson “jngo ʼnde jñani bijnaʼmalee je ntjao̱, jngo ʼnde jñani bijnangʼiánlee je jtsínʼio” (Is. 32:2). Kuenta sʼiaan nga kʼoati kjoa tjíofaʼatojin ndsʼee xi kjaʼaí. Tsa kuinyakoaa je ndsʼee xi nganʼio machjénle tsjoa sʼe̱ tokoán kʼoa tikui koasenkaoniná nga ska̱ná je kjoa xi tibitjatojiaan (Hech. 20:35).

KJOACHOYA XI TJÍNNÁ

15. Jósʼin tsakasenkao Jesús je kjoachoya xi kisʼele kʼoa jósʼin basenkaoná ñá je kjoachoya xi tjínná (Hebreos 12:2).

¹⁵ Je Jeobá kʼoatsoná nga nda kuiyoaa nichxin xi nroaján kʼoa kui xi basenkaoná nga kaná je kjoa xi bitjatojiaan (Rom. 15:13). Je Jesús kuenta kisʼin je kjoachoya xi kisʼele kʼoa kui xi tsakasenkao nga kiskale je kjoañʼai xi kinikjaʼá (tʼexkiai Hebreos 12:2).e Je Jesús be nga kʼoasʼin kʼoasjetsjeni jaʼaínle Nʼaile kʼiatsa kixi koaitʼale. Kʼoati kui xi koanmele nga ya kʼoéjnakao ijngokʼani je Nʼaile ya ngʼajmi kʼoa nga ya koatexomakao je chjotale xi toxá kitjoejinni nga ya koai ngʼajmi. Tikʼoasʼinni ñá, ninga tse kjoa bitjatojiaan ndʼaibi nga je Na̱i kjinentsja sonʼnde, chókjoajinná nga kui nikjaʼaitsjeen nga koa̱n kuiyoaa ngantsjai nichxin kʼianga jekjoaʼai sonʼnde chjotse.

16. Jósʼin tsakasenkao jngo tichjaa je kjoachoya xi tjínná, kʼoa jmé xi bakóyali jokitso.

¹⁶ Kataʼyala josʼin tíbasenkao je kjoachoya xi tjínná jngo tichjaa xi Alla ʼmi, xi Rusia tsʼe. Kʼianga ndoyá kinikʼéjnaʼya je xʼinle tichjaa i kitso: “Kʼianga bʼetsʼoa kʼoa nga kui sikjaʼaitsjen nga nda kuiyoaa nichxin xi nroaján basenkaona nga tsín sikʼajenle tokoan kʼoa ʼbeña nga tokjoaʼato je kjoa xi tifaʼatojian. Kuicho nichxin nga kjoaʼaxin Jeobá je xi kontra tjíole kʼoa sichikontʼainná ñá”.

17. Jósʼin bakoñá nga chjí ʼyatokoán je kjoachoya xi tjínná (kʼoati chótsenlai sén xi faʼaitʼa).

¹⁷ Jmé xi koa̱n sʼiaan. Si̱kjaʼaitsjenjiaan jokoa̱nchon kʼianga jeʼndenaxó koa̱n sonʼnde. Si̱kjaʼaitsjenjiaan nga nʼio ndasʼin kuiyoaa nga kʼia. Kʼiatsa kʼoasʼiaan, nda sa̱tío tokoán nga̱ ʼyañá nga tokjoaʼato je kjoa xi bitjatojiaan ndʼaibi (2 Cor. 4:17). Chja̱kaonajmíñá je chjota jme kjoanichikontʼain xi tsjoáná Jeobá nichxin xi nroaján. Nga je Na̱i kjinentsja sonʼnde nʼio ñʼai kjimachon kʼoa je chjota xi tsín je Jeobá síxále nʼio makjáojinle, nga̱ tsín be je kjoanichikontʼain xi kjoaʼaíkao Jeobá nichxin xi nroaján. Tsa chja̱kaonajmíñá chjota tʼatsʼe Niná tsakui nichxin koa̱nmele skoe̱sa xi tʼatsʼe nga jekoa̱nni.

18. Ánni tjínjngoni tokoán nga sitjoson jmeni xi tso Jeobá.

¹⁸ Kʼianga jetse kjoa jaʼatojin je Job, i kitsole Jeobá: “Ndʼaibi ʼbeña nga mali kʼoanʼiai tojmeni. Kʼoa jmeni xi tjínndajinli nga sʼiain alikui ñʼai koa̱nli nga si̱tjosuin” (Job 42:2). Je Job koanjinle nga tsín ʼya xi kʼoechjoale Jeobá nga sitjoson jmeni xi tso. Joni Job, kʼianga nikjaʼaitsjenjiaan nga sítjoson jmeni xi tso Jeobá, tsjoánganʼioná nga chókjoajinná je kjoa xi bitjatojiaan. Kʼianga ngisa nda katamajinná, jngola choa̱ si̱kʼéjnaa. Nga nʼio tímʼe jngo chjoón nkjín chjinexki fikonle, síkinroajen kon nga nijngojin xi be jmeni xi tjínle. Tonga chaan kajin jngo chjinexki xi be jme chʼin xi tjínle kʼoa kʼoatsole jmeni xi sʼin nga koa̱nndaya. Ningalani tsín ndi̱to̱n mandaya chjoón jebi nda sʼe kon nga̱ be nga chan tjóxinle chʼin xi tjínle. Tikʼoasʼinni, nga ʼyaa nga jeme naskánakoa̱nchon sonʼnde basenkaoná nga chókjoajinná tojme kjoa xi bitjatojiaan.

19. Jméni xi sʼiaan nga chókjoajinná je kjoa xi bitjatojiaan.

¹⁹ Tojosʼin kaʼyaa nkjín koya josʼin basenkaoná Jeobá nga kaná je kjoa xi bitjatojiaan. Jolani nga ma bʼetsʼoalee, nga kijnaná Biblia, nga tjío ndsʼee kʼoa nga tjínná kjoachoya. Tsa kuenta sʼiaan jmeni xi jekaʼyaa koasenkaoná Jeobá nga chókjoajinná tojme kjoa xi kuitjátojiaan saʼnda nga kuicho nichxin nga tjóxin jmeni xi chon sonʼnde (Filip. 4:​13, TNM).