“Tʼainái jngo ni̱ma̱ xi tsín jao katasʼele ánni nga tsokjonke̱síña jaʼaínli”

1. Jósʼin tíjna nga nokjonchá je Niná, kʼoa nga tsjoachaa je Jeobá ánni machjénsíni nga kuijkónchaa.

ÑÁ XI chjotale Cristo maa, tsjoachañá je Niná kʼoa nokjonchañá. Jmé xi tsoyanile nga nokjonchá Niná. Kui xi tsonile nga ñaki ni̱ma̱ná nroajinni nga bakolee kjoaxkóntokon. Kʼoa kui xosíkaoná nga tsínkui kʼoanʼiañá jmeni xi tsín sasénle nga̱ chjí ʼyatokoán nga miyoná mani (Sal. 111:10; Prov. 8:13). Kataʼyala josʼin tíjna nga nokjonchá je Niná.

2. Jñánile nga jao koya xi faʼaitʼa Salmo 86:11 chótʼayajiaan i̱ kjoaʼmiya jebi.

² (Tʼexkiai Salmo 86:11).b Kʼianga nikjaʼaitsjenjiaan jmeni xi tso texto jebi ʼyañá nga koanjinle je rey David jokji chjíle nga nokjonchá je Niná. Kataʼyala jósʼin koa̱n si̱tjosoán je kjoafaʼaitsjen xi kiski je rey David. Xi títjon, kui jchaa ánni tjínnenile nga jchaxkoán je jaʼaínle Niná. Kʼoati jchaa josʼin koakolee kjoaxkóntokon je jaʼaínle Niná nga nyaon nyaon.

ÁNNI TJÍNNENILE NGA JCHAXKOÁN JE JAʼAÍNLE JEOBÁ

3. Jméni xi tsakui nichxin tsakasenkao je Moisés nga ntsjaintsjai tsabexkónni je jaʼaínle Niná.

³ Si̱kjaʼaitsjenla jokisʼe kon Moisés nga tsabe je kjoajeyale Jeobá ya nindo Horeb. Je libro Perspicacia para comprender las Escrituras kʼoatso nga tsakui nichxin toje Moisés xi kui sén tsabe nga kjesa faʼaijin je Jesús i̱ Sonʼnde. Je Jeobá jngoo ánkje kisichjén nga i̱ kitsole je Moisés: “Jeobá, Jeobá, jngoo Niná xi tjínle kjoamatokon kʼoa xi mamake chjota, likui tokjoan síjtile yaole kʼoa nʼio tjínle xi ñaki kjoatsjoacha kʼoa kao xi ñaki kʼoatjín, kʼoa jmi mani xi bakóle je kjoatsjoacha, síchatʼa jñani tsín kʼoanʼia, jñani saténgiaa kʼoa jñani bijnyijée” (Éx. 33:17-23; 34:5-7). Kʼianga kisichjén Moisés je jaʼaínle Jeobá jaʼaitsjenjinle je sén xi tsabe. Kuijin kʼoakitsonile je naxinandá Israel nga koanskanni nga katatsokjónke je jaʼaínle Niná nga̱ nʼio jeya tíjna (Deut. 28:58).

4. Jméni xi koa̱n sʼiaan nga ngisasa koakolee kjoaxkóntokon je Jeobá.

⁴ Kʼianga nikjaʼaitsjeen je jaʼaínle Jeobá machjén nga kʼoati si̱kjaʼaitsjenjiaan jokjoan. Si̱kjaʼaitsjeen nga tjínle nganʼio, kjoachjine, kjoatéxomakixi kao kjoatsjoacha. Kʼianga si̱kjaʼaitsjenjiaan jokjoan Jeobá kui xi koasenkaoná nga ngisasa koakolee kjoaxkóntokon (Sal. 77:11-15).

5, 6. 1) Jósʼin tsoyanile je jaʼaínle Niná. 2) Tojo tso Éxodo 3:13, 14 kao Isaías 64:8, jósʼín je Jeobá nga bitjoson jmeni xi tjínndajinle.

⁵ A ʼyañá josʼin tsoyanile je jaʼaínle Niná. Nkjín chjota xi tʼatsʼe Biblia kotʼayason xi kʼoatso nga “jé xosʼín nga kʼoama” sʼin tsoyanile jaʼaínle Niná. Jebi kui xi tsonile nga tsín jme xi kʼoechjoale Jeobá nga sitjoson jmeni xi tjínndajinle kʼoa jé xosʼin nga kʼoakoa̱n. Jméni xi sʼín je Jeobá.

⁶ Je Jeobá kʼoasʼin tojmeni nga kuitjoson jme xi tjínndajinle (tʼexkiai Éxodo 3:13, 14).c Je xo̱n xi bʼasje naxinandále Jeobá kjitʼaa kʼoatsoná nga si̱kjaʼaitsjenjiaan jokjoan je Jeobá. Xi ijngosani, je Jeobá koaanle sichjén je choʼndale nga je sixále kʼoa nga kuitjoson jmeni xi tjínndajinle (tʼexkiai Isaías 64:8).d Jé Jeobá xosʼín nga bitjoson jmeni xi mele. Tsín jme xi kʼoechjoale nga kʼoasʼin (Is. 46:10, 11).

7. Jmé xi koasenkaoná nga ngisa kʼoailee kjoanda kʼoa nga ngisa koakolee kjoaxkóntokon je Nʼainá xi tíjna ngʼajmi.

⁷ Kʼianga si̱kjaʼaitsjenjiaan jmeni xi sʼín je Nʼainá xi tíjna ngʼajmi kʼoa josʼin basenkaoná, ngisaa kʼoailee kjoanda kʼoa ngisaa koakolee kjoaxkóntokon. Tobʼelañá, tokʼoamaná nga nikjaʼaitsjenjiaan jmeni xi kisinda (Sal. 8:3, 4). Kʼoa nga nikjaʼaitsjenjiaan josʼin basenkaoná nga bitjosonná josʼin mele, bakolee kjoaxkóntokon. Nʼio ngʼa tíjna je jaʼaínle Jeobá, nga̱ kui tsoyanile jokjoan, jmeni xi jekʼoakisʼin kʼoa jmeni xi sʼa kʼoasʼin (Sal. 89:7, 8).

“KUINCHJAÑA JE JAʼAÍNLE JEOBÁ”

8. Tojo tso Deuteronomio 32:2, 3, jmé xi mele je Jeobá xi kao jaʼaínle.

⁸ Kʼianga tojeme kjoaʼasʼen je chjota israelita ya ʼNde jña tsakʼinle nga kʼoaile, je Jeobá jngoo kjoajnda kitsoyale je Moisés kʼoa kʼoakitsole nga kʼoati katatsoyale je naxinandá (Deut. 31:19). Kʼianga nikjaʼaitsjenjiaan jmeni xi tso kjoajnda jebi, majinná nga tsín mele Jeobá nga sʼe̱ʼma je jaʼaínle kʼoa tsín mele nga kʼoasʼin si̱kjaʼaitsjeen nga nʼio xkón tíjna kʼoa nga tsín koa̱n si̱kʼaxkiaa (tʼexkiai Deuteronomio 32:2, 3).e Kui xi mele nga katabe ngatsʼi chjota. Tsee kjoanda kisʼele je chjota israelita nga kitsoyale je Moisés tʼatsʼe Jeobá kao jaʼaínle. Jmeni xi tsakʼinyale tsakinyakao nga nda kisatio kon kʼoa kisinʼiojin, tojo ma nga bʼanele jtsí je jñá. Jmé xi koa̱n sʼiaan nga kʼoatisʼin katabichómani kʼianga koakoyaa.

9. Jósʼin bʼainganʼioá nga katabitjotsje je jaʼaínle Jeobá.

⁹ Kʼianga kʼuínyasoán nga xki̱ ndʼia xki̱ ndʼia kʼoa tsa ya jña nʼio tjín chjota, si̱chjén je Biblia nga kʼuínyalee chjota je jaʼaínle Niná. Koaan kui si̱chjén je xo̱n xi Énle Niná yʼangini, video kao je página xi tíjnaná ya Internet, ngayeje jebi jé Jeobá bʼasjengʼa. Koaan chja̱kaonajmíñá je chjota tʼatsʼe jokjoan Niná ya tʼaxáná, ya ndʼiaskuela kʼoa tsa tjín jña timangián. Kui chja̱kaonajmíñá jmeni xi tjínndajinle Niná xi kao ñá kʼoa xi kao Sonʼnde. Kʼianga kjuinrʼoé je chjota tʼatsʼe jebi, tsakui nichxin tokʼia skoe̱ títjon nga nʼio tsjoakená je Jeobá. Kʼianga ñandia ñandia bakoyaa jokjoantjínni tʼatsʼe Jeobá, bʼainganʼioñá nga katabitjotsje je jaʼaínle kʼoa bʼejnatsenñá je énndiso xi sakóya xi tʼatsʼe. Nda satío kon je chjota kʼianga nrʼoé jmeni xi tso je Biblia (Is. 65:13, 14).

10. Kʼianga ʼmiyalee Biblia je chjota, ánni nga tsín tokui kjoatéxomale Niná kʼuínyanilee.

¹⁰ Kʼianga ʼmiyalee Biblia je chjota, kui xi mená nga kuinyakoaa nga katabe je jaʼaínle Jeobá kʼoa nga katasíchjén. Kʼoati kui xi mená nga nda katabe jokjoan je Niná. Tsakui nichxin likui koa̱njinle je xi Biblia tiʼmiyalee tsa tokui kʼuínyalee je kjoatéxoma xi faʼaitʼa Biblia, jmeni xi tso je Niná kʼoa josʼin kjuinkoaa yaoná. Jngo chjota xi Biblia tíkotʼaya tsakui nichxin koa̱njinle jotso je kjoatéxomale Niná kʼoa tsa kʼoakuitso nga nʼio ndatjín. Tonga, a kuinga tsjoake je Jeobá nga sitjosonnile. Si̱kjaʼaitsjeen jokoan je Eva, ningalani tsabe je kjoatéxomale Niná, alikui ñaki tsjoake koan je Jeobá. Kʼoati kisʼin je Adán (Gén. 3:1-6). Kuinga tsín koa̱n tokui kʼuínyanilee chjota je kjoatéxomale Niná.

11. Kʼianga kʼuínyalee chjota je kjoatéxomale Niná, jósʼin kuinyakoaa nga tsjoake katama Niná.

¹¹ Tsjoa satío tokoán nga mangíntjenngiaa je kjoatéxomale Niná kʼoa basenkaoná (Sal. 119:97, 111, 112). Tonga je chjota xi tiʼmiyalee Biblia alikuijin kʼoasʼin sikjaʼaitsjen tsa tsín koa̱njinle nga kuinga tsjoakená Jeobá nga kjoatéxoma tsjoániná. Koaan chjónangilee jebi: “Jósingái ji, ánni nga kui síjéniná Niná nga kʼoasʼiaan jebi, kʼoa ánni nga kui síjéniná nga tsínkui kʼoasʼiaan jebi. Jmé xi bakóyali jebi tʼatsʼe Niná”. Tsa kuisenkoaa je xi tiʼmiyalee Biblia nga katasíkjaʼaitsjen tʼatsʼe Jeobá kʼoa nga tsjoake katama kjoaixi je jaʼaínle, kuichokajin ni̱ma̱le jme xi tso Énle Niná. Kʼoa kui xosikao nga tsjoake koa̱n je Jeobá kao kjoatéxomale (Sal. 119:68). Ngisaa nʼio sʼe̱jna kjoamakjainle kʼoa chókjoajinle ninga tse kjoa kjoaʼatojin (1 Cor. 3:12-15).

“JE JAʼAÍNLE JEOBÁ NINÁNÁ KUITSOMAKOAA”

12. 1) Jméni xokisikao je David nga jao kisʼeni ni̱ma̱le. 2) Jósʼin kichomani nga jao kisʼe ni̱ma̱le.

¹² Jé Jeobá xi kʼoasʼin koanmele nga kui kiski je rey David jmeni xi tso Salmo 86:11. Kʼoati nʼio tjínle kjoandosin nga “tʼainái jngo ni̱ma̱ xi tsín jao katasʼele” tso. Jokjitse tsakʼejnakon je rey David tsabee nga ngotjo koa̱n jao sʼe̱ni ni̱ma̱ná. Ñandia nga ya tsoʼba sonndʼiale, tsabee nga tíbangoya jngo chjoón xi jexʼin tjínle xi Bat-Seba ʼmi. Jótjín ni̱ma̱le David nga kui nichxin. A tjínjngoo ni̱ma̱le axo jao kisʼe. Je David nda tsabe nga i̱ tso je kjoatéxomale Jeobá: “Ali jejin chjoónle xíngi nimetokuin” (Éx. 20:17). Tonga tosi tonda kiskotsenle nga tíbangoya je chjoón, kuinga jao kisʼeni ni̱ma̱le. Kisimekon chjoón jebi ya jinni̱ma̱le tonga kʼoati koanmele nga ndasʼin tsakʼejna ngixko̱n Jeobá. Ninga tsjoake koan je Jeobá kʼoa ninga kitsokjonke tsakai, tokui kini jmeni xi kisimekon. Tsee kjoa kichomani nga kʼoakisʼin. Kisijndí je jaʼaínle Jeobá kʼoa kisikiʼaon je familiale kao chjota xi tsín jme jée tjínle (2 Sam. 11:1-5, 14-17; 12:7-12).

13. Jósʼin ʼyañá nga kjijngo kisʼe ijngokʼa je ni̱ma̱le David.

¹³ Je Jeobá tsakatekjáyale je David kʼoa ndasʼin tsakʼejna ijngokʼani ngixko̱n (2 Sam. 12:13; Sal. 51:2-4, 17). Tsínjin kichajinle josʼin kichomani jmeni xi kisʼin kao je kjoañʼai xi tsakʼejnajin nga kitsjoaʼnde nga jao kisʼe ni̱ma̱le. Je Jeobá kinrʼoé kʼianga tsakʼétsʼoale je David, nga̱ je Biblia kʼoatso nga tsín tijao kisʼeni ni̱ma̱le nga kisixále je Jeobá Ninále (1 Rey. 11:4; 15:3).

14. Jméni xi machjén nga si̱kjaʼaitsjenjiaan, kʼoa ánni.

¹⁴ Basenkaoná je choa̱le David, tonga kʼoati bakóyaná josʼin bichómani nga tsín nda nʼia. Kuenta sʼiaan josʼin kichomani nga tse jée tsakajngi. Ni jekjoatse kʼoa ni chriansʼa tinixálee Jeobá, machjén nga si̱kjaʼaitsjenjiaan jebi: “A tibʼenele yaona nga tsínkui katasíkinjena jmeni xi batíobasen je Na̱i nga mele jao sʼe̱ ni̱ma̱na”.

15. Jósʼin basenkaoná nga nokjonchá Niná kʼiatsa kui jchaa je sén xi kjoajndí ska̱niya jkoaa.

¹⁵ Tobʼelañá, jmé xi nʼia kʼiatsa jngo sén ʼyaa kʼoa tsa jngo película tichotsenlee ya televisión kʼoa tsa ya Internet xi kjoajndí ska̱niya jkoaa. Tsakui nichxin kʼoakuixoán nga tsínkui sén tichotsenlee jñani tokjiojti chjota. Ninga kʼoalani, machjén nga si̱kjaʼaitsjenjiaan tsakui tísíchjén je Na̱i nga mele jao kʼoe ni̱ma̱ná (2 Cor. 2:11). Jebi yaa mangóson joma kʼianga jngo ki̱cha̱ chanisʼenjiaan jngo yá. Tsakui nichxin tochoa choa fisʼenjin kʼoa bijbi bakjannga. Je sén xi kjoajndí kaníya jkoaa yaa mangóson ki̱cha̱ jebi. Tsakui nichxin kʼoasʼin matsen nga tsín chʼaotjín, tonga kui xosikaoná nga kui jée ska̱jiaan xi jao kʼoe ni̱ma̱ná kʼoa nga tsín tikixi kjuintʼanilee Jeobá. Kuinga tsín kʼoaiʼndesíñá nga kui katafaʼasʼenjin ni̱ma̱ná je xi chʼaotjín. Si̱kuindaa je ni̱ma̱ná nga tsín jao katasʼe kʼoa kuijkónchaa je jaʼaínle Jeobá.

16. Jmé xi si̱kjaʼaitsjenjiaan kʼiatsa kui xi chʼaotjín sa̱tíobasenná.

¹⁶ Ali tokuijin batíobasenná je Na̱i sén xi kui kaníya jkoaa xi chʼaotjín, kʼoati nkjínsa che̱n batíobasenná nga̱ kui xi mele nga kuijnyíjée. Tsakui nichxin i̱ kuixoán: “Alikui tokui kuichonsjejinnina naxinandále Niná nga kʼoasʼian, alikui nʼio tse jée koanjngia”. Tonga alikui kixi tíjna tsa kʼoasʼin si̱kjaʼaitsjeen. ʼNdele nga kʼoakuixoán, tosaa nda nga i̱ tso xi si̱kjaʼaitsjenjiaan: “A kui jebi tísíchjén je Na̱i nga jao tíbʼé je ni̱ma̱na. Tsa tsjoaʼndele yaona nga kui simekoan xi kjoajndí tjenkao, a sijndíña je jaʼaínle Jeobá. A koasenkaona nga sichriantʼale Niná axo tosaa koa̱nkjinle”. Si̱kjaʼaitsjenjiaan jebi. Si̱jélee kjoachjine je Jeobá nga si̱kjaʼaitsjenjiaan jotjín kjoaixi tokoán (Sant. 1:5). Tsa kʼoasʼiaan, alikui jée jtsaojiaan. Koasenkaoná nga chʼa̱sjengiaa kʼianga kui xi chʼaotjín sa̱tíobasenná, tojo kisʼin je Jesús kʼianga i̱ kitsole je Na̱i: “Tʼin, Satanás” (Mat. 4:10).

17. Jngo choa̱ tʼejnai xi bakó nga tsín ndasʼin bichómani nga jao sʼe ni̱ma̱ná.

¹⁷ Alikui ndasʼin bichómani nga jao sʼe ni̱ma̱ná. Tobʼelañá, tsa je chjota xi ñatjen síská likui nda fikao xínkjín. Tsa tjínkʼa xi toje mele nda kʼoaxki̱, tsa tjínkʼa xi tsín fitjenngi josʼin tjínnele maská, kʼoa tsa tjínkʼa xi tsín kʼoasʼín jotsole je xi síkotʼaya. Tsa kʼoasʼin jngo equipo xi síská alikuijin kuinjele. Jéjin kuinjele xi jtín sʼin tjío. Yaa koa̱nngóson je ni̱ma̱ná joni jngo equipo xi jtín sʼin tjío tsa mangóson josʼin nikjaʼaitsjeen, jmeni xi nimetokoán kao jotjío tokoán nga tinixálee Jeobá. Je Na̱i kui xi mele nga jao sʼe̱ ni̱ma̱ná. Kui xi mele nga tiñá kuixkantʼakaoñá yaoná nga kʼoasʼiaan xi mele je Jeobá kʼoa nga kui si̱metokoán je xi chʼaotjín. Tsa mená nga je Jeobá si̱xálee machjén nga tsín jao kʼoé ni̱ma̱ná (Mat. 22:36-38). Alikuikʼia kʼoaiʼndelee je Na̱i nga jao kʼoe ni̱ma̱ná.

18. Tojo tso Miqueas 4:5, jmé xi tijnandai nga sʼiain.

¹⁸ Joni je David kʼoati i̱ kʼuínlee je Jeobá: “Tʼainái jngo ni̱ma̱ xi tsín jao katasʼele ánni nga tsokjonke̱síña jaʼaínli”. Kʼoénelee yaoná nga kʼoasʼiaan jotso én jebi. Ni choa kʼoa ni tse jmeni xi sʼiaan nga nyaon nyaon koakoá nga ʼyaxkoán jaʼaínle Niná. Tsa kʼoasʼiaan, tsjoa sa̱tío tokoán nga testigole Jeobá ʼminá (Prov. 27:11). Koaan kʼoakuixoán ngatsʼiaa jokitso je profeta Miqueas, nga kitso: “Je jaʼaínle Jeobá Nináná kuitsomakoaa ngantsjai nichxin” (Miq. 4:5).