Si̱chjén jw.org kʼianga ʼmiyasoán: “Miyole Jeobá katamai”

Ya jw.org ya jñani “Xo̱n kao grabación” tso yaa faʼaitʼa je video xi “Miyole Jeobá katamai” ʼmi, xi tsʼe xtiʼndí. (Nga én kastía kʼoati faʼaitʼa canción kao xi kjaʼaísanile.) A nichjénñá video jebi nga ʼmiyasoán. Kʼoa tsa tjínle xtiʼndí je chjota xi tibʼailee estudio kʼoati koa̱n koakolee. Tsakuini nichxin kʼoati koa̱nmele nga skótʼa jmesani xi faʼaitʼa ya dirección xi tíjnaná ya Internet.

Kʼianga jngo ndsʼee kitsjoale jngo chjoón xi xtiʼndí tjínle je tratado número 38 xi tsʼe Én xi bájinkonná tʼatsʼe Chjotaxále Niná, tiʼakʼiaa tsakʼéxkiani nga jetsakʼaile. Kʼoa je xtiʼndíle kʼoati koanmele nga tsabe jmé xo̱n xi tsakʼaile je male. Kʼoa kʼiaa kitsoyale je ndsʼee jmeni xi tínchja̱ni kʼoa tsakakóle je dirección xi tíjnaná ya Internet xi faʼaitʼa ya jto̱n yátsʼi̱n tratado. Kʼoa nga kʼoati koanndosinle male xtiʼndí jebi, je ndsʼee tsakakóle je video xi tsʼe Caleb ya celularle.

Jngo tichjaa kui tsakjákaonajmíni je jw.org jngo chjoón xi ya ñatjen síxá xi xtiʼndí tjínle, kui kʼoakitsole nga ya dirección jebi faʼaitʼa jmeni xi basenkao je familia. Chjoón jebi tsakásjaijin jw.org ya Internet kao xtiʼndíle. Xijekoan, kʼoakitsole je tichjaa nga je xtiʼndíle tokuixó tjíose ya niʼyale je canción xi “Predica la palabra” ʼmi, xi faʼaitʼa jñani “Miyole Jeobá katamai” tso ya dirección xi tsʼe én kastía.

Koaan kjitʼa chótʼaa jmeni xi satíotʼa chjotse ya jw.org, kʼoa chʼa̱jeen je video, canción kʼoa jmesani xi faʼaitʼa. Tsa kʼoasʼiaan, ngisajin nda koa̱nná si̱chjén kʼianga ʼmiyasoán ánni nga tosi tonda jo choʼnda sʼin si̱xásínilee je Nainá (Hech. 20:19, TNM).