KJOAʼMIYA 34
Jósʼin koakolee je Jeobá nga tsjoachaa
Jokji tse jetichotʼayai Biblia, a jengisa kjimachriantʼalai je Niná. A meli nga ngisa koa̱nmiyui. Nga skoe̱ je Jeobá nga tsjoachai kʼoati tsjoake koa̱nli kʼoa sikuindali. Jósʼin koakolai Niná nga tsjoachai.
1. Jósʼin bakolee je Jeobá nga tsjoachaa
Kʼianga nitjosonlee bakolee nga tsjoachaa (tʼexkiai 1 Juan 5:3). Je Niná alikui bʼénená nga si̱tjosonlee. Ñá xi kuixónñá tsa kʼoasʼiaan kʼoa tsa mai. Je Jeobá kui xi mele nga ñaki ni̱ma̱ná katanroajinni nga si̱tjosonlee (Romanos 6:17). Kui xi tsonile nga tsín mele nga tosʼe̱neli nga si̱tjosonlai. Ya sección 3 kao 4 jao koya tjínni xi tsoya josʼin koakui nga tsjoachai je Jeobá. Xi títjon, nga kui kʼoasʼiain jmeni xi sasénle, kʼoa xi majaoni, nga tsínkui kʼoasʼiain jmeni xi tsín sasénle.
2. Ánni nga sakʼoa ñʼai maniná nga bakolee je Jeobá nga tsjoachaa
Je Biblia kʼoatso nga “nʼio tse kjoañʼai faʼatojin je chjota xi kixi” (Salmo 34:19). Kʼianga kjoa bitjatojiaan tsakui nichxin ngisa ñʼai koa̱nná nga si̱tjosonlee je Jeobá. Tobʼelañá tsa ñʼai kjimaná je tao̱n, tsa tsín kixi jme xi kamatʼeen kʼoa tsa jmesa kjoa xi tibitjatojiaan ngisa ñʼai maná nga nitjosoán. Kʼoa mani nga chjotajée makaoñá kʼoati tibixkantʼakoaa je jée xi kichʼá. Tonga tsa kʼoénelee yaoná nga kui kʼoasʼiaan jmeni xi sasénle je Jeobá koakoñá nga tsjoachaa kʼoa nga kixi timangíntʼalee. Tsa kʼoasʼiaan kʼoati kixi koa̱n je Jeobá xi kao ñá kʼoa nikʼiajinla tsjiónkonná (tʼexkiai Salmo 4:3).
KATAʼYASAI JME XI TÍNCHJA̱NI
Kataʼyala ánni nga nʼio chjí beni je Jeobá kʼianga nitjosoán kʼoa jméni xi koasenkaoná nga kixi kjuintʼalee.
3. Jngo kjoa xi kʼoati bʼetʼaná
Ya libro xi tsʼe Job, kʼoatso nga je Na̱i énndiso tsakáne je Job, tonga ali tsa tojejin xi énndiso tsakáne, kʼoati énndiso tsakáne ngatsʼi je chjota xi mele sixále je Jeobá. Tʼexkiao Job 1:1 kao 1:6–2:10 kʼoa cho̱bayaño jebi:
Jókitso je Na̱i, ánlani nga kisitjosonnile Job je Jeobá (chótsenlao Job 1:9-11).
Jmé énndiso xi bánená je Na̱i (chótsenlao Job 2:4).
Tʼexkiao Job 27:5b kʼoa cho̱bayaño jebi:
Jósʼin tsakakó Job nga ñaki tsjoake kjoaixi je Jeobá.
Nga kixi koan je Job, kʼoasʼin tsakakóni nga tsjoake kjoaixi je Jeobá
Nga kixi mangíntʼalee je Jeobá, kʼoasʼin bakoñá nga tsjoachaa
4. Tjayatsjoai je ni̱ma̱le Jeobá
Tʼexkiao Proverbios 27:11 kʼoa cho̱bayaño jebi:
Jósʼe kon je Jeobá kʼianga nitjosonlai kʼoa nga nda chjoejin jmeni xi nʼiai. Ánni.
5. Koaan kixi kʼuíntʼalai je Jeobá
Nga tsjoachaa je Jeobá kui xi basenkaoná nga chjakaoñá xi kjaʼaí chjota xi tʼatsʼe. Kʼoa nga kixi timangíntʼalee kʼoati kui xi basenkaoná nga tosi tonda ʼmiyasoán ninga sakʼoa ñʼai maná. Chótsenlao VIDEO kʼoa cho̱bayaño jebi.
A ñʼai mali nga chjakaoni xi tʼatsʼe Jeobá je chjota.
Tojosʼin kaʼyaa je video, jméni xi tsakasenkao je Grayson nga tsín tikitsokjonni.
Ngisaa choa ñʼai maná nga kixi mangíntʼalee je Jeobá kʼianga jtichaa jmeni xi jtike kʼoa nga tsjoachaa jmeni xi tsjoake. Tʼexkiao Salmo 97:10 kʼoa cho̱bayaño jebi:
Jokji tse nga tichotʼayai, jméni xi tiʼyai xi tsjoake je Jeobá, kʼoa jméni xi tsín tsjoake.
Jósingái ji, jókoa̱n sʼiain nga jticha koai̱n je xi chʼaotjín, kʼoa nga tsjoacha koai̱n je xi ndatjín.
6. Nga nitjosonlee je Jeobá basenkaoná
Tsa si̱tjosonlee je Jeobá nʼio nda sʼiaan. Tʼexkiao Isaías 48:17, 18 kʼoa cho̱bayaño jebi:
Jósingái ji, a be je Jeobá jmeni xi ngisa nda koasenkaoná. Ánni.
Jósʼin tíbasenkaoli nga tichotʼayai je Biblia kʼoa nga tiʼyasai xi tʼatsʼe Jeobá.
TJÍNKʼA XI I̱ TSO: “Likuila jomale Niná tojmeni xi sʼian”.
Jñánile texto xi koakolai je chjota nga koa̱n tsjoa kʼoa koa̱n ba kʼoe kon je Niná jmeni xi nʼia.
XI KACHOTʼAYÁ
Bakoní nga tsjoachai je Jeobá kʼianga kixi ʼmitʼalai kʼoa kʼianga nitjosonlai ninga tojme kjoa bitjatojin.
Jmé xi kamajinli
Jméni xi bakóyali choa̱le Job.
Jósʼin koakui nga tsjoachai je Jeobá.
Jméni xi koasenkaoli nga kixi kʼuíntʼalai je Jeobá.
XI KOASENKAOSALI
Kataʼyai jókoa̱n sʼiain nga kixi kʼuíntʼalai je Jeobá kʼoa kao je jtín.
Kataʼyai tʼatsʼe énndiso xi kitso je Na̱i.
“Job kixi kitʼale Niná” (A ʼyaní jme xi tínchjani je Biblia, kjoaʼmiya 6)
Kataʼyai nga je xtiʼndí kʼoati koa̱n koako nga tsjoake je Jeobá.
Jókoa̱n sʼin je xi sʼa xti nga kixi koaitʼale je Jeobá tsa sʼe̱nele nga kui kʼoasʼin je xi chʼaotjín.