Je Jeobá “kao kjoatsjoa kisichatʼano”

“ʼYani xi tsín síchatʼale xi kjaʼaí, tijé síkixoyani xo̱ʼma̱ xi tije koa̱nchjénnile”. Je xi kʼoakitso én jebi jngo chjota xi Edward Herbert tsakʼin, xi ya Inglaterra tsʼe, xi jeño siento nó tjínle nga tsakʼejna. Kʼoa jebi kui bakóyaná anni nga machjénsíni nga si̱chatʼalee xíngiaa, nga̱ ñá kʼoati koa̱nchjénná nga ʼya xi sichatʼaná (Mateo 7:12). Tonga ijngosa koya tíjna xi ngisasa nʼio chjíle anni nga si̱chatʼasínilee xíngiaa. Je pastro Pablo i kitso: “Tosi tonda katakano xíngio kʼoa kao kjoatsjoa tichatʼalao xíngio kʼiatsa ʼya xi fajétʼale xínkjín. Jokisʼin Jeobá nga kao kjoatsjoa kisichatʼano, kʼoati tʼiaon tsanda jon” (Colosenses 3:13, TNM).

Kʼianga chjotajée maa ngatsʼiaa, sakʼoaa nijtilee xíngiaa (Romanos 3:23). Jméni xi sʼiaan kʼianga nyʼán kuiyoaa kao xi ngikʼa. Je Pablo jngo kjoafaʼaitsjen kitsjoa xi tʼatsʼe Niná tínroani nga katakaná kʼoa nga si̱chatʼalee xíngiaa. Ningalani jeme jao jmi nó tjínle nga kitsjoa kjoafaʼaitsjen jebi tojo nʼio machjénná ndʼaibi. Chótʼayajinla.

“Tosi tonda katakano xíngio.” Je én jebi, kʼianga én griego kui tsoyanile nga tsejta maa. Jngo libro kijna xi kui tsoya én xi faʼaitʼa Biblia kʼoa kʼoatso nga je chjotale Cristo xi tsejta “tjíondaní nga kale tsa jme xi síkao xi ngikʼa kʼoa tsakuije̱ nga tsín sasénle jokjoan”. Kʼoa kʼianga “katakano xíngio” tso, kui xi tsonile nga tsejta katamaa kao xíngiaa. Kʼiatsa machoyaná nga tsen tjínná nga jngó jngoá jmeni xi síjtile xi ngikʼa, kui xi koasenkaoná nga nyʼán kuiyokoaa xíngiaa ningalani nkjín koya xi tsín sasénná jokjoan. Kʼoa jósʼiaan tsa ʼyani xi sijtiná.

“Tosi tonda [...] kao kjoatsjoa tichatʼalao xíngio.” Jngo chjota xi kotʼayason je én xi faʼaitʼa je Biblia, kʼoatso nga je én griego xi “kao kjoatsjoa tichatʼalao xíngio” sʼin tífaʼatoya “ali tsakuijin je én xi machjénntsjai xi kjoanichatʼa tínchja̱ni”. Kʼoatso nga “ngisa tse xi tsoyanile én jebi, nga kui tínchja̱ni nga tiyondaa nga nichatʼaa”. Kʼoa jngo libro kijna xi kʼoatso nga je én jebi kʼoati kui tsoyanile “nga kui bʼé xi ndatjín, nga bakoá kjoamatokon kʼoa tsa jngo kjoanda”. Kʼianga tiyondaa nga nichatʼalee xíngiaa ninga jme xi kasíkaoná, kjoamatokon bakoá. Tonga ánni nga kʼoasʼiansíñá. Tsakui nichxin kʼoati skanni koa̱nchjénná tsanda ñá nga sa̱kóná kjoamatokon.

“Jokisʼin Jeobá nga kao kjoatsjoa kisichatʼano, kʼoati tʼiaon tsanda jon.” Kui jebi xi ngisasa chjíle anni nga kao kjoatsjoa si̱chatʼasínilee xíngiaa, nga̱ je Jeobá kao kjoatsjoa síchatʼaná ñá (Miqueas 7:18). Si̱kjaʼaitsjenla jokji kjoanda bakóná je Jeobá nga síchatʼaná kʼianga kʼoamaniná jéená. Je Jeobá alikui jée bajngi jonʼia tsa ñá. Kʼoa ningalani tsínkʼia koa̱nchjénle nga jme xi si̱chatʼalee, ñaki kao kjoatsjoa síchatʼaná ñá. Je Jeobá jngo choa̱ xi nʼio nda bʼéjnaná jokjoansʼin tíjna je xi kjoanichatʼa ʼmile.

Kʼianga bakóná kjoamatokon je Jeobá ngisa machriantʼalee kʼoa ñaki mamená nga chjenngilee (Efesios 4:32–5:1). Kuinga machjénsíni nga chjónangilee yaoná jebi: “Kʼianga kʼoasʼin bakóna kjoamatokon je Jeobá nga síchatʼana, ánni nga tsín sichatʼasínile jngo xi chjotajée joni tsa an kʼiatsa kʼoamanile jmeni xi kasíkaona” (Lucas 17:3, 4).