Antena nichjainjin jñani tsín bichó Internet

Nga xki̱ sá kui chotsenlee je video kao jmesani xi satíotʼa ya JW Broadcasting. Nkjín ndsʼee xi África tsʼe xi tsín ma kotsenle nga̱ tsínle Internet.

Nkjín ʼnde xi tjío África jñani tsín Internet. Ya jñani nga tjín, nʼio chjí kʼoa nʼio xa̱n síxá. Tobʼelañá, jngo ndsʼee xi superintendente xi tsʼe circuito sʼin tíjna ya Madagascar kui Broadcasting tsakʼajen kʼoa 16 dólar tsakʼéchjí.a Tsʼato kʼoatjín tsakʼéchjí ndsʼee jebi jotjín njele chjota nga jngo xomana síxá.

Ningalani tsín Internet, millón chjota xi África tsʼe xi ma kotsenle je Broadcasting. Jósʼinnile.

Saʼnda tjen nó 2017, nkjín ʼnde xi tjío ya África jñani jema kotsenle je JW Broadcasting nga antena bʼétʼale je televisión. Je programa faʼa nga bʼajnda xomana kʼoa 16 én faʼa.

Je testigole Jeobá síjékjoaa kʼoa bʼéchjí nga ya televisión katafaʼa je JW Broadcasting, kʼoa 35 ʼnde xi tjío África jñani bichóle señal xi tsʼe televisión je chjota kʼoa tsʼatola 12,000 dólar machjí nga xki̱ sá. Kʼoa nga ijngosa canal machjén sakʼoa, machjísonsa. Nga kʼoasʼin televisión machjén, jmi chjota xi ma kotsenle je kjoajtíntse xi jan nichxin sʼejna kʼoa jmeni xi faʼa nga bichó je representante xi síkasén jña tjen tísʼendiaanile xále Niná jngo tjíjtsa Sonʼnde.

Nʼio nkjín chjota kotsenle canal jebi ya televisiónle ni testigole Jeobá ma kʼoa ni mai. Nkjín ndsʼee xi tsín masonnile tao̱n nga televisión batse, kuinga 3,670 Ndʼia jña chotʼayá kisatiotʼani antena xi bʼéʼndó señal, kʼoa yaa tjen kotsennile ndsʼee je JW Broadcasting. Kʼiatsa jetjío televisión kʼoa tsa proyector ya Ndʼia jña chotʼayá, tome 70 dólar bʼéchjí je ndsʼee, tonga tsa tsínle me 530 dólar machjí.

Je ndsʼee nʼio tsjoa tjío kon nga kui televisión síchjén. Jngo ndsʼee xi chjotajchínga sʼin tíjna ya Camerún itso: “Nʼio tsjoa tjíole je familiana nga ma chotsenlaijin je JW Broadcasting”. Jngo ndsʼee xi Nigeria tsʼe xi Odebode ʼmi, itso: “Jan kʼa biyojtínjin kao familiana nga jngo xomana nga chotsenlaijin canal jebi. Je ʼndíxtina nʼio tsjoa tjío kon nga kʼoasʼin tjínndajinnajin nga chotsenlaijin canal jebi, kʼoa nichxin nga tsínkui tjínndajinnajin, sakʼoa kʼoatsonajin nga mele skótsenle nga toje”. Jngo tichjaa xi Nigeria tsʼe, xi Rose ʼmi, itso: “Ngasʼa ñaki to noticia kotsenle. Tonga ndʼaibi nʼio tsjoa tjín tokoan nga jekui canal JW kotsenle. Kʼianga noticia kotsenle ngotjo majtinina kʼoa mi presiónna, tonga je canal JW ñaki nda bʼé tokoan nga̱ ndatjín xi faʼa. Nʼio tsjoake̱ canal jebi, nga̱ tʼatsʼe Jeobá tínroani”.

Jngo superintendente xi tsʼe circuito xi ya Mozambique tsʼe, kʼoatso nga ya Ndʼia jña chotʼayá tjíosatíotʼa je antena xi bʼéʼndó señal nga matsen je canal JW. Je ndsʼee sakʼoa jngo hora tongini bichó nga satíole kjoajtín nga ma kotsenle JW Broadcasting.

Kʼianga nó 2019, nga kisʼejna je kjoajtíntse jñani nkjín naxinandá faʼaini xi bichó ya Johannesburgo (Sudáfrica), ñajan ʼnde jñani kui canal xi tsʼe televisión koanchjén nga kinoʼyale je kjoanokjoaya, jolani xi kitsjoa je ndsʼee xi ya tíjnajin je Cuerpo Gobernante. Je ndsʼee Sphumelele xi ya títsjoánganʼio ya Departamento Local xi tsʼe Broadcasting ya sucursal xi tíjna Sudáfrica, itso: “Ngasʼa Internet nichjainjin nga satío je kjoanokjoaya, tonga bʼechjíníjin ánni nga nda katakjoéni. Kʼianga jekisatio je antena jebi kʼoa nga tjen televisión faʼani ngisaa choa sʼengi kʼoa ngisaa nda ma”.

Nga kʼoasʼin bʼainganʼio kʼoa nga batio tao̱n, je ndsʼee xi África tsʼe jema kotsenle je JW Broadcasting nga kui televisión xi antena tjínle síchjén. Nʼio bʼailee kjoanda xíngiaa nga kʼoasʼin nikasáon je tao̱n xi kjimachjén, ma ya tjen donate.jw.org nikasénñá tao̱n.