Kjoaʼmiya 8

¿ʼYáni xi tsín miyo le Niná?

Je xi sejna titjon xi tsín miyo le Niná jé Satanás jé Nai. Satanás jngo chjota xi espíritu xi tsakʼiejnachjoa le Jeobá. Tojo tisitoankao Niná, kui nga kʼoa sikji kjoa tjín ni le chjota jngo tjíjtsa Soʼnde. Satanás nʼió tsʼen, ndiso, kʼoa ma le sikʼien (Juan 8:44).

Tjió sa kʼa chjota xi espíritu xi ya kisijngokao jé Satanás nga tsakatiochjoa le Niná. Je Biblia kʼoatso nga nai tjengí ʼmi. Jo ni tsa Satanás, kʼoati tsín miyo le chjota; kui xi me le nga sikiʼaon chjota (Mateo 9:32, 33; 12:22). Kui nga Jeobá sikjieson si ni Satanás kao nai tjengí le ngantsjai nichxin. Tochoa sa nichxin tíjna le nga isʼin sikiʼaon chjota (Apocalipsis 12:12).

Nga miyo le Niná koain, likui koan kʼoasʼiain jotsó Satanás. Satanás kao nai tjengí le jtikie Jeobá; likui miyo le Niná ma kʼoa me le nga kʼoati likui miyo le Niná koain. Kui nga, tjínne ni li nga chjoejin ʼyani xi tsjoa kʼoai kon: a jé Satanás a xo jé Jeobá. Tsa me li nga kuijnachuin ngantsjai nichxin, tjínne li kui chjoejin nga kʼoasʼiain josʼín me le Niná. Satanás nʼió nkjín koya josʼín bʼanacha kʼoa mjé chen. Kʼoasʼin nga nʼió nkjín chjota xi tibʼanacha le (Apocalipsis 12:9).