Jósʼin basenkaoná je xi letra ʼndí kjoan faʼaijin je textole Biblia

Je Traducción del Nuevo Mundo nga jngó jngó versículo letra ʼndí kjoan xi tjíojin. Je letra jebi kui bakó je texto xi tikui tínchja̱ni je versículo kʼoa kui bakóyaná nga mangóson jme xi tínchja̱ni je Biblia. Kʼiatsa Biblia tibʼexkiai tjasjai je letra ʼndí xi faʼaijin je versículo kʼoa tsa ya tjen tibʼexkiani ya jw.org kʼoa tsakui JW Library^® tinichjain ya tisennelai je letra ʼndí nga jchai je texto xi mangósonkao jmeni xi tibʼexkiai.

Kataʼyala jósʼin machjén je texto xi bakó je letra ʼndí.

Texto xi mangóson jme xi tínchja̱ni. Je letra ʼndí xi faʼaijin je versículo kui bakó je texto xi tikui tínchja̱ni. Jolani, jmeni xi tso 2 Samuel 24:1 mangóson kao jmeni xi tso 1 Crónicas 21:1.

Texto. Je letra ʼndí kui bakó jña kitjoénile je texto. Tobʼelañá, jmeni xi tso Mateo 4:4 yaa kitjoénile jmeni xi tso Deuteronomio 8:3.

Je én xi tongini kinokjoa kʼoa josʼin tíbitjoson. Kʼiatsa kui tibʼexkiaa je én xi tongini kinokjoa kʼoa tsa ya kuisennelee je letra ʼndí kui bakó je texto xi tsoya josʼin kitjoson. Tobʼelañá, jmeni xi tso Zacarías 9:9 yaa Mateo 21:5 kitjoson.