Jña ma bitjasʼeen Internet xi tsʼe Testigole Jeobá: Koa̱nchjénle ngatsʼi chjota
Je Jesús kʼoasʼin tsakʼénená nga kʼuínyasoán je énnda chjotse “ngakijnda sonʼnde, nga si̱kixiyandale ngatsʼi naxinandá” (Mat. 24:14). Kʼoa nga ngisa nda kuitjosonná xá jebi, jngo dirección chjotse kisʼejna ya Internet, kʼoa yaa bakó ngayeje xi faʼaitʼa tsakai ya watchtower.org, jw-media.org kʼoa kao jw.org (2 Tim. 4:5). Kʼoa je dirección chjotse xi tsʼe énná kui jebi: www.jw.org/mau.
“Ngakijnda sonʼnde.” Nʼio nkjín chjota xi síchjén Internet jngo tjíjtsa Sonʼnde, nga xki̱ jan jan chjota jngola mani xi kui síchjén. Nʼio nkjín mani xi ya básjai tsa jmeni xi mele skoe̱ kʼoa ngisa nʼio síchjén je xi sʼa xti. Kʼoa je dirección chjotse xi kisʼejna yaa koa̱nsjaitʼale chjota jmeni xi kjonangi xi tʼatsʼe Biblia. Kʼoati ya skoe̱ josʼin tísíxá je naxinandále Jeobá kʼoa ngisa choa ñʼai koa̱nle nga ya sijé nga kataʼmiya kjoatjaole Biblia. Kʼoasʼin kuichonile je énnda chjotse je chjota xi ya tjío ya ʼnde jña tsín tíʼmiyason.
“Ngatsʼi naxinandá.” Kʼianga sʼe̱jinkon ngatsʼi chjota xi tjío jngo tjíjtsa Sonʼnde machjénní nga nʼio nkjín én si̱kʼatoyaa je énle Niná. Je xo̱n kʼoa kao grabación xi tjío ya jw.org ñola siento én faʼaitʼa. Nijngojinla dirección xi faʼaitʼa ya Internet xi kʼoasikji nkjín én faʼaitʼa.
Nda tichjain dirección chjotse xi kisʼejna. Ali tsa tokuijin xá kisʼendani nga je koasenkao je chjota. Kʼoati koa̱nchjénná tsanda ñá xi testigole Jeobá maa. Tsa tjínli Internet kʼoaʼmilaijin nga chótsenlai nga jngó jngó koya xi faʼaitʼa ya jw.org. Kʼoa i tjítʼa xi fisani josʼin koa̱n si̱chjén.
[Én xi tjítʼa ya pájina 3]
(Chótʼai je xo_n xi kitjo kʼiatsa meli jchai jokjoan kisʼe)
Titjásʼain je dirección chjotse
1 Tʼetʼai dirección jebi www.jw.org/mau ya jña fitsʼiani nga bitjasʼeen ya Internet.
2 Tjasjaijin nga jngó jngó koya xi faʼaitʼa ya dirección chjotse jebi. (Tjíokʼa xi kje faʼaitʼajin ya dirección xi tsʼe énná, tonga koaan ya tjasjai ya www.jw.org/es.)
3 Koaan si̱chjain tojñanile ki̱cha̱ xi tjínle Internet nga kuitjásʼain ya jw.org, jolani tsa celular. Tonga kʼoantjaiya josʼin koa̱ntsen nga̱ ngisa ʼndí kjoan pantallale, tonga tojo kʼoakuitso.