Jméni xi sʼiaan nga tosi tonda tsjoa sʼe̱ tokoán ninga jejchíngaa

1, 2. Jósʼin bekon Jeobá je ndsʼee xi jekjimajchínga (Salmo 92:​12-14; kʼoati chótsenlai sén xi faʼaitʼa).

TJÍNKʼA chjota xi tsjoa satío kon kʼianga jemajchínga tonga kʼoati tjín xi tsín mele nga jchale tsa jekjimajchínga, tokjoan kjone kʼianga jngo ntsja̱chxoa nroale. Ninga kʼoalani sʼín alikui tichani je ntsja̱chxoa, tosa nkjín tosa nkjín nroa. Jebi kui bakóná nga tsín ʼya xi mele nga koa̱njchínga.

² Tonga je Jeobá chjí be je xi jekoanjchínga (Prov. 16:31). Yaa síngósonkao je yá xi nya xkoén xkoén (tʼexkiai Salmo 92:​12-14).a Ninga jenkjín nó nga nya je yá tojo nya xkoén xkoén kʼoa bale naxó. Kʼoama je yá xi tjín ya Japón, ninga jetsʼato 1,000 nó nya tojo nʼio nda bale naxó. Tojo ma yá jebi, je ndsʼee xi jekoanjchínga tosi tonda nda tjíosíxále Jeobá ninga tse kjoa tjíofaʼatojin kʼoa je Jeobá chjí be ndsʼee jebi.

3. Tʼeyanajmí jme xá xi kitsjoale Jeobá je choʼndale xi jekoanjchínga nga kitjoson jme xi tjínndajinle.

³ Je Jeobá chjí bekonná ninga jekoanjchíngaa.b Nichxin kjoatse jé kisichjén je choʼndale xi jekoanjchínga nga kitjoson jme xi tjínndajinle. Tobʼelañá, jenʼio jchínga je Sara nga kʼoakitsole nga jngo ʼndí sʼe̱le xi jngo naxinandá koa̱nni nga koa̱nskanni kʼoa nga ya ntje̱le kjuinroani je Mesías (Gén. 17:​15-19). Kʼoa je Moisés kʼoati jejchínga nga kʼoakitsole Jeobá nga je katamʼaonsje je chjota israelita ya Egipto (Éx. 7:​6, 7). Kʼoati jechjotajchínga je Juan nga kiski je xi aon libro faʼaitʼa ya Biblia.

4. Tojo tso Proverbios 15:​15, jméni xi kuinyakao je ndsʼee xi jekoanjchínga nga chókjoajinle je kjoa xi faʼatojin (kʼoati chótsenlai sén xi faʼaitʼa).

⁴ Nʼio tse kjoa bitjatojiaan kʼianga jemajchíngaa. Jngo tichjaa xi i̱ kitso: “Tjínnele nga nʼiojin koaan nga̱ tsínti choa ñʼai maniná jme xi nʼia kʼianga jemajchíngaa”. Ningalani tse kjoa bitjatojiaan, kʼiatsa tsjoa tjín tokoán kui xi koasenkaoná nga chókjoajinnác (tʼexkiai Proverbios 15:15).d I̱ kjoaʼmiya jebi kui jchaa jméni xi koa̱n sʼin je ndsʼee xi jekoanjchínga nga tosi tonda tsjoa sa̱tío kon kʼoa jósʼin kuinyakoaa ngatsʼiaa xi tiyoaa ya jinjtín. Kuila títjon kataʼyaa ánni nga ñʼai manile je ndsʼee xi jekoanjchínga nga tsjoa satío kon.

ÁNNI NGA ÑʼAI MANINÁ NGA TSJOA SATÍO TOKOÁN KʼIANGA JEMAJCHÍNGAA

5. Jméni xi síkinroajen tokoán nga jemajchíngaa.

⁵ Nroajen tokoán nga jemajchíngaa nga tsínti ma kʼoanʼiañá jonʼia ngasʼa. Kʼoati ba satío tokoán nga kui nikjaʼaitsjenjiaan jme xi kinʼia nga sʼa xtiaa kʼoa tsakuije̱ nga tsín jme nanda chʼin kisʼená (Ecl. 7:10). Jngo tichjaa xi Ruby ʼmi, itso: “Nga aonjon aontʼa kʼoa nga tsínti ma sikjanña ñʼai mana nga bʼakja je najñona kʼoa nga baya je najñondso̱koa. Nga tsínti ma síkjanni je ndsa̱ nga chʼin tjínle je nindana alijme xi tima sʼinña”. Je ndsʼee Harold xi ya Betel kisixá, itso: “Nʼio jti mana nga tsínti jme xi ma sʼinña. Kʼianga sʼa xtia tjínna nganʼio kʼoa nʼio tsjoake̱ koan nga kisiská. Kʼianga niskáijin itso je xi ñatjen kisiská: Tikʼatolai pelota je Harold nga̱ nʼio nda male basén. Tonga ndʼaibi alikuijin tichókjoanina nga koasen pelota”.

6. 1) Jmésani xi kʼoati síkinroajen tokoán. 2) Jméni xi kuenta sʼin je ndsʼee xi jejchínga tsa tojo koa̱n sixákao carro kʼoa tsa mai (chótʼai je kjoaʼmiya xi faʼaitʼa revista jebi, jñani tso: “A tsín tikoa̱n sixákaoña carro”).

⁶ Kʼianga jekjimajchíngaa nroajen tokoán nga tsínti ma kʼoanʼiañá tsa jmeni nga toñá kʼoa ngisaa tiba sʼengáni tokoán nga tjín xi síkuindaná kʼoa tsakuije̱ nga ya mangínkiyokoaa je xtiná. Kʼiatsa chʼin tíbʼetʼaná kʼoa tsa tsínti nanda matsenniná alikui tima kʼoanʼiañá tsa jmeni nga toñá kʼoa tsa carro si̱xákoaa. Koaan si̱kjaʼaitsjenjiaan nga tojo chjí bekonná Jeobá kao xíngiaa ninga tsínti ma kʼoanʼiañá jmeni xi nʼia ngasʼa. Je Jeobá be jotjín tokoán kʼoa kuenta sʼín nga tsjoachaa kʼoa nga chjí ʼyatokoán je ndsʼee (1 Sam. 16:7).

7. Jméni xi kuenta sʼiaan kʼiatsa kʼoasʼin nikjaʼaitsjeen nga tsínti jchañá nga kjoetʼa jme xi chon sonʼnde.

⁷ Kʼianga jemajchíngaa kʼoati ba sʼe tokoán nga kui nikjaʼaitsjeen tsa tsínti jchañá nga kjoetʼa jme xi chon sonʼnde. Kʼiatsa kʼoasʼin nikjaʼaitsjeen kuenta sʼiaan nga tsejta kjima Jeobá kʼoa nga tsín tokjoán tísíkjeson jme xi chon sonʼnde (Is. 30:18). Kuinga tsejta kjimani nga̱ kui xi mele nga nkjínsa chjota katabe xi tʼatsʼe kʼoa je katasíxále (2 Ped. 3:9). Kʼianga nroajen tokoán kui kuenta sʼiaan nga nkjínsa chjota cha xi sʼa skoe̱ tʼatsʼe Jeobá, kʼoa tsakui nichxin saʼnda tjínni kʼa xíngiaa xi koa̱nkjainle kʼoa xi kuinje̱ngile yaole nga kjoaʼaí kjoaxkón.

8. Jósatío kon je chjotajchínga kʼianga chʼin bʼetʼale.

⁸ Ni sʼa xtiaa kʼoa ni jekoanjchíngaa sakʼoa tsín nda sʼe tokoán kʼoa yaa nroani nga tokjaʼaíngá bixoán kʼoa tokjaʼaíngá nʼia xi skanni kʼoamaná (Ecl. 7:7; Sant. 3:2). Kʼoakoan je Job kʼianga tse kjoañʼai tíjnajin tokitso tomani (Job 6:​1-3). Kʼoa je xki xi chinee sakʼoa kui síkiʼaonná kuinga tokjaʼaíngá bixónñá kʼoa tokjaʼaíngá nʼiañá. Tonga alikui koa̱n nga tokui kjoánelee nga jekjimajchíngaa kʼoa tsa chʼin tjínná nga tokuinókjoatiñá kʼoa tsa ʼnyi koaan. Kʼiatsa tiʼyaa nga tsín nda tso én tinokjoaa tokjoan si̱jélee kjoanichatʼa xíngiaa (Mat. 5:​23, 24).

JÓSʼIAAN NGA TSJOA SʼE̱ TOKOÁN

9. Ánni ndatjínni nga bʼaiʼndelee xi ngikʼa nga binyakaoná (kʼoati chótsenlai sén xi faʼaitʼa).

⁹ Kʼoakʼuínlee xi ngikʼa nga katabinyakaoná (Gál. 6:2). Ñʼai ma sakʼoaná nga nijélee nganʼio xíngiaa. Kʼoakoan jngo tichjaa xi Gretl ʼmi. Itso: “Ñʼai ma sakʼoana nga sijyoa nga tjín xi basenkaona nga̱ tsín mena nga ʼya xi sisile. Tonga skanni koanjinna nga machjénna nga tjín xi koasenkaona”. Tsjoa satío kon je ndsʼee nga bʼaiʼndelee nga binyakaoná (Hech. 20:35). Kʼoati tsjoa satío tokoán tsanda ñá nga̱ kʼoasʼin bakóniná nga tsjoakená.

10. Ánni nga kʼoainilee kjoanda je xi binyakaoná (kʼoati chótsenlai sén xi faʼaitʼa).

¹⁰ Kʼoailee kjoanda xíngiaa nga binyakaoná (Col. 3:15; 1 Tes. 5:18). Kʼiatsa “Niná xi katʼéchjíli” kʼuínlee xi binyakaoná nda sa̱tío kon kʼoa skoe̱ní nga chjí ʼyaa jmeni xi sʼín. Je tichjaa xi Leah ʼmi xi síkuinda je ndsʼee xi jejchínga xi tjío ya Betel, itso: “Jngo tichjaa xi xo̱n síkájnana nga tsjoána kjoanda nga basenkoa. Ninga tochoa jmeni xi tso tsjoa sʼe tokoan, nga̱ ʼbeña nga ñaki kʼoatjín kon kʼoa nga chjí be jmeni xi sʼian”.

11. Jósʼin kuinyakoaa je xi ngikʼa (kʼoati chótsenlai sén xi faʼaitʼa).

¹¹ Kuinyakoaa xi ngikʼa. Kʼianga nikʼayaa nichxin nga binyakoaa xi kjaʼaí alikuila kui nikjaʼaitsjeen je kjoa xi tjínná. Je én xi síchjén je chjota xi África tsʼe kʼoatso nga ya mangóson je chjotajchínga ya jñani nʼio nkjín libro nya. Tonga tsa tsín ʼya xi kʼoexkia je libro alikui ʼya xi skoe̱ jme xi tsoya. Tikʼoasʼinni, alikuijin josʼin skoe̱ni je xti je kjoafaʼaitsjen xi tjínli tsa tsín chja̱kaonajmí. Kuinga nʼio tjínnile kjoandosin nga tikʼayalai nichxin nga chja̱kaonajmí kʼoa nda tasenñolai jokuitso. Tʼinyalai josʼin tíbasenkaoli je Jeobá kʼoa jokji tsjoa tjín tokuin nga je tinixálai. Kʼiatsa si̱nʼiui kon je xi sʼa xti tsjoa sʼe̱ tokuin (Sal. 71:18).

12. Tojo tso Isaías 46:​4, jméni xi tso Jeobá tʼatsʼe choʼndale xi jekoanjchínga (kʼoati chótsenlai sén xi faʼaitʼa).

¹² Kʼoatʼinlai Jeobá nga katatsjoáli nganʼio. Kʼiatsa sakʼoa chóbeli kʼoa tsa tsín nda sʼe tokuin tikjaʼaitsjenjin nga nʼio tse nganʼio tjínle Jeobá. Je Biblia itso: “Alikuikʼia bijtale kʼoa ni chóbejinlale” (Is. 40:28). Jé tsjoáli nganʼio xi koa̱nchjénli (Is. 40:​29-31). Kʼoa kuenta tʼiain nga kʼoatso Jeobá nga mele koasenkaoli (tʼexkiai Isaías 46:4).e Je Jeobá sítjoson ngantsjai jmeni xi tso (Jos. 23:14; Is. 55:​10, 11). Kʼianga si̱jélai nganʼio koasenkaoli kʼoa tsjoa sʼe̱ tokuin nga̱ jchaní nga tsjoakeli.

13. Tojo tso 2 Corintios 4:​16-18, jméni xi si̱kjaʼaitsjenjiaan (kʼoati chótsenlai sén xi faʼaitʼa).

¹³ Si̱kjaʼaitsjenjiaan nga kuicho nichxin nga koa̱nxtiya ijngokʼá kʼoa nga tsínti jme chʼin sʼe̱niná. Chókjoajinná je kjoa xi bitjatojiaan ndʼaibi nga̱ ʼyañá nga tokjoaʼato kʼoa je Biblia kʼoatso nga tsínti koa̱njchíngañá kʼoa nga tsínti jme chʼin sʼe̱niná (Job 33:25; Is. 33:24). Tsjoa sʼe tokoán nga ʼyaa nga ndasʼin kuiyoaa nichxin xi nroaján (tʼexkiai 2 Corintios 4:​16-18).f Kuila kataʼyaa ndʼaibi jósʼin kuinyakaoná je xi ngikʼa.

JÓSʼIN KUINYAKOAA XI JEKOANJCHÍNGA

14. Ánni nga nʼio chjínile nga kuinókjoalee kʼoa nga kjuinnixatʼaa je ndsʼee xi jejchínga.

¹⁴ Kjuinnixatʼaa je ndsʼee xi jekoanjchínga kʼoa kjitʼa kuinókjoalee teléfono (Heb. 13:16). Je chjotajchínga sakʼoa kʼoasʼin síkjaʼaitsjen nga toje tjío. Je ndsʼee xi Pierre ʼmi,g itso: “Nga tsínti jña ma bitjoña ñaki tomasina. Sakʼoa kʼoasʼe tokoan joni jngo cho̱ xi sénʼyanʼio”. Kʼianga mangínchotsenlee xi jekoanjchínga kʼoasʼin bakoñá nga tsjoachaa kʼoa nga makjáojinná josʼin tjíoni. Sakʼoa kʼoabixoán nga kjuinnixatʼaa kʼoa tsa teléfono kuinókjoaleje̱ tonga tsínni kʼoanʼia. Ningalani tse xá tjínná ngatsʼiaa, si̱kʼayaa nichxin nga kjuinnixatʼaa xi jejchínga (Filip. 1:10). Kʼoétʼaxoaan kʼiáni nga si̱kasénlee mensaje kʼoa kʼiáni nga kuinókjoalee. Kʼoéndajiaan jmé nichxinni nga kjuinnixatʼaa kʼoa tsín tokʼia kʼoasʼiaan nga kʼoakoa̱nná.

15. Jméni xi koa̱n sʼiaan kʼianga ya tiyokoaa xi jejchínga.

¹⁵ Sakʼoa kui nikjaʼaitsjenjiaan jméni xi chja̱kaonajmíñá xi jekoanjchínga kʼoa jméni xi tsjoakeje̱ nga sʼín. Tonga je xi ngisa chjíle kuinga si̱miyoaa (Prov. 17:17). Chja̱kaonajmiá nga kjesa fitsʼiajin kjoajtín kʼoa tsa kʼiaje̱ nga jekafetʼa. Chjónangilee jñánile texto xi ngisa tsjoake kʼoa jméni xi kisʼin nga sʼa xti xi tsjoa tsakʼé kon. Koaan kuinókjoalee ndʼianá nga ñatjen chótsenlee je JW Broadcasting^® xi xki̱ sá satío. Kʼoati koa̱n kuinyakoaa nga nda katasíxá je celularle kʼoa tsa tabletale kʼoa chʼa̱jenlee je xo̱n xi chotʼayá xi chriansʼa kitjo. Jngo tichjaa xi Carol ʼmi, itso: “Kʼianga ya tijnakoai xi jejchínga kui kʼoatʼiaon jmeni xi ngisa tsjoachai. Ninga jejchínga an tojo bʼetsaojinña. Tsjoake̱ña nga tsojmi fikatse, nga xin fikakjen kʼoa kotsenle jmeni xi tjín ya jñani bʼamje̱”. Kʼoa je tichjaa xi Maira ʼmi, itso: “Ninga jeñokan kao te nóle miyona, tsínkui fiña ninga 57 nó tjentítjonna bʼetsaojinníjin kʼoa ñatjen chotsenlaijin película. Kʼoa kʼianga jme xi ñʼai manajin nijéngañálaijin kjoafaʼaitsjen xíngijin”.

16. Ánni ndatjínni nga kjuinkoaa xi jejchínga nga fi tsʼe chjinexki.

¹⁶ Kjuinkoaa nga fi tsʼe chjinexki. Kʼianga koanngínkoaa tsʼe chjinexki koaan kuitjásʼenkoaa ánni nga jchañá jósʼin koa̱nxkile (Is. 1:17). Kʼoa kʼoétʼaxoaan jmeni xi kuitsole je chjinexki. Jngo tichjaa xi Ruth ʼmi, itso: “Kʼianga toʼan fia tsʼe chjinexki alikui makjainle jmeni xi xinle. To itsona: Alijme chʼin tjínli, toji xokjimali. Tonga kʼianga tjín xi fikaona nda sísinna je chjinexki. Tsjoale kjoanda je ndsʼee nga síkʼaya nichxinle nga fikaona”.

17. Jósʼin kuinyakoaa je ndsʼee xi jejchínga nga kuitsoyason.

¹⁷ Ñatjen kʼuínyasoán. Je ndsʼee xi jejchínga alikui tichókjoanile nga xki̱ ndʼia tsoyason. Kʼoakʼuínlee nga ñatjen kuiyoʼndá je carrito kʼoa chʼa̱tjenngi jngolee je yáxile xi kʼoéjnane. Kʼoati koa̱n kʼoakʼuínlee nga katabasenkaoná nga kʼoailee estudio je chjota kʼoa ya tjen ndʼiale ndsʼee kʼuínyanilee. Je xi chjotajchínga sʼin tjío koaan kʼoasʼin kʼoendajin nga ya tjen ndʼiale ndsʼee xi jejchínga kuitjoñá nga kʼuínyasoán ánni nga kʼoati koa̱n kuitjoni tsanda je. Je Jeobá nda sʼe kon nga binyakoaa je ndsʼee xi jekoanjchínga (Prov. 3:27; Rom. 12:10).

18. Jmé xi chótʼayajiaan ya kjoaʼmiya xi ijngo.

¹⁸ I̱ kjoaʼmiya jebi kui kaʼyaa nga chjí be Jeobá je xi jekoanjchínga kʼoa kʼoati sʼín je ndsʼee xi tjío ya jinjtín. Ningalani tse kjoa bitjatojiaan nga jemajchíngaa jé Jeobá basenkaoná nga tsjoa sʼe tokoán (Sal. 37:25). Kʼoa ngisaa titsjoa sʼengáni tokoán nga ʼyaa nga kuicho nichxin nga nda kuiyoaa. Tonga jósʼiaan nga tosi tonda tsjoa kʼoé tokoán kʼiatsa jngo xíngiaa xi jejchínga tinikuindaa, tsa jngo tiná kʼoa tsa jngo miyoná xi tímʼe. Kui tʼatsʼe jebi chótʼayá ya kjoaʼmiya xi ijngo.