Je chjinexki kʼoatso jokji síkiʼaon xi sʼa xti je redes sociales | Jótso je Biblia

Nga 23 sá mayo nó 2023 jngo chjinexki xi ya tíjna Estados Unidos kʼoakitso nga nʼio síkiʼaon xi sʼa xti je redes sociales.

• “Kjoaixi nga machjén sakʼoale je xtiʼndí kʼoa kao xi sʼa xti je redes sociales, tonga nga síkʼatone choa̱le jokji nga síchjén nʼio síkiʼaon kjoafaʼaitsjenle kʼoa likui tinda satíoni kon” (Social Media and Youth Mental Health: The U.S. Surgeon General’s Advisory, 2023).

Je chjinexki jebi kitsoya josʼin síkiʼaon xi sʼa xti je redes sociales.

• Je xti xi 12 saʼnda 15 nóle “xi tsʼato jan hora kotsenle redes sociales nga nyaon nyaon ngisaa miʼaon kjoafaʼaitsjenle, tobʼelañá tjínkʼa xi nʼio ba satío kon kʼoa xi ansiedad tsaotʼale”.

• Je xti xi 14 nóle ”‏xi nʼio síchjén je redes sociales alikui tinda sʼefeni, tjín xi totaon ʼya ya redes sociales, kʼoa kʼoasʼin síkjaʼaitsjen nga tsín jme chjíle, ba satío kon kʼoa ngisaa kʼoasatío kon je xi xtiyánchjín tikʼoajinni je xtixʼin”.

Jósʼin koa̱n kuinyakao je xtile xi xijchá ma. Ya Biblia nkjín kjoafaʼaitsjen tsjoá xi kuinyakao.

Jme xi koa̱n sʼin xi xijchá ma

Ali tobʼejngojin tokuin. Jon xi xijchá mao kuenta tʼiaon josʼin bichómani nga redes sociales síchjén je xti kʼoa koaan kʼoakʼuínlao tsa koa̱n sichjén kʼoa tsa mai.

• Kjoafaʼaitsjen xi tsjoá Biblia: “Tjenlai ndiaa je ti josʼin koaikao yaole” (Proverbios 22:6).

• Tsa mesali jchai tʼatsʼe jebi, tʼexkiai jñani tso “¿Deberían mis hijos usar redes sociales?”.

Tsa kʼoaiʼndelai je ʼndíxtili nga redes sociales skótsenle kuenta tʼain jme xi kotsenle ya Internet. Jmé xi koa̱n sʼiain.

Kuenta tʼiain jme xi kotsenle je xtili. Kʼoatʼinlai jmeni xi tsín koa̱n kʼoasʼin ya redes sociales kʼoa jmeni xi sikiʼaon.

• Kjoafaʼaitsjen xi tsjoá Biblia: “Ali nikʼaxki̱jinjion xíngio niʼi̱tséjin kjoachajngi, ni ngayije xi nʼio chʼao tjín [...]. Ni jejin éntsʼen nokjoao, ni énchi̱kónjin, ni énntsjénʼajin” (Efesios 5:3, 4).

• Koa̱nsjaisali kjoafaʼaitsjen jñani tso “Enséñele a su hijo adolescente a usar con seguridad las redes sociales”.

To nichxin tʼejnalai. Kʼoatʼinlai je xtili kʼiáni koa̱n si̱chjén je redes sociales kʼoa jókji tse nga koa̱n si̱chjén.

• Kjoafaʼaitsjen xi tsjoá Biblia: “Chótsaon, tsokʼoa, nga kixi timao, ali joni chjota xi tsínle kjoafaʼaitsjenjin, tonga joni chjota xi tjínle kjoafaʼaitsjen. Ali nichxinjin nichalao yaono” (Efesios 5:15, 16).

• Chótsenlai kao je ʼndíxtili je video “Dibujo xi síkjan” Chósonnilai josʼin tichjain je redes sociales ánni nga koa̱njinnile nga xkón tíjna tsakui nʼio tsjéntʼale.