A ʼyaní

Nichxin kjoatse, a kjoaixi nga jñá xi tsín nda tsakʼéntjejin chjota je tsojmintjele xi kjaʼaí

YA Mateo 13:24-26, je Jesús i kitso: “Je kjoatéxomale ngʼajmi ya mangóson chjota xi nda na̱xi̱n bʼéntjeson nangile. Tonga kʼia nga kjiofe chjota, jaʼai xi kontrale, kʼoa jñá xi tsínkui nda tsakʼéntjejin trigo, kʼia kitʼaxinni. Kʼia nga je trigo kitsjoa xka̱ntsja, kisʼele to, kʼoa kʼia koantsen je jñá xi tsín nda”. Tjínkʼa chjota xi kʼoatso nga tochoa̱ xi tsakʼéjna je Jesús nga tsín ñaki kʼoakisʼin kjoaixi chjota nga kui nichxin. Tonga je xo̱n jña faʼaitʼa kjoatéxoma xi kisʼele chjota romano nichxin kjoatse kʼoatso nga sakʼoa kʼoakisʼin je chjota.

Jngo diccionario xi tʼatsʼe Biblia nchja̱ni, kʼoatso nga je kjoatéxoma xi kisʼele chjota romano kʼoatso nga majéele tsa ʼyani xi tsín nda jñá bʼéntjejin tsojmintjele xi kjaʼaí. Tsa kisʼe jngo kjoatéxoma xi kui tínchja̱ni, kuijin xi tsonile nga kʼoakoan kjoaixi. Jngo chjota xi tʼatsʼe kjoatéxoma kotʼayason xi Alastair Kerr ʼmi kʼoatso nga kʼianga nó 533 je chjota xi tsakatéxoma ya Roma xi Justiniano tsakʼin, jngo xo̱n tsakʼasje xi Digesto ʼmi. Xo̱n jebi kui faʼaitʼa kjoatéxoma xi kisʼe ya Roma kao jmeni xi kitso je chjota xi tʼatsʼe kjoatéxoma kiskotʼayason nga nó 100 kao nó 250. Je xo̱n xi Digesto ʼmi síkʼaxki je chjotachjine xi Ulpiano tsakʼin. Chjota jebi kui kisikʼaxki̱ nga jngo chjota kui jñá xi tsín nda tsakʼéntjejin tsojmintjele xi kjaʼaí chjota kʼoa kisikitsón je tsojmintjele. Kʼoati síkʼaxki̱ nga je chjota xi kʼoakisʼin tjínnele tsakʼéchjíle je chjota xi kicha tsojmintjele.

Tojosʼin tiʼyaa, kʼoakoan jñani tsakatéxoma naxinandá Roma nichxin kjoatse. Kui xi bakó nga tsakui nichxin ñaki kʼoakoan jmeni xi kitso je Jesús.