Je kjoasʼendajin xi tsakʼénda Niná kao Abraham

KʼIALA jan siento basen nó jaʼato nga jaʼai Jtsínʼio nichxinle Noé kʼianga tsakʼejna Abraham (Abrahán) ya naxinandá jña Ur tsakʼin. Naxinandá jebi nʼio nda koanchon kʼoa yaa tíjnajin jñani Irak ʼmi ndʼaibi. Je Abraham nʼio koankjainle xi tʼatsʼe Niná, tonga chan kichotʼayakao kjoamakjainle. Kataʼyala jmeni xi koan.

Je Jeobá kʼoakitsole nga katasíkʼéjna je naxinandále kʼoa nga ya Canaán katafi. Kʼianga kʼoatsakʼinle kjitʼanangi kisitjoson, likuila tsa kisikjaʼaitsjen. Kʼianga kitjo ya ʼndele kikao je Sara je chjoónle, kʼoa kao Lot je kjaʼmele kʼoa kao xi tjíosa ya yaniʼyale. Kʼianga je kicho ya Canaán totsakʼetsomasonní, to ndʼianajño tsakatioʼya. Je Jeobá jngo kjoasʼendajin tsakʼéndakao. Kʼoakitsole nga totʼatsʼe nga sʼe̱le kjoanichikontʼain ngatsʼi je chjota kʼoa nga jngo naxinandáje koa̱n je ntje̱le kʼoa nga tsʼe koa̱n je ʼnde Canaán.

Je Abraham kao Lot nʼio nkjín barré kao nra̱ja̱ kisʼele. Je Abraham alikui chʼaondai koan, kitsjoaʼnde nga je kjaʼmele títjon kiskoejin je ʼnde jñani ngisa nda chonle nga sikjen cho̱ntjele. Je Lot yaa kiskoejin ya ʼnde jñani nʼio nda ma tsojmi ya jña kijna xongá Jordán kʼoa yaa tsakationi kao yaniʼyale ya chrian Sodoma. Tonga je chjota xi ya tsʼe ñaki to xájndí koanle kʼoa tse jée tsakajngi ngixko̱n Jeobá.

Kʼianga je kitʼaxinle xínkjín je Abraham kao Lot, je Jeobá kʼoakitsole Abraham nga kʼoakoa̱nchon je ntje̱le jochon je niño. Je Abraham kisʼele kjoamakjain xi kao Jeobá ninga ʼndi̱ je chjoónle. Tonga nga je ñokan kao xjaʼaonñole nó Abraham kʼoa jeme ñokan kao tele nó Sara, je Niná kʼoakitsole nga jngo ʼndí sʼe̱le. Kʼoa kitjoson jebi, jngo ʼndí kisʼele xi Isaac tsakʼin. Ninga kisʼesale xti xi kjaʼaí je Abraham, je Niná kʼoakitso nga ya ntje̱le Isaac kuinroani je ntje̱ xi kinokjoani ya Edén xi kʼoasjentjai chjota.

Je Lot kao yaniʼyale tojo ya Sodoma tjío nga kʼia. Je Lot nda chjota koan, alikui ya kiskenngi xájndí xi koanle je chjota xi ya tsʼe. Je Jeobá kʼoakitso nga sikjeson je chjota jebi, tonga títjonkjoanla kisikasén ánkje xi kʼoakitsole je Lot nga katabitjo ya naxinandá jebi kao yaniʼyale kʼoa nga nijngojin xi yátsʼi̱n katakotsenni. Xijekoan, je Niná lʼí kao asufre kisikʼani ya ngʼajmi nga kisikjeson chjotatsʼen xi ya tsʼe Sodoma kao Gomorra. Je Lot kao nga jao xtiyánchjínle kitjontjaile yaole. Tonga je chjoónle yátsʼin kiskotsenni, tsakui nichxin kui kisikjaʼaitsjen je tsojmi xi kisikatío. Nga tsín kisitjoson kisicha kjoabijnachonle.

(Yaa yʼangini Génesis 11:10–19:38.)