KJOAʼMIYA 38
Chjí jchatokoán je kjoabijnachon
Nkjín koya jmeni xi nʼia i̱ Sonʼnde kʼianga tiyochoán. Ningalani kjoa bitjatojiaan nkjín koya jmeni xi kʼoati tsjoa báya tokoán. Jósʼin koakonilee je Jeobá nga tsjoa tjínná nga tiyochoán. Kʼoa ánni nga nʼio chjínile nga kʼoasʼiaan.
1. Ánni machjénsíni nga chjí jchatokoán je kjoabijnachon
Tjínnele chjí jchatokoán je kjoabijnachon nga jngoo kjoatjao xi je Jeobá kitsjoaná, tʼatsʼe “tínroani je kjoabijnachon” nga̱ jé kisinda ngayeje xi tjíokon (Salmo 36:9). “Jé tsjoáná kjoabijnachonná, kʼoa nga chjenjta, kʼoa kao ngayije tsojmi” (Hechos 17:25, 28). Xi ijngosani, jé Jeobá tsjoáná ngayeje jmeni xi machjénná nga biyochoán kʼoa nga tsjoa katasʼe tokoán (tʼexkiai Hechos 14:17).
2. Jósʼin koakolee je Jeobá nga chjí ʼyaa je kjoabijnachon
Saʼnda nga tosʼa koanjcháyaa yatsʼoa̱ na̱ná, je Jeobá kuenta kisʼinná. Jngo choʼndale Jeobá xi tsakʼejna nichxin kjoatse xi David tsakʼin i kitso kʼianga tsakʼétsʼoa: “Tsaʼyanái saʼnda nga sʼa kjimajcháya yatsʼoa̱ na̱na” (Salmo 139:16). Je Jeobá nʼio chjí bekon kjoabijnachonná (tʼexkiai Mateo 10:29-31). Je Jeobá nʼio aon male kʼianga toxá sʼínni chjota nga xínkjín síkʼien kʼoa tsa tiñá si̱kʼienñá yaoná (Éxodo 20:13).a Kʼoati aon male kʼianga tsín nikuindaa yaoná kʼoa nga xkón nikatioá kjoabijnachonle xi ngikʼa. Tonga kʼianga nikuindaa yaoná kʼoa nikuindaa xi ngikʼa, bakoñá nga ʼyachjiá je kjoabijnachon.
KATAʼYASAI JME XI TÍNCHJA̱NI
Kataʼyala jósʼin koakoá nga chjí ʼyatokoán je kjoabijnachon.
3. Tikuindai yaoli
Ñá xi chjotale Cristo maa, nga kʼoatsakʼinlee je Jeobá nga kui kʼoasʼiaan josʼin mele, kʼoasʼin mangínkoaa yaoná josʼin sasénle. Kʼoasʼin tsakʼaitʼalee yaoná je Niná joni jngo kjoatjao xi tsje kʼoa kuinga machjénsíni nga si̱kuindaa. Tʼexkiao Romanos 12:1, 2 kʼoa cho̱bayaño jebi:
Ánni nga tjínnesínile si̱kuindai yaoli.
Jókoa̱n sʼiain nga si̱kuindai yaoli.
4. Tikuindai yaoli kʼoa tikuindai xi ngikʼa
Je Biblia kʼoatsoná nga tjínnele si̱kuindalee yaoná jmeni xi xkón sikatíoná. Chótsenlao VIDEO kʼoa kataʼyao josʼin si̱kuindao yaono nga tsín xkón kuiyo.
Tʼexkiao Proverbios 22:3 kʼoa cho̱bayaño jókoa̱n sʼiaan nga si̱kuindaa yaoná...
ya ndʼianá.
ya tʼaxáná.
nga niská.
tsa carro tinixákoaa kʼoa tsa carro tijnayaa.
5. Jchaxkuín je kjoabijnachonle ʼndílee xi kjesa tsinjin
Je David kʼoakitso jokji mandosinle kʼoa jokji chjí be Jeobá je kjoabijnachonle ʼndílee xi sʼa kjimajcháya yatsʼoa̱ na̱le. Tʼexkiao Salmo 139:13-17 kʼoa cho̱bayaño jebi:
Xi kao Jeobá kʼiáni fitsʼiani nga biyochoán, a kʼiaa nga jetsiaan axo kʼiaa nga tosʼa kjimajcháyaa yatsʼoa̱ na̱ná.
Je kjoatéxoma xi kitsjoale Jeobá je naxinandá Israel tsakinyakao je yánchjín xi ʼndíyʼa kʼoa kao je ʼndíleele. Tʼexkiao Éxodo 21:22, 23 kʼoa cho̱bayaño jebi:
Jósʼin tsabekon je Jeobá tsa ʼyani xi tokjoataon xi koanle nga jngo ʼndílee kisikʼien xi kje tsinjin.
Kʼoa jósʼe kon nga ʼya xi toxá sʼínni nga síkʼien je ʼndí xi kje tsinjin.b
Kʼoa ji, jósʼin nikjaʼaitsjain jmeni xi tso je Niná.
Ningalani chjí bekon jngo chjoón je kjoabijnachon tsakui nichxin kʼoasʼin sikjaʼaitsjen nga tjínnele sikʼatjenjen chjiʼndé je ʼndíleele. Tʼexkiao Isaías 41:10 kʼoa cho̱bayaño jebi:
Tsa ʼyani xi kjoanʼio kʼoenele jngo chjoón nga sikʼatjenjen chjiʼndé je ʼndíleele, ʼyáni xi tjínnele sijéle nganʼio. Ánni.
TJÍNKʼA XI I̱ TSO: “Jé chjoón xi kuitsoni tsa mele sikʼatjenjen chjiʼndé je ʼndíle, alikui koa̱n nga ʼya xi jokuitsole, nga̱ yaole xotísíkao”.
Ánni nga makjainnili nga tongóson kji chjí be Jeobá je kjoabijnachonle chjoón xi ʼndíyʼa kʼoa kao je ʼndí xi sʼa ya tjiá tsʼoa̱.
XI KACHOTʼAYÁ
Je kjoabijnachon jngoo kjoatjao xi je Jeobá kitsjoaná. Je Biblia bakóyaná jokoa̱n sʼiaan nga jchaxkoán, nga si̱kuindaa kʼoa nga tsjoacha koaan je kjoabijnachonná kʼoa kao tsʼe xi ngikʼa.
Jmé xi kamajinli
Jómani ʼyaa nga chjí be Jeobá je kjoabijnachonná.
Jósʼe kon je Jeobá kʼianga toxá sʼínni je chjota nga síkʼien yaole kʼoa tsa kjaʼaí xi sikʼien.
Jméni xi tsjoa bʼé tokuin nga tijnachuin.
XI KOASENKAOSALI
Jókoa̱n sʼiaan nga kʼoailee kjoanda je Jeobá nga tiyochoán.
A sichatʼale Niná je xi toxá kisikʼatjenjen chjiʼndéni je ʼndíleele ngasʼa.
“Jótso je Biblia tʼatsʼe xi bʼétsaojen chjiʼndé je ʼndíleele” (Yaa faʼaitʼa ya Internet ya jw.org)
Nga ʼyaa josʼin bekon Niná je kjoabijnachon, basenkaoná nga tsínkui bʼetsaojinkoaa je xi xkón síkatíoná.
“A koaan kui kʼoétsaojinkoaa je xi xkón sikatío kjoabijnachonná” (¡Despertad!, 8 de octubre de 2000)
Kataʼyai kjoafaʼaitsjen xi tsjoále Biblia je chjota xi kʼoasʼin síkjaʼaitsjen nga sikʼien yaole.
a Je Jeobá mandosinle tʼatsʼe chjota xi aon tjío je ni̱ma̱le (Salmo 34:18). Je Jeobá majinle josatío kon je chjota xi mele sikʼien yaole kʼoa mele koasenkao. Nʼio basenkaoná je kjoafaʼaitsjen xi tsjoá je artículo: “A koasenkaona je Biblia kʼiatsa tsín timenina koatejnakoan kʼoa tsakui tisikjaʼaitsjen nga sikʼien yaona”. Artículo jebi yaa faʼaitʼa kjoaʼmiya jebi jñani tso: “Xi koasenkaosali”.
b Tsa ʼyani xi tsakʼaonjen chjiʼndé ʼndíleele ngasʼa, alikui koa̱n nga tosi tonda jée koane yaole, je Jeobá tíjnandaa nga sichatʼale. Yaa koa̱nsjaitʼasali xi tʼatsʼe jebi ya artículo “Jótso je Biblia tʼatsʼe xi bʼétsaojen chjiʼndé je ʼndíleele” xi faʼaitʼa kjoaʼmiya jebi jñani tso: “Xi koasenkaosali”.