Si̱chjén jw.org kʼianga ʼmiyasoán: “Jmeni xi chjonangiaa xi tʼatsʼe Biblia”

Ya jw.org ya jñani “Enseñanzas bíblicas” tso yaa faʼaitʼa je xi “Preguntas sobre la Biblia” ʼmi. Nga ʼyaa jmeni xi faʼaitʼa basenkaoná nga ʼmiyasoán, nga̱ tsa ʼyani xi tjín xi skónanginá koaan koakolee pájina jebi tsa ya faʼaitʼa. Kʼoati koa̱n kui si̱chjén je kjoachjonangi xi ya faʼaitʼa nga tosʼa kʼoétsʼiakaoñá nga chja̱kaonajmiá je chjota. Tobʼelañá, koaan chjoéjin jngoaa je kjoachjonangi xi koa̱nndosinle je chjota jñani bʼakaoná nga ʼmiyasoán, chjónangilee jósʼin síkjaʼaitsjen kʼoa kʼuínyalee jmeni xi tso je Biblia kʼoa yaa chjoénilee jokuixoán ya jw.org. Xijekoa̱n, koaan kʼoakʼuínlee nga ya jw.org kachjoenilee jmeni xi kaʼmiyalee kʼoa koakolee pájina jebi. Ijngo koya xi koa̱n sʼiaan kuinga koakolee jotso ya jw.org tʼatsʼe jmeni xi kachjonangilee kʼoa jesoa katabʼéxkia. Je chjoónle jngo superintendente kʼoatso nga ndasʼin bichómani nga fákaonajmí je chjota kʼianga i̱ tsole: “Nʼio nkjín chjota xi kjonangile yaole tsa je Niná xotísʼín nga kjoañʼai chjaʼá. A meli jchai xi tʼatsʼe jebi, tongotjoní”. Kʼoa je tichjaa kʼiaa bakóle je grabación xi tsʼe kjoaʼmiya, xi ya jw.org tsakʼajenni, kʼoa xijema kʼiaa bakóle libro Jmé kjoanni xi bakóya je Biblia ya kjoaʼmiya tejngo.