Jósʼin basenkaoná je librole Job kʼianga kjoa bitjatojiaan

1, 2. Ánni machjénni nga kʼoéxkiaa je librole Job.

A JESA tsakʼexkiai je librole Job. Ningalani jejan jmi basen nó tjínle nga kichji tojo nʼio basenkaoná ndʼaibi jmeni xi tso. Je chjota kʼoatso nga tsínsa xi kjaʼaí libro xi mangóson je librole Job, nga̱ nda majinná jmeni xi tso kʼoa bichókajin ni̱ma̱ná je kjoafaʼaitsjen xi faʼaitʼa. Ninga je Moisés kiski libro jebi tsʼee Jeobá je én xi nya (2 Tim. 3:16).

² Tsee jmeni xi bakóyaná je librole Job. Kui tsoya nga nʼio tjínle kjoandosin nga chʼa̱sjetsjee je jaʼaínle Jeobá. Kʼoati tsoya jokjoan je Jeobá, jolani nga bakó kjoatsjoacha, kjoachjine, kjoatéxomakixi kao nganʼio kʼoa 31 kʼa kʼoatso libro jebi nga je Jeobá xi “ngisasa tse nganʼio tjínle”. Kʼoati tsoya je librole Job ánni nga tsjoáʼndeni Jeobá nga kjoañʼai chjaʼá kʼoa nkjínsa koya jmeni xi tsoya.

3. Jósʼin basenkaoná nga bʼéxkiaa je librole Job.

³ Nʼio tse jmeni xi bakóyaná je librole Job. Yaa mangóson joma kʼianga mangián ya jñani sonnindo chon, kʼianga jeya tiyoaa ʼyañá ngayeje jmeni xi tjín ngotjondaile. Kʼoati ma kʼianga bʼéxkiaa je librole Job ʼyañá josʼin síkjaʼaitsjen Jeobá tʼatsʼe kjoa xi bitjatojiaan. I̱ kjoaʼmiya jebi kui chótʼayajiaan jósʼin basenkaoná librole Job kʼianga kjoa bitjatojiaan. Jchañá jósʼin tsakinyakao chjota israelita je choa̱le Job kʼoa jósʼin basenkaoná ndʼaibi. Kʼoati jchaa jósʼin chjénngiaa je choa̱le Job nga kʼoainganʼiolee xi kjaʼaí.

KITSJOAʼNDE JEOBÁ NGA KJOAÑʼAI TSAKJAʼÁ JOB

4. Ánni nga tsín koanngósonni Job jokisʼin kʼa chjota israelita.

⁴ Je Job yaa tsakʼejna ya ʼnde jña Uz tsakʼin xi nchja̱ni Arabia kʼoa kʼiaa tsakʼejna nga choʼnda sʼin tsakatio chjota israelita ya Egipto. Kixi kitʼale Jeobá, alikui kʼoakisʼin jokisʼin kʼa chjota israelita nga niná ndiso tsakʼétsʼoale (Jos. 24:14; Ezeq. 20:8). Je Jeobá i kitso xi tʼatsʼe Job: “Liʼya xi tjín sonʼnde xi kʼoasʼín joni tsa je” (Job 1:8).a Nʼio nyiná koan kʼoa nʼio tsaʼyale ya jñani tsakʼejna (Job 1:3). Nʼiojin jti koanle je Na̱i nga kixi kitʼale Jeobá je Job.

5. Ánni kitsjoaʼndeni Jeobá nga kjoañʼai tsakjaʼá Job (Job 1:​20-22; 2:​9, 10).

⁵ Je Na̱i kʼoakitso nga yátsʼi̱n koasenle Niná je Job kʼiatsa kjoañʼai kjoaʼa (Job 1:​7-11; 2:​2-5). Je Jeobá tsjoake koan tonga kitsjoaʼnde nga kjoañʼai kinikjaʼá ánni nga jchanile tsa kʼoatjín kʼoa tsa mai jmeni xi kitso je Na̱i (Job 1:​12-19; 2:​6-8). Jé Na̱i xokisʼin nga kisicha je cho̱ntjele Job kʼoa nga kʼien nga 10 xtile, kʼoa kʼoati je xokisʼin nga táo chʼin kiskatʼale. Ninga kʼoalani koantʼain tosi tonda kixi kitʼale Jeobá (tʼexkiai Job 1:​20-22;b 2:​9, 10c). Nga koanskanni koanndayani, nyiná koan ijngokʼa kʼoa ngi 10 xti kisʼele. Ngi 140 nó tsakʼejnasa kʼoa nkjínsa xtindaile tsabe (Job 42:​10-13, 16). Jósʼin tsakinyakao je choʼndale Niná xi tsakatio nichxin kjoatse je choa̱le Job kʼoa jósʼin binyakaoná nichxin xi tiyoaa ndʼaibi.

6. Jméni xi koanjinle chjota israelita tsa kisʼejinlanile je kjoa xi jaʼatojin Job (kʼoati chótsenlai sén xi faʼaitʼa).

⁶ Jósʼin tsakinyakao chjota israelita choa̱le Job. Tsee kjoa jaʼatojin kʼianga tsakatio ya Egipto, jolani je Josué kao Caleb choʼnda kinikao nga sʼa xti kʼoa 40 nó tsakʼetsoma ya ʼndekixí xi totʼatsʼe nga xíjin koan kʼa. Tsa kisʼejinlanile nga kui nichxin je chjota israelita je kjoa xi jaʼatojin Job, koanjinjinle ánni nga tsjoáʼndeni Niná nga kjoañʼai chjaʼá kʼoa nga nʼio chjí be nga kixi mangíntʼalee. Kʼoajin tikoanjinle je xi tsakatio nga koanskanni.

7, 8. Jósʼin basenkaoná je librole Job kʼianga kjoa bitjatojiaan. Jngo choa̱ tʼejnai.

⁷ Jósʼin binyakaoná choa̱le Job. Nichxin xi tiyoaa ndʼaibi nkjín chjota xi tsínti makjainnile xi tʼatsʼe Niná nga tsín be ánni nga kjoañʼai chjaʼañá. Kʼoakoan jngo chjoón xi Ruanda tsʼe xi Hazel ʼmi.d Kʼianga sʼa tsoti makjainle xi tʼatsʼe Niná tonga kʼianga tse kjoa jaʼatojin tsínti koankjainnile. Kitsjion xínkjín xijchále kʼoa je chjota xi tsakʼejnakao na̱le totaon tsabe. Kʼoa nga koanskanni tsaʼyataon je Hazel. Kʼianga kisijé nganʼio ya religión jñani tíjnajin alikui ʼya xi tsakasenkao. Ñandia nga tsakʼétʼaxo̱n jotjín kon, i kitsole Niná: “Bʼetsʼoale kʼoa kui kʼoatisʼian xi ndatjín, tonga ji tokjoañʼai nikjaʼánái kuinga tsínti ji kuenta sʼinnile tosaa toʼan kʼoa yaona”. Tojo koan chjoón jebi, nʼio nkjín chjota xi kʼoasʼin síkjaʼaitsjen nga je Niná xi kjoañʼai síkjaʼáná.

⁸ Kʼianga chotʼayajiaan je librole Job majinná nga tsínni je Niná xi kjoañʼai síkjaʼáná nga jeni Na̱i xosʼín. Kʼoati majinná nga tsín tsakuijin nga chʼao nʼia nga kjoa bitjatojinñá nga̱ je Biblia kʼoatso nga ngatsʼiaa faʼainená je kjoa xi tsín ñá tjínjinná kʼoa xi tsín choyalee (Ecl. 9:11; Job 4:​1, 8). Kʼoati majinná kʼiatsa tosi tonda kixi koanngíntʼalee Jeobá kʼoasʼin koakoñá nga to énndiso jmeni xi kitso je Na̱i (Job 2:3; Prov. 27:11). Bʼailee kjoanda Niná nga ʼyaa ánni nga kjoañʼai chjaʼañá. Kʼianga tsakʼinyale Biblia je Hazel koanjinle nga tsín je Niná xi kjoañʼai kisikjaʼá. Itso: “Tsakʼeyanajmíle Jeobá jotjín tokoan kʼoa kʼoakixinle nga je kʼoetsʼoa ijngokʼale kʼoa nga kuinga tokjaʼaí kixinña nga tsín ʼbe jokjoantjínni xi tʼatsʼe. Ndʼaini majinna nga tsjoakena je Jeobá kʼoa tsjoa tjín tokoan”. Nda sʼe tokoán nga ʼyaa ánni nga tsjoáʼndeni Niná nga kjoañʼai chjaʼá. Kuila kataʼyaa jósʼin basenkaoná je librole Job kʼianga kjoa bitjatojiaan.

JÓSʼIN BASENKAONÁ CHOA̱LE JOB NGA CHÓKJOAJINNÁ JE KJOA XI BITJATOJIAAN

9. Jókisʼin je Job kʼianga chʼin kiskatʼale (Santiago 5:11).

⁹ Si̱kjaʼaitsjenla jokji kjoañʼai tsakjaʼá je Job nga nʼio táo chʼin kiskatʼale. Nga jtsé tsakajon yaole toyaasa chaolʼí tsakʼejnajin, ñaki koantseen nindale nga kitjokaya yaole kʼoa toʼyasa kichokjoale nga xjoa̱tii kiskenjonni yaole. Nʼiojin tsakatejé je Job nga kʼoasikji táo chʼin kiskatʼale. Ningalani kʼoasikji tse kjoañʼai tsakjaʼá kichokjoajinle (tʼexkiai Santiago 5:11).e Jméni xi tsakasenkao Job nga kixi kitʼale Niná ningalani tse kjoa jaʼatojin.

10. Jósʼin ʼyañá nga nda tsakjáo je Job kao Jeobá.

¹⁰ Je Job tsakʼéyanajmíle Jeobá jokisʼe kon (Job 10:​1, 2; 16:20). Ya capítulo 3 kʼoatso nga je Jeobá tsakánele nga kʼoasikji kjoa tíjnajin. Kʼianga kichokjákaonajmí nga jan miyole ngisaa kixi tsakʼasje yaole tikʼoajinni Niná (Job 10:​1-3; 32:​1, 2; 35:​1, 2). Tonga kʼoakitso nga koanskanni nga kuinga tokitso tokoanni nga to yaole kini (Job 6:​3, 26). Ningalani likui tjínnele je Niná kʼoakuitsole ánni nga kjoañʼai tífaʼáni, ya capítulo 31 kʼoatso nga kui xi koanmele Job nga kinrʼoéle Jeobá kʼoa nga kʼoakʼuínle nga kixi kjima kjoaixi (Job 31:35).

11. Jósʼin tsakjákaonajmí Jeobá je Job.

¹¹ Kuinga kitsoni kon je Job nga tsakʼéyanajmíle Jeobá jokisʼe kon nga̱ be nga kjuinrʼoéle kʼoa nga kuenta sʼin nga kixi tífitʼale. Kʼoa kʼianga tsakjákaonajmí Jeobá alikui kiskankao ningalani tokitso tomani kʼoa ninga nʼio kixi tsakʼasje yaole. Tosaa ngasin nganda tsakjákaonajmí tojo sʼín jngo nʼai nga síkixiyanda je tiʼndíle. Xijekoan, je Job koanchoyale nga nʼioni tochoa jmeni xi be kʼoa nga tsínni ndatjín jmeni xi kitso (Job 31:6; 40:​4, 5; 42:​1-6). Alikui jao tjín tokoán nga tsakinyakao chjota nichxin kjoatse je choa̱le Job kʼoa kʼoati binyakaoná ndʼaibi.

12. Jósʼin tsakinyakao chjota israelita je choa̱le Job.

¹² Jósʼin tsakinyakao choa̱le Job je chjota israelita. Je Moisés kʼoati tse kjoa jaʼatojin kʼoa sakʼoa kinroajen kon nga tsakándiaale chjota israelita. Jé Jeobá tsakʼéyanajmíle Moisés jme xi koankjáojinle, alikui kʼoakisʼin jokisʼin je chjota israelita nga to tsakjayojéetʼale Jeobá ʼndele nga je sinʼiotʼa (Éx. 16:​6-8; Núm. 11:​10-14; 14:​1-4, 11; 16:​41, 49; 17:5). Kʼoati tsejta koan nga tsakatekjáyale Jeobá. Tobʼelañá, kʼianga jeñachan nó tjíoma ya ʼndekixí nga kicho ya ʼnde jña Cadés tsakʼin, je Moisés alikui je Jeobá tsakʼasjengʼa (Sal. 106:​32, 33). Kʼoa je Jeobá alikui kitsjoaʼndele nga jaʼasʼen ya ʼnde jña tsakʼinle nga kʼoaile (Deut. 32:​50-52). Alikuijin nda kisʼe kon Moisés nga kʼoatsakʼinle tonga tsakʼaʼén nga tsakichakjáyale. Ndajin tsakinyakao choa̱le Job je chjota israelita xi tsakatio nga koanskanni nga kichokjoajinle je kjoa xi jaʼatojin. Tsa kisikjaʼaitsjenjin je choa̱le Job koanjinjinle nga koa̱n kʼoeyanajmíle Jeobá jotjío kon, nga tsín koa̱n ngisa kixi kʼoasje yaole tikʼoajinni Niná kʼoa nga kʼoaʼén nga koatekjáyale Jeobá.

13. Jósʼin basenkaoná je choa̱le Job nga chókjoajinná je kjoa xi bitjatojiaan (Hebreos 10:36).

¹³ Jósʼin binyakaoná choa̱le Job. Kʼoati machjén nga chókjoajinná ndʼaibi nga̱ nʼio tse kjoa bitjatojiaan xi tsín nda bʼé tokoán (tʼexkiai Hebreos 10:36).f Jolani nga chʼin katʼaná, tsa je xíngiaa xi kjoa faʼatojin, tsa xíngiaa nichaa kʼoa tsa jmesa kjoa xi kuitjátojiaan. Kʼoati tsín nda sʼe tokoán kʼianga totso tomaniná je chjota (Prov. 12:18). Je librole Job kui bakóyaná nga koa̱n kʼoakʼuínlee Jeobá josʼe tokoán nga̱ kjuinrʼoéná, alikui skankaoná kʼiatsa kui kʼoakuixoán jmeni xi tsín tjen ndiaale (1 Juan 5:14). Tosaa tsjoáná nganʼio nga chókjoajinná je kjoa xi bitjatojiaan (2 Crón. 16:9; Sant. 1:5). Kʼoa kʼianga kjoafaʼaitsjen tsjoáná kui síchjén je Biblia, naxinandále, xi chjotajchínga sʼin tjío kʼoa tsa je ndsʼee xi jetjínle kjoafaʼaitsjen. Je choa̱le Job kui bakóyaná kʼianga batekjáyaná Jeobá tjínnele nga tsejta koaan kʼoa nga chʼa̱ʼén jme xi kuitsoná (Heb. 12:​5-7). Kʼoakisʼin je Job nda tsakasénño kʼianga tsakjákaonajmí je Jeobá, kʼiatsa kʼoasʼiaan tsanda ñá nʼio nda koasenkaoná je kjoafaʼaitsjen xi tsjoáná (2 Cor. 13:11). Nʼio tse jmeni xi bakóyaná je choa̱le Job. Kataʼyala jósʼin si̱chjén choa̱ jebi nga kuinyakoaa xi kjaʼaí.

SI̱CHJÉN JE LIBROLE JOB NGA KʼUÍNYALEE XI KJAʼAÍ

14. Kʼianga ʼmiyasoán, jóʼmilee je chjota xi kui kjonangi ánni nga kjoañʼai chjaʼañá.

¹⁴ Sakʼoa kui kjonanginá chjota kʼianga ʼmiyasoán ánni nga kjoañʼai tjínni. ʼMiyalee jmeni xi tso je Biblia, kʼoaʼmilee nga je Na̱i tsakʼanachale Adán kao Eva ya ʼndenaxóle Edén. Kʼoa je Adán kao Eva koankjainle jmeni xi kitso je Na̱i kʼoa tsínti tsakʼaʼénnile Niná (Gén. 3:​1-6). Nga ya kinroani nga kjoañʼai tjín kʼoa nga biyañá (Rom. 5:12). Nga títsjoáʼnde Niná nga kataʼyale nga tsín kʼoatjín jmeni xi kitso je Na̱i kʼoa nga kuicho nichxin nga chjotatsje koa̱n ijngokʼá (Apoc. 21:​3, 4). Kʼianga ʼmiyalee chjota jmeni xi tso Biblia majinle ánni kjoañʼai chjaʼañá.

15. Jósʼin si̱chjén je librole Job nga kʼuínyalee je chjota ánni nga kjoañʼai chjaʼañá (kʼoati chótsenlai sén xi faʼaitʼa).

¹⁵ Kʼoati koa̱n si̱chjén je librole Job nga kʼuínyalee chjota ánni nga kjoañʼai chjaʼañá. Nga̱ je Job kʼoati kui kisikjaʼaitsjenjin tsa je Niná xi kjoañʼai kisikjaʼá kʼianga tse kjoa jaʼatojin (Job 7:​17-21). Koanjinle chjota nga tsín toje xi kui síkjaʼaitsjenjin ánni nga kjoañʼai chjaʼañá. Koaan kʼuínyalee nga tsín je Niná xokisikao Job nga kjoañʼai tsakjaʼá. Je Na̱i kʼoakitso nga tokui nga síxánile Niná je chjota nga ndatjío kʼoa nga tsín tije sixánile tsa tse kjoañʼai kjoaʼa. Ningalani kitsjoaʼnde Niná nga kjoañʼai tsakjaʼá je Job, kixi kitʼale kʼoa kʼoasʼin tsakakóni nga tsín kʼoatjín jmeni xi kitso je Na̱i. Koaan kʼoakʼuínlee je chjota nga kisichikontʼain Jeobá je Job nga kixi kitʼale kʼoa nga tsín je Jeobá xi kjoañʼai síkjaʼáná kʼianga kjoa bitjatojiaan.

16. Tʼeyanajmí jósʼin binyakao je chjota xi kjoa faʼatojin nga bʼéxkia je librole Job.

¹⁶ Kataʼyala josʼin tsakasenkao je xi Mario ʼmi kʼianga tsakʼéxkia je librole Job. Kʼianga nó 2021 jngo tichjaa xi teléfono kisichjén kʼianga kitsoyason kʼoa je chjota xi kinchja̱ Mario ʼmi. Jngo texto tsakʼéxkiale, kʼoakitsole nga kuicho nichxin nga ndasʼin kuiyoaa kʼoa nga nrʼoéná Niná kʼianga bʼetsʼoalee. Xijekoan kui kiskonangile jósʼin síkjaʼaitsjen tʼatsʼe texto xi tsakʼéxkiale. Je Mario kʼoakitso nga jngo xo̱n tíbʼéndale je familiale nga tíbájinkon nga sikʼien yaole, i kitso: “ʼBeña nga tíjna Niná tonga tsínjin mandosinle xi tʼatsʼan”. Kʼianga koanjaoni kʼa nga kinchja̱le tichjaa kui tsakjáoyani jokji kjoañʼai tsakjaʼá je Job. Kʼoa je Mario kʼoakitso nga kʼoexkia je librole Job. Je tichjaa kʼoakitsole nga koa̱n ya tjen internet kʼoexkiani Biblia, ya jw.org. Je Mario koanmele nga Biblia kʼuínyale kʼoa nda kisʼe kon nga kisʼejinle nga mandosin kjoaixile Niná xi tʼatsʼe.

17. Ánni nga bʼainilai kjoanda Jeobá nga ya Biblia kisʼetʼa je librole Job (Job 34:12).

¹⁷ Je Biblia sínʼio tokoán kʼianga kjoa bitjatojiaan (Heb. 4:12). Bʼailee kjoanda Jeobá nga ya kisʼetʼaxo̱n je librole Job nga̱ nʼio nda binyakaoná ndʼaibi jmeni xi tso (Job 19:​23, 24). Je libro jebi kui tsoya nga tsínkui kʼoasʼín je Niná xi chʼaotjín (tʼexkiai Job 34:12).g Kʼoati tso ánni nga tsjoáʼndeni Niná nga kjoañʼai chjaʼá kʼoa jósʼiaan nga chókjoajinná je kjoa xi bitjatojiaan. Kʼoati kui bakóya jósʼin kuinyakoaa je xi kjoa tjíofaʼatojin. Ya kjoaʼmiya xi ijngo kui jchaa jósʼin si̱chjén je librole Job kʼianga kjoafaʼaitsjen kʼoailee xíngiaa.