Tsjoake koa̱nná ngantsjai je Jeobá

1, 2. Jósatío kon je ndsʼee kʼianga kjoa faʼatojin.

SI̱KJAʼAITSJENLA joma je chitso kʼianga ntjao̱ faʼajin je ndáchikon, ngaʼi̱ ngaján fikao kʼoa tsín tikʼoasʼin fini josʼin tífi tsakai. Je chjota xi síxákao jngo ki̱cha̱ʼba̱ síkʼatjenngindá xi bájnanʼio je chitso ánni nga tsín jme xi katamanile.

² Kʼiatsa kjoa tibitjatojin tsakui nichxin sakʼoa nda sʼe ngotjo tokuin kʼoa kʼoasʼin nikjaʼaitsjain nga tsjoakeli Jeobá kʼoa nga je basenkaoli. Tonga sakʼoajin kui nikjaʼaitsjain tsa mandosin kjoaixile jme kjoa xi tibitjatojin (Sal. 10:1; 13:1). Kʼoa tsa nda tso én fákaoli je miyoli ndajin sʼe ngotjo tokuin (Prov. 17:17; 25:11). Tonga xijema, tikuijin nikjaʼaitsjenngáni tsa mandosin kjoaixile Jeobá xi tʼatsi. Kʼiatsa kʼoakjimai, jósʼiain nga ñaki sʼe̱jngo tokuin nga tsjoakeli Jeobá kʼoa nga mele koasenkaoli.

3. 1) Jósʼin tíjna je kjoatsjoacha xi nchja̱ni Salmo 31:7 kao Salmo 136:1. 2) Ánni nga tojeni Jeobá xi kʼoasʼin bakóná kjoatsjoacha (kʼoati chótsenlai sén xi faʼaitʼa).

³ Kʼianga kjoa bitjatojiaan kuenta sʼiaan nga tsjoakená je Jeobá kʼoa nga tsín tsjiónkonná (tʼexkiai Salmo 31:7;a 136:1b). Nga kui síkʼaxki̱ ya salmo josʼin tsjoakená Jeobá, kui nchja̱ni nga tsjentʼale xínkjín je chjota kʼoa nga tondiaa tsjoake ma. Tojé Jeobá xi kʼoasʼin bakóná kjoatsjoacha. Je Biblia kʼoatso nga tsjoakená je Jeobá kʼoa nga tsín koasenxinná (Éx. 34:​6, 7; Sal. 86:5). Kui xi tsonile nga tsjoake koa̱n ngantsjai je choʼndale. Nga ʼyaa jebi basenkaoná kʼianga kjoa bitjatojiaan (Sal. 23:4).

KUENTA SʼIAAN NGA KUI BAKÓYA JE BIBLIA NGA TSJOAKENÁ JE JEOBÁ

4. Jméni xi tsaʼyaa nga tosʼa kichotʼayá je Biblia, kʼoa ánni nga kʼoéjngoñá tokoán nga ñaki kʼoatjín jme xi tso je Biblia.

⁴ Jmeni xi bakóya Biblia basenkaoná nga ʼyaa nga tsjoakená Jeobá kʼoa kuinga je ninʼiotʼañá. Xi koanjinná nga tosʼa kichotʼayá je Biblia kuiní nga Jeobá ʼmi je Niná, nga ʼNdíle Niná je Jesús, nga tsín tijme xi beni xi jekʼien, nga ʼndenaxó koa̱n je sonʼnde kʼoa nga koa̱n kuiyoaa ngantsjai nichxin (Sal. 83:18; Ecl. 9:5; Juan 3:16; Apoc. 21:​3, 4). Nga jeʼyaa jokjoantjínni xi bakóya je Biblia alikui tiʼya xi bʼanachaniná, sʼejngo tokoán kʼoa ʼyañá nga mandosinle Jeobá xi tʼatsaan.

5. Jósʼiaan nga tsín tikui si̱sinñá josʼin makjainná tsakai.

⁵ Jméni xi tsakasenkaoli nga kinikʼéjnai josʼin makjainli tsakai nga tosʼa kichotʼayai je Biblia. Tsakui nichxin kiningósonkoai jmeni xi bakóya je Biblia kao jmeni xi tso je religión jña tsakijnajin. Tsa kʼoasʼin makjainli tsakai nga niná je Jesús, kʼianga kichotʼayai kuijin kinikjaʼaitsjenjin tsa ñaki kʼoatjín jme xi tíʼmiyali. Jisoajin kichotʼayajin jme xi tso je Biblia kʼoa tsaʼyajin nga tsínni kʼoatjín josʼin makjainli. Kʼianga jekoanjinli nga ʼNdíle Niná je Jesús alikuijin tikui kuenta kinʼiani josʼin makjainli tsakai (Juan 3:18; Col. 1:15). Nga jenʼio koanngakaoná jonʼia ngasʼa, alikui choa ñʼai maná nga tsín tikʼoanʼiañá (2 Cor. 10:​4, 5). Tonga alikui tikui nisinñá kʼianga jeʼyaa jotso Biblia (Filip. 3:13).

6. Ánni nga nkjín kʼa faʼaitʼani ya Salmo 136 je én xi tso: “Likuikʼia kjoetʼa kjoatsjoachale”.

⁶ Kʼianga kjoa bitjatojiaan tsakui nichxin to jao sʼe tokoán tsa tsjoake kjoaixiná je Jeobá. Kʼianga kʼoama, koaan chótʼayajiaan jmeni xi tso Salmo 136:​1, nga̱ yaa tsoya josʼin tíjna nga tsjoakená Jeobá. Je én xi “kjoatsjoacha” sʼin faʼatoya ya Salmo 136:1 kui nchja̱ni josʼín jngo chjota nga ñaki kixi fitʼale tsa ʼyani. Ánni kʼoakitsoni je xi kiski salmo nga kʼoasʼín je Jeobá xi kao ñá. Kʼoa jméni xi bakóyaná nga 26 kʼa faʼaitʼa ya Salmo 136 je én xi tso: “Likuikʼia kjoetʼa kjoatsjoachale”. Tojosʼin tiʼyaa, ya Biblia kʼoatso nga tsjoakená je Jeobá kʼoa nga tsín tsjiónkonná. Kʼiatsa sakʼoa kʼoasʼin nikjaʼaitsjain nga tsín tsjoakeli Jeobá, ali tosi tondajin kui bʼejintokuin.

7. Jñánile texto xi koasenkaoná nga sʼe̱jngo tokoán nga tsjoake kjoaixiná je Jeobá.

⁷ Ya Biblia nkjín texto faʼaitʼa xi tsoya nga tsjoakená je Jeobá. Jaola choa̱ kataʼyaa. Je Jesús i kitsole chjotatjenngile: “Ngisa chjíno nga jon kaoni tsa nkjín niseʼndí” (Mat. 10:31). Ali tsa i̱jin kitsole: “Tsakui nichxin ngisa chjíno nga jon kaoni tsa nkjín niseʼndí”. Kʼoa je Jeobá i kitsole je naxinandále: “An tsjoanganʼiole. An koasenkaole. Kao ndsa̱ ngakixi tsoanile” (Is. 41:10). Ali tsa i̱jin kitsole: “Tsakui nichxin koasenkaole”. Kʼianga kjoa bitjatojiaan tsakui nichxin sakʼoa to jao sʼe tokoán tsa tsjoake kjoaixiná je Jeobá. Jmeni xi tso texto jebi bʼéjngo tokoán nga tsjoakená Jeobá kʼoa koaan kʼoéyanajmílee josʼe tokoán. Kʼiatsa kʼoasʼiaan, kʼoati kuixoán jokitso je chjotale Cristo xi tsakatio nga siglo 1, nga i̱ kitso: “Ñá tsaʼyanía kʼoa koankjainná nga tjaokená Niná” (1 Juan 4:16).c

8. Jméni xi sʼiaan tsa tojo jao sʼe tokoán tsa tsjoakená Jeobá.

⁸ Jméni xi sʼiain tsa tojo jao sʼe tokuin tsa tsjoakeli Jeobá. Tikjaʼaitsjenjin ánni kʼoasʼeni tokuin kʼoa kuenta tʼiain jmeni xi jeʼyai xi tʼatsʼe. Kʼiatsa tojo tsín sʼejngo tokuin nga tsjoakeli Jeobá, alikuijin kuenta nʼiai je kjoafaʼaitsjenli nga̱ sakʼoa tobʼanachaná, tosa kui tikjaʼaitsjenjin nga kʼoatso je Biblia nga tsjoakená. Kʼiatsa to jao sʼe tokoán tsa tsjoakená Jeobá alikuijinni makjainná nga kʼoatso je Biblia nga kjoatjaocha je Niná (1 Juan 4:8).

SI̱KJAʼAITSJENJIAAN NGA TSJOAKENÁ JE JEOBÁ

9, 10. Jmé xi kinchja̱ni Jesús nga “tijeni Nʼainá tsjoakeno” kitso (Juan 16:​26, 27; kʼoati chótsenlai sén xi faʼaitʼa).

⁹ Je xi kʼoati koasenkaoná nga sʼe̱jngo tokoán kʼiaa nga si̱kjaʼaitsjenjiaan jmeni xi kitsole Jesús je chjotatjenngile, nga i̱ kitsole: “Tijeni Nʼainá tsjoakeno” (tʼexkiai Juan 16:​26, 27).d Kʼianga kʼoakitso je Jesús ali tsakuijin kinchja̱ni jotjío kon je chjotatjenngile, kui kinchja̱ni josʼin tjínnele kʼoetsʼoa.

¹⁰ Je Jesús kʼoakitsole chjotatjenngile nga kui jaʼaínle katasíchjén nga kʼoetsʼoa tonga tsín kʼoakitso tsa je sʼe̱tsʼoale (Juan 16:​23, 24). Nʼio tjínle kjoandosin nga koanjinle jebi je chjotatjenngile. Nga nʼio miyole koanni Jesús, tsakui nichxin kʼoasʼin kisikjaʼaitsjen nga jejaʼáyanile Jesús nga koa̱n je kʼoetsʼoale kʼoa nga je sikʼatole én je Nʼaile nga tsjoále jme xi machjénle je chjotatjenngile. Je Jesús kʼoakitso nga tsín tjínnele kʼoasʼin je chjotatjenngile, i kitsole: “Tijeni Nʼainá tsjoakeno”. Je Biblia kʼoatso nga nrʼoéná Niná kʼianga bʼetsʼoalee. Kʼianga chotʼayai je Biblia kʼoajinti tiʼyaxkuin je Jesús kʼoa tsjoachajin kjimai (Juan 14:21). Kʼoati tʼiain jokisʼin je chjotatjenngile Jesús xi tsakatio nga siglo 1. Je Jeobá tʼetsʼoalai nga̱ kjuinrʼoéli, kʼiatsa kʼoasʼiain, kʼoasʼin koakoni nga tsjoachai (1 Juan 5:14).

SI̱KJAʼAITSJENJIAAN ÁNNI NGA JAO SʼENI TOKOÁN

11. Ánni nga tsjoa manile Na̱i kʼiatsa jao kʼoé tokoán tsa tsjoakená Jeobá.

¹¹ Jé Na̱i xosʼín nga to jao sʼe tokoán tsa tsjoakená je Jeobá. Básjaile josʼín nga síkinroajen tokoán nga̱ kui xi mele nga kʼoasʼin si̱kjaʼaitsjeen nga tsín tsjoakená je Jeobá (1 Ped. 5:8). Kui xi mele nga kʼoasʼin si̱kjaʼaitsjeen nga tsín bakinná nga tsakʼéchjíntjainá Jeobá (Heb. 2:9). Tsjoa male nga nikʼajenlee tokoán kʼianga kjoa bitjatojiaan kʼoa nga to jao sʼená tsa tsjoake kjoaixiná Niná. Kui xi mele nga kʼoasʼin si̱kjaʼaitsjeen nga tsín tsjoakená Jeobá kʼoa nga tsín nda tiyoaa ngixko̱n, tonga jéni xi tsín nda tíjna ngixko̱n Niná kʼoa xi tsín tsjoacha (Efes. 6:11). Kʼianga ʼyaa jme che̱n xi batíobasenná je Na̱i alikui je bʼanachaná (Sant. 4:7).

12, 13. Ánni nga kui jée xi kichʼá xosíkaoniná nga jao satío tokoán tsa tsjoake kjoaixiná Jeobá.

¹² Ali tsa tojejin Na̱i xosíkaoná nga jao sʼeni tokoán tsa tsjoake kjoaixiná Jeobá, kʼoati kui jée xi kichʼá xosíkaoná (Sal. 51:5; Rom. 5:12). Nga chjotajée maa alikui kʼoasʼin tiyoaa josʼin mele Jeobá, tsʼantjaiyaa kjoafaʼaitsjenná, jotjín ni̱ma̱ná kao josʼin tjínnda yaoná.

¹³ Kui jée xosíkaoná nga tsín nda sʼe tokoán kʼoa nga kʼoasʼin nikjaʼaitsjeen nga tsín tsjoakená Jeobá, kʼoa yaa nroani nga jée fané yaoná, nga nʼio nikjáojiaan, nga jao sʼe tokoán kʼoa nga soa maná. Kʼoasʼe tokoán kʼianga bijnyijée kʼoa nga tokui nikjaʼaitsjen ʼndeʼndee nga chjotajée maa, kʼoa je Jeobá alikui kʼoasʼin kisindaná nga kʼoasa̱tío tokoán (Rom. 8:​20, 21). Yaa mangósoán joma jngo carro nga tsinnga llantale nga tsín tima fini, nga chjotajée maa kʼoati tsín nda bitjosonná jme xá kisindaniná Niná. Kʼianga kʼoasʼe tokoán kuenta sʼiaan nga tsjoake Jeobá kʼoa nga tsín tsjionkon je xi tsjoake kʼoa xi sítjoson kjoatéxomale (Neh. 1:5).

14. Jósʼin basenkaoná nga tsakʼéchjíntjainá Niná nga sʼejngo tokoán nga tsjoakená (Romanos 5:8; kʼoati chótsenlai je recuadro “Alikui kʼoaiʼndee nga kui jée katabʼanachaná”).

¹⁴ Tsakui nichxin kʼoasʼin nikjaʼaitsjeen nga tsín bakinná nga tsjoake koa̱nná Jeobá nga chjotajée maa. Je Jeobá tsjoakená nga̱ kisikasén ʼNdíle nga tsakʼéchjíntjainá nga jchatʼa jéená (1 Juan 4:10). Kʼoati si̱kjaʼaitsjenjiaan nga je xi chjotajée jaʼaikʼasjentjai je Jesús (tʼexkiai Romanos 5:8).e Kʼoa tsínkui koyale Jeobá nga kʼoakjoansʼin kuitjosonná josʼin mele nga̱ be nga tsín kʼoakoa̱nná. Kʼianga majinná nga kui jée xi kichʼá xosíkaoná nga to jao sʼeni tokoán alikui bʼaiʼndelee kjoafaʼaitsjenná nga kui bʼanachaná (Rom. 7:​24, 25).

KIXI KJUINTʼALEE JEOBÁ

15, 16. Jméni xi kʼoéjngoaa tokoán tsa kixi timangíntʼalee Jeobá (2 Samuel 22:26).

¹⁵ Kui xi mele Jeobá nga je si̱nʼiotʼaa kʼianga kjoa bitjatojiaan kʼoa nga kui kʼoasʼiaan xi ndatjín (Deut. 30:​19, 20). Kʼiatsa kixi kjuintʼalee tjínjngo tokoán nga koasenkaoná kʼoa tsínkʼia tsjiónkonná (tʼexkiai 2 Samuel 22:26).f

¹⁶ Kixi kjuintʼalee Jeobá kʼianga kjoa kuitjátojiaan, ñaki kʼoéjngoaa tokoán nga tsjoakená kʼoa nga mele koasenkaoná. Kʼiatsa sakʼoa to jao sʼená, alikui tokui kjuinñá josʼe tokoán, tosa kui kuenta sʼiaan nga tsjoakená Jeobá. Ñaki kʼoakʼoé tokoán nga tsín tsjiónkonná kʼoa nga tsjoake koa̱nná ngantsjai.