Je ndsʼee xi jekoanjchínga nda tsjoánganʼio ya jinjtín

Je tichjaa xi Connie ʼmi xi 83 nóle itso: “Kʼianga sʼa xtia nʼio nda kisixá. Tonga ndʼaibi nga jekoanjchínga alikui tikʼoakji bichóni nganʼiona”.

Tsakui nichxin kʼoati sʼe tokuin tsanda ji josʼin síkjaʼaitsjen tichjaa jebi. Tsa tsínti chókjoanili nga kʼoakji nixálai Jeobá jonʼiai nga sʼa xti. Jmé xi koasenkaoli nga tsín si̱kinroajain tokuin.

JMÉNI XI MELE JEOBÁ NGA SʼIAIN

Tikjaʼaitsjenjin jebi: “Jméni xi mele Jeobá nga sʼian”. Ya Deuteronomio 6:5, itso: “Tjínneli nga katamatsjoachai Jeobá Nináli kao ngayeje ni̱ma̱li, kao ngayeje kjoabijnachonli kʼoa kao ngayeje nganʼioli”. Ánni nga nda bʼéni tokoán jmeni xi tso texto jebi.

Texto jebi kui bakóyaná nga kui xi mele Jeobá nga kʼoakji si̱xálee jokji tjen kʼoakoa̱nná. Tsín je si̱ngósonkoaa yaoná je ndsʼee xi nda tjíosíxále Jeobá kʼoa tsín tokui si̱kjaʼaitsjen ʼndeʼndee jokji kinixálee ngasʼa xtiaa.

Tikjaʼaitsjenjin nga kʼoajinkji kinixálai Jeobá jokji tjen kʼoakoanli kʼianga sʼa xti. Kʼoa ndʼaibi nga jekoanjchíngai kʼoajinti kʼoakji tinixálai jokji tjen bichó nganʼioli. Kui xi tsonile jebi nga tojo kʼoasʼin nda tinixálai Jeobá jokinʼiai ngasʼa.

Sén xi faʼaitʼa: Jngo tichjaa xi jekjoatse nga nda tísíxále Jeobá. 1. Kʼianga sʼa xti je tichjaa títsoyale jngo chjoón. 2. Nga jekoanjchínga tichjaa teléfono tísíchjén nga títsoyason kao jngo tichjaa xi sʼa xti. — Nga nda kinixálai Jeobá nga sʼa xti kʼoajinti tinʼiai ndʼaibi, kʼoajinkji tinixálai jokji tjen kʼoamali

KOAAN KʼUÍNYALAI JE NDSʼEE JMENI XI MALI NʼIAI

Kui tikjaʼaitsjenjin jósʼin koa̱n kuisenkoai je ndsʼee ʼndele nga kʼoasʼin si̱kjaʼaitsjenjin nga jetsínli nganʼio kʼoa nga tsínti nanda jme xi ma nʼiani. Jméni xi koa̱n sʼiain.

Tʼinyalai xi ngikʼa jmeni xi mali nʼiai. Kuenta tʼiain jmeni xi kitso je choʼndale Niná xi bʼaxki̱ ya Biblia.

Je rey David i kitso: “Xti koan kʼoa jekoanjchínga ndʼaibi, tonga nisañandiajinla ʼbe tsa njiotokon jngo chjota xi kixi, kʼoa tsa tsínle jme xi tjíokjine je xtile” (Sal. 37:25).

Je Josué i kitso: “Ndʼaibi tojeme kuiyáa. Jon nanda ʼyao kao ngayeje ni̱ma̱no kʼoa kao ngayeje kjoabijnachonno nga nijngojin énnda xi kinchja̱ je Jeobá Nináno xi tsín kitjoson. Ñaki kitjoson ngayeje xi totʼatsaon. Nijngojin én jebi xi tsín kitjoson” (Jos. 23:14).

Jmeni xi kitso David kao Josué nda basenkaoná nga̱ jesoaa tsabe josʼin kisichikontʼain Jeobá jokjitse kisixále. Kʼoajinti koasenkao je ndsʼee nga kʼoéyanajmílai jokjitse jetinixálai Jeobá.

Tsa jenkjín nó nga je Jeobá tinixálai tʼeyanajmílai xi kjaʼaí josʼin tísíchikontʼainli. Tʼeyanajmí je choa̱ xi tsaʼyai josʼin tsakasenkao Jeobá je choʼndale kʼianga nganʼio koanchjénle. Tsa kʼoasʼiain, sinʼio kon je ndsʼee kʼoa tsjoa sʼe̱ tokuin tsanda ji (Rom. 1:11, 12).

Kʼoati koa̱n si̱nʼiui kon je ndsʼee kʼianga kʼuín kjoajtín ya Ndʼia jña chótʼayá kʼiatsa chókjoali. Tsjoa sʼe̱ tokuin nga kʼoasʼiain kʼoa kʼoainganʼiolai je ndsʼee. Je tichjaa xi Connie ʼmi, xi jenása kanikʼaxkiaa itso: “Kʼianga fia kjoajtín basenkaona nga tsín nroajen tokoan. Tsjoa sʼe tokoan nga nda kjoéyana je ndsʼee nga bichoa ya Ndʼia jña chotʼayá. Tjín xi bʼale nga katabe nga kʼoati tjaona tsanda an. Bʼenele yaona jokji tjen kʼoamana nga ñatjen nixálaijin Jeobá kao je ndsʼee”.

CHJÍ BE JEOBÁ JOKJI TINIXÁLAI

Nkjín chjota síkʼaxki̱ Biblia xi tojo nʼio nda kisixále Jeobá ninga jenʼio jchínga. Tobʼelañá, je Simeón jenʼio jchínga kʼianga kitsin Jesús. Tsabejin nga nda tjíosíxále Jeobá je xi sʼa xti ya yo̱ngo̱ kʼoa tsakui nichxin kʼoasʼin kisikjaʼaitsjen nga jetsín tichjí beni Jeobá nga jekoanjchínga. Tonga je Jeobá kʼoakitso nga kixi koan je Simeón kʼoa nga nda tsabexkón Niná. Kui kjoanda kisʼele nga tsabe Jesús nga sʼa ʼndílee kʼoa jé xokitso nga Mesías koa̱n je Jesús (Luc. 2:25-35). Je Jeobá kui kuenta kisʼin jokji kjoamakjain kisʼele Simeón kʼoa kitsjoale nganʼiotsjele kʼoa tsínkui kini tsa jejchínga kʼoa tsa tsín tijme xi ma sʼínni.

Tsjoa tjío kon je José kao María nga bakóle Simeón nga sʼa ʼndílee je Jesús. — Je Jeobá kui kjoanda kitsjoale Simeón nga tsabe Jesús nga sʼa ʼndílee kʼoa kʼoakitso nga je Jesús xi Mesías koa̱n

Tʼejngui tokuin nga kʼoati chjí be Jeobá nga kʼoakji nixálai jokji tjen chókjoali. Tsjoa sʼe kon Jeobá nga kʼoakji nixálee jokji tjen kʼoamaná (2 Cor. 8:12).

Kuenta tʼiain jmeni xi koa̱n kʼoasʼiain. Tʼinyasuin jotjín koya tjín josʼin ʼmiyasoán kʼoa kʼoasʼin tʼinyasuin jokji tjen chókjoali. Kʼoati koa̱n teléfono kuinókjoalai je ndsʼee kʼoa tsa xo̱n chjílai nga si̱nʼiui kon. Tsa kʼoasʼiain skoee je ndsʼee nga tjaoli kʼoa chjí skoe̱konli nga jekjoatse nga je Jeobá tinixálai.

Ninga tsínti nanda chókjoanili koaan nda si̱xálai Jeobá. Tobʼelañá, ya recuadro jñani tso “Je tichjaa Biblia tsakʼéxkiale jngo chjoón nga tsakasenkao” kui bʼéyanajmí jmeni xi kisʼin jngo tichjaa xi jejchínga xi ya tsʼe jñani África oriental ʼmi.

Sinʼio kon je ndsʼee nga skoe̱ nga kixi tiʼmitʼalai Jeobá, nga nʼio tíjna kjoamakjainli kʼoa nga tíchókjoajinli je kjoa xi tibitjatojin. Tikjaʼaitsjenjin jmeni xi tso Hebreos 6:10, nga i̱ tso: “Niná tjínle kjoakixi, likui chajinle xáno kao je kjoatjaocha xi tsen tsaʼyanino xi tʼatsʼe jaʼaínle. Koantsen kjoatjaochabe nga kinisinlao je chjotale Cristo, kʼoa nga tojo nisinlao”.

TOSI TONDA TISENKOAI XI NGIKʼA

Je chjota xi kui kotʼayason xi tʼatsʼe chjotajchínga kʼoatso nga tsín nanda tjochʼinle je chjotajchínga kʼianga binyakao xi kjaʼaí, nga tsín nanda jme xi chajinle kʼoa nga tse batio.

Ningalani binyakoaa xíngiaa alikui xi tsonile nga koa̱nxtiya, nga̱ tojé Chjotaxále Niná xi koa̱nle kjoaʼaxin je jée nga̱ kui xosíkaoná nga majchíngañá kʼoa nga mʼeñá (Rom. 5:12).

Nga nda tinixálai Jeobá jokji tjen kʼoamali, nga tibisenkoai xi kjaʼaí nga skoe̱ xi tʼatsʼe Jeobá. Tsjoajin sʼe tokuin kʼoa tosi tondajin kui nikjaʼaitsjenjin nga nda kuijnai nichxin xi nroa. Nʼio chjí be Jeobá nga bʼenelao yaono nga kʼoakji nixálao jokjitjen bichó nganʼiono kʼoa tsjoakeno je ndsʼee.

Je tichjaa Biblia tsakʼéxkiale jngo chjoón nga tsakasenkao

Kʼianga títsoyason je tichjaa xi jejchínga ya jñani nya je carrito, kisitiʼndaa je chjoón xi jaʼa kʼoa kʼoakitsole tsa koa̱n kʼoexkiale textole Biblia. Kui tsakʼéxkiale Jeremías 29:11 jñani kʼoatso nga kui xi mele Jeobá nga ndasʼin kuiyoaa, nga tsínkui xi mele nga kjoa kuiyojiaan. Kʼoa i kitsole: “Jósʼin mele Niná nga kuijnai nichxin xi nroaján”.

Ñaki kinroajen ndáxko̱n je chjoón kʼoa i kitso: “Kui xi mele nga ndasʼin koatejna nichxin xi nroaján. Niná xi katabʼéchjíli nga kʼoatso én kabʼexkianái, nʼio tse kjoa tifaʼatojian kʼoa saʼnda kʼoasʼin tisikjaʼaitsjen nga tosa nda nga sikʼien yaona. Kanrʼoejinna Niná nga kabʼetsʼoale nga̱ kʼoakaxinle nati tanjio nga katabakóna tsa tojo mandosinle xi tʼatsʼan. Nga tiʼmiyanái xi tʼatsʼe Niná ninga tsín ʼyaxkonnái kʼoasʼin tiʼbeña nga mandosin kjoaixile Niná xi tʼatsʼan”.

Nkjín koya tsakakóle tichjaa xi faʼaitʼa ya jw.org xi kui nchja̱ni josʼin basenkaoná je Biblia nga kʼoasʼin nikjaʼaitsjeen nga mená si̱kʼien yaoná. Kitsoyale josʼin ʼmiyaa je Biblia, kʼoati kitsole nga katafi je kjoajtín xi satíoná. Je chjoón ki kjoajtín nga tífe xomana kʼoa jetíkotʼaya ndʼaibi je folleto Koaan nda kuiyoaa ngantsjai nichxin.

Ninga sʼa xtiaa kʼoa ni jejchíngaa koaan kʼoasʼin kʼuínyasoán nga kuiyoʼndá carrito.