Tjínkʼa xi kjonangi

Jmé xi kinchja̱ni je xi kiski Proverbios 30:​18, 19, kʼianga kʼoakitso nga tsín machoyale “josʼín jngo chjota nga ya tíjnakao jngo chjoón”

Nkjín chjota xi tʼatsʼe Biblia kotʼayason kao xi kjaʼaísa chjota xi kui síkjaʼaitsjenjin jósʼin tsoyanile én jebi. Ya Biblia Traducción del Nuevo Mundo, itso: “Jan koya tjínni xi tomaxkónna, ño koya tjínni xi tsín machoyana: Josʼin fitjen je ja̱, josʼin fison la̱jao̱ je ye̱, josʼin fison ndáchikon je chitso kʼoa josʼín jngo chjota nga ya tíjnakao jngo chjoón” (Prov. 30:​18, 19).

Ngasʼa kʼoasʼin majinná tsakai nga kui xi chʼaotjín tínchja̱ni je én xi “josʼín jngo chjota nga ya tíjnakao jngo chjoón” tso. Nga̱ jmeni xi tso nga tongini kʼoa nga maskanni kui síkʼaxki̱ xi chʼaotjín (Prov. 30:​15, 16). Kʼoa ya versículo 20 kui nchja̱ni tʼatsʼe jngo chjoónchajngi, xi kʼoatso nga tsínkui xi chʼaotjín kʼoatísʼín. Kʼoasʼin majinná tsakai nga kui tínchja̱ni nga kui xi chʼaotjín kʼoasʼín jngo chjota kʼoa nga tsín ʼya xi be jmeni xi sʼín, kʼoa nga ya mangóson josʼín je ja̱ nga tsín tsen síchon josʼin fi, josʼín jngo ye̱ nga tsín tsen síchon josʼin ndiaa fi kʼoa nga tsín tsen síchon je chitso kʼianga fison ndáchikon. Kuinga kʼoasʼin koanjinniná tsakai nga kui tínchja̱ni jósʼín jngo chjota nga bʼanachale jngo tsoti je én xi “josʼín jngo chjota nga ya tíjnakao jngo chjoón” tso.

Tonga alikuini kui xi chʼaotjín tínchja̱ni texto jebi, nga̱ je xi kiski tokuini kʼoatítso nga tomaxkónle jmeni xi kisikʼaxki̱.

Je xo̱njchá xi kjio saʼnda ngasʼa nga én hebreo, kʼoatso nga tsín chʼaotjín xi tínchja̱ni jmeni xi tso Proverbios 30:18. Jngo diccionario xi kʼoatso nga je én xi “tomaxkónna” sʼin faʼatoya, kui tínchja̱ni jmeni xi tokʼoamaná (Theological Lexicon of the Old Testament, de Ernst Jenni y Claus Westermann).

Je chjota xi Crawford Howell Toy ʼmi, xi ya síxá ya universidad xi Harvard ʼmi ya Estados Unidos, kʼoati kitso nga tsínkui xi chʼaotjín síkʼaxki̱ texto jebi. Kʼoatso nga tokui kʼoakitso je xi kiski nga tomaxkónle josʼín nga jngó jngó koya xi kisikʼaxki̱.

Ndʼaibi kʼoasʼin majinná nga kui tínchja̱ni jmeni xi tomaxkónná ya Proverbios 30:​18, 19. Tojo kitso je xi kiski texto jebi, kʼoati tomaxkónná nga ʼyaa josʼin fitjen je ja̱, josʼin fison la̱jao̱ je ye̱ ninga tsín ndso̱ko̱, josʼin fison chitso je ndáchikon ninga nʼio ʼyai kjoan kʼoa ninga nʼio ai, kʼoa josʼín jngo ti kao jngo tsoti kʼianga tsjoake ma xínkjín kʼoa nga nda batio.