Jmé xi sʼiaan tsakui xi chʼaotjín nimetokoán

1. Jméni xi sakʼoa ñʼai maná ngatsʼiaa.

KʼIATSA sakʼoa kui nimetokoán nga kui kʼoasʼiaan jmeni xi tsín sasénle Jeobá, alikui koa̱n kʼoasʼin si̱kjaʼaitsjeen nga toñá xi kʼoakjimaa. Je Biblia itso: “Nijmejin kjoa xi chʼao síkaono xi tsín tsa kʼoati chʼao síkao ngatsʼi chjota” (1 Cor. 10:13). Nkjín ndsʼee xi kʼoati kui tjíokjántʼakao nga kui xi chʼaotjín símekon. Kʼoéjngoaa tokoán nga je Jeobá koasenkaoná nga tsínkui kʼoasʼiaan jmeni xi chʼaotjín nimetokoán.

2. Jméni xi ñʼai ma kʼale je ndsʼee kao xi tosʼa tjíokotʼaya Biblia (kʼoati chótsenlai sén xi faʼaitʼa).

² Itsosa je Biblia: “Jngójngó titsʼeni kjoachi̱nga̱le xi chʼao síkao nga je. Je kjoachi̱nga̱le nchja̱ndʼéle yaole” (Sant. 1:14). Kui nchja̱ni texto jebi nga tjín jmeni xi ñʼai maná nikatioá nga jngó jngoá. Tobʼelañá, tjínkʼa ndsʼee kʼoa tsa je xi tosʼa tjíokotʼaya Biblia xi kui símekon nga tjín xi kjoáyokao kʼoa tsakuije̱ nga tixʼin xínkjín kʼoa tsa tiyánchjín xínkjín matsjoakeni. Tjínkʼa xi tojo kui símekon nga pornografía skótsen ngindiale kʼoa tjínkʼa xi kʼoati kui mele kʼoasʼin ngindia jme xi kisʼin ngasʼa, jolani tsa droga kisken kʼoa tsa xán tsakʼi. Kʼoajinti ma sakʼoa jokoan je Pablo nga i̱ kitso: “Kʼia nga mena an nga kʼoasʼian xi nda tjín, je xi chʼao tjín tíjnajinna” (Rom. 7:21).

3. Jósʼe tokoán tsakui tibixkantʼakoaa xi chʼaotjín nimetokoán.

³ Kʼiatsa kui tibixkantʼakoaa nga kui nimetokoán xi chʼaotjín tsakui nichxin kʼoasʼin nikjaʼaitsjeen nga tsín koa̱nná si̱kʼéjnaa kʼoa nga tsín tinda tiyoñá ngixko̱n Jeobá. Tonga tokui je kjoafaʼaitsjenná xi kʼoasʼe. I̱ kjoaʼmiya jebi jao koya tjínni xi chótʼayajiaan xi koasenkaoná nga tsín kʼoasʼin si̱kjaʼaitsjeen. Xi títjon, ánni nga kʼoasʼin nikjaʼaitsjenñá nga tsín tinda tiyoñá ngixko̱n Jeobá. Kʼoa xi majaoni, jméni xi sʼiaan nga si̱kinjelee xi chʼaotjín nimetokoán.

KUI XI MELE JE NA̱I NGA TSÍN NDA KATASʼE TOKOÁN

4. 1) Jósʼin mele Na̱i nga si̱kjaʼaitsjeen. 2) Ánni tjínjngoni tokoán nga koa̱nná kui kʼoasʼiaan xi kixi tjín.

⁴ Je Na̱i kui xi mele nga kʼoasʼin si̱kjaʼaitsjeen nga tsín koa̱nná nga kui kʼoasʼiaan xi kixi tjín kʼianga kui sʼejnabasenná xi chʼaotjín. Je Jesús kʼoakitso nga koa̱n si̱jélee nganʼio je Jeobá, i kitso: “Ali bʼaiʼndejin nga chótʼayakaonajin, tonga chʼa̱sjentjaináijin tʼatsʼe je xi tsʼen” (Mat. 6:​13, TNM). Je Na̱i kʼoatso nga tsín tikixi kjuintʼanilee Jeobá kʼiatsa kui sʼe̱jnabasenná xi jée ska̱nijinná (Job 2:​4, 5). Kui kʼoatsoni nga̱ kʼoakisʼin je, tsín tikixi kitʼanile Jeobá nga kui kisimekon xi chʼaotjín. Kʼoa kʼoatisʼin kisikjaʼaitsjen nga kʼoatisʼin je Jesús nga tsín tikixi koaitʼanile Niná kʼiatsa kui sʼe̱jnabasenle xi jée tjenkao (Mat. 4:​8, 9). Tonga ñá xi chjota koaanná nga kui kʼoasʼiaan xi kixi tjín ninga kui sʼe̱jnabasenná xi chʼaotjín. Je Pablo kʼoakitso nga je Niná tsjoáná nganʼio nga kui kʼoasʼiaan xi kixi tjín (2 Cor. 4:7).

5. Jósʼin ʼyañá nga be Jeobá nga koa̱n kixi kjuintʼalee ninga kui xi chʼaotjín nimetokoán.

⁵ Je Jeobá be nga koa̱n si̱kinjelee jmeni xi jée kaníjinná. Nga̱ tongini kʼoakitso nga kʼoangile yaole je xi kixi fitʼale kʼianga kjoaʼaí je kjoañʼai xi nʼio tse. Je Jeobá alikui bʼéndiso nga kʼoatso nga nʼio nkjín koa̱nni chjota xi koatio kʼianga jekoa̱nndachon sonʼnde. Kʼoatso nga chjota jebi “najñochxoa yʼakjá”, xi tsonile, ndasʼin tjío ngixko̱n Niná (Apoc. 7:​9, 13, 14). Kuinga tjínjngoni tokoán nga be Jeobá nga koa̱nná kui kʼoasʼiaan xi kixi tjín ninga kui xi chʼaotjín nimetokoán.

6, 7. Jósasʼin mele Na̱i nga si̱kjaʼaitsjeen.

⁶ Kui xi mele je Na̱i nga kʼoasʼin si̱kjaʼaitsjeen nga tsínkʼia nda kuiyoaa ngixko̱n Jeobá kʼoa nga tsín koa̱n kuiyoaa ngantsjai nichxin nga kui nimetokoán xi chʼaotjín. Kui kʼoatsoni je Na̱i nga to kjoabiyasa tíkoyale kʼoa tsínkʼia nda kʼoéjna ngixko̱n Jeobá (Gén. 3:15; Apoc. 20:10). Kʼoati kui kʼoatsoni nga maxinkonkená nga̱ kaile nga kuiyochoán ngantsjai nichxin kʼoa kui xi mele nga kʼoatisʼin si̱kjaʼaitsjeen joni je nga tsín jme kjoachoya katasʼená. Tonga je Biblia kʼoatso nga je Jeobá koasenkaoná nga nda kuiyoaa ngixko̱n kʼoa nga koa̱n kuiyoaa ngantsjai nichxin nga̱ “kaile nga jngo xi cha̱. Tomele nga kjuicho síkʼantjaiya kjoafaʼaitsjenle ngatsʼi” (2 Ped. 3:9).

⁷ Jé Na̱i xi mele nga kʼoasʼin si̱kjaʼaitsjeen nga tsín koa̱n si̱kinjelee jmeni xi jée kaníjinná kʼoa nga tsínkʼia nda kuiyoaa ngixko̱n Jeobá nga kui nimetokoán xi chʼaotjín. Nga ʼyaa jebi tosi tonda kʼoénelee yaoná nga kixi kjuintʼalee Jeobá ninga sakʼoa ñʼai maná. Alikui kʼoaiʼndee nga je Na̱i katabʼanachaná (1 Ped. 5:​8, 9).

JÓSʼE TOKOÁN NGA CHJOTAJÉE MAA

8. Jmésani xosíkaoná nga kʼoasʼin nikjaʼaitsjenñá nga tsínkʼia nda kuiyoaa ngixko̱n Jeobá (Salmo 51:5; kʼoati chótsenlai jñani tso “Jósʼin tsoyanile”).

⁸ Nga chjotajée maa kʼoati ya nroani nga chʼao sʼe tokoán kʼoa nga kʼoasʼin nikjaʼaitsjeen nga tsínkʼia nda kuiyoaa ngixko̱n Jeobá nga kui nimetokoán xi chʼaotjína (Job 14:4; tʼexkiai Salmo 51:5b).

9, 10. 1) Jókisatio kon je Adán kao Eva kʼianga jetsakajngijée (kʼoati chótsenlai sén xi faʼaitʼa). 2) Jósatío tokoán nga chjotajée maa.

⁹ Si̱kjaʼaitsjenla jokisatio kon je Adán kao Eva kʼianga jetsakajngijée. Nga jejaʼatone je kjoatéxomale Jeobá tsakatioʼma kʼoa soa koanle nga tsabe nga kjiojti. Je libro Perspicacia para comprender las Escrituras kʼoatso nga chʼao kisatio kon, nga kitsokjon kʼoa nga soa koanle. Je Adán kao Eva alikui tinda tsakationi ngixko̱n Jeobá. Kʼianga jetsakajngijée soa koanle kʼoa chʼao kisatio kon.

¹⁰ Je Adán kao Eva alikui tijme kjoachoya tjínnile. Tonga ñá nga tsakʼéchjíntjainá je Niná koaan jchatʼa jéená kʼoa nda sʼe̱ tokoán (1 Cor. 6:11). Nga chjotajée maa kuinga tsín nda satíoni tokoán kʼianga jme xi nʼia kʼoa soa maná. Je Biblia kʼoatso nga kui jée tsakatéxomale ngatsʼi chjota “nda tsa je xi tsín jée tsajngi jo kisʼin Adam nga jaʼatontjaile kjoatéxoma” (Rom. 5:14). Tsín kʼoaiʼndee nga kui jée katasíkinjená, tosa kui kʼoasʼiaan xi kixi tjín ánni nda kuiyosíñá ngixko̱n Jeobá. Jméni xi sʼiaan nga tsín tokui kjuinñá josʼe tokoán.

11. Jméni xi bakóyaná Romanos 6:12 kʼiatsa sakʼoa kʼoasʼin nikjaʼaitsjeen nga tsín koa̱n si̱kinjelee xi chʼaotjín.

¹¹ Nga chjotajée maa sakʼoa kʼoasʼin nikjaʼaitsjeen nga tsín koa̱n si̱kinjelee xi chʼaotjín. Si̱kjaʼaitsjeen nga kʼoatso je Biblia nga tsín kʼoaiʼndee nga kui jée katasíkinjená (tʼexkiai Romanos 6:12).c Kuinga tsín koa̱n kʼoaiʼndenilee yaoná nga kui kʼoasʼiaan jmeni xi chʼaotjín nimetokoán (Gál. 5:16). Je Jeobá be nga koa̱nná si̱kinjelee xi chʼaotjín sʼejnabasenná kuinga kʼoatsoniná nga koa̱n kixi kjuintʼalee (Deut. 30:​11-14; Rom. 6:6; 1 Tes. 4:3). Ningalani ñʼai maná, koaanná nga tsínkui kʼoasʼiaan xi chʼaotjín.

12. Jmé xi sʼiaan tsa sakʼoa kʼoasʼin nikjaʼaitsjeen nga tsín nda tiyoaa ngixko̱n Jeobá kʼoa ánni.

¹² Nga chjotajée maa sakʼoa kʼoatisʼin nikjaʼaitsjeen nga tsínkʼia nda kuiyoaa ngixko̱n Jeobá nga kui xi chʼaotjín nimetokoán. Tonga kuenta sʼiaan nga kʼoatso je Biblia nga be Jeobá nga tokʼoa jée jekichʼá nga tsiaan (Sal. 103:​13, 14). Kʼoa majinle nga ñʼai maná nga kui xi ndatjín kʼoanʼia nga chjotajée maa (1 Juan 3:​19, 20). Tsa tosi tonda kʼoénelee yaoná nga tsínkui kʼoasʼiaan jmeni xi chʼaotjín nimetokoán ndasʼin kuiyoaa ngixko̱n Jeobá.

13, 14. Jómani ʼyaa nga tojo nda tiyoaa ngixko̱n Jeobá ninga kui nimetokoán xi chʼaotjín.

¹³ Je Biblia kʼoatso nga tsín mangóson nga to nimetokoán xi chʼaotjín kʼoa nga kui kʼoanʼia. Ningalani sakʼoa ñʼai koa̱nná nga kʼoéchjoalee yaoná jmeni xi nimetokoán tonga koaanná kʼoéchjoalee yaoná nga tsínkui xi chʼaotjín kʼoasʼiaan. Tobʼelañá, je chjota xi Corinto tsʼe kʼianga kjesa chjotale Cristo majin tjínkʼa xi tixʼin xínkjín kʼoa tsa xi tiyánchjín xínkjín tsakjayokaoni. Je Pablo i kitso: “Kʼoakoan kjoaon kʼao”. Ningalani ñʼai koanle nga tsín tikui kisimekonni jmeni xi kisʼin ngasʼa, tsakʼéchjoale yaole nga tsín tikui kʼoakisʼinni kʼoa nda tsakatio ngixko̱n Jeobá (1 Cor. 6:​9-11). Kʼoati koa̱n kʼoéchjoalai yaoli tsanda ji jmeni xi nimetokuin.

¹⁴ Ñaki kʼoatʼai tokuin nga koa̱n si̱kinjelai jmeni xi chʼaotjín nimetokuin, kʼoa ningalani kui bitjokjaʼaitsjen ijngokʼali, tosi tonda tʼenelai yaoli nga tsínkui kʼoasʼiain (Efes. 2:3). Kataʼyala jméni xi sʼiaan nga si̱kinjelee jmeni xi chʼaotjín nimetokoán.

JMÉNI XI SʼIAAN NGA SI̱KINJELEE XI CHʼAOTJÍN NIMETOKOÁN

15. Tsa mená si̱kʼéjnaa jmeni xi chʼaotjín nimetokoán, ánni tjínnenile kuenta sʼiaan jmeni xi ñʼai maná.

¹⁵ Nga tsínkui kʼoasʼiaan jmeni xi chʼaotjín nimetokoán tjínnele kuenta sʼiaan jméni xi ñʼai maná. Alikui koa̱n nga tiñá chʼa̱nachanilee yaoná (Sant. 1:22). Tobʼelañá, je chjota xi nʼio tsakʼi ngasʼa tsakui nichxin kʼoakuitso nga tsín chʼaotjín jmeni xi tísʼín kʼoa tsa kʼoakuitso nga tongisa tse ʼbi xi kjaʼaí tikʼoajinni je. Kʼoa tsa jeje̱ chjota xi kui símekon nga pornografía skótsenle kʼoakuitso nga kui símekonni nga tsín sísinle je chjoónle. Je chjota xi kʼoasʼin síkjaʼaitsjen to ngisaa ngotjo kʼoasʼínni jmeni xi símekon. Kuinga tsín koa̱n nga totjín totjenni kjoa xi kuise̱nngiñá yaoná nga jme xi nimetokoán, tosa kuenta sʼiaan jméni xi ñʼai maná kʼoa si̱ndayaa yaoná (Gál. 6:7).

16. Jméni xi sʼiaan nga kui xi ndatjín kʼoasʼiaan.

¹⁶ Nga jeʼyaa jméni xi ñʼai maná alikui kʼoaiʼndelee yaoná nga kui kʼoasʼiaan (1 Cor. 9:​26, 27; 1 Tes. 4:4; 1 Ped. 1:​15, 16). Kuenta sʼiaan jméni xi ñʼai maná nikʼéjnaa kʼoa si̱kjaʼaitsjenjiaan kʼiáni nga ngisa ñʼai maná, a kʼiaa nga jenʼio njio axo kʼiaa nga kijtaná. Kʼoa tongini si̱kjaʼaitsjenjiaan jósʼiaan kʼianga kui sʼejnabasenná xi jée tjenkao. Kʼiatsa tongini kuiyondaa alikuijin kui kʼoasʼiaan jmeni xi chʼaotjín nimetokoán (Prov. 22:3).

17. Jméni xi bakóyaná jokisʼin José (Génesis 39:​7-9; kʼoati chótsenlai sén xi faʼaitʼa).

¹⁷ Si̱kjaʼaitsjenla jokisʼin José kʼianga je chjoónle Potifar kʼoakitsole nga katabajnakao. Je José kjitʼanangi kitoka (tʼexkiai Génesis 39:​7-9).d Kui kʼoakisʼinni nga̱ tongini kisikjaʼaitsjenjin jmeni xi sʼin kʼoa ñaki kʼoatsakʼé kon nga tsín koa̱njngijée ngixko̱n Niná. Je choa̱le José kui bakóyaná nga tongini si̱kjaʼaitsjenjiaan jmeni xi sʼiaan kʼianga kui sʼejnabasenná xi jée tjenkao. Kʼiatsa tongini kuiyondaa jmeni xi sʼiaan alikuijin kuijnyíjée kʼiatsa kui xi chʼaotjín sʼe̱jnabasenná.

TOSI TONDA SI̱NDAYAA YAONÁ

18. Jmé xi sʼiaan nga si̱kʼéjnaa jmeni xi chʼaotjín nimetokoán (2 Corintios 13:5).

¹⁸ Si̱kjaʼaitsjenjiaan jñá nroani nga kui xi chʼaotjín nimetokoán (tʼexkiai 2 Corintios 13:5).e Kʼiatsa kʼoasʼiaan jchañá jñáni machjén nga si̱ndayaa yaoná. Si̱kjaʼaitsjenjiaan jókinʼia nga títjon kʼianga kui xi jée tjenkao kisʼejnabasenná. Kʼiatsa ñʼai koanná alikui koa̱n si̱kinroajeen tokoán, tosa kui si̱kjaʼaitsjenjiaan jósʼiaan xi ngindia. Si̱kjaʼaitsjenjiaan jebi: “A tokjoan sichajinña kʼianga kui bitjokjaʼaitsjenna xi jée tjenkao. A kui xosíkaona jmeni xi nrʼoele, xi kotsenle kʼoa xi bʼexkia nga ngisa ñʼai mana sikʼéjna jmeni xi chʼaotjín simetokoan. A tokjoan basenxinña kʼiatsa kui xi kjoachajngi tjenkao faʼajin jmeni xi kotsenle. Kʼoa a majinna nga ngisa chjíle nga sitjosoan je kjoatéxomale Jeobá ninga ñʼai koa̱nna” (Sal. 101:3).

19. Ánni nga tsínkui kʼoasʼianñá xi nimetokoán ninga tsín chʼaotjín koa̱nná.

¹⁹ Alikui koa̱n nga tiñá chʼa̱nachanilee yaoná, kuenta sʼiaan nga i̱ tso je Biblia: “Je ni̱ma̱ná ngisaa nʼio bʼanacha tikʼoajinni tojmeni, kʼoa matso maskále” (Jer. 17:9). Kʼoa je Jesús kʼoakitso nga ya ni̱ma̱ná nroani “kjoafaʼaitsjen xi tsʼen” (Mat. 15:19). Kuinga tsín koa̱n nga kʼoasʼin si̱kjaʼaitsjenñá nga tsín chʼaotjín jmeni xi nʼia. Si̱kjaʼaitsjenla je xi pornografía kiskotsenle ngasʼa. Tsa kʼoasʼin sikjaʼaitsjen nga tsín chʼaotjín tsa jme xi skótsenle nga tonga tsínkjoanni kjiojti xi skótsenle. Kʼoa tsa tjínkʼa xi i̱ kuitso: “Alikuila chʼaotjín nga kui nikjaʼaitsjeen nga tjín xi sójnakoaa nga tonga tsínkjoanni kʼoatinʼia”. Je xi kʼoasʼin síkjaʼaitsjen joxi jeni kui tjíosímekon nga kui kʼoasʼin xi jée tjenkao (Rom. 13:14). Kuenta sʼiaan jmeni xi nʼia ninga tosʼa choa kjoa nga̱ yaa kjuinroani nga ai jée ska̱jiaan.f Tsín koa̱n ndatjín koa̱nná jmeni xi chʼaosʼin bekon Jeobá.

20. Jósʼin kuiyoaa kʼianga jekoa̱nndachon sonʼnde, kʼoa jósʼin basenkaoná Jeobá ndʼaibi.

²⁰ Je Jeobá koasenkaoná nga tsínkui kʼoasʼiaan jmeni xi jée tjenkao. Nga jekoanchjíntjé koaan kuiyoaa ngantsjai nichxin kʼianga jekoa̱nndachon sonʼnde kʼoa tsjoa sa̱tío tokoán nga si̱xálee je Jeobá nga̱ tsín tikui si̱mekonñá xi chʼaotjín. Tonga nga kjesa kʼoamajin, tosi tonda kʼoénelee yaoná nga si̱kinjelee je xi chʼaotjín nimetokoán. Kʼiatsa kʼoasʼiaan je Jeobá sichikontʼainná kʼoa koasenkaoná nga kixi koanngíntʼalee.