Tjínkʼa xi kjonangi

Jókʼoe Jeobá je kjoafaʼaitsjenle naxinandá nichxin xi nroa

Ya Apocalipsis 17:​16, 17 kʼoatso jokoa̱n nga koaitsʼia je kjoañʼai xi nʼio tse. Itso: “Je nra̱ xi te mani xi kaʼyai kao cho̱be, jébi xi majtike chjoónchajngibe. Kjoaʼale ngayije, kʼoa sikájnajti, kʼoa ski̱ne je yaole, kʼoa koakajin lʼí. Niná kʼoasʼin kitsjoale chjotabe ni̱ma̱ xi kʼoasʼin sitjosonle josʼin mele Niná, nga kʼoasʼin tjíojngokon nga tsjoále kjoatéxomale je cho̱be”. Je xo̱n xi bʼasje naxinandále Jeobá kʼoakitso nga kʼoakʼoe Jeobá je ni̱ma̱le naxinandá nga sikjeson je religión ndiso.

Tonga ndʼaibi tsʼantjaiyajin josʼin majinná tsakai. Kʼianga kʼoatso Biblia nga “Niná kʼoasʼin kitsjoale chjotabe ni̱ma̱ xi kʼoasʼin sitjosonle josʼin mele Niná”, kui xi tsonile nga kʼoakʼoe Jeobá je kjoafaʼaitsjenle naxinandá nga katatsjoále “kjoatéxomale je cho̱be”. Jósʼin kuitjoson én jebi. Kataʼyala.

ʼYá xi nchja̱ni je xi síkʼaxki̱ Apocalipsis 17:​16, 17. Je xi chjoónchajngi tsole texto jebi kʼoati “Babilonia xi nʼio je” sʼin ʼyale kʼoa jé tsoyanile religión ndiso. Je “cho̱ xi ní kji” jé nchja̱ni je jtín xi kʼia kisʼejna nga nó 1919, jtín jebi Sociedad de Naciones tsakʼin kʼoa kui xá kisʼejnani nga katasʼe kjoanyʼán jngo tjíjtsa sonʼnde kʼoa ndʼaibi Organización de las Naciones Unidas sʼin ʼyale (Apoc. 17:​3-5). Kʼoa je xi “te nra̱” jé nchja̱ni ngatsʼi chjotaxá xi ya tsjoánganʼiole je “cho̱be”.

Jósʼin tsjoánganʼiole xínkjín je chjoónchajngi kao cho̱ xi ní kji. Nga kʼoatso Biblia nga ya tíjnason “cho̱ xi ní kji” je chjoónchajngi kui xi tsonile nga ya tsjoánganʼiole kʼoa nga je kʼoatsole jmeni xi sʼín.

Jókoa̱ntʼain je chjoónchajngi. Je “cho̱ xi ní kji” kʼoa kao “nra̱ xi te mani” xi ya tsjoánganʼiole tsakai je chjoónchajngi kjoaʼale je kjoanyinále kʼoa kʼoejnatseen jmeni xi sʼín kʼoa kʼiaa sikʼien. Kui xi mele Jeobá nga kʼoakatamatʼain je chjoónchajngi. Kʼianga ni̱kʼien je chjoónchajngi kui xi tsonile nga nijngojin religión ndiso tisʼe̱ni (Apoc. 17:1; 18:8). Tonga nga kjesa kʼoamajin kui kʼoasʼin naxinandá josʼin mele Jeobá.

Jókʼoe Jeobá je kjoafaʼaitsjenle chjotaxá. Jé Jeobá jokʼoe kjoafaʼaitsjenle je “nra̱ xi te mani” xi tsonile ngatsʼi chjotaxá nga tsjoáʼndele nga je koatexoma cho̱ xi ní kji, xi tsonile Naciones Unidas (Apoc. 17:13). Tonga ali tsa tojejin chjotaxá xosʼin nga̱ je Biblia kʼoatso nga je Jeobá xokʼoe kjoafaʼaitsjenle (Prov. 21:1; tingósonkoai Isaías 44:28). Kʼoa je chjotaxá ali tsa sikʼachxinjin, toxijña tsjoále kjoatéxoma je Naciones Unidas. Kʼianga jesʼe̱le nganʼio kʼiaa sikjeson ngatsʼi religión ndiso.

Jméni xi choyalee nga koa̱n nichxin xi nroa. Alikui choyalee nga tobijbi tsjoánganʼiole chjotaxá je Naciones Unidas, jé Jeobá xokʼoe kjoafaʼaitsjenle naxinandá nga toxijña tsjoáʼndele je Naciones Unidas nga je katabatéxoma. Kʼianga jekʼoakoa̱n, tojeme koaitsʼia je kjoañʼai xi nʼio tse. Kuinga nʼio tjínnile kjoandosin nga tjenyatokon kuiyoaa kʼoa nga chósonnilee jmeni xi sʼiaan ndʼaibi nga̱ jeʼyaa nga jeme kʼoakoa̱n (1 Tes. 5:6).