KJOAʼMIYA 01
Jósʼin basenkaoná je Biblia
Sakʼoa kui nikjaʼaitsjeen jmé xá tiyoñá, ánni kjoañʼai chjaʼañá, ánni biyañá, kʼoa jmé xi koa̱n nichxin xi sʼa nroaján. Kʼoati sakʼoa kui nikjáojiaan jósʼin so̱koʼaná yaoná kʼoa jósʼin nga nda kuiyokoaa xíngiaa ya yaniʼyaná. Je Biblia bakóya xi tʼatsʼe jebi kʼoa tsjoáná kjoafaʼaitsjen josʼin kjuinkoaa yaoná. Koasenkaoli tsa chótʼayai Biblia.
1. Jméni xi bakóya je Biblia
Je Biblia bakóyaná jñá jeʼe̱ñá xi chjota. Jmé xá tiyoñá. Ánni kjoañʼai chjaʼañá. Jmé xi maná kʼianga jebiyaa. Ánni nga kjoajchán tjínni i̱ sonʼnde tsa kjoanyʼán mele je chjota. A kjoe je sonʼnde xi tiyosoán. Nkjín chjota xi ya Biblia kjimasjaitʼale xi tʼatsʼe jebi kʼoa tjíosʼejngo kon.
2. Jósʼin basenkaoná je Biblia nga nda biyoaa
Je Biblia nʼio nda je kjoafaʼaitsjen xi tsjoáná. Tobʼelañá, bakóyaná josʼin nga ngisa nda kuiyoaa ya yaniʼyaná. Kʼoati bakóyaná jme xi sʼiaan nga tsín jme xi si̱kjáojiaan kʼoa nga tsjoa sa̱tío tokoán nga si̱xá. Kʼianga chótʼayá je Biblia, koakoyaná xi tʼatsʼe jebi, kʼoa nkjínsa koya jmeni xi kʼoati koakoyaná. Kʼoa jchañá nga “kjaínga nda machjén” jmeni xi tso je Biblia (2 Timoteo 3:16).
Xo̱n jebi ali tsakuijin Biblia tonga koasenkaoli nga chótʼayai. Tʼexkiai ngayeje texto xi faʼaitʼa nga jngó jngó kjoaʼmiya ánni nga ngisa nda koa̱njinnili jmeni xi tichotʼayai.
KATAʼYASAI JME XI TÍNCHJA̱NI
Kataʼyala jósʼin tjíobinyakao Biblia je chjota, jmé xi sʼiaan nga koa̱nmená kʼoéxkiaa je Biblia kʼoa jósʼin basenkaoná nga ʼya xi tsoyaná.
3. Je Biblia bándiaaná
Je Biblia yaa mangóson jngo lámpara xi síʼisenná josʼin mangián. Koasenkaoná nga nda chjoéjiaan jmeni xi sʼiaan kʼoa nga jchaa jmeni xi koa̱n nichxin xi sʼa nroa.
Tʼexkiao Salmo 119:105 kʼoa cho̱bayaño jebi:
Jósʼin tsabekon Biblia je xi kiski salmo jebi.
Jósʼin nikjaʼaitsjain ji xi tʼatsʼe Biblia.
4. Je Biblia tsoya jme xi mená jchaa
Jngo chjoón xi tsabe nga ya Biblia faʼaitʼa jmeni xi nkjín nó kiskonangile yaole. Chótsenlao VIDEO kʼoa cho̱bayaño jebi:
Jmé xi kiskonangile yaole je chjoón xi faʼa ya video.
Jósʼin tsakasenkao nga kiskotʼaya je Biblia.
Je Biblia kʼoatso nga ndatjín nga chjonangiaa jmeni xi mená jchaa. Tʼexkiao Mateo 7:7 kʼoa cho̱bayaño jebi:
Jósingái ji, a faʼaitʼa ya Biblia jmeni xi chjonangilai yaoli. Tobʼelañá, jméni xi sakʼoa chjonangilai yaoli.
5. Koa̱ntsjoachaní nga kʼoéxkiai je Biblia
Nʼio nkjín chjota xi tsjoake nga bʼéxkia je Biblia kʼoa binyakao jmeni xi tso. Chótsenlao VIDEO kʼoa cho̱bayaño jebi:
Jósʼin síkjaʼaitsjen je xti xi faʼa ya video kʼianga tjín xi bʼéxkia.
Kʼoa ánni nga tsín kʼoasʼin síkjaʼaitsjenni kʼianga Biblia bʼéxkia.
Je Biblia sínʼio tokoán kʼoa tsjoáná kjoachoya. Tʼexkiao Romanos 15:4 kʼoa cho̱bayaño jebi:
A mesali jchai jósʼin sínʼio tokoán je Biblia kʼoa jmé kjoachoya xi tsjoáná.
6. Koa̱njinná jmeni xi tso je Biblia tsa ʼya xi koasenkaoná
Ningalani ma nga toñá bʼexkiaa je Biblia, tonga ngisaa majinná nga tjín xi basenkaoná. Tʼexkiao Hechos 8:26-31 kʼoa cho̱bayaño jebi:
Jméni xi koasenkaoná nga koa̱njinná jmeni xi tso je Biblia (chótsenlao versículo 30 kao 31).
Jngo chjota xi Etiopía tsʼe, tjín xi tsakasenkao nga koanjinle jmeni xi tso je Biblia. Nichxin xi tiyoaa ndʼaibi, je chjota kʼoati majinle jmeni xi tso je Biblia kʼianga tjín xi binyakao
TJÍNKʼA XI I̱ TSO: “Tonichxinnájin si̱chaa tsa Biblia chótʼayá”.
Jósingái ji. Ánni.
XI KACHOTʼAYÁ
Basenkaoná ngantsjai je kjoafaʼaitsjen xi nroatʼa ya Biblia, yaa faʼaitʼa jmeni xi chjonangilee yaoná, sínʼio tokoán kʼoa tsjoáná kjoachoya.
Jmé xi kamajinli
Jñánile je kjoafaʼaitsjen xi faʼaitʼa Biblia.
Kʼoalasi kʼai jméni xi sakʼoa chjonangilee yaoná xi ya Biblia tsoya.
Jméni xi meli jchai xi ya Biblia faʼaitʼa.
XI KOASENKAOSALI
Nichxin xi tiyoaa ndʼaibi basenkaoná je kjoafaʼaitsjen xi faʼaitʼa ya Biblia.
“Basenkaoná ngantsjai je kjoachjine xi nya Biblia” (Xo̱n xi Bájinkonná, núm. 1 2018)
Jé Biblia tsakasenkao jngo chjota xi tsín nda kisʼe kon saʼnda nga sʼa ʼndí kji.
Xi tsakasenkaona nga nda tsakatejna kʼoa nga tsjoa kisʼe tokoan (2:53)
Kjoafaʼaitsjen xi tsjoá je Biblia nga nda kuiyoaa ya yaniʼya.
“12 kjoafaʼaitsjen xi basenkaoná nga nda biyoaa ya yaniʼya” (¡Despertad!, núm. 2 2018)
Je Biblia tsoya ʼyákjoánni xi kjinentsja je sonʼnde.
Ánni nga machjénsíni nga chótʼayá je Biblia (xi tíjnayeje) (3:14)