A bʼaiʼndeñá nga síndayaná je Jeobá

1, 2. 1) Ánni nga nʼio chjí tsabekonni Niná je Daniel. 2) Jméni xi sʼiaan nga si̱tjosoán tojo kisʼin je Daniel.

KʼIANGA kinikatíonʼio je chjota judío ya Babilonia, tsabee nga ñaki to xkóson bʼétsʼoale je chjota kʼoa nga ánkjele Na̱i bexkón. Tonga tjínkʼa chjota judío xi kixi koan kʼoa xi tsínkui kʼoakisʼin jmeni xi sʼín je chjota xi ya Babilonia tsʼe. Tobʼelañá, je Daniel kao xi ngi jan miyole kixi koan (Daniel 1:6, 8, 12; 3:16-18). Nga ño xti jebi tojé Jeobá tsabexkón. Ningalani nʼio tse nga ya tsakʼejna je Daniel ya Babilonia, jngo ánkje xi kʼoakitsole nga nʼio chjí bekon Niná (Daniel 10:11, 19).

² Nichxin kjoatse je chjota xi tii sínda jngo xjoa bʼéjnaya je niʼnde nga ma sínda. Nichxin xi tiyoaa ndʼaibi, ñá xi chjotale Cristo maa ʼyañá nga tjínle ʼnde je Jeobá nga kʼoasikao ngatsʼi naxinandá josʼin mele nga̱ jé batéxomale ngayeje (tʼexkiai Jeremías 18:6).a Kʼoati tjínle ʼnde je Jeobá nga sindayaná nga jngó jngoá. Tonga tsín bʼénená nga si̱kʼantjaiyaa yaoná. Ñá xi kuixónñá tsa kʼoaiʼndee nga sindayaná. I̱ kjoaʼmiya jebi kui jchaa jósʼiaan nga tosi tonda kʼoaiʼndee nga katasíndayaná je Jeobá. Kui jchaa xi tʼatsʼe jebi: Jméni xi tjínnele sʼiaan nga tsín chʼa̱sjengiaa je kjoafaʼaitsjen xi tsjoáná je Niná kʼoa nga tsín ya koa̱nngósoán joma je niʼnde xi tsín ma mandani je tii. Jméni xi koasenkaoná nga tosi tonda si̱tjosoán kʼoa nga ya koa̱nngósoán je niʼnde xi inda, xi choa ñʼai nikao nga mandani je tii. Jósʼin je xi xijchá ma nga sixákao je Jeobá kʼianga kuitsoyale je xtile.

JMÉ XI SʼIAAN NGA TSÍN KOA̱NTAJA NI̱MA̱NÁ

3. Jméni xosikaoná nga koa̱ntaja ni̱ma̱ná. Jngo choa̱ tʼejnai.

³ Proverbios 4:23 itso: “Je xi ngisasa nda tikuindai jé ni̱ma̱li, nga̱ kui xi tjín jinni̱ma̱ná xi kuitsoni tsa so̱koná kjoabijnachon kʼoa tsa mai”. Je xi sítaja ni̱ma̱ná kui kjoangʼakon, nga bijnyijée kʼoa nga tsín sʼená kjoamakjain (chótsenlai je rekuadro “Jósʼin tsoyanile”). Tsa tsín si̱kuindalee yaoná jebi, kui xosikaoná nga tsín si̱tjosoán kʼoa nga xíjin koaan (Daniel 5:1, 20; Hebreos 3:13, 18, 19). Kʼoakoan jngo chjota xi tsakatéxoma ya Judá xi Uzías tsakʼin (tʼexkiai 2 Crónicas 26:4, 16, 19).b Nga títjon, kisitjoson kʼoa nda tsakʼejna ngixko̱n Niná. Kuinga kitsjoanganʼionile je Jeobá nga tsakatéxoma. Tonga nga jekisʼele nganʼio, ngʼakon koan. Kʼoa jé kjoangʼakon xokisikao nga je tsakakáni xongó ya yo̱ngo̱. Kʼianga kʼoakitsole je naʼmi nga toje xi tjínle ʼnde nga kʼoasʼin, je Uzías nʼio jti koanle. Tonga je Jeobá kjoañʼai kitsjoale kʼoa jtsé tsakajon yaole saʼnda nga kʼien (Proverbios 16:18).

4, 5. Jókoa̱n tsa tsín si̱kuindalee yaoná je kjoangʼakon. Jngo choa̱ tʼejnai.

⁴ Tsa tsín si̱kuindalee yaoná je kjoangʼakon, tochale ngʼa chʼa̱sjee yaoná kʼoa tsín chʼa̱ʼén je kjoafaʼaitsjen xi tsjoáná je Biblia (Proverbios 29:1; Romanos 12:3). Kataʼyala jokoan jngo ndsʼee xi Jim ʼmi xi chjotajchínga sʼin tíjna. Ñandia kʼianga tíjnale kjoajtín kao xi ngikʼa ndsʼee xi kʼoati chjotajchínga sʼin tjío, tsín kisasenle jmeni xi kisʼendajin. Itso: “Kʼoakixinle nga tsín tjíobakó kjoatsjoacha kʼoa tokiña”. Nga jekoanni jaon sá xin jtín ki, tonga tsín tichjotajchínga sʼin tsakʼejnani ya. Nʼio chʼao kisʼe kon nga tsín nda kitjo jmeni xi kiskoyale kʼoa kʼoasʼin kisikjaʼaitsjen nga kʼoatjín jmeni xi kitso je. Kʼoa te nó nga tsín tikitsoyasonni kʼoa tsín tikini kjoajtín. Ndʼaibi kʼoatso nga ngʼakon koan kʼoa nga saʼnda je Jeobá tsakánele jmeni xi koan. Nkjín nó kisíxatʼa je ndsʼee tonga tsín koanmele nga tsakʼainganʼiole.

⁵ Je Jim kʼoatso nga tokui kisikjaʼaitsjen ʼndeʼnde nga chʼao kisʼin xi ngikʼa. Jméni xi tsoyaná choa̱ jebi. Kui tsoyaná nga je kjoangʼakon xosíkaoná nga tojme xi chʼangiñá yaoná kʼianga chʼao nʼia. Tsa ngʼakon koaan likuijin tiya koa̱nngósonñá je niʼnde xi inda, xi ngotjo mandani tii (Jeremías 17:9). Jókinʼia tsa tsín kisasenná jme xi kitsoná jngo ndsʼee kʼoa tsa kitjoʼaná je xá xi tjínná ya jinjtín. A ngʼakon koan axo koanjinná nga kui xi ngisa chjíle nga nyʼán sʼin biyoaa kao ndsʼee kʼoa nga kixi mangíntʼalee je Jeobá (tʼexkiai Salmo 119:165;c Efesios 4:32d).

6. Jméni xi koa̱n kʼiatsa kui xi chʼaotjín kʼoatinʼia.

⁶ Tsakui xi chʼaotjín kʼoatinʼia kʼoa totibʼeʼmaa, tochale alikui chʼa̱ʼén kʼianga kʼoainá kjoafaʼaitsjen. Tsa kʼoasʼiaan tosi tondajin kuijnyíjée. Jngo ndsʼee xi kʼoatso nga chanxó tsín tijokoannile kjoafaʼaitsjenle nga tosi tonda kui xi chʼaotjín kʼoakisʼin (Eclesiastés 8:11). Kʼoa ijngo ndsʼee xi pornografía kiskotsenle kʼoatso nga chan tsín ndasʼin kisikʼaxki̱ je xi chjotajchínga sʼin tjío. Tsín tindasʼin tsakʼejnani xi kao Jeobá. Kʼianga tsaʼyale jmeni xi tísʼín ndsʼee jebi, tsakʼaʼén jokitsole je xi chjotajchínga sʼin tjío. Sakʼoaa saténgiaa nga̱ chjotajée maa. Tonga chanjin koa̱ntaja ni̱ma̱ná tsa tsín ndasʼin si̱kʼaxkiaa je xi tsjoáná kjoafaʼaitsjen kʼoa tojme xi kuise̱nngiñá yaoná tsa chʼao tinʼia, ʼndele nga si̱jélee je Niná nga katasíchatʼaná kʼoa katabasenkaoná.

7, 8. 1) Jósʼin bakóná je choa̱le chjota israelita nga koa̱ntaja ni̱ma̱ná tsa tsín sʼe̱ná kjoamakjain. 2) Jméni xi bakóyaná jokoan je chjota israelita.

⁷ Kʼianga kitjoni je chjota israelita ya Egipto, tsabee nga nʼio nkjín kjoaxkón tsakatío je Jeobá. Ninga kʼoalani, kʼianga jeya kichochrian ya ʼNde jña tsakʼinle nga kʼoaile, taja kisʼin ni̱ma̱le. Kui kʼoakoanni nga tsín kisʼele kjoamakjain. ʼNdele nga Niná sinʼiotʼa tosa tokitsokjon kʼoa kisikʼaxki je Moisés. Saʼnda kʼoakitso nga tosa ya koai ijngokʼani ya Egipto, jñani nga choʼnda koan. Je Jeobá nʼio aon koanle nga kʼoakisʼin je chjota israelita kʼoa i kitso: “Kʼiá saʼndani nga tsín skoe̱xkónna naxinandá jebi” (Números 14:1-4, 11; Salmo 78:40, 41). Je chjota israelita yaa kʼien ya ʼndekixí nga kitsjoaʼnde nga koantaja ni̱ma̱le kʼoa tsín kisʼele kjoamakjain.

⁸ Jméni xi bakóyaná jebi. Ndʼaibi jenʼio chrian tiyolee je sonʼnde chjotse kʼoa kʼoati tíchotʼayakao je kjoamakjainná. Nʼio machjén nga taja katasʼejna kjoamakjainná. Si̱kjaʼaitsjeen jmeni xi kitso je Jesús ya Mateo 6:33 kʼoa chjónangilee yaoná jebi. “Jmeni xi mena kuichotjenngia kʼoa jme xi sʼian, a bakó nga makjainna jmeni xi kitso je Jesús. A sichaña je kjoajtínná kʼoa a tsín tikjuíxinyasonña tojoni nga nʼio tse tao̱n kuinje̱na. Jméni xi sʼian tsa nʼio tse nganʼio kʼoa nʼio tse nichxin faʼáxinna je xána. A tsjoaʼndeña nga kʼoati sʼian josʼín chjota xi tjín sonʼnde kʼoa tsa saʼnda tsín tikʼoakoa̱nnina nga je Jeobá sixále”.

9. 1) Ánni nga chótʼasíñá josʼin tíjna kjoamakjainná. 2) Jósʼin chótʼaa kjoamakjainná.

⁹ A nitjosonñá ngantsjai jmeni xi tso je Biblia tʼatsʼe nga tsín je si̱miyoaa chjota xi tsín nda sʼín, jotso tʼatsʼe xi bichonsjejin naxinandále Niná kʼoa tʼatsʼe kjoasʼetsaojin. Tsa tsín kʼoanʼia kui xosikaoná nga koa̱ntaja ni̱ma̱ná. Tsa kʼoakoaan, machjén nga kjuintjenngiaa kjoafaʼaitsjen jebi: “Chótʼao yaono nga tijonnio, tsa nda tiyokao xi makjainno” (2 Corintios 13:5). Jósʼin chótʼaa kjoamakjainná. Kʼianí nga kjitʼa si̱kjaʼaitsjenjiaan jñani nda tinʼia kʼoa jñani chʼao tinʼia kʼoa kui Biblia si̱chjén nga si̱ndayaa yaoná.

TOSI TONDA KʼOAIʼNDEE NGA KATASÍNDAYANÁ JE JEOBÁ

10. Jméni xi koasenkaoná nga tosi tonda sindayaná je Jeobá.

¹⁰ Nga tíbasenkaoná je Jeobá nga kjimandayaa kui tísíchjén je Biblia, je jtín kao nga ʼmiyasoán. Kʼianga nyaon nyaon kʼoéxkiaa je Biblia kʼoa si̱kjaʼaitsjenjiaan jmeni xi kʼoéxkiaa kʼoati koasenkaoná nga koa̱n sindayaná je Jeobá. Kuinga kʼoakitsonile je xi rey sʼin tsakatio ya naxinandá Israel nga jngo copia katakji xi tsʼe kjoatéxoma kʼoa nga nyaon nyaon katabʼéxkia (Deuteronomio 17:18, 19). Je pastrole Jesús koanjinle nga nʼio chjíle nga tsakʼéxkia kʼoa nga kisikjaʼaitsjenjin jmeni xi tso je Énle Niná nga koan kitsoyason. Kuinga nʼio nkjín kʼa kisikʼaxki̱ni je testo xi faʼaitʼa ya Escrituras Hebreas kʼianga kiski je Escrituras Griegas. Kʼoa kʼianga kitsoyason, kʼoakitsole je chjota nga katabʼéxkia je Énle Niná (Hechos 17:11). Ñá, kʼoati ʼyaa nga nʼio chjíle nga nyaon nyaon kʼoéxkiaa je Biblia kʼoa nga si̱kjaʼaitsjenjiaan jmeni xi tso (1 Timoteo 4:15). Tsa kʼoasʼiaan, kui xi koasenkaoná nga tosi tonda nangitokon koaan kʼoa nga tosi tonda sindayaná je Jeobá.

11, 12. Jósʼin síchjén je Jeobá je jtín nga síndayaná nga jngó jngoá. Jngo choa̱ tʼejnai.

¹¹ Je Jeobá be jmeni xi machjénná nga jngó jngoá kʼoa jé jtínle Cristo síchjén kʼianga síndayaná. Je Jim, xi kanikʼaxkiaa ya párrafo xi mani ño, kʼiaa kisikʼantjaiya josʼin síkjaʼaitsjen kʼianga jngo xi chjotajchínga sʼin tíjna koanndosinle xi tʼatsʼe. Je Jim itso: “Alikui kʼoakitso tsa an tjínna jée jmeni xi koan. Tosa kitsjoanganʼiona kʼoa kʼoakitsona nga koasenkaona”. Nga jekoanni jan sá, je ndsʼee xi chjotajchínga sʼin tíjna xi kitsjoanganʼiole kʼoakitsole nga katafi je kjoajtín. Je Jim kʼoatso nga nʼio ndasʼin kiskoeya je ndsʼee. Nga tsakakóle kjoatsjoacha je ndsʼee kui xi tsakasenkao nga kisikʼantjaiya josʼin kisikjaʼaitsjen. Koanjinle nga tsín tsakui jotjín kon xi ngisa chjíle. Je ndsʼee xi chjotajchínga sʼin tjío kao je chjoónle Jim kitsjoanganʼiole kʼoa chan kisixá ijngokʼanile Jeobá. Xi kʼoati tsakasenkao kuinga tsakʼéxkia je artículo xi “Jehová no tiene la culpa” ʼmi kao xi “Sirva a Jehová lealmente” ʼmi, xi jaʼaitʼa ya rebista La Atalaya xi tsʼe 15 de noviembre de 1992.

¹² Nga jeki nichxin, je Jim chjotajchínga sʼin tsakʼejna ijngokʼa. Saʼnda nga kʼia tíbasenkao xi kjaʼaí ndsʼee xi kʼoati kui kjoa tjíosʼele kʼoa tíbasenkao nga tjíosítaja je kjoamakjainle. Kʼoatso nga kʼoasʼin kisikjaʼaitsjen nga miyole Niná ma, tonga kʼoatso nga tsínni miyole koan nga kʼoakisʼin. Kʼoatso nga kʼoamanile nga ngʼakon koan kʼoa nga kui ngisa kiskotsenle josʼín xi ngikʼa kʼoa nga tsínkui kuenta kisʼin xi ngisa nʼio chjíle (1 Corintios 10:12).

13. 1) Jósʼin basenkaoná nga ʼmiyasoán. 2) ʼYáni xi binyakao kʼianga ʼmiyasoán.

¹³ Kʼianga ʼmiyasoán kʼoati basenkaoná nga nindayaa yaoná kʼoa nga ngisa nda nʼia. Ánni. Kuinga kʼianga ʼmiyasoán tjínnele koakoá kjoanangitokon kʼoa kʼoakoa̱nkjoaan josʼin mele Niná (Gálatas 5:22, 23). Koaan si̱kjaʼaitsjeen josʼin tíbasenkaoná kʼianga ʼmiyasoán. Tsa chjénngilee jokisʼin je Jesús nga kitsoyason, ndajin kjuinrʼoéná je chjota kʼianga kʼuínyasoán kʼoa tsakui nichxin sikʼantjaiya josʼin síkjaʼaitsjen xi tʼatsaan. Jngola choa̱ kataʼyaa. Ya Australia, jao testigole Jeobá xi jngo chjoón tsakjákaonajmíni je Énle Niná ya ndʼiale. Tonga je chjoón nʼio koanjtile kʼoa tokinchja̱ti. Ninga kʼoalani kao kjoaxkóntokon kinrʼoé je ndsʼee jmeni xi kitso je chjoón. Xijekoanni, je chjoón kʼoakoannile nga kʼoakisʼin kʼoa jngo karta kiski xi kisikasén ya sucursal xi tsʼe testigole Jeobá nga kisijé kjoanichatʼa. I kitso: “To chjotachini koanña nga tsín kinrʼoele je chjota xi Énle Niná kichokjákaonina kʼoa nga tokoanjtina”. Jebi kui tsoyaná nga nʼio chjíle nga ndʼé si̱koaa je chjota kʼianga ʼmiyasoán. Tojosʼin jekaʼyaa, kʼianga ʼmiyasoán binyakao je chjota kʼoa kʼoati binyakaoná tsanda ñá nga̱ basenkaoná nga nindayaa yaoná jokjoaan.

JE XI XIJCHÁ MA TJÍNNELE SIXÁKAO JE JEOBÁ KʼIANGA KUITSOYALE JE XTILE

14. Jméni xi sʼin je xi xijchá ma tsa mele nga nda sʼin je xtiʼndíle.

¹⁴ Me tongatsʼi xtiʼndí nga nangitokon kʼoa nga nrʼoé jmeni xi ʼmiyale (Mateo 18:1-4). Kuinga tjínnenile je xi xijchá ma nga kuitsoyale je xtiʼndíle xi tʼatsʼe Niná kʼoa nga tsjoake katama je Énle Niná nga sʼasa ʼndí kjoan (2 Timoteo 3:14, 15). Tsa mele xi xijchá ma nga nda sʼin je xtiʼndíle, jé kjoanla títjon tsjoake katama je Énle Niná kʼoa katasítjoson jmeni xi tso je Biblia. Tsa kʼoasʼin, ngisaa choa ñʼai koa̱nle je xtiʼndíle nga tsjoake koa̱n je Énle Niná kʼoa kʼianga kuichákjáyale skoe̱ní nga kuinga kʼoatínikaoni nga tsjoacha.

15, 16. Jósʼin je xi xijchá ma nga sínʼiotʼa je Jeobá kʼiatsa tile kʼoa tsa tsotile kuichonsjejin naxinandále Niná.

¹⁵ Ninga tsoyale ʼndíxtile je xi xijchá ma, tjínkʼa xti xi síkjinnile je Jeobá nga jemani kʼoa tsa maije̱ bichonsjejin ya naxinandále Niná. Kʼoa nʼio tse kjoaʼaon batiojin je xi xijchá ma. Ya Sudáfrica, jngo tichjaa xi i̱ kitso: “Kʼianga tsakichonsjejin je ndsʼe, joxi kʼien koanna, nʼio aon koanna”. Tonga je tichjaa kʼoa kao xijchále kisitjoson jmeni xi tso je Biblia (tʼexkiai 1 Corintios 5:11, 13).e Je xijchá jebi koanchoyale nga ngisa chjíle nga kui kjoafaʼaitsjen xi tsjoá Niná sitjoson. Be nga kuinga batekjáyaniná je Jeobá nga tsjoakená. Kuinga tokʼiakjoan tsakjákaoni je tile kʼianga nʼio jtín xá.

¹⁶ Nga kʼoakisʼin je xijchále, jókisʼe kon je tile. Xijekoanni i kitso: “Koanjinna nga tsín jtikena je xijchána. Tokui kisitjoson jmeni xi tso je Jeobá kao naxinandále”. Kʼoa kʼianga koanchoyale ti jebi nga tojé Jeobá xi koa̱nle koasenkao kʼoa sijéle kjoanichatʼa, koanjinle nga nʼio machjénle nga sichriantʼale je Jeobá. Kʼianga kisixá ijngokʼanile je Jeobá ti jebi, nʼio tsjoa kisatio kon je familiale. Tsín jao tjínná nga je xi ngisa nda kʼoa xi ngisa tsjoa koaya tokoán kuinga si̱tjosonlee ngantsjai je Jeobá (Proverbios 3:5, 6; 28:26).

17. 1) Ánni kui kʼoasʼiansíñá ngantsjai josʼin mele je Jeobá. 2) Jósʼin koasenkaoná tsa kʼoasʼiaan.

¹⁷ Je profeta Isaías kʼoakitso nga je chjota judío xi ya tjío ya Babilonia kʼoakoa̱nnile jéele kʼoa i kuitso: “Ji Jeobá, jiní Nʼainajin. Kʼoa jinjin niʼndeníjin, kʼoa jiní xi nindanáijin josʼín jngo xi tii sínda; ji kinindanáijin ngatsʼijin. Alikuijin bʼejinkuin ngantsjai nichxin je jéenajin. Chótsennáijin, nga̱ ngatsʼijin naxinandáli maijin” (Isaías 64:8, 9). Tsa nangitokon koaan ngantsjai, tsa si̱tjosonlee je Jeobá kʼoa kui kʼoasʼiaan ngantsjai josʼin mele, nʼio chjí skoe̱konná josʼin chjí tsabekon je Daniel. Je Jeobá tosi tonda sindayaná kao je Biblia, nganʼiotsjele kʼoa kao naxinandále ánni nga “ʼndíle Niná” koa̱nsíñá nichxin xi nroaján (Romanos 8:21).