Abraham... miyole Niná

JNGO ʼnde jñani kikatio chjota kʼianga je jaʼato Jtsínʼio ya jña Ur tsakʼin. Naxinandá jebi nda koanchon kʼoa naskánakjoan ndʼia xi kisʼe. Tonga chjota xi ya tsʼe niná ndiso tsakʼétsʼoale. Kʼoa kʼoati kisʼin ya Babel. Je chjota xi ya tsʼe Babel kʼoa kao Ur a likui kʼoakisʼin jokisʼin Noé kao tile xi Sem tsakʼin, nga Niná kisixále.

Xijekoan, nga je jan siento basen nó jaʼato nga jaʼai jtsínʼio, kʼien Noé. Xijekoanni jao nó kʼia kitsin chjota xi faʼaitʼasí ibi. Nʼio chjí tsabe Niná chjota jebi. Abraham tsakʼin. Ya tsakʼejna ya Ur kao yaniʼyale.

Jngo nichxin je Jeobá kitsole Abraham: “Tikʼéjnai Ur kʼoa kao xíngi, kʼoa ya tʼin jngo naxinandá xi koakole”. Je Abraham, a kisitjosonle Niná kʼoa a kisikatío ngayeje jme xi tjín ya Ur. Jaon, kisitjosonní. Kʼoa nga kisitjosonle ngantsjai je Niná, miyole Niná tsakʼinle.

Kʼianga kitjo ya Ur kikao kʼa xínkjín. Ki Taré je nʼaile Abraham. Kʼoati ki Lot je tikjaʼmele. Kʼoa kao Sara je chjoónle Abraham. Xijeki nichxin ya kichó ngatsʼi ya ʼnde jña Harán ʼmi kʼoa ya kʼien Taré. Nʼio kjinle ya Ur.

Xijekoan, Abraham kao yaniʼyale kitjoni ya Harán kʼoa ya kichó ya ʼnde jña Canaán ʼmi. Nga tjío ya, Jeobá kitsole: “Kui nangi jebi xi tsjoale je xtili”. Abraham ya tsakʼejna Canaán kʼoa ndʼianajño tsakʼejnaʼya.

Niná tsakasenkao je Abraham kʼoa nkjín nyʼoá barré kisʼele kao cho̱ xi kjaʼaisa kʼoa siento choʼnda kisʼele. Tonga je Abraham kʼoa kao Sara tsínle xti.

Kʼianga ñokan kao xjaʼaonñole nó je Abraham, Jeobá kitsole: “Kʼoaxinle kʼianga nkjín naxinandá xi nʼaile koa̱in”. Tonga jókoa̱nnile jebi, nga je nʼio chjota jchínga Abraham kao Sara nga xti sʼele.